Our Coptic language > Old pronunciation vs new debate

إلى الأخت أوكين ⲧⲁⲁⲥ ⲛⲧⲥⲱⲛⲓ ⲉⲩⲭⲏⲛ

<< < (2/4) > >>

batroc:
شارا - سلام
متهيألى إنه الأصح هو تعلم اللغة قبل الدخول فى جدل عن طريقة النطق ، تقريباً 99ر99 % من اللغة عبارة عن نصوص مكتوبة ، والمسجل صوتياً قليل

فواجب إنك تعرفى تقرأى وتفهمى اللغة المكتوبة ، وتكتبى اللغة أولاً ، وبعدين ممكن تعملى جدل على طريقة النطق والقراءة

لكن عمل الجدل بدون معرفة اللغة المكتوبة تبقى عملية مشاغبة ومشاكسة فى موضوع معلق من 150 سنة ، الإنتاج العملى هو اللى هيبين الصح من الغلط لكن المناقشات والجدل النظرى مش هيجيب نتيجة ، ولو جاب نتيجة بدون دراسة اللغة .. فما الفائدة ؟

okeen888:
شيري  - سلام

مش عاجبي كلامك خالص يا استاذ بطرس --- تعليم اللغة كنصوص مكتوبة فقط امر لا يتحقق
انت عايز تتعلم لغة جميل --- ولكن هتنطق الحروف ازاي هل هتنطق اضام ولا ادام هل هتنطق بربارة ولا فرفارة ولا وراوراة
هي دي المشكلة انت بتطلب ان الناس تتعلماللغة وبعدين تدخل تتناقش في اهم شئ في اللغة نطق الحروف
طيب ازاي اصلا من الاول هيتعلموا اللغة و اي لفظ هما ممكن يتعلموا بيه 

الكلام الصحيح اللي يدخل العقل اننا لازم اولا نستقر و نحدد لفظ معين هو الاصلح لدراسة اللغة
وبعدين نبدأ نعلم الناس اللغة بكل اركانها
ولكن لو واحد اتعلم اللغة باللفظ الحديث وو حفظها علي كده هتيجي بعدين تقوله ان كل اللي اتعلمه فشنك
ولو واحد اتعلم القديم و حفظ بالطريقة دي هتيجي في الاخر يعرف ان اللفظ ده فشنك
كلام غير معقول ---- المعقول هو ضرورة ان نتحاور جديا في مشكلة اللفظ القديم حتي ننتهي من لفظ صحيح و موحد

batroc:
مشكلة القراءة بقالها مدة معلقة ، ومش معقول نوقف مجهودنا لغاية لما تتحل المشكلة ، لأن معنى كده العمر هيضيع هدر

أنــا بأقول اللى عاوز يمشى بالحديث يمشى ، واللى عاوز يمشى بالقديم يمشى ، وما هو متفــق عليــــه وهو الكتــــابة ( وهى ثابتة ) فإحنا نتعامل بالكتابة مع بعض ، والمسافة مازالت كبيرة لبدء المحادثة القبطية الجدية

من سينجح هو من سيجذب الناس ( فى النهاية ) لكن مناقشات نظرية بدون إنتاج فعلى فمالهاش قيمة ، لأن اللفظ الحديث له 150 سنة ولم ينتج

إعتراضاتك نظرية أكثر منها عملية لأن الأسماء معروفة

okeen888:

--- Quote from: batroc on 12 January , 2011, 12:13:33 AM ---مشكلة القراءة بقالها مدة معلقة ، ومش معقول نوقف مجهودنا لغاية لما تتحل المشكلة ، لأن معنى كده العمر هيضيع هدر

--- End quote ---

انا راضية ذمتك يا استاذ بطرس ازاي هتقدر تعلم الناس لغة من غير نطق ازاي هتحاول
تفهم الناس اللغة من غير نطق ، متبقاش لغة ابدا
اي وسيلة حاليا لتعليم اللغة لازم تكون صورة و شرح بالصوت

انا مقولتش نمشي مجهودنا ابدا الكنيسة عندنا بتعمل مجهود رائع في تعليم القبطي
بتعلمهم القبطي بالحديث رغم انهم عارفين عيوبه كويس
لكن هل معني كده اننا نوقف تعليم القبطي نوقف الالحان اللي بالقبطي انا مبقلش كده ابدا

ولكن الاصلح هو اننا ندرس كويس اللغة القبطية ونحل الجدل بتاع الالفاظ ده بسرعة جدا
وانا عارفة ان الكاتدرائية بتعمل شغل جامد في الموضوع ده مع الانبا روفائيل وديمتريوس

والاصح اننا نبدأ في تعليم الناس لفظ جديد المسمي باللفظ القديم رغم اننا عارفين انه في عيوب برضة
هتظهر مع الوقت زي اللفظ الحديث و نبتدي تاني نحاول نصلح في اللغة
مش هينفع لازم دلوقتي قبل ما كل واحد يمشي حسب دماغة اننا ندرس و نتناقش حول موضوع اللفظ

افترض معايا ان اللفظ القديم طلع غلط بعد ماتم تعليمة ونشره بين الناس وكتير من المواقع
و انتج فيه انتاج كثير و كتب كتير و شرايط وبعدها عرفنا ان في بعض العيوب فيه هنعمل ايه سعتها
زي بالضبط دلوقتي ببالضبط ....انت عارف ايه مشكلة اللفظ الحديث ان كل الناس اتعلمته وانتج انتاج غزير جدا
من خولاجيات وابصلموديات و تسابيح والحان وشرايط وكتب بالالاف
و لكن بعد كل ظهرت علي السطح عيوب اللفظ الحديث و تعارض بعض كلماته مع التاريخ
و عشان كده لازم نبقي خايفين علي اللغة القبطية في المجمل و نحاول ندرسها ونبحث فيها الان بكل جدية
مش كل واحد يمشي في سكة وملوش دعوة بالتاني هو ده اكبر غلط

batroc:
يظهر إننا بندور فى دايرة مفرغة

ذكرتى قبل كده إن الكنيسة لها إنتاج قبطى هائل ،  ورديت عليكى إن القبطى الموجود موجود من قرون وأن الكنيسة الحديثة جلبت قطع يونانية فى عصر البابا كيرلس الرابع ، ومؤخراً بعدما أصبحت الثقافة المدرسية العربية هى ثقافة المجتمع كله إتجهوا للتعريب ، بما يعنى أنهم لم ينتجوا قبطى لا كثير ولا قليل

عملية الإتفاق على شىء موحد بسرعة مش هتحصل نهائياً لأن هدف اللفظ الحديث هو إحتقار التراث القروى ، والتخلص من القبطى فى الكنيسة
وهدف أصحاب القديم هو إحياء اللغة ، وبالتالى الهدفين لن يلتقوا أبداً

حالياً ( وجهة نظرى ) إن كل واحد يمشى على كيفه ومن سينجح فى إحياء اللغة سيتبعه الناس كلهم ( بعد عقود من السنين ) ء

لو فرضنا وجود أخطاء فى اللفظ القديم فلن تكون أخطاء تعوق المسيرة .. زى واحد عنده رجل أطول من رجل 2 - 3 سنتيمتر .. فهيعرج لكن هيمشى بطريقة شبه عادية ، لكن اللفظ الحديث يشبه واحد مشلول غير قادر على المشى بالكلية

ماقلتش هنعلم بدون نطق .. قلت كل واحد ينطق كيفما يقتنع .. لأنه ليست لنا سيطرة على الناس .. والصح هينجح ، والغلط هيفشل

Navigation

[0] Message Index

[#] Next page

[*] Previous page

Reply