ϩⲁⲛⲥϧⲁⲓ ⲛⲣⲉⲙⲛⲭⲏⲙⲓ

[bashandy]

 
Ⲁⲃⲃⲁ ⲙⲱⲩⲥⲏⲥ ⲡⲓⲉⲡⲓⲥⲕⲟⲡⲟⲥ ⲛⲧⲉ ⲕⲉϥⲧ
   

ⲁ̅

Ϩⲁⲛⲕⲟⲩϫⲓ ⲉⲃⲟⲗϧⲉⲛ ⲛⲓⲉⲅⲕⲱⲙⲓⲟⲛ ⲉⲧⲁϥϫⲟⲧⲟⲩ ⲛ̀ϫⲉ ⲁⲃⲃⲁ Ⲙⲱⲩⲥⲏⲥ ⲡⲓⲉⲡⲓⲥⲕⲟⲡⲟⲥ ⲛ̀ⲧⲉ Ⲕⲉϥⲧ ⲉⲫⲏⲉ̅ⲑ̅ⲩ̅ ⲁⲃⲃⲁ Ⲡⲓⲥⲉⲛⲧⲓⲟⲥ ⲡⲓⲉⲡⲓⲥⲕⲟⲡⲟⲥ ⲛ̀ⲧⲉ ⲧⲁⲓⲡⲟⲗⲓⲥ ⲛ̀ⲟⲩⲱⲧ Ⲕⲉϥⲧ ϧⲉⲛ ⲡ̀ⲉϩⲟⲟⲩ ⲙ̀ⲡⲉϥⲉⲣⲫⲙⲉⲩⲓ ⲉⲧⲧⲁⲓⲏⲟⲩⲧ ⲉⲧⲉ ⲥⲟⲩⲓ̅ⲅ̅ ⲙ̀ⲡⲓⲁⲃⲟⲧ Ⲉⲡⲓⲡ ⲉϥⲉⲣⲉⲩⲛⲫⲱⲛⲓⲛ ⲛⲉⲙⲁϥ ⲛ̀ϫⲉ Ⲓⲱ̅ⲁ̅ ⲡⲉϥⲙⲁⲑⲏⲧⲏⲥ ⲉⲩⲱⲟⲩ ⲙ̀ⲡⲉⲛⲟ̅ⲥ̅ Ⲓⲏ̅ⲥ̅ Ⲡⲭ̅ⲥ̅.
Ⲧϩⲩⲡⲟⲑⲉⲥ ⲙ̀ⲡⲁⲓϣⲁⲓ ⲙ̀ⲫⲟⲟⲩ ϥⲙⲉϩ ⲛ̀ⲣⲁϣⲓ ⲛⲉⲙ ⲟⲩⲛⲟϥ ⲉⲧⲉ ⲡⲉϩⲟⲟⲩ ⲡⲉ ⲙ̀ⲡⲉⲛⲓⲱⲧ ⲉ̅ⲑ̅ⲩ̅ ⲉⲧⲉⲣⲫⲟⲣⲓⲛ ⲙ̀Ⲡⲭ̅ⲥ̅ ⲁⲃⲃⲁ Ⲡⲓⲥⲉⲛϯ ⲡⲓⲉⲡⲓⲥⲕⲟⲡⲟⲥ ⲉⲧⲉⲛϩⲟⲧ ϥⲙⲉϩ ⲛ̀ⲟⲩⲱⲓⲛⲓ ϧⲉⲛ ⲟⲩⲙⲉⲧϩⲟⲩⲟ ϧⲉⲛ ⲡⲥⲱϫⲡ ⲛ̀ⲛⲓⲉϩⲟⲟⲩ ⲛ̀ⲧⲉ ϯⲣⲟⲙⲡⲓ ⲧⲏⲣⲥ ⲕⲁⲧⲁ ⲫⲣⲏϯ ⲉⲧⲉ ⲡⲓⲥⲁϫⲓ ⲛⲁⲧⲁⲙⲟⲛ ⲉϣⲱⲡ ⲁⲛϣⲁⲛⲙⲟϣⲓ ⲉⲧϩⲏ ⲛ̀ⲟⲩⲕⲟⲩϫⲓ.
Ⲁⲩⲓⲥ ⲇⲉ ϯⲛⲟⲩ ⲛ̀ⲧⲉⲛϫⲱ ⲉⲣⲱⲧⲉⲛ ⲛ̀ⲛⲓϣⲫⲏⲣⲓ ⲉⲧⲁϥⲁⲓⲧⲟⲩ ⲛ̀ϫⲉ Ⲫϯ ⲉⲃⲟⲗϩⲓⲧⲟⲧϥ ⲙ̀ⲡⲉⲛⲓⲱⲧ ⲉ̅ⲑ̅ⲩ̅ ⲁⲃⲃⲁ Ⲡⲓⲥⲉⲛϯ ⲓⲥϫⲉⲛ ⲧⲉϥⲙⲉⲧⲕⲟⲩϫⲓ.
Ⲁⲩϫⲟⲥ ⲟⲩⲛ ⲉⲑⲃⲏⲧϥ ϫⲉ ⲉϥⲟⲓ ⲛ̀ⲕⲟⲩϫⲓ ⲛⲁϥⲁⲙⲟⲛⲓ ⲛ̀ⲛⲓⲉⲥⲱⲟⲩ ⲛ̀ⲧⲉ ⲡⲉϥⲓⲱⲧ ⲁⲪϯ ⲟⲩⲱⲛ ⲛ̀ⲛⲉϥⲃⲁⲗ ⲁϥⲛⲁⲩ ⲉⲟⲩⲥⲧⲩⲗⲟⲥ ⲛ̀ⲭⲣⲱⲙ ⲉϥⲥⲱⲕ ϩⲓⲧϩⲏ ⲙ̀ⲙⲟϥ ⲛⲁϥⲙⲟϣⲓ ⲟⲩⲛ ⲡⲉ ⲛⲉⲙ ⲕⲉⲁⲗⲟⲩ ⲙ̀ⲡⲉϥⲣⲏϯ. ⲡⲉϫⲉ ⲁⲃⲃⲁ Ⲡⲓⲥⲉⲛϯ ⲙ̀ⲡⲓⲁⲗⲟⲩ ⲉⲑⲙⲟϣⲓ ⲛⲉⲙⲁϥ ϫⲉ ⲁⲕⲛⲁⲩ ⲉⲡⲁⲓⲥⲧⲩⲗⲟⲥ ⲛ̀ⲭⲣⲱⲙ ⲉϥⲙⲟϣⲓ ϩⲓⲧϩⲏ ⲙ̀ⲙⲟⲛ ⲡⲉϫⲁϥ ϫⲉ ⲙ̀ⲫⲏ. ⲁϥⲱϣ ⲇⲉ ⲉⲡϣⲱⲓ ϩⲁ Ⲫϯ ⲛ̀ϫⲉ ⲁⲃⲃⲁ Ⲡⲓⲥⲉⲛϯ ⲉϥϫⲱ ⲙ̀ⲙⲟⲥ ϫⲉ Ⲫϯ ⲁⲟⲩⲱⲛ ⲛ̀ⲛⲓⲃⲁⲗ ⲛ̀ⲧⲉ ⲡⲁⲥⲟⲛ ϩⲱϥ ϩⲓⲛⲁ ⲡⲁⲓⲥⲧⲩⲗⲟⲥ ⲛ̀ⲭⲣⲱⲙ ⲙ̀ⲫⲣⲏϯ ⲉϯⲛⲁⲩ ⲉⲣⲟϥ ⲙⲁⲣⲉϥⲛⲁⲩ ⲉⲣⲟϥ ϩⲱϥ ⲛ̀ϫⲉ ⲡⲁϣⲫⲏⲣ ⲁϥⲥⲱⲧⲉⲙ ⲟⲩⲛ ⲛ̀ϫⲉ Ⲫϯ ⲉⲡⲉϥⲧⲱⲃϩ ⲁϥⲟⲩⲱⲛ ⲛ̀ⲛⲓⲃⲁⲗ ⲛ̀ⲧⲉ ⲡⲉϥϣ̀ⲫⲏⲣ ⲁϥⲛⲁⲩ ⲉⲣⲟϥ ⲟⲩⲟϩ ⲁϥⲉⲣϣⲫⲏⲣⲓ ⲉⲙⲁϣⲱ.
Ⲁⲩϫⲟⲥ ⲟⲛ ⲉⲑⲃⲏⲧϥ ϫⲉ ϧⲉⲛ ϯⲁⲣⲭⲏ ⲙⲉⲛ ⲉⲧⲁϥⲉⲣⲙⲟⲛⲁⲭⲟⲥ ϫⲉ ⲁⲥϣⲱⲡⲓ ⲉⲑⲣⲉϥϭⲓ ⲙ̀ⲡⲓⲑⲁⲗⲧⲏⲣⲓⲟⲛ ⲛ̀ⲁⲡⲟⲥⲑⲏⲧⲏⲥ. ⲛⲉ ϣⲁϥⲓ̀ ⲉⲃⲟⲗ ⲙ̀ⲫⲛⲁⲩ ⲙ̀ⲡⲓⲕⲁⲩⲙⲁ ⲙ̀ⲡⲕⲉⲣⲟⲥ ⲉⲣⲉ ⲡⲓⲙⲱⲟⲩ ⲛⲏⲟⲩ ⲉϩⲣⲏⲓ ⲛ̀ϧⲏⲧϥ ⲉⲣⲉ ⲛⲓⲧⲱⲟⲩ ⲣⲟⲕϩ ϩⲓⲧⲉⲛ ⲡⲓⲕⲁⲩⲙⲁ ϣⲁϥⲟϩⲓ ⲉⲣⲁⲧϥ ϧⲉⲛ ⲟⲩⲙⲁ ⲛ̀ⲥⲁϩⲣⲉ ⲉⲧⲉ ⲙ̀ⲙⲟⲛ ⲣⲱⲙⲓ ⲛⲁⲩ ⲉⲣⲟϥ ⲛ̀ϧⲏⲧϥ ⲛ̀ⲧⲉϥⲙⲟⲩⲣ ⲛ̀ⲟⲩⲛⲓϣϯ ⲛ̀ⲱⲛⲓ ⲉⲡⲉϥⲙⲟⲩⲧ ϣⲁⲧⲉϥⲧⲁⲟⲩⲟ ⲙ̀ⲡⲓⲯⲁⲗⲧⲏⲣⲓⲟⲛ ⲧⲏⲣϥ ⲛ̀ⲁⲡⲟⲥⲑⲏⲧⲏⲥ ⲙ̀ⲡⲁⲧⲉϥⲭⲁϥ ⲉⲡⲉⲥⲏⲧ ϩⲱⲥⲇⲉ ⲛ̀ⲧⲉ ⲣⲁⲧϥ ⲣⲱⲕϩ ϩⲓⲧⲉⲛ ⲡⲓⲣⲱⲕϩ ⲛ̀ⲧⲉ ⲡⲓⲧⲱⲟⲩ ⲛ̀ⲧⲉ ⲟⲩⲟⲛ ⲛⲓⲃⲉⲛ ϫⲟⲥ ϫⲉ ⲉⲧⲁϥϩⲱⲙⲓ ⲉϫⲉⲛ ϩⲁⲛϫⲉⲃⲥ ⲛ̀ⲭⲣⲱⲙ.
Ⲁⲙⲉⲗⲓ ⲟⲩⲛ ⲁⲟⲩⲥⲟⲛ ⲙ̀ⲙⲟⲛⲁⲭⲟⲥ ϩⲓⲕⲟⲧ ⲉⲣⲟϥ ⲛ̀ⲟⲩⲉϩⲟⲟⲩ ⲟⲩⲟϩ ⲁϥϣⲓⲛⲓ ⲛ̀ⲥⲱϥ ϧⲉⲛ ⲡⲉϥⲃⲏⲃ ⲙ̀ⲡⲉϥϫⲉⲙϥ ⲁϥⲙⲟϣⲓ ⲛ̀ⲥⲁ ⲧⲉⲉϥⲥⲧⲣⲁⲧⲁ ⲁϥⲛⲁⲩ ⲉⲣⲟϥ ⲉϥⲓⲣⲓ ⲙ̀ⲡⲁⲓⲣⲏϯ ϩⲱⲥⲇⲉ ϩⲓⲧⲉⲛ ⲡϩⲣⲟϣ ⲙ̀ⲡⲓⲱⲛⲓ ⲛ̀ⲧⲉ ⲛⲉϥⲃⲁⲗ ⲙⲟϩ ⲛ̀ⲥⲛⲟϥ ϩⲱⲥ ϫⲉ ⲉⲩⲛⲁⲫⲱⲣⲕ ⲛ̀ⲥⲉⲓ̀ ⲉⲃⲟⲗ.
Ⲉⲧⲁ ⲡⲓⲥⲟⲛ ⲇⲉ ϧⲱⲛⲧ ⲉϧⲟⲩⲛ ⲉⲣⲟϥ ϣⲁ ⲡϣⲁⲩ ⲛ̀ϩⲓⲟⲩⲓ ⲛ̀ⲟⲩⲥⲟⲑⲛⲉϥ ⲉⲃⲟⲗ ⲁϥⲥⲱⲧⲉⲙ ⲉⲣⲟϥ ⲉϥϫⲱ ⲙⲡⲁⲓⲯⲁⲗⲙⲟⲥ ϫⲉ ⲁⲓⲛⲁϩⲱⲥ ⲛⲁⲕ Ⲡⲟ̅ⲥ̅ ⲛ̀ⲟⲩⲛⲁⲓ ⲛⲉⲙ ⲟⲩϩⲁⲡ ϯⲛⲁⲉⲣⲯⲁⲗⲓⲛ ⲛ̀ⲧⲁⲕⲁϯ ϧⲉⲛ ⲟⲩⲙⲱⲓⲧ ⲛ̀ⲁⲧⲁϭⲛⲓ ϫⲉ ⲁⲕⲛⲁⲓ̀ ϣⲁⲣⲟⲓ ⲛ̀ⲑⲛⲁⲩ.
Ⲉⲧⲁϥϫⲟⲩϣⲧ ⲇⲉ ⲁϥⲛⲁⲩ ⲉⲡⲓⲥⲟⲛ ⲁϥⲭⲱⲗⲉⲙ ⲙ̀ⲙⲟϥ ⲁϥⲭⲱ ⲙ̀ⲡⲓⲱⲛⲓ ⲉⲡⲉⲥⲏⲧ ⲁϥϩⲉⲙⲥⲓ ϩⲓϫⲱϥ ⲡⲉϫⲉ ⲡⲓⲥⲟⲛ ⲛⲁϥ ϫⲉ ⲛⲁϩϯ ⲉⲣⲟⲓ ϫⲉ ⲁⲓⲉⲣϣⲫⲏⲣⲓ ⲛ̀ⲧⲁⲓϣϯ ⲛ̀ϫⲟⲙ ⲛⲉⲙ ⲧⲁⲓⲙⲉⲧϫⲱⲣⲓ ⲉⲧⲁⲕⲁⲓⲥ ϫⲉ ⲛ̀ⲁϣ ⲛ̀ⲣⲏϯ ⲁⲕⲉⲣϩⲑⲡⲟⲙⲉⲛⲓⲛ ⲁⲕⲧⲱⲟⲩⲛ ϧⲁ ⲡⲁⲓⲛⲓϣϯ ⲛ̀ⲕⲁⲩⲥⲱⲛ ⲛ̀ⲧⲁⲓⲙⲓⲏ ⲁⲛⲟⲕ ⲅⲁⲣ ⲓⲥ ⲡⲓⲑⲱⲟⲩⲓ ⲧⲟⲓ ⲉⲛⲁϭⲁⲗⲁⲩϫ ϩⲏⲡⲡⲉ ⲁⲩⲣⲱⲕϩ ⲙ̀ⲫⲣⲏϯ ϫⲉ ⲉⲓⲙⲟϣⲓ ⲉϫⲉⲛ ϩⲁⲛϫⲉⲃⲥ ⲛ̀ⲭⲣⲱⲙ ⲉⲩⲙⲟϩ ϩⲁⲣⲁ. ⲡⲁⲥⲟⲛ Ⲡⲓⲥⲉⲛϯ ⲉⲣⲉ ⲟⲩ ⲙ̀ⲙⲉⲩⲓ ϧⲉⲛ ⲡⲉⲕϩⲏⲧ ϣⲁⲧⲉⲕⲉⲣ ⲧⲁⲓⲛⲓϣϯ ⲙ̀ⲡⲟⲗⲏⲧⲓⲁ ⲑⲁⲓ ⲉⲧⲉ ⲙ̀ⲙⲟⲛ ⲣⲱⲙⲓ ⲛⲁϣⲁⲓⲥ ⲛ̀ⲧⲉϥⲟϩⲓ ⲉⲣⲁⲧϥ ϩⲓϫⲉⲛ ⲡⲁⲓϣⲱ ⲛ̀ⲧⲉϥⲉⲣϩⲩⲡⲟⲙⲉⲛⲓⲛ ⲙ̀ⲡⲁⲓⲛⲓϣϯ ⲛ̀ϭⲱⲗⲕ ⲉⲃⲟⲗ ⲛ̀ⲧⲉ ⲡⲁⲓⲕⲁⲩⲙⲁ ⲙ̀ⲡⲁⲓⲣⲏϯ.
Ⲁϥⲉⲣⲟⲩⲱ ⲛ̀ϫⲉ ⲁⲃⲃⲁ Ⲡⲓⲥⲉⲛϯ ⲡⲉϫⲁϥ ⲛⲁϥ ϫⲉ ⲁⲣⲉϣⲧⲉⲙ ⲡⲓⲣⲱⲙⲓ ⲉⲣϩⲱⲃ ϧⲉⲛ ⲧⲉϥⲙⲉⲧⲕⲟⲩϫⲓ ⲉϥⲛⲁϣⲉⲣϩⲱⲃ ⲑⲱⲛ ϧⲉⲛ ⲡⲥⲏⲟⲩ ⲛ̀ⲧⲉϥⲙⲉⲧϧⲉⲗⲗⲟ ⲙⲉⲛⲉⲛⲥⲁ ⲑⲣⲉ ⲛⲉⲛⲕⲁⲥ ⲙ̀ⲡⲉϥⲥⲱⲙⲁ ϧⲓϯ. ⲟⲩⲉⲃϣⲓ ⲅⲁⲣ ⲉⲧϩⲓϫⲉⲛ ⲡϩⲏⲧ ⲙ̀ⲡⲓⲣⲱⲙⲓ ⲛ̀ⲥⲭⲱ ⲙ̀ⲙⲟϥ ⲁⲛ ⲉⲉⲣⲫⲙⲉⲩⲓ ⲙ̀Ⲫϯ.

ⲃ̅

Ⲁϥϣⲱⲡⲓ ⲇⲉ ⲟⲛ ⲛ̀ⲟⲩⲥⲟⲡ ⲉⲡⲉϥⲥⲡⲏⲗⲏ ϧⲉⲛ ⲡⲓⲅ̅ ⲙ̀ⲡϣⲁⲓ ⲙ̀ⲡⲓⲃⲱⲗ ⲛ̀ⲧⲉ ⲡⲓⲡⲁⲥⲭⲁ ⲙ̀ⲡⲉϥⲧⲁⲙⲉ ϩⲗⲓ ⲛ̀ⲛⲓⲥⲛⲏⲟⲩ ϫⲉ ϥϣⲱⲛⲓ
Ⲁϥϫⲟⲥ ⲅⲁⲣ ⲛⲱⲟⲩ ϫⲉ ϣⲗⲏⲗ ⲉϫⲱⲓ ⲛ̀ⲧⲁϣⲉⲛⲏⲓ ϣⲁ ϯⲙⲟⲛⲏ ⲛ̀ⲧⲉ ⲁⲃⲃⲁ Ⲁⲃⲣⲁⲁⲙ ⲛ̀ⲧⲁϫⲉⲙⲡϣⲓⲛⲓ ⲛ̀ⲛⲓⲥⲛⲏⲟⲩ ⲛ̀ⲧⲉ ⲡⲓⲙⲁ ⲉⲧⲉⲙⲙⲁⲩ ⲁⲣⲉϣⲁⲛ Ⲫϯ ⲟⲩⲱϣ ϯⲛⲁⲓ̀ ϣⲁⲣⲱⲧⲉⲛ ⲛ̀ⲭⲱⲗⲉⲙ.
Ⲉⲧⲁϥϫⲉ ⲫⲁⲓ ⲇⲉ ϫⲉ ϩⲓⲛⲁ ⲛ̀ⲧⲟⲩϣⲧⲉⲙⲉⲙⲓ ⲉⲣⲟϥ ϫⲉ ϥϣⲱⲛⲓ. ⲁⲣⲉϣⲁⲛ ⲟⲩⲁⲓ ⲇⲉ ϧⲉⲛ ⲛⲓⲁⲕⲣⲟⲁⲧⲏⲥ ⲟⲩⲱϣ ⲉϧⲟⲧϧⲉⲧ ϫⲉ ⲡⲱⲥ ⲥⲉϣⲱⲛⲓ ⲛ̀ϫⲉ ⲛⲓⲉⲃⲓⲁⲓⲕ ⲛ̀ⲧⲉ Ⲡⲭ̅ⲥ̅ ⲙⲁⲣⲉ ⲫⲁⲓ ⲙ̀ⲡⲁⲓⲣⲏϯ ⲱϣ ϧⲉⲛ ⲡ̀ϫⲱⲙ ⲛ̀Ⲓⲱⲃ ⲡⲓⲇⲓⲕⲓⲉⲟⲥ ⲭⲛⲁϫⲓⲙⲓ ⲙ̀Ⲡⲟ̅ⲥ̅ ⲉϥϫⲱ ⲙ̀ⲙⲟⲥ ⲛⲁϥ ϫⲉ ⲉⲧⲁⲓⲓⲛⲓ ⲛ̀ⲛⲁⲓ ⲉϩⲣⲏⲓ ⲉϫⲱⲕ ⲁⲛ ⲛ̀ⲕⲉⲥⲙⲟⲧ ⲁⲗⲗⲁ ϫⲉ ϩⲓⲛⲁ ⲛ̀ⲧⲉⲕⲟⲩⲱⲛϩ ⲉⲃⲟⲗ ⲛ̀ⲇⲟⲕⲓⲙⲟⲥ. ⲡⲁⲗⲓⲛ ⲟⲛ ϥϫⲱ ⲙ̀ⲙⲟⲥ ⲛ̀ϫⲉ Ⲡⲁⲩⲗⲟⲥ ⲡⲓⲁⲡⲟⲥⲧⲟⲗⲟⲥ ϫⲉ ⲁⲓⲉⲣⲥⲙⲟⲧ ⲛⲓⲃⲉⲛ ⲛⲉⲙ ⲟⲩⲟⲛ ⲛⲓⲃⲉⲛ ϫⲉ ϩⲓⲛⲁ ⲛ̀ⲧⲁⲛⲟϩⲉⲙ ⲛ̀ϩⲁⲛⲟⲩⲟⲛ.
Ⲉⲧⲁ ⲫⲏⲉ̅ⲑ̅ⲩ̅ ⲇⲉ ⲉⲣⲟⲩⲉⲃⲇⲟⲙⲁⲥ ⲛ̀ⲉϩⲟⲟⲩ ⲉϥϣⲱⲛⲓ ⲛⲁϥϧⲟⲥⲓ ⲡⲉ ϧⲉⲛ ⲡⲓϣⲱⲛⲓ ⲛⲁⲣⲉ ⲛⲓⲥⲛⲏⲟⲩ ⲙⲉⲩⲓ ⲉⲣⲟϥ ϫⲉ ϥⲭⲏ ⲁⲛ ϧⲉⲛ ⲡⲓⲃⲏⲃ ⲁⲩⲥⲁϫⲓ ⲟⲩⲛ ⲛ̀ϫⲉ ⲛⲓⲥⲛⲏⲟⲩ ⲛⲉⲙ ⲛⲟⲩⲉⲣⲏⲟⲩ ⲉⲩϫⲱ ⲙ̀ⲙⲟⲥ ϫⲉ ⲁϥⲱⲥⲕ ⲛ̀ϫⲉ ⲁⲃⲃⲁ Ⲡⲓⲥⲉⲛϯ ⲙⲁⲣⲉⲛϣⲓⲛⲓ ⲛ̀ⲥⲱϥ ⲓⲉ ⲁⲣⲏⲟⲩ ⲡⲁⲛⲧⲱⲥ ⲉⲧⲁ ⲡⲓϧⲓⲥⲓ ϩⲣⲟϣ ⲉϩⲣⲏⲓ ⲉϫⲱϥ ⲙ̀ⲡⲉϥϣⲧⲱⲟⲩⲛ.
Ⲁⲩⲟⲩⲱⲣⲡ ⲇⲉ ⲛ̀ⲟⲩⲥⲟⲡ ⲉϣⲓⲛⲓ ⲛ̀ⲥⲱϥ. ⲙⲉⲛⲉⲛⲥⲁ ⲛⲁⲓ ⲓⲥϫⲉⲛ ⲉⲧⲁϥⲥⲉⲛ ⲛⲓⲥⲛⲏⲟⲩ ⲉⲃⲟⲗ ⲛⲁⲣⲉ Ⲡⲟ̅ⲥ̅ ⲟⲩⲱⲣⲡ ⲛ̀ⲛⲏⲉ̅ⲑ̅ⲩ̅ ⲉⲩϫⲓⲙⲓ ⲙ̀ⲡⲉϥϣⲓⲛⲓ ⲉⲩϯⲛⲟⲙϯ ⲛⲁϥ. ⲕⲁⲧⲁ ⲟⲩⲟⲓⲕⲟⲛⲟⲙⲓⲁ ⲇⲉ ⲛ̀ⲧⲉ Ⲫϯ ⲙ̀ⲡⲓⲛⲁⲩ ⲉⲧⲁ ⲡⲓⲥⲟⲛ ⲙ̀ⲙⲟⲛⲁⲭⲟⲥ ⲓ ϣⲁⲣⲟϥ ⲛⲁϥⲭⲏ ϧⲁⲧⲟⲧϥ ⲡⲉ ⲛ̀ϫⲉ Ⲏⲗⲓⲁⲥ ⲡⲓⲡⲣⲟⲫⲏⲧⲏⲥ.
Ⲉⲧⲁ ⲡⲓⲥⲟⲛ ⲇⲉ ⲙ̀ⲙⲟⲛⲁⲭⲟⲥ ⲟϩⲓ ⲉϥⲕⲱⲗϩ ⲉϧⲟⲩⲛ ⲟⲩⲟϩ ⲉϥⲙⲟⲩϯ ϩⲓⲧϩⲏ ⲙ̀ⲙⲟϥ ϫⲉ ⲥⲙⲟⲩ ⲉⲣⲟⲓ ⲉⲧⲁϥⲛⲁⲩ ⲇⲉ ⲛ̀ϫⲉ Ⲏⲗⲓⲁⲥ ⲡⲓⲑⲉⲥⲃⲏⲧⲏⲥ ϫⲉ ⲡⲓⲥⲟⲛ ⲕⲱⲗϩ ⲁϥⲟⲩⲱϣ ⲉⲉⲣⲁⲛⲁⲭⲱⲣⲓⲛ ⲛⲁϥ.
Ⲫⲏⲉ̅ⲑ̅ⲩ̅ ϫⲉ ⲁⲃⲃⲁ Ⲡⲓⲥⲉⲛϯ ⲁϥⲁⲙⲟⲛⲓ ⲙ̀ⲙⲟϥ ⲉϥϫⲱ ⲙ̀ⲙⲟⲥ ϫⲉ ϯϯϩⲟ ⲉⲣⲟⲕ ⲡⲁⲓⲱⲧ ⲙ̀ⲡⲉⲣϩⲱⲗ ⲛ̀ⲧⲉⲕⲭⲁⲧ ⲁⲗⲗⲁ ⲟϩⲓ ⲛⲉⲙⲏⲓ ⲛ̀ⲕⲉⲕⲟⲩϫⲓ ⲛ̀ⲧⲉⲕⲥⲉⲗⲥⲱⲗⲧ. ⲡⲓⲥⲟⲛ ⲇⲉ ⲙ̀ⲙⲟⲛⲁⲭⲟⲥ ⲉⲧⲁϥⲛⲁⲩ ϫⲉ ⲙ̀ⲡⲉϩⲗⲓ ⲉⲣⲟⲩⲱ ⲛⲁϥ ⲁϥϯ ⲙ̀ⲡⲉϥⲟⲩⲟⲓ ⲉϧⲟⲩⲛ ⲁϥϫⲓⲙⲓ ⲛ̀ⲛⲏⲉ̅ⲑ̅ⲩ̅ ⲡⲓⲙⲁⲕⲁⲣⲓⲟⲥ Ⲏⲗⲓⲁⲥ ⲡⲓⲑⲉⲃⲩⲧⲏⲥ ⲛⲉⲙ ⲡⲓⲙⲁⲕⲁⲣⲓⲟⲥ ⲁⲃⲃⲁ Ⲡⲓⲥⲉⲛϯ ⲉⲛⲁϥⲉⲛⲕⲟⲧ ⲡⲉ ⲉϥϣⲱⲛⲓ. ϧⲉⲛ ⲡϫⲓⲛⲑⲣ ⲡⲓⲥⲟⲛ ⲉⲧⲉⲙⲙⲁⲩ ϣⲁⲛⲁϥ ⲉϧⲟⲩⲛ ⲁϥϭⲓ ⲙ̀ⲡⲓⲥⲙⲟⲩ ⲙ̀ⲡⲓⲃ̅ ⲉⲧⲁϥⲟϩⲓ ⲉⲣⲁⲧϥ ⲇⲉ ⲉϥⲛⲁϣⲗⲏⲗ ⲙ̀ⲡⲉϥϫⲉⲙϫⲟⲙ ⲙ̀ϥⲁⲓ ⲛ̀ⲛⲉϥⲃⲁⲗ ⲉⲡϣⲱⲓ ⲉⲥⲟⲙⲥ ⲉⲡϩⲟ ⲙ̀ⲡⲓⲁⲅⲓⲟⲥ Ⲏⲗⲓⲁⲥ ⲉⲑⲃⲉ ⲡⲁϣⲁⲓ ⲛ̀ⲛⲓⲁⲕⲧⲏⲛ ⲛ̀ⲟⲩⲱⲓⲛⲓ ⲉϥⲛⲏⲟⲩ ⲉⲃⲟⲗϧⲉⲛ ⲡⲉϥϩⲟ ⲙ̀ⲫⲣⲏϯ ⲛ̀ⲟⲩⲥⲉⲧⲉⲃⲣⲏϫ.
Ⲫⲏⲉ̅ⲑ̅ⲩ̅ ⲇⲉ ⲁⲃⲃⲁ Ⲡⲓⲥⲉⲛϯ ⲡⲉϫⲁϥ ⲙ̀ⲡⲓⲥⲟⲛ ϧⲉⲛ ⲟⲩϩⲟ ⲉϥⲙⲉϩ ⲛ̀ⲣⲁϣⲓ ϫⲉ ⲡⲓⲥⲟⲛ ⲙⲏ ⲫⲁⲓ ⲡⲉ ⲡⲓⲕⲱⲧ ⲉⲧⲁⲕϯ ⲙ̀ⲡⲉⲟⲩⲟⲓ ⲉϧⲟⲩⲛ ⲁϭⲛⲉ ⲥⲟϭⲛⲓ. ⲉⲛⲉ ⲟⲩⲁⲣⲭⲱⲛ ⲛ̀ⲧⲉ ⲡⲁⲓⲕⲟⲥⲙⲟⲥ ⲡⲉⲙⲏ ⲭⲛⲁϣϣⲉ ⲉϧⲟⲩⲛ ⲁϭⲛⲉ ⲥⲟϭⲛⲓ ⲁϥⲉⲣⲟⲩⲱ ⲛ̀ϫⲉ ⲡⲓⲥⲟⲛ ⲙ̀ⲙⲟⲛⲁⲭⲟⲥ ϫⲉ ⲭⲱ ⲛⲏⲓ ⲉⲃⲟⲗ ⲁⲓⲉⲣⲛⲟⲃⲓ ⲉⲧⲁⲓⲱⲥⲕ ϩⲓⲧϩⲏ ⲙ̀ⲡⲓⲣⲟ ⲉⲓⲕⲱⲗϩ ⲛⲁⲓⲙⲉⲩⲓ ⲛⲏⲓ ⲡⲉ ϫⲉ ⲉⲕⲟⲓ ⲛ̀ⲁⲥⲑⲉⲛⲏⲥ ⲙ̀ⲡⲉⲕϣϫⲉⲙϫⲟⲙ ⲛ̀ⲧⲱⲟⲩⲛ ⲉⲉⲣⲟⲩⲱ ⲛⲏⲓ ⲉⲑⲃⲉ ⲫⲁⲓ ⲁⲓϯ ⲙ̀ⲡⲁⲟⲩⲟⲓ ⲉϧⲟⲩⲛ ⲛ̀ⲧⲁϫⲉⲙ ⲡⲉⲕϣⲓⲛⲓ.
Ϧⲉⲛ ⲡϫⲓⲛⲑⲣⲉ ⲡⲓⲥⲟⲛ ⲇⲉ ⲙ̀ⲙⲟⲛⲁⲭⲟⲥ ϫⲉ ⲛⲁⲓ ⲉϥϯ ⲙⲉⲧⲁⲛⲟⲓⲁ ⲡⲉϫⲉ Ⲏⲗⲓⲁⲥ ⲡⲓⲑⲉⲃⲏⲧⲏⲥ ⲛ̀ⲁⲡⲁ Ⲡⲓⲥⲉⲛϯ ϫⲉ ⲡⲑⲱϣ ⲙ̀Ⲫϯ ⲡⲉ ⲫⲁⲓ ϫⲉ ⲟⲩⲛⲓ ϥⲉⲙⲡϣⲁ ⲛ̀ϫⲉ ⲡⲁⲓⲥⲟⲛ ⲉⲑⲣⲉϥⲉⲣⲁⲥⲡⲁⲍⲉⲥⲑⲉ ⲙ̀ⲙⲟⲛ ⲟⲩⲟϩ ⲛ̀ⲧⲉϥϭⲓ ⲙ̀ⲡⲉⲛⲥⲙⲟⲩ ⲉⲩⲥⲟⲡ. ⲉⲧⲁϥϫⲉ ⲛⲁⲓ ⲇⲉ ⲛ̀ϫⲉ Ⲏⲗⲓⲁⲥ ⲡⲓⲡⲣⲟⲫⲏⲧⲏⲥ ⲁϥⲉⲣⲁⲛⲁⲣⲭⲱⲣⲓⲛ ⲉⲃⲟⲗϩⲁⲣⲱⲟⲩ.
Ⲡⲓⲥⲟⲛ ⲇⲉ ⲙ̀ⲙⲟⲛⲁⲭⲟⲥ ⲛⲁϥϣⲓⲛⲓ ⲙ̀ⲫⲏⲉ̅ⲑ̅ⲩ̅ ϫⲉ ⲟⲩ ⲉⲃⲟⲗⲑⲱⲛ ⲡⲉ ⲡⲁⲓⲣⲱⲙⲓ ⲉⲣⲉ ⲡⲉϥϥⲱⲓ ϣⲏⲟⲩ ⲟⲩⲟϩ ⲉⲣⲉ ⲡⲁⲓⲛⲓϣϯ ⲛ̀ⲱⲟⲩ ⲕⲱϯ ⲉⲣⲟϥ ϧⲉⲛ ⲟⲩⲙⲉⲑⲙⲏⲓ ⲙ̀ⲡⲓⲛⲁⲩ ⲉⲟⲩⲟⲛ ⲙ̀ⲡⲁⲓⲣⲏϯ ⲉⲛⲉϩ ⲉϥⲙⲉϩ ⲛ̀ⲱⲟⲩ ⲛⲉⲙ ⲟⲩⲙⲉⲧⲣⲉⲙⲣⲁⲩϣ ⲙ̀ⲫⲣⲏϯ ⲙ̀ⲫⲁⲓ ⲟⲩⲟϩ ϧⲉⲛ ϯⲟⲩⲛⲟⲩ ⲉⲧⲁⲓⲁⲙⲟⲛⲓ ⲛ̀ⲛⲉϥϫⲓϫ ⲁⲓⲟⲩⲱϣⲧ ⲙ̀ⲙⲱⲟⲩ ⲁⲟⲩⲛⲓϣϯ ⲛ̀ϫⲟⲙ ϣⲱⲡⲓ ϧⲉⲛ ⲡⲁⲥⲱⲙⲁ ⲁⲓⲕⲏⲛ ⲉⲓⲟⲓ ⲛ̀ⲁⲥⲑⲉⲛⲏⲥ ⲟⲩⲟϩ ⲁⲓⲟⲩⲛⲟϥ ⲙ̀ⲫⲣⲏϯ ⲛ̀ⲟⲩⲁⲓ ⲉⲧⲁϥⲧⲱⲛϥ ⲉⲃⲟⲗϧⲉⲛ ⲟⲩⲁⲣⲓⲥⲧⲟⲛ ⲁⲓϣⲁⲛϫⲟⲥ ⲟⲩⲛ ϫⲉ ⲫⲁ ⲡⲁⲓⲱⲟⲩ ⲡⲉ ⲡⲓⲁⲣⲱⲙⲓ ⲙ̀ⲡⲓⲛⲁⲩ ⲉⲣⲟϥ ⲛ̀ϧⲏⲧϥ ⲟⲩⲟϩ ⲙ̀ⲡⲓⲛⲁⲩ ⲉⲟⲩⲟⲛ ⲉⲛⲉϩ ⲉϥⲣⲏⲧ ⲙ̀ϥⲱⲓ ⲙ̀ⲫⲣⲏϯ ⲙ̀ⲫⲁⲓ ⲛⲉⲙ ⲡⲉϥⲥⲙⲟⲧ.
Ⲁϥⲉⲣⲟⲩⲱ ⲛ̀ϫⲉ ⲡⲓⲙⲁⲕⲁⲣⲓⲟⲥ ⲁⲃⲃⲁ Ⲡⲓⲥⲉⲛϯ ⲡⲉϫⲁϥ ⲙ̀ⲡⲓⲥⲟⲛ ϫⲉ ⲁⲣⲓⲟⲙⲟⲗⲟⲅⲓⲛ ϫⲉ ⲕⲛⲁⲁⲣⲉϩ ⲉⲡⲓⲙⲩⲥⲧⲏⲣⲓⲟⲛ ⲁⲛⲟⲕ ϯⲛⲁⲧⲁⲙⲟⲕ ⲁϥⲉⲣⲟⲩⲱ ⲛ̀ϫⲉ ⲡⲓⲥⲟⲛ ϫⲉ ⲓⲙⲏϯ ⲙⲉⲛⲉⲛⲥⲁ ⲟⲩⲥⲏⲟⲩ ⲛ̀ⲧⲉ ⲟⲩⲁⲛⲁⲅⲕⲏ ⲧⲁϩⲟⲓ ⲛ̀ⲧⲁⲟⲩⲟⲛϩϥ ⲉⲃⲟⲗ ⲛ̀ϯⲛⲁϫⲟϥ ⲁⲛ. ⲡⲁⲗⲓⲛ ⲟⲛ ⲡⲉϫⲉ ⲡⲓⲥⲟⲛ ⲛⲁϥ ϫⲉ ⲙ̀ⲡⲉⲕⲥⲱⲧⲉⲙ ⲉⲢⲁⲫⲁⲏⲗ ⲡⲓⲁⲣⲭⲏⲁⲅⲅⲉⲗⲟⲥ ⲉϥⲥⲁϫⲓ ⲫⲏⲉ̅ⲑ̅ⲩ̅ Ⲧⲱⲃⲓⲁⲥ ϫⲉ ⲡⲓⲙⲩⲥⲧⲏⲣⲓⲟⲛ ⲛ̀ⲧⲉ ⲡⲟⲩⲣⲟ ⲛⲁⲛⲉⲥ ϩⲟⲟⲡϥ ⲛⲓϩⲃⲏⲟⲩⲓ ⲛ̀ⲧⲉ Ⲫϯ ⲛ̀ⲑⲱⲟⲩ ⲛⲁⲛⲉⲥ ⲉⲟⲩⲟⲛϩⲟⲩ ⲉⲃⲟⲗ ⲁⲗⲗⲁ ϯⲥⲱⲟⲩⲛ ϫⲉ ⲕⲙⲟⲥϯ ⲙ̀ⲡⲓⲱⲟⲩ ⲉⲧϣⲟⲩⲓⲧ ⲛ̀ⲧⲉ ⲛⲓⲣⲱⲙⲓ ⲙⲁⲧⲁⲙⲟⲓ ⲉⲡⲓⲙⲩⲥⲏⲣⲓⲟⲛ ϯⲛⲁϯ ⲙ̀ⲕⲁϩ ⲛ̀ϩⲏⲧ ⲛⲁⲕ ⲁⲛ.
Ⲁϥⲉⲣⲟⲩⲱ ⲛ̀ϫⲉ ⲡⲓⲙⲁⲕⲁⲣⲓⲟⲥ ⲁⲃⲃⲁ Ⲡⲓⲥⲉⲛϯ ⲡⲉϫⲁϥ ⲙ̀ⲡⲓⲥⲟⲛ ϫⲉ ϧⲉⲛ ⲡϫⲓⲛⲑⲣⲓϣⲉⲛⲏⲓ ⲉⲃⲟⲗϩⲓⲧⲉⲛⲑⲏⲛⲟⲩ ⲉⲓⲟⲩⲱϣ ⲉϩⲱⲗ ⲉⲡⲓⲙⲟⲛⲁⲥⲧⲏⲣⲓⲟⲛ ⲛ̀ⲧⲉ ⲁⲃⲃⲁ Ⲁⲃⲣⲁⲁⲙ ⲛ̀ⲧⲉϫⲉⲙ ⲡⲉϥϣⲓⲛⲓ ⲁⲓⲛⲁⲩ ⲉⲡⲁⲥⲱⲙⲁ ⲉϥⲟⲓ ⲛ̀ⲁⲥⲑⲉⲛⲏⲥ ⲁⲓϫⲟⲥ ϫⲉ ⲙⲏⲡⲱⲥ ϯⲛⲁϣϣⲉ ⲉⲙⲁⲩ ⲁⲛ ⲛ̀ⲧⲁϣⲱⲡⲓ ⲉⲓⲣⲁϧⲧ ⲉϧⲣⲏⲓ ϩⲓ ⲡⲓⲙⲱⲓⲧ ⲉⲑⲃⲉ ⲧⲁⲙⲉⲧⲁⲧϫⲟⲙ ⲁⲓⲓ̀ ⲉⲡⲁⲓⲙⲁ ⲁⲓⲟⲣϥⲧ ⲉϧⲟⲩⲛ ⲉⲧⲁⲓⲕⲟⲩϫⲓ ⲛ̀ⲣⲓ. ⲓⲥϫⲉⲛ ⲡⲓⲉϩⲟⲟⲩ ⲉⲧⲁⲓⲓ̀ ⲉⲃⲟⲗ ϩⲓⲧⲉⲛ ⲑⲏⲛⲟⲩ ⲙ̀ⲡⲓⲛⲁⲩ ⲡϩⲟ ⲛ̀ⲟⲩⲣⲱⲙⲓ ⲉⲃⲏⲗ ⲉⲣⲟⲕ.
Ⲉⲧⲁ ⲡⲁⲡⲗⲏⲛ ϯⲙⲁⲕϩ ⲛⲏⲓ ⲉⲙⲁϣⲱ ⲁⲓϯϩⲟ ⲉⲡⲁⲟ̅ⲥ̅ Ⲓⲏ̅ⲥ̅ Ⲡⲭ̅ⲥ̅ ⲁϥⲉⲣϩⲙⲟⲧ ⲛⲏⲓ ⲙ̀ⲡⲓⲧⲁⲗϭⲟ ⲙ̀ⲡⲁⲥⲱⲙⲁ ⲟⲩⲟϩ ⲟⲛ ⲉⲑⲃⲉ ⲡⲁⲓⲣⲱⲙⲓ ⲉⲧⲁⲕⲛⲁⲩ ⲉⲣⲟϥ ⲫⲁⲓ ⲡⲉ Ⲏⲗⲓⲁⲥ ⲡⲓⲑⲉⲥⲃⲩⲧⲏⲥ ⲫⲏⲉⲧⲁⲩⲟⲗϥ ⲉⲧⲫⲉ ϧⲉⲛ ϩⲁⲛϩⲁⲣⲙⲁ ⲛ̀ⲭⲣⲱⲙ.
Ⲁⲗⲗⲁ ϯϯϩⲟ ⲉⲣⲟⲕ ⲡⲁⲥⲟⲛ ⲙ̀ⲙⲁⲓⲛⲟⲩϯ ⲛ̀ⲧⲉⲕϣⲧⲉⲙϫⲉ ⲡⲁⲓⲥⲁϫⲓ ⲛ̀ϩⲗⲓ ⲛ̀ⲣⲱⲙⲓ ϣⲁ ⲡⲉϩⲟⲟⲩ ⲙ̀ⲡⲁⲙⲟⲩ. ϧⲉⲛ ⲡϫⲓⲛⲑⲣⲉ ⲡⲓⲥⲟⲛ ⲇⲉ ⲥⲱⲧⲉⲙ ⲉⲛⲁⲓ ⲛ̀ⲧⲟⲧϥ ⲙ̀ⲡⲓϧⲉⲗⲗⲟ ⲁϥⲣⲁϣⲓ ⲉⲙⲁϣⲱ ⲟⲩⲟϩ ⲙ̀ⲡⲉϥⲟⲩⲉⲛϩ ⲡⲓⲥⲁϫⲓ ⲉⲃⲟⲗ ϣⲁ ⲡⲓⲉϩϩⲟⲩ ⲉⲧⲁ Ⲡⲟ̅ⲥ̅ ϫⲉⲙ ⲡⲉϥϣⲓⲛⲓ ⲛ̀ϧⲏⲧϥ.

ⲅ̅

Ⲁⲥϣⲱⲡⲓ ⲇⲉ ϧⲉⲛ ⲡϫⲓⲛⲑⲣⲉ Ⲫϯ ⲟⲩⲱϣ ⲉⲟⲩⲟⲑⲃⲉϥ ⲉⲃⲟⲗϧⲉⲛ ⲡⲓⲁⲙⲁⲛ̀ϫⲱⲓⲗⲓ ⲉⲟⲗϥ ⲉⲧⲭⲱⲣⲁ ⲛ̀ⲧⲉ ⲛⲏⲉⲧⲟⲛϧ ⲫⲙⲁⲛϣⲱⲡⲓ ⲛ̀ⲛⲓⲡⲁⲧⲣⲓⲁⲣⲭⲏⲥ ⲛⲉⲙ ⲛⲓⲡⲣⲟⲫⲏⲧⲏⲥ ⲛⲉⲙ ⲛⲓⲁⲡⲟⲥⲧⲟⲗⲟⲥ ⲉⲧⲁϥⲓ̀ ⲇⲉ ⲉⲥⲟⲩⲁⲓ ⲙ̀ⲡⲓⲁⲃⲟⲧ Ⲉⲡⲏⲡ ⲁϥⲛⲁⲩ ⲉⲟⲩϩⲁⲣⲙⲁ ⲟⲩⲟϩ ⲡⲉϫⲁϥ ⲛⲏⲓ ϫⲉ Ⲓⲱ̅ⲁ̅ ⲛⲓⲙ ⲡⲉ ⲉⲧⲭⲏ ϧⲉⲛ ⲡⲁⲓⲙⲁ. ⲡⲉϫⲏⲓ ⲛⲁϥ ϫⲉ ⲙ̀ⲙⲟⲛ ϩⲗⲓ ⲛ̀ⲣⲱⲙⲓ ⲭⲏ ⲙ̀ⲡⲁⲓⲙⲁ ⲉⲃⲏⲗ Ⲙⲱⲩⲥⲏⲥ ⲛⲉⲙ Ⲉⲗⲓⲥⲉⲟⲥ ⲉⲧⲁⲩⲓ̀ ⲉϫⲉⲙ ⲡⲉⲕϣⲓⲛⲓ.
Ⲁϥⲉⲣⲟⲩⲱ ⲛ̀ϫⲉ ⲡⲁⲓⲱⲧ ⲡⲉϫⲁϥ ⲛⲏⲓ ϫⲉ ϧⲁⲧϩⲏ ⲙ̀ⲡⲁϯⲥⲁϫⲓ ⲛⲉⲙⲁⲕ ⲁⲟⲩⲉⲕⲥⲧⲁⲥⲓⲥ ⲧⲁϩⲟⲓ ⲁⲓⲛⲁⲩ ⲉⲟⲩⲙⲏϣ ⲛ̀ⲉⲡⲓⲥⲕⲟⲡⲟⲥ ⲛ̀ⲟⲣⲑⲟⲇⲟⲝⲟⲥ ⲉⲩⲉⲣⲟⲩⲱⲓⲛⲓ ⲙ̀ⲫⲣⲏϯ ⲙ̀ⲫⲣⲏ ⲉⲣⲉ Ⲡⲉⲧⲣⲟⲥ ⲛⲉⲙ Ⲡⲁⲩⲗⲟⲥ ⲟϩⲓ ⲉⲣⲁⲧⲟⲩ ϧⲉⲛ ⲧⲟⲩⲙⲏϯ ⲁⲛⲟⲕ ⲇⲉ ⲁⲓϩⲓⲧ ⲉϫⲉⲛ ⲡⲁϩⲟ ⲁⲓⲟⲩⲱϣⲧ ⲙ̀ⲙⲱⲟⲩ Ⲡⲉⲧⲣⲟⲥ ⲇⲉ ⲁϥⲁⲙⲟⲛⲓ ⲛ̀ⲧⲁϫⲓϫ ⲁϥⲧⲁϩⲟⲓ ⲉⲣⲁⲧ ⲡⲉϫⲁϥ ⲛⲏⲓ ϫⲉ ⲙ̀ⲡⲉⲕⲥⲟⲩⲱⲛⲧ ⲁⲛⲟⲕ ⲛⲓⲙ.
Ⲡⲉϫⲏⲓ ⲛⲁϥ ϫⲉ ⲙ̀ⲫⲏ ⲡⲁⲟ̅ⲥ̅. ⲁϥⲉⲣⲟⲩⲱ ϫⲉ ⲁⲛⲟⲕ ⲡⲉ Ⲥⲓⲙⲱⲛ Ⲡⲉⲧⲣⲟⲥ ⲫⲃⲱⲕ ⲟⲩⲟϩ ⲡⲁⲡⲟⲥⲧⲟⲗⲟⲥ ⲛ̀ⲧⲉ Ⲓⲏ̅ⲥ̅ Ⲡⲭ̅ⲥ̅ ⲡⲁⲥⲟⲛ ⲉⲧⲉⲕⲛⲁⲩ ⲉⲣⲟϥⲡⲉ Ⲡⲁⲩⲗⲟⲥ ⲟⲩⲟϩ ⲛⲉⲕϣⲫⲏⲣ ⲛ̀ⲉⲡⲓⲥⲕⲟⲡⲟⲥ ⲛⲉ ⲛⲁⲓ ⲉⲧⲁⲩⲟⲩⲟⲣⲡⲧⲉⲛ ⲅⲁⲣ ϩⲁⲣⲟⲕ ϫⲉ ϩⲓⲛⲁ ⲉⲕⲉⲥⲉⲃⲧⲉ ⲛⲉⲕϩⲃⲏⲟⲩⲓ ⲉⲡⲉⲕⲙⲱⲓⲧ ⲛ̀ⲓ̀ ⲉⲃⲟⲗϧⲉⲛ ⲡⲁⲓⲃⲓⲟⲥ......
Ⲛⲁⲓ ⲇⲉ ⲉⲧⲁϥϫⲟⲧⲟⲩ ⲛⲁⲛ ⲁⲛϥⲁⲓ ⲛ̀ⲧⲉⲛⲥⲙⲏ ⲉⲡϣⲱⲓ ⲁⲛⲣⲓⲙⲓ ϧⲉⲛ ⲟⲩⲣⲓⲙⲓ ⲉϥⲉⲛϣⲁϣⲓ ⲉⲛⲉⲙⲓ ⲉⲫⲁⲓ ϫⲉ ⲉⲛⲛⲁⲉⲣϧⲁⲉ ⲛ̀ⲟⲩⲓⲱⲧ ⲛⲇⲓⲕⲉⲟⲥ ⲛ̀ⲧⲁⲓⲙⲁⲏ. ⲁϥⲉⲣⲟⲩⲱ ⲡⲉϫⲁϥ ⲛⲁⲛ ϫⲉ ⲉⲑⲃⲉ ⲟⲩ ⲧⲉⲧⲉⲛⲣⲓⲙⲓ ⲉⲣⲉⲧⲉⲛϯ ⲙ̀ⲕⲁϩ ⲛ̀ϩⲏⲧ ⲙ̀ⲡⲁⲡ̅ⲛ̅ⲁ̅ ⲁⲛⲟⲕ ⲅⲁⲣ ϯⲛⲁϩⲱⲗ ⲉⲣⲁⲧⲟⲩ ⲛ̀ⲛⲁⲓⲟϯ ⲉ̅ⲑ̅ⲩ̅ ⲉⲧⲁⲩϫⲱⲕ ⲉⲃⲟⲗ ϧⲁϫⲱⲓ. ⲛ̀ⲑⲟⲕ ⲇⲉ Ⲙⲱⲩⲥⲏⲥ ⲕⲥⲱⲟⲩⲛ ⲉⲧⲁⲓⲓⲛⲓ ⲙ̀ⲡⲉⲕⲃⲓⲟⲥ ⲉⲡϣⲱⲓ ϧⲁⲧⲟⲧ ⲛ̀ⲁϣ ⲛ̀ⲣⲏϯ ⲗⲟⲓⲡⲟⲛ ϥⲓⲫⲣⲱⲟⲩϣ ⲛ̀ⲛⲁϫⲱⲙ ϫⲉ ⲭⲛⲁⲉⲣⲭⲣⲓⲁ ⲙ̀ⲙⲱⲟⲩ ⲟⲩⲟϩ ⲭⲛⲁⲉⲣ ⲉⲃⲟⲗ ⲁⲛ ⲉϯⲉⲧⲫⲱ ⲉⲧϩⲟⲣϣ ⲉⲧⲉⲙⲙⲁⲩ.
Ⲡⲉϫⲁϥ ⲇⲉ ⲛ̀Ⲉⲗⲓⲥⲉⲟⲥ ⲡⲓⲡⲣⲉⲥⲃⲩⲧⲉⲣⲟⲥ ϫⲉ Ⲉⲗⲓⲥⲉⲟⲥ ⲟϩⲓ ⲉⲣⲁⲧⲕ ⲛ̀ⲕⲁⲗⲱⲥ ⲉϫⲉⲛ ⲛⲓⲥⲛⲏⲟⲩ ⲟⲩⲟϩ ⲁⲣⲉϩ ⲉⲛⲏⲏⲉⲧⲁⲓϩⲉⲛϩⲱⲛⲕ ⲉⲣⲱⲟⲩ ⲛ̀ⲧⲉⲕⲑⲱⲟⲩϯ ⲙ̀ⲡⲓϣⲉ ⲛ̀ⲑⲱⲟⲩϯ ⲕⲁⲧⲁ ⲟⲩⲛⲟⲩ ⲛ̀ⲥⲉϯ ϩⲏⲟⲩ ⲛ̀ⲛⲟⲩⲯⲩⲭⲏ ⲉⲃⲟⲗ ϩⲓⲧⲟⲧⲕ.
Ⲓⲧⲁ ⲡⲉϫⲁϥ ⲛⲏⲓ ϫⲉ Ⲓⲱ̅ⲁ̅ ⲡⲁϣⲏⲣⲓ ⲕⲥⲱⲟⲩⲛ ⲙ̀ⲡⲁⲃⲓⲟⲥ ⲧⲏⲣϥ ϫⲉ ⲙ̀ⲡⲓⲭⲁ ϩⲗⲓ ⲛ̀ⲓⲇⲟⲥ ⲛ̀ⲧⲉ ϯⲉⲕⲕⲗⲏⲥⲓⲁ ⲛ̀ⲧⲉ ϯⲡⲟⲗⲓⲥ Ⲕⲉϥⲧ ⲛ̀ⲧⲟⲧ ⲉⲛⲉϩ ⲟⲩⲗⲁⲩⲓ ⲛ̀ⲟⲗⲟⲕⲟϫⲓ ⲛ̀ⲟⲩⲱⲧ ⲉⲧⲭⲏ ⲛ̀ⲧⲟⲧ ⲓⲥϫⲉⲛ ⲡⲓⲥⲏⲟⲩ ⲉⲓϣⲟⲡ ϧⲉⲛ ⲧⲁⲣⲓ ⲉⲓⲟⲓ ⲙ̀ⲙⲟⲛⲁⲭⲟⲥ ⲉⲧⲁⲓϫⲫⲟⲥ ϧⲉⲛ ⲡⲁϩⲱⲃ ⲛ̀ϫⲓϫ ⲉⲓⲣⲱⲓⲥ ⲉⲣⲟⲥ ϣⲁ ⲫⲟⲟⲩ ⲉⲡϫⲓⲛϩⲟⲛⲥ ⲡⲁⲥⲱⲙⲁ ϫⲉ ⲟⲩⲏⲓ ⲁⲓⲁⲣⲉϩ ⲉⲣⲟⲓ ⲉϣⲧⲉⲙⲭⲁ ϩⲗⲓ ⲛ̀ϭⲣⲟⲡ ⲛ̀ⲛⲏⲉⲑⲛⲏⲟⲩ ⲙⲉⲛⲉⲛⲥⲱⲓ ⲛ̀ⲥⲉϫⲟⲥ ϫⲉ ⲁⲕⲉⲣ ⲥⲁⲃⲟⲗ ⲙ̀ⲡⲉⲧⲥϣⲉ.
Ⲁⲣⲓ ϯⲁⲅⲁⲡⲏ ⲛ̀ⲧⲉⲕϣⲟⲡⲥ ⲛ̀ⲕⲁⲓⲥⲓ ⲉⲡⲁⲥⲱⲙⲁ ⲟⲩⲟϩ ⲙ̀ⲡⲉⲣϯ ϩⲗⲓ ⲉⲣⲟϥ ⲉⲃⲏⲗ ⲉⲡⲓⲗⲉⲃⲓⲧⲟⲩ ⲉⲧⲁⲩϯ ⲉϫⲱⲓ ⲙ̀ⲡⲓⲥⲭⲏⲙⲁ ⲉ̅ⲑ̅ⲩ̅ ⲛ̀ϧⲏⲧϥ ⲛⲉⲙ ⲧⲁⲕⲟⲩⲗⲗⲁ ⲛⲉⲙ ⲡⲁⲙⲟϫϧ ⲛⲉⲙ ⲡⲁϫⲓⲛϫⲱⲗϩ ⲛ̀ⲧⲉ ⲡⲁϣⲉⲙϣⲓ. ⲛ̀ⲧⲉⲧⲉⲛⲕⲟⲥⲧ ⲛ̀ⲧⲉⲧⲉⲛⲑⲱⲙⲥ ⲙ̀ⲙⲟⲓ ϧⲉⲛ ⲡⲓⲙⲁ ⲉⲧⲁⲓⲧⲁⲙⲱⲧⲉⲛ ⲉⲣⲟϥ ⲟⲩⲟϩ ⲙ̀ⲡⲉⲣⲭⲁ ϩⲗⲓ ⲛ̀ⲣⲱⲙⲓ ⲉⲱⲗⲓ ⲙ̀ⲡⲁⲥⲱⲙⲁ ⲥⲁⲃⲟⲗ ⲙ̀ⲡⲁⲙⲁⲛϣⲱⲡⲓ ⲛ̀ⲥⲉϭⲓⲧϥ ⲉϯⲡⲟⲗⲓⲥ Ⲕⲉϥⲧ. ⲉⲧⲁϥϫⲉ ⲇⲉ ⲁϥⲭⲁⲣⲱϥ.
Ⲉⲡⲉϥⲣⲁⲥϯ ⲇⲉ ⲁϥⲉⲣϩⲏⲧⲥ ⲛ̀ϣⲱⲛⲓ ⲟⲩⲟϩ ⲉⲧⲁ ⲣⲟⲩϩⲓ ϣⲱⲡⲓ ⲛ̀ⲥⲟⲩⲏ̅ ⲙ̀ⲡⲡⲓⲁⲃⲟⲧ Ⲉⲡⲏⲡ ⲁϥϩⲱⲗⲉⲙ ⲙ̀ⲡⲉϥⲛⲟⲩⲥ ⲉⲡⲓϭⲓ ⲁϥⲉⲣⲅ̅ ⲛ̀ⲉϩⲟⲟⲩ ⲛⲉⲙ ⲅ̅ ⲛ̀ⲉϫⲱⲣϩ ⲙ̀ⲡⲉϥⲥⲁϫⲓ ϩⲗⲓ. ϧⲉⲛ ⲡⲓⲉϫⲱⲣϩ ⲇⲉ ⲥⲟⲩⲓ̅ⲃ̅ ⲙ̀ⲡⲓⲁⲃⲟⲧ Ⲉⲡⲏⲡ ⲁϥⲙⲟⲩϯ ϫⲉ Ⲓⲱ̅ⲁ̅ ⲡⲉϫⲏⲓ ⲛⲁϥ ϫⲉ ⲥⲙⲟⲩ ⲉⲣⲟⲓ ⲡⲁⲓⲱⲧ ⲉ̅ⲑ̅ⲩ̅.
Ⲡⲉϫⲁϥ ⲛⲏⲓ ϫⲉ ϯϣⲓⲛⲓ ⲉⲣⲟⲕ ϫⲉ ⲁϥϧⲱⲛⲧ ⲛ̀ϫⲉ ⲡⲁⲥⲏⲟⲩ ⲟⲩⲟϩ ϣⲁⲣⲉ Ⲫϯ ϣⲓⲛⲓ ⲛ̀ⲥⲱⲓ ⲙ̀ⲫⲛⲁⲩ ⲛ̀ⲣⲟⲩϩⲓ ⲛ̀ⲣⲁⲥϯ ⲛ̀ⲥⲟⲩⲓ̅ⲅ̅ ⲟⲩⲟϩ ⲡⲁⲓⲅ̅ ⲛ̀ⲉϩⲟⲟⲩ ⲉⲧⲁⲓⲁⲧⲟⲩ ⲙ̀ⲡⲓⲥⲁϫⲓ ⲛⲉⲙ ⲣⲱⲙⲓ ⲛⲁⲓⲟϩⲓ ⲉⲣⲁⲧ ⲙ̀ⲡⲉⲙⲑⲟ ⲉⲃⲟⲗ ⲙ̀Ⲡⲭ̅ⲥ̅ Ⲫϯ ⲟⲩⲟϩ ⲁϥⲓⲣⲓ ⲙ̀ⲡⲁⲗⲟⲅⲟⲥ ⲓⲥϫⲉⲛ ⲁϫⲡⲑ̅ ⲛ̀ⲥⲁϥ ⲟⲩⲟϩ ϯϫⲱ ⲙ̀ⲙⲟⲥ ϫⲉ ⲡⲉϥⲛⲁⲓ ⲛ̀ⲁⲧⲁϩⲟⲓ. ⲁⲛⲟⲕ ⲇⲉ ⲡⲉϫⲏⲓ ⲛⲁϥ ϫⲉ ⲁⲣⲓ ϯⲁⲅⲁⲡⲏ ⲙⲁⲧⲁϫⲣⲉ ⲡⲉⲕϩⲏⲧ ⲛ̀ⲟⲩⲕⲟⲩϫⲓ ⲛ̀ⲱⲓⲕ ⲛⲉⲙ ⲟⲩⲙⲱⲟⲩ ϫⲉ ⲓⲥ ⲅ̅ ⲛ̀ⲉϩϩⲟⲩ ⲙ̀ⲡⲉⲕϫⲉⲙϯⲡⲓ ⲛ̀ϩⲗⲓ.
Ⲁϥⲉⲣⲟⲩⲱ ϫⲉ ϯⲛⲁϫⲉⲙϯⲡⲓ ⲛ̀ϩⲗⲓ ⲛ̀ⲧⲣⲟⲫⲏ ⲁⲛ ϫⲉ ⲛ̀ⲧⲉ ⲡⲁⲓⲕⲟⲥⲙⲟⲥ ϣⲁⲧⲁⲃⲱⲗ ⲉⲃⲟⲗ ⲛ̀ⲧⲁⲛⲏⲥⲧⲓⲁ ϧⲁⲧⲉⲛ Ⲡⲟ̅ⲥ̅ Ⲓⲏ̅ⲥ̅ Ⲡⲭ̅ⲥ̅ ⲡⲁⲟⲩⲣⲟ. ⲙⲉⲛⲉⲛⲥⲁ ⲛⲁⲓ ⲇⲉ ⲡⲉϫⲁϥ ϫⲉ ⲡⲓ⳥ ⲉ̅ⲑ̅ⲩ̅ ⲛ̀ⲧⲉ Ⲡⲭ̅ⲥ̅ Ⲫϯ Ⲓⲅⲛⲁⲧⲓⲟⲥ ⲡⲓⲑⲉⲟⲫⲟⲣⲟⲥ ϣⲱⲡⲓ ⲛⲉⲙⲏⲓ ϣⲁϯⲥⲓⲛⲓ ⲙ̀ⲁⲡⲓⲓⲁⲣⲟ ⲛ̀ⲭⲣⲱⲙ ⲉⲧⲥⲱⲕ ϩⲓⲧϩⲏ ⲙ̀Ⲡⲭ̅ⲥ̅ ϫⲉ ⲟⲩⲛⲓϣϯ ⲧⲉ ϯϩⲟϯ ⲛ̀ⲧⲉ ⲡⲓⲙⲁ ⲉⲧⲉⲙⲙⲁⲩ. ⲡⲉϫⲏⲓ ⲇⲉ ⲛϥ ϫⲁ ⲡⲁⲟ̅ⲥ̅ ⲛ̀ⲓⲱⲧ ⲙⲉⲛⲉⲛⲥⲁ ⲛⲁⲓϧⲓⲥⲓ ⲧⲏⲣⲟⲩ ⲛⲁⲓⲛⲏⲥⲧⲓⲁ ⲛⲉⲙ ⲛⲁⲓϣⲗⲏⲗ ⲛⲉⲙ ⲉϫⲱⲣϩ ⲛ̀ϣⲣⲱⲓⲥ ⲉⲧⲁⲕⲉⲣϩⲩⲡⲟⲙⲉⲛⲓⲛ ⲉⲣⲱⲟⲩ ⲉⲑⲃⲉ Ⲫϯ ⲕⲉⲣϩⲟϯ ϩⲱⲕ ϧⲁⲧⲏϩ ⲙ̀ⲡⲓⲓⲁⲣⲟ ⲛ̀ⲭⲣⲱⲙ ⲉⲧⲉⲙⲙⲁⲩ.
Ⲡⲉϫⲁϥ ⲛⲏⲓ ϫⲉ ⲛⲓⲙ ⲡⲉ ⲡⲓⲣⲱⲙⲓ ⲉⲑⲛⲁⲉⲣ ⲉⲃⲟⲗ ⲉϣⲧⲉⲙϫⲉⲙϯⲡⲓ ⲙ̀ⲡⲓⲓⲁⲣⲟ ⲛ̀ⲭⲣⲱⲙ ⲉⲧⲉⲙⲙⲁⲩ. ⲟⲩⲟϩ ⲛⲁϥⲥⲁϫⲓ ⲁⲛ ϫⲉ ⲡⲉ ⲛⲉⲙ ϩⲗⲓ ⲛ̀ⲣⲱⲙⲓ.
Ⲉⲧⲁ ϣⲱⲣⲡ ⲇⲉ ϣⲱⲡⲓ ⲁⲡⲓⲙⲁ ⲧⲏⲣϥ ⲙⲟϩ ⲛ̀ⲣⲱⲙⲓ ⲥⲁϧⲟⲩⲛ ⲛⲉⲙ ⲥⲁⲃⲟⲗ ⲁϥⲉⲣ ⲡⲓⲉϩⲟⲟⲩ ⲧⲏⲣϥ ⲉⲧⲉⲙⲙⲁⲩ ⲙ̀ⲫⲣⲏϯ ⲛ̀ⲟⲩⲁⲓ ⲉⲩⲑⲱϩⲥ ⲙ̀ⲙⲟϥ ⲛ̀ⲛⲉϩ ⲉⲡϧⲁⲉ ⲇⲉ ⲁϥϫⲱ ⲙ̀ⲡⲁⲓⲥⲁϫⲓ ⲇⲉ ϩⲏⲡⲡⲉ ⲁⲓⲓⲣⲓ ⲙ̀ⲡⲟⲩⲁϩⲥⲁϩⲛⲓ ⲛ̀ⲧⲉ Ⲡⲟ̅ⲥ̅ ⲟⲩⲟϩ ⲁⲓⲓⲣⲓ ⲙ̀ⲡⲁⲥⲟⲃϯ ⲟⲩⲟϩ ⲡⲁⲓⲣⲏϯ ⲁϥⲟⲩⲱⲛ ⲛ̀ⲣⲱϥ ⲁϥϯ ⲙ̀ⲡⲓⲡ̅ⲛ̅ⲁ̅ ⲉⲛⲉⲛϫⲓϫ ⲙ̀Ⲫϯ ⲙ̀ⲡⲓⲛⲁⲩ ⲉⲣⲉ ⲫⲣⲏ ⲛⲁϩⲱⲧⲡ ⲛ̀ⲥⲟⲩⲓ̅ⲅ̅ ⲙ̀ⲡⲓⲁⲃⲟⲧ Ⲉⲡⲏⲡ.
   
 

[ophadece]

ⲡⲁⲥⲟⲛ Ⲡⲉϣⲉⲛϯ,
Ⲱ ⲃⲓⲁ ⲛⲉⲙ ⲡⲁⲓϩⲱⲡ ⲛ̀ⲛⲓϣϯ
Ⲟⲩϫⲁⲓ ϧⲉⲛ Ⲡϭⲥ

[bashandy]

ⲁⲩϫⲟⲥ ⲟⲛ ⲉⲑⲃⲏⲧϥ ϫⲉ ⲉϥϣⲗⲏⲗ ⲛⲟⲩⲥⲟⲡ ϧⲉⲛ ⲧⲉϥⲣⲓ ⲛϫⲉ ⲁⲃⲃⲁ ⲙⲁⲕⲁⲣⲓⲟⲥ ⲁⲟⲩⲥⲙⲏ ⲓ ⲛⲁϥ ⲉⲥϫⲱ ⲙⲙⲟⲥ ϫⲉ ⲙⲁⲕⲁⲣⲓⲟⲥ ⲙⲡⲁⲧⲉⲕⲫⲟϩ ⲉⲡϣⲓ ⲛⲥϩⲓⲙⲓ ⲥⲛⲟⲩϯ ⲉⲩϧⲉⲛ ⲡⲁⲫⲙⲁⲛ ⲛϯⲙⲓ. ⲉⲧⲁϥⲧⲱⲛϥ ⲇⲉ ⲛϣⲱⲣⲡ ⲛϫⲉ ⲡⲓϧⲉⲗⲗⲟ ⲁϥϣⲓ ⲙⲡⲉϥϣⲃⲱⲧ ⲙⲃⲁⲓ ⲁϥⲉⲣϩⲏⲧⲥ ⲉⲡⲓⲙⲱⲓⲧ ⲙⲙⲟϣⲓ. ⲉⲧⲁϥⲫⲟϩ ⲟⲩⲛ ⲉⲡⲓϯⲓⲙⲓ ⲁⲟⲩⲁⲅⲅⲉⲗⲟⲥ ⲙⲟϣⲓ ⲛⲉⲙⲁϥ ⲉϥϭⲓⲙⲱⲓⲧ ϧⲁϫⲱϥ ϣⲁ ⲡⲓⲏⲓ. ⲉⲧⲁϥⲕⲱⲗϩ ⲇⲉ ⲡⲓⲣⲟ ⲁⲩⲟⲩⲱⲛ ⲛⲁϥ. ⲉⲧⲁⲩⲉⲙⲓ ⲇⲉ ϫⲉ ⲁⲃⲃⲁ ⲙⲁⲕⲁⲣⲓⲟⲥ ⲡⲉ ⲁⲩⲟⲩⲱϣⲧ ⲛⲁϥ ϩⲓϫⲉⲛ ⲡⲓⲕⲁϩⲓ ⲁⲩϣⲟⲡϥ ⲉⲣⲱⲟⲩ ϧⲉⲛ ⲟⲩⲣⲁϣⲓ. ⲡⲉϫⲉ ⲡⲓϧⲉⲗⲗⲟ ⲛⲱⲟⲩ ϫⲉ ⲉⲑⲃⲉ ⲑⲏⲛⲟⲩ ⲁⲓⲉⲣϩⲩⲡⲟⲙⲉⲛⲉⲓⲛ ⲉⲡⲁⲓⲥⲕⲩⲗⲙⲟⲥ ⲛⲧⲉ ⲡⲁⲓⲙⲱⲧ ⲙⲙⲟⲱϣⲓ ⲉⲃⲟⲗϧⲉⲛ ⲡϣⲁϥⲉ ⲁⲛ ⲙⲛⲁⲓ ⲁϫⲟⲥ ⲟⲩⲛ ⲛⲏⲓ ϫⲉ ⲉⲧⲉⲧⲉⲛϫⲓⲛⲉⲣϩⲱⲃ ⲟⲩ ⲧⲉ. ⲛⲑⲱⲟⲩ ⲇⲉ ⲉⲩⲟⲩⲱϣ ⲉⲭⲱⲡ ⲡⲉϫⲱⲟⲩ ⲛⲁϥ ϫⲉ ⲉⲕϣⲓⲛⲓ ⲟⲩⲛϫⲓⲛⲉⲣϩⲱⲃ ⲛⲧⲟⲧⲟⲩ ⲛⲛⲁⲓ ⲟⲩⲟⲛ ⲉⲩϭⲁϧⲉⲙ. ⲉⲧⲁϥϯⲙⲉⲧⲁⲛⲟⲓⲁ ⲟⲩⲛ ⲛϫⲉ ⲡⲓϧⲉⲗⲗⲟ ⲡⲉϫⲁϥ ⲛⲱⲟⲩ ϫⲉ ⲙⲡⲉⲣⲭⲱⲡ ⲉⲣⲟⲓ ϫⲉ ⲫϯ ⲡⲉ ⲉⲧⲁϥⲧⲁⲟⲩⲟⲓ. ⲉⲧⲁⲩⲉⲣϩⲟϯ ⲇⲉ ⲁⲩⲟⲩⲱⲛϩ ⲉⲣⲟϥ ⲉⲩϫⲱ ⲙⲙⲟⲥ ϫⲉ ⲭⲱ ⲛⲁⲛ ⲉⲃⲟⲗ ⲡⲉⲛⲓⲱⲧ ⲁⲛⲟⲛ ϩⲁⲛϣⲉⲙⲙⲱⲟⲩ ⲉⲃⲟⲗϩⲁ ⲛⲉⲛⲉⲣⲏⲟⲩ ⲛϯⲃ̄ϯ ⲕⲁⲧⲁ ⲡⲓⲕⲟⲥⲙⲟⲥ ⲕⲁⲧⲁ ⲟⲩϯⲙⲁϯ ⲇⲉ ⲁⲩⲧⲏⲓⲧⲉⲛ ⲛⲥⲟⲛⲃ̄ ⲛⲥⲁⲣⲕⲓⲕⲟⲥ. ⲓⲥ ⲓ̄ⲉ̄ ⲛⲣⲟⲙⲡⲓ ⲙⲫⲟⲟⲩ ⲧⲉⲛϣⲟⲡ ϧⲉⲛ ⲡⲁⲓⲏⲓ ⲟⲩⲟϩ ⲧⲉⲛⲥⲱⲟⲩⲛ ⲙⲙⲟⲛ ⲁⲛ ⲉⲁⲛⲓⲣⲓ ⲛⲟⲩⲙⲗⲁϧ ⲟⲩⲃⲉ ⲛⲉⲛⲉⲣⲏⲟⲩ ⲓⲉ ⲁⲟⲩⲓ ϫⲉ ⲟⲩⲥⲁϫⲓ ⲛⲁⲣⲅⲟⲛ ⲛⲧⲉⲥϣⲫⲉⲣⲓ ⲁⲗⲗⲁ ⲛϣⲟⲡ ⲛⲥⲏⲟⲩ ⲛⲓⲃⲉⲛ ϧⲉⲛ ⲟⲩϩⲉⲓⲣⲏⲛⲏ ⲛⲉⲙ ⲟⲩⲙⲉⲩⲓ ⲛⲟⲩⲱⲧ. ⲁⲥϩⲓ ⲇⲉ ⲉⲛⲉⲛⲙⲉⲩⲓ ⲉⲑⲣⲉⲛⲭⲱ ⲛⲥⲱⲛ ⲛⲛⲉⲛϩⲁⲓ ⲟⲩⲟϩ ⲛⲧⲉⲛⲟⲩⲱⲧⲉⲃ ⲉϧⲟⲩⲛ ⲉⲫⲃⲓⲟⲥ ⲛⲧⲉ ϯⲙⲉⲧⲡⲁⲣⲑⲉⲛⲟⲥ. ⲟⲩⲟϩ ⲉⲧⲁⲛϯϩⲟ ⲉⲛⲉⲛϩⲁⲓ ⲛⲟⲩⲙⲏϣ ⲛⲥⲟⲡ ⲉⲑⲃⲉ ⲛⲁⲓϩⲱⲃ ⲙⲡⲟⲩⲑⲱⲧ ⲉⲭⲁⲛ ⲉⲃⲟⲗ. ⲉⲧⲉⲙⲡⲉ ⲡⲁⲓⲥⲕⲟⲡⲟⲥ ⲓ ⲇⲉ ⲛⲁⲛ ⲉⲃⲟⲗ ⲁⲛⲥⲉⲙⲛⲓ ⲟⲩⲧⲱⲛ ⲛⲉⲙ ⲫϯ ⲛⲟⲩⲇⲓⲁⲑⲏⲕⲏ ϩⲱⲥⲧⲉ ϣⲁ ⲉϧⲣⲏⲓ ⲉⲡⲉⲛⲙⲟⲩ ⲛⲧⲉⲛϣⲧⲉⲙϫⲉ ⲟⲩⲥⲁϫⲓ ⲛⲕⲟⲥⲙⲓⲕⲟⲥ ⲉⲃⲟⲗϧⲉⲛ ⲣⲱⲛ ⲁⲗⲗⲁ ⲛⲧⲉⲛⲉⲣⲫⲙⲉⲩⲓ ⲙⲫϯ ⲛⲉⲙ ⲛⲉϥⲁⲅⲓⲟⲥ ⲛⲥⲏⲟⲩ ⲛⲓⲃⲉⲛ ⲛϥⲓ ⲙⲫⲣⲱⲟⲩϣ ⲛⲛⲓⲉⲩⲭⲏ ⲛⲉⲙ ⲛⲓⲛⲏⲥⲉⲧⲓⲁ ϧⲉⲛ ⲟⲩⲙⲟⲩⲛ ⲉⲃⲟⲗ ⲛⲉⲙ ⲟⲩⲙⲉⲑⲛⲁⲏⲧ. ⲉⲧⲁϥⲥⲱⲧⲉⲙ ⲇⲉ ⲉⲛⲁⲓ ⲛϫⲉ ⲁⲃⲃⲁ ⲙⲁⲕⲁⲣⲓⲟⲥ ⲡⲉϫⲁϥ ϫⲉ ϧⲉⲛ ⲟⲩⲙⲉⲑⲙⲏⲓ ⲟⲩⲣⲁⲛ ⲙⲙⲟⲛⲁⲭⲟⲥ ⲁⲛ ⲡⲉ ⲓⲉ ⲛⲕⲟⲥⲙⲓⲕⲟⲥ ⲓⲉ ⲙⲡⲁⲣⲑⲉⲛⲟⲥ ⲓⲉ ⲛⲥϩⲙⲓ ϧⲁ ϩⲁⲓ ⲁⲗⲗⲁ ⲟⲩⲡⲣⲟϩⲁⲓⲣⲉⲥⲓⲥ ⲉⲥⲥⲟⲩⲧⲱⲛ ⲧⲏⲣⲟⲩ. ⲟⲩⲟϩ ⲉⲧⲁϥϫⲉⲙϩⲏⲟⲩ ⲛϫⲉ ⲡⲓϧⲉⲗⲗⲟ ⲁϥⲕⲟⲧϥ ⲉⲧⲉϥⲣⲓ ⲉϥⲕⲱⲗϩ ϧⲉⲛ ⲛⲉϥϫⲓϫ ⲉϥϫⲱ ⲙⲙⲟⲥ ϫⲉ ⲟⲩⲇⲉ ⲙⲫⲣⲏϯ ⲛⲛⲁⲓⲕⲟⲥⲙⲓⲕⲟⲥ ⲙⲡⲓⲉⲣϩⲉⲓⲣⲏⲛⲏ ⲛⲉⲙ ⲡⲁⲥⲟⲛ. 

[bashandy]

ⲁⲃⲃⲁ ⲙⲁⲕⲁⲣⲓⲟⲥ ⲡⲓⲛⲓϣϯ ⲁϥⲭⲁ ϯⲉⲕⲕⲗⲏⲥⲓⲁ ⲉⲃⲟⲗϧⲉⲛ ϣⲓⲏⲧ ⲛⲁϥϫⲱ ⲙⲙⲟⲥ ⲡⲉ ⲛⲛⲓⲥⲛⲏⲟⲩ ϫⲉ ⲫⲱⲧ ⲛⲓⲥⲏⲛⲟⲩ. ⲡⲉϫⲉ ⲟⲩϧⲉⲗⲗⲟ ⲛⲁϥ ϫⲉ ⲁⲛⲛⲁⲫⲱⲧ ⲉⲑⲱⲛ ⲛϩⲟⲩⲟ ⲉⲡⲁⲓϣⲁϥⲉ . ⲟⲩⲟϩ ⲉⲧⲁϥⲭⲁ ⲡⲉϥⲧⲏⲃ ϩⲓⲣⲉⲛ ⲣⲱϥ ⲁϥϫⲱ ⲙⲙⲟⲥ ϫⲉ ⲫⲁⲓ ⲡⲉ ⲡⲓⲫⲱⲧ ⲉⲧⲉ ⲡⲓⲭⲁⲣⲱϥ ⲡⲉ

[bashandy]

ⲡⲉϫⲉ ⲁⲃⲃⲁ ⲙⲁⲕⲁⲣⲓⲟⲥ ϫⲉ ⲡⲓⲥⲁϫⲓ ⲉⲧϩⲱⲟⲩ ⲛⲓⲕⲉⲭⲱⲟⲩⲛⲓ ⲉⲑⲛⲁⲛⲉⲩ ϣⲁϥⲑⲣⲟⲩⲧϩⲟ ⲡⲁⲓⲣⲏϯⲟⲛ ⲡⲓⲥⲁϫⲓ ⲉⲑⲛⲁⲛⲉϥ ⲛⲓⲕⲉⲭⲱⲟⲩⲛⲓ ⲉⲑϩⲱⲟⲩ ϣⲁϥⲑⲣⲟⲩⲁⲛⲁⲓ

[bashandy]

ⲁⲩϭⲱⲣⲡ ⲉⲃⲟⲗ ⲛⲁⲃⲃⲁ ⲁⲛⲧⲱⲛⲓⲟⲥ ϩⲓ ⲡϣⲁϥⲉ ϫⲉ ⲟⲩⲟⲛ ⲟⲩⲁⲓ ϧⲉⲛ ⲟⲩⲃⲁⲕⲓ ⲉⲟⲩⲥⲏⲓⲛⲓ ⲡⲉ ϧⲉⲛ ϯⲉⲡⲓⲥⲧⲓⲙⲏ ⲉϥⲟⲛⲓ ⲙⲙⲟⲕ ⲟⲩⲟϩ ⲫⲏⲉⲧⲟⲓ ⲛϩⲟⲩⲟ ⲉⲣⲟϥ ⲉϥϯ ⲙⲙⲟϥ ⲛⲛⲏⲉⲧⲉⲣⲭⲣⲉⲓⲁ

[bashandy]

ⲁⲙⲟⲩ ϣⲁⲣⲟⲛ ⲱ ⲡⲓϩⲓⲥⲧⲟⲣⲓⲟⲅⲣⲁⲫⲟⲥ ⲛ̀ⲧⲉⲕⲉⲣⲓⲥⲧⲟⲣⲓⲛ ⲛⲁⲛ ⲙⲫⲃⲓⲟⲥ ⲉⲧⲧⲁⲓⲏⲟⲩⲧ ⲛⲧⲉ ⲡⲉⲧϫⲏⲕ ⲉⲃⲟⲗϧⲉⲛ ⲁⲣⲉⲧⲏ ⲛⲓⲃⲉⲛ ⲛⲁⲃⲓⲗ ⲙⲓⲭⲁⲏⲗ ⲙⲁⲣⲕⲟⲥ ⲡⲓⲣⲉϥϯⲥⲃⲱ ⲛⲧⲉ ϯⲁⲥⲡⲓ ⲛ̀ⲣⲉⲙⲛ̀ⲭⲏⲙⲓ ϧⲉⲛ ⲛⲓⲕⲉⲗⲗⲉⲅⲓⲟ ⲛⲕⲗⲏⲣⲓⲕⲟⲥ ⲛ̀ⲑⲉⲟⲗⲟⲩⲅⲓⲕⲟⲥ ⲛ̀ⲣⲉⲙⲛ̀ⲭⲏⲙⲓ ⲛ̀ⲟⲑⲣⲟⲇⲟⲝⲟⲥ ⲛⲉⲙ ⲛⲓⲙⲁⲛϯⲥⲃⲱ ⲛ̀ⲑⲉⲟⲗⲟⲅⲓⲕⲟⲛ ⲉⲧⲁϥⲙⲁϯ ⲉϯⲙⲉⲑⲛⲏⲃ ⲛⲉⲙ ϯⲇⲓⲡⲗⲱⲙⲁ ϧⲉⲛ ϯⲁⲥⲡⲓ ⲛ̀ⲣⲉⲙⲛ̀ⲭⲏⲙⲓ ⲁϥⲧⲁⲓϥ ⲛ̀ϫⲉ ⲡⲓⲙⲁⲛⲥⲱⲟⲩϩ ⲉⲧϭⲟⲥⲓ ⲛ̀ⲧⲉ ⲛⲓⲥⲃⲱⲟⲩⲓ ⲛ̀ⲣⲉⲙⲛ̀ⲭⲏⲙⲓ

ⲓⲥ ⲟⲩⲙⲏϣ ⲅⲁⲣ ⲛⲉϩⲟⲟⲩ ϯϧⲟⲥⲓ ⲟⲩⲟϩ ϯϣⲑⲉⲣⲧⲱⲣ ⲉⲓⲉⲣϩⲟϯ ⲉϯⲙⲡⲁⲟⲩⲟⲓ ⲉϧⲟⲩⲛ ⲉⲛⲓϩⲃⲏⲟⲩⲓ ⲛⲧⲉ ⲡⲁⲥⲁϧ ⲛⲁⲃⲓⲗ ⲙⲏⲭⲁⲏⲗ ⲙⲁⲣⲕⲟⲥ ⲁⲗⲗⲁ ϯϯϩⲟ ⲉⲣⲱⲧⲉⲛ ⲛⲁⲙⲉⲛⲣⲁϯ ⲛⲉⲙ ⲛⲁⲥⲛⲏⲟⲩ ⲛ̀ⲧⲉ ⲡⲓⲥⲁϫⲓ ϩⲓⲛⲁ ⲉⲑⲣⲉⲧⲉⲛϯⲧⲟⲧⲉⲛ ⲛⲉⲙⲏⲓ ϧⲁⲓ ⲧⲁⲓⲛⲓϣϯ ⲛⲁⲣⲭⲏ ⲙⲏⲡⲟⲧⲉ ⲛⲧⲁϩⲓⲧⲟⲧ ⲉⲡⲁⲓⲛⲓϣϯ ⲙⲡⲉⲗⲁⲅⲟⲥ ⲫⲏⲉⲧⲉ ⲙⲙⲟⲛ ⲁⲩⲣⲏϫϥ ⲛⲧⲁϥ ⲟⲩⲟϩ ⲙⲙⲟⲛ ϣϫⲟⲙ ⲙⲙⲟⲓ ⲉⲥⲱⲕ ⲛⲧⲁⲕⲟⲩϫⲓ ⲛⲕⲩⲃⲱⲧⲟⲥ ⲉⲡⲓⲭⲣⲟ ϫⲉ ⲟⲩⲏⲓ ⲧⲉⲧⲉⲛⲥⲱⲟⲩⲛ ⲛⲧⲁⲙⲉⲧϩⲏⲕⲓ ⲧⲏⲣⲟⲩ ⲟⲩⲟϩ ϫⲉ ⲙⲙⲟⲛⲧⲏⲓ ⲛϩⲗⲓ ϧⲉⲛ ⲧⲁⲙⲉⲧⲓⲉⲃϣⲱⲧ ϩⲓⲛⲁ ⲛⲧⲁⲱⲃⲧ ⲛⲟⲩⲛⲓϣϯ ⲛⲕⲩⲃⲱⲧⲟⲥ ⲉⲟⲩⲟⲛ ϣϫⲟⲙ ⲙⲙⲟ ⲉⲉⲣϫⲓⲛⲓⲟⲣ ϧⲉⲛ ⲫⲓⲟⲙ ⲉⲙⲁϣⲱ ⲟⲩⲟϩ ⲛⲧⲉⲥϥⲁⲓ ϧⲁ ⲧϧⲣⲉϣⲓ ⲛⲛⲓⲑⲏⲟⲩ ⲁⲗⲗⲁ ⲟⲩⲕⲟⲩϫⲓ ⲡⲣ ⲡⲓⲁⲃⲓⲛ ⲟⲩⲟϩ ⲟⲩⲕⲟⲩϫⲓ ⲡⲉ ϯⲕⲩⲃⲱⲧⲟⲥ ⲟⲩⲟⲛ ⲉⲧⲉ ⲛⲧⲏⲓ ϯⲉⲣϩⲟϯ ⲙⲏⲡⲟⲧⲉ ⲛⲧⲁⲓ ⲉⲃⲟⲗϧⲉⲛ ⲧⲁⲓⲗⲩⲙⲏⲛ ⲉⲧⲉ ⲙⲙⲟⲛ ⲗⲩⲙⲏⲛ ⲛⲧⲁⲥ ϣⲁ ⲕⲉⲗⲩⲙⲏⲛ ⲉⲥϣⲑⲟⲣⲧⲉⲣ ⲛⲧⲉ ⲛⲓⲑⲏⲟⲩ ⲧⲱⲟⲩⲛ ⲉϫⲱⲓ ⲟⲩⲟϩ ⲛⲧⲉ ⲛⲓϩⲱⲓⲙⲓ ⲛⲉⲙ ⲛⲓϫⲟⲗ ϩⲓ ⲧⲉⲑⲁⲗⲁⲥⲥⲁ ⲛϯⲥⲟⲩⲛ ⲛⲛⲏⲃⲓ ⲁⲛ ϫⲉ ϩⲓⲛ ⲛⲧⲁⲛⲟϩⲉⲙ ⲛⲧⲁⲯⲩⲭⲏ ⲙⲙⲁⲩⲁⲧⲥ ⲉⲡⲓⲭⲣⲟ ⲉⲑⲃⲉ ⲫⲁⲓ ϯⲉⲣϩⲟϯ ⲙⲏⲡⲱⲥ ⲛⲧⲁϩⲓⲟⲩⲓ ⲛⲧⲁⲯⲩⲭⲏ ⲟⲩⲟϩ ϯⲉⲙⲓ ϫⲉ ⲧⲁⲕⲩⲃⲱⲧⲟⲥ ϫⲱϫⲉⲃ ⲟⲩⲟϩ ⲧⲁⲓⲉⲃϣⲱⲧ ⲟⲩⲕⲟⲩϫⲓ ⲡⲉ ⲟⲩⲟϩ ϯⲉⲙⲓ ⲁⲛⲟⲕ ⲛⲛⲏⲃⲓ ⲁⲛ ⲙⲏⲡⲟⲧⲉ ⲛⲧⲁϩⲓⲧⲟⲧ ⲉⲑⲁⲗⲁⲥⲥⲁ ⲛⲧⲁϣⲧⲉⲙⲧⲁⲥⲑⲟⲓ ϧⲉⲛ ⲟⲩϩⲓⲣⲏⲛⲏ

ⲟⲩⲟϩ ⲁⲛⲟⲕ ⲁⲓϣⲁⲛϥⲁⲓ ϧⲁ ⲛⲓϧⲓⲥⲓ ⲛⲧⲉ ⲫⲓⲟⲙ ⲛⲉⲙ ⲛⲓϩⲱⲓⲙⲓ  ⲛϯⲛⲁϣϥⲁⲓ ⲁⲛ ϧⲁ ⲟⲩϣⲫⲓⲧ ⲛⲧⲉ ⲫⲏⲉⲑⲛⲁϯϣⲱϣ ⲛⲏⲟ ⲛⲥⲉϫⲟⲥ ϫⲉ ⲱ ⲡⲓⲁⲧⲉⲙⲓ ⲛⲣⲱⲙⲓ ⲛⲓⲙ ⲡⲉ ⲫⲏⲉⲧⲁⲫⲉⲣⲁⲛⲁⲅⲕⲁⲍⲓⲛ ⲙⲙⲟⲕ ⲉⲑⲣⲉⲕⲓⲣⲓ ⲥⲁⲡϣⲱⲓ ⲛⲧⲉⲕϫⲟⲙ ⲓⲥϫⲉ ⲕⲉⲙⲓ ϫⲉ ⲕⲟⲓ ⲛϩⲏⲕⲓ ⲟⲩⲟϩ ⲙⲙⲟⲛ ϩⲗⲓ ⲛⲧⲟⲧⲕ ⲙⲡⲉⲣⲓⲣⲓ ⲥⲁⲡϣⲱⲓ ⲛⲧⲉⲕϫⲟⲙ ⲁⲗⲗⲁ ϩⲁⲛⲙⲏ ⲛⲉ ⲛⲓϣⲱⲧ ⲡⲱⲥ ⲙⲡⲉⲕϯⲛⲱⲟⲩ ⲛⲧⲉⲕⲕⲟⲩϫⲓ ⲙⲡⲉⲕⲓⲉⲃϣⲱⲧ ⲉⲑⲣⲟⲩⲉⲣϣⲱⲧ ⲛϧⲏⲧⲥ ϩⲓⲛⲁ ⲛⲧⲉⲕϭⲓ ⲙⲡⲓϫⲫⲟ ⲛⲉⲙ ϯⲙⲉⲧⲓⲉⲃϣⲱⲧ ⲛⲉⲙ ϯⲕⲩⲃⲱⲧⲟⲥ ⲛⲉⲙ ⲡⲉⲧⲉⲛⲧⲁⲕ ⲟⲩⲛ ϧⲉⲛ ⲟⲩϩⲓⲣⲏⲛⲏ ⲉϣⲱⲡ ⲕⲉⲙⲓ ⲛⲛⲏⲃⲓ ⲁⲛ

ⲁⲛⲟⲕ ⲇⲉ ϯⲛⲁⲧⲁⲙⲱⲧⲉⲛ ⲱ ⲛⲁⲥⲛⲏⲟⲩ ϫⲉ ⲁϣ ⲧⲉ ϯⲕⲩⲃⲱⲧⲟⲥ ⲓⲉ ⲟⲩ ⲡⲉ ⲡⲓⲁⲃⲓⲛ ϯⲕⲩⲃⲱⲧⲟⲥ ⲓⲉ ⲟⲩ ⲡⲉ ⲡⲓⲁⲃⲓⲛ ϯⲕⲓⲃⲱⲧⲟⲥ ⲇⲉ ⲧⲁⲥⲁⲣⲝ ⲡⲓⲁⲃⲓⲛ ⲇⲉ ⲡⲉ ⲡⲁϩⲏⲧ ⲫⲁⲓ ⲉⲧⲉ ⲙⲙⲟⲛ ⲉⲙⲓ ⲛϧⲏⲧϥ ⲟⲩⲇⲉ ⲛⲏⲃⲓ ⲉⲡϣⲱⲓ ⲟⲩⲟϩ ⲡⲓⲛⲏⲃⲓ ⲉϯⲥⲱⲟⲩⲛ ⲙⲙⲟϥ ⲁⲛ ⲛⲁⲓ ⲛⲉ ⲛⲓⲅⲣⲁⲫⲏ ⲉⲧⲉ ⲙⲡⲓⲥⲟⲩⲟⲛⲟⲩ ⲉⲑⲃⲉ ⲫⲁⲓ ⲛⲑⲱⲧⲉⲛ ⲧⲉⲧⲉⲛⲥⲁϫⲓ ⲛⲉⲙⲏⲓ ⲙⲫⲟⲟⲩ ϩⲓⲛⲁ ⲉⲑⲣⲓⲉⲣⲥⲁⲡϣⲱⲓ  ⲛⲧⲁϫⲟⲙ ⲉⲡⲉϥⲧⲁⲓⲟ

ⲁⲥϣⲱⲡⲓ ⲇⲉ ϧⲉⲛ ⲑⲙⲉⲧⲉⲝⲟⲩⲥⲓⲁ ⲛⲧⲉ ⲙⲟⲩⲃⲁⲣⲁⲕ ⲛⲉⲙ ϧⲉⲛ ϯⲙⲉⲧⲟⲩⲏⲃ ⲛⲧⲉ ⲡⲁⲡⲁ ⲁⲃⲃⲁ ϣⲉⲛⲟⲩⲧⲉ ⲡⲓⲙⲁϩϣⲟⲙⲧ ⲁϥⲉⲣϩⲧⲥ ⲛⲧⲉϥϯⲥⲃⲱ ⲉϯⲙⲉⲧⲣⲉⲙⲛⲭⲏⲙⲓ ⲛϫⲉ ⲡⲉⲛⲥⲁϧ ϧⲉⲛ ⲡⲥⲱⲟⲩϩ ⲉⲧϭⲟⲥⲓ ⲛⲧⲉ ⲛⲓⲥⲃⲱⲟⲩⲓ ⲛⲣⲉⲙⲛⲭⲏⲙⲓ ⲕⲉ ⲡⲁⲗⲓⲛ ⲟⲛ ⲁϥϯⲥⲃⲱ ϧⲉⲛ ϩⲁⲛⲙⲏϣ ⲛⲉⲕⲕⲗⲏⲥⲓⲁ ⲁⲡⲉϥⲣⲁⲛ ⲉⲣⲭⲱⲓⲧ ϧⲉⲛ ⲧⲭⲱⲣⲁ ⲛⲭⲏⲙⲓ ⲟⲩⲟϩ ⲁⲛⲓⲙⲟⲛⲁⲭⲟⲥ ⲛⲧⲉ ⲡϣⲁϥⲉ ⲛϣⲓϩⲏⲧ ⲧⲱⲃϩ ⲛⲧⲉϥⲃⲟⲏⲑⲓⲁ ϫⲉ ϩⲓⲛⲁ ⲛⲧⲉϥⲱϣ ⲟⲩⲟϩ ⲥⲱⲟⲩⲧⲉⲛ ⲛⲛⲓⲯⲁⲗⲓ ⲛⲉⲙ ⲛⲓⲇⲟⲝⲟⲗⲟⲅⲓⲁ ⲙⲃⲉⲣⲓ ⲉⲧⲁⲩⲥϧⲏⲧⲟⲩ

ⲁⲙⲱⲓⲛⲓ ϣⲁⲣⲟⲓ ϫⲉ ϩⲓⲛⲁ ⲛⲧⲁϫⲟⲥ ⲛⲱⲧⲉⲛ ⲡⲱⲥ ⲁϥϯⲥⲃⲱ ⲉⲧⲉⲛⲁⲥⲡⲓ ⲉⲧⲁϥϣⲉ ⲉϧⲟⲩⲛ ⲛϫⲉ ⲡⲓⲥⲏⲓⲛⲓ ⲛ̀ⲛⲓⲧⲉⲃⲛⲱⲟⲩⲓ ⲛⲁⲃⲓⲗ ⲙⲓⲭⲁⲏⲗ ⲙⲁⲣⲕⲟⲥ ⲉⲡⲓⲧⲱⲧⲉⲣ ϧⲉⲛ ⲡⲥⲱⲟⲩϩ ⲉⲧϭⲟⲥⲓ ⲛⲧⲉ ⲛⲓⲥⲃⲱⲟⲩⲓ ⲇⲉ ⲁⲟⲩϫⲟⲩϣⲧ ⲉⲃⲟⲗ ϧⲁⲣⲟϥ ⲁϥⲥⲁϫⲓ ϧⲉⲛ ⲟⲩⲙⲟⲑⲛⲉⲥ ⲛ̀ϯⲁⲥⲡⲓ ⲛ̀ⲣⲉⲙⲛ̀ⲭⲏⲙⲓ ⲁϥⲥⲁϫⲓ ϧⲉⲛ ⲟⲩⲥⲱⲟⲩⲧⲉⲛ ⲁϥⲥⲁϫⲓ ϧⲉⲛ ⲟⲩϫⲟⲙ ⲟⲩⲟϩ ⲁϥⲑⲣⲉ ⲙⲁⲑⲏⲧⲏⲥ ⲛⲓⲃⲉⲛ ϭⲱⲛⲧ ⲉⲥⲁϫⲓ ⲙⲉⲛⲉⲛⲥⲁ ⲡⲓⲱϣ ⲁϥⲓ ϩⲁⲣⲟϥ ⲛ̀ϫⲉ ⲟⲩⲙⲁⲑⲏⲧⲏⲥ ⲁϥϯⲛⲁϥ ⲛⲟⲩⲯⲁⲗⲓ ⲙ̀ⲃⲉⲣⲓ ⲙⲁⲣⲕⲟⲥ ⲇⲉ ⲁϥⲟϣⲥ ⲟⲩⲟϩ ⲁϥⲥⲉⲙⲛⲓ ⲛⲛⲓϣⲱϥⲧ ⲛⲉⲙ ⲛⲓϣⲱϥⲧ ⲛ̀ⲧⲉ ϯⲉⲣⲙⲏⲛⲓⲁ. ⲁϥⲧⲱⲃϩ ⲛϫⲉ ⲡⲓⲙⲑⲏⲧⲏⲥ ⲛ̀ⲧⲉϥϭⲓⲥⲃⲱ ⲉⲥⲁϫⲓ ϧⲉⲛ ⲟⲩⲙⲟⲑⲛⲉⲥ ⲟⲩⲟϩ ⲁϥϯⲙⲁϯ ⲅⲁⲣ ⲛϫⲉ ⲙⲁⲣⲕⲟⲥ ϫⲉ ϩⲓⲛⲁ ⲛⲧⲉ ⲡⲓⲙⲁⲑⲏⲧⲏⲥ ⲙⲟⲩϯ ⲉⲣⲟϥ ⲛ̀ⲉϫⲱⲣϩ ⲛⲓⲃⲉⲛ ϧⲁⲧⲉⲛ ⲧⲫⲁϣⲓ ⲙⲡⲓⲉϫⲱⲣϩ ϩⲓⲧⲉⲛ ⲡⲓⲧⲏⲗⲉⲫⲱⲛⲟⲥ. ⲕⲁⲧⲁ ⲕⲟⲩϫⲓ ⲕⲟⲩϫⲓ ⲡⲓⲙⲁⲑⲏⲧⲏⲥ ⲉⲧⲉ ⲙ̀ⲡⲉϥϣⲥⲁϫⲓ ⲛ̀ⲟⲩⲗⲉⲝⲓⲥ ⲁϥϭⲓⲥⲃⲱ ⲉⲥⲁϫⲓ ϧⲉⲛ ⲟⲩⲙⲟⲑⲛⲉⲥ.

ⲛⲉ ⲟⲩⲟⲛ ⲟⲩⲁⲟⲩⲏⲧ ⲉⲧⲟⲩⲙⲟⲩϯ ⲉⲣⲟϥ ϫⲉ ⲡⲓⲁⲟⲩⲏⲧ ⲛⲧⲉ ⲛⲏⲉⲧⲥⲁϫⲓ ⲛϯⲙⲉⲧⲣⲉⲙⲛⲭⲏⲙⲓ ⲛⲁⲩⲑⲱⲟⲩϯ ⲛⲁⲃⲟⲧ ⲛⲓⲃⲉⲛ ϧⲉⲛ ϯⲉⲕⲕⲗⲏⲥⲓⲁ ⲛⲧⲉ ϯⲁⲅⲓⲁ ⲙⲁⲣⲓⲁ ϧⲉⲛ ϩⲉⲗⲓⲟⲡⲟⲗⲓⲥ ⲟⲩⲟϩ ⲛϩⲣⲏⲓ ϧⲉⲛ ⲛⲓϫⲓⲛⲑⲱⲟⲩϯ ⲛⲧⲉ ⲛⲏⲉⲧⲥⲁϫⲓ ⲛ̀ϯⲙⲉⲧⲣⲉⲙⲛⲭⲏⲙⲓ ⲁϥⲥⲁϫⲓ ⲛϫⲉ ⲙⲁⲣⲕⲟⲥ ϧⲉⲛ ⲟⲩⲙⲟⲑⲛⲉⲥ ⲛⲉⲙ ⲟⲩⲥⲱⲟⲩⲧⲉⲛ ⲛⲁⲯⲧⲱⲙⲧ ⲇⲉ ⲧⲏⲣⲟⲩ ⲛϫⲉ ⲛⲏⲉⲧⲥⲱⲧⲉⲙ ⲉⲣⲟϥ ⲉϩⲣⲏⲓ ⲉϫⲉⲛ ⲡⲓⲉⲙⲓ ⲛⲉⲙ ⲧⲉϥϫⲓⲛⲉⲣⲟⲩⲱ ⲛⲱⲟⲩ. ⲛⲁϥⲥⲁϫⲓ ⲇⲉ ϩⲱⲥ ⲟⲩⲣⲉⲙⲛⲭⲏⲙⲓ ⲙⲙⲏⲓ ⲁⲥϧⲁϯ ⲅⲁⲣ ⲛϫⲉ ϯⲙⲉⲧⲣⲉⲙⲛⲭⲏⲙⲓ ⲙⲫⲣⲏϯ ⲛⲟⲩⲙⲟⲩⲙⲓ ⲙⲙⲱⲟⲩ ⲛⲱⲛϧ ⲉⲧϧⲁϯ ⲙⲡⲓⲗⲓⲃⲁⲛⲟⲥ ϯϫⲱ ⲙⲙⲟⲥ ⲛⲱⲧⲉⲛ ϫⲉ ⲟⲩⲇⲉ ⲕⲗⲁⲩⲇⲓⲟⲥ ⲗⲁⲡⲓⲡ ϧⲉⲛ ⲡⲉϥⲱⲟⲩ ⲧⲏⲣϥ ⲙⲡⲉϥⲥⲁϫⲓ ϧⲉⲛ ⲟⲩⲙⲟⲑⲛⲉⲥ ⲙⲫⲣⲏϯ ⲛⲛⲁⲃⲓⲗ ⲙⲏⲭⲁⲏⲗ ⲙⲁⲣⲕⲟⲥ

ⲉⲧⲁϥⲉⲙⲓ ⲇⲉ ⲛϫⲉ ⲡⲉⲛⲥⲁϧ ⲛⲁⲃⲓⲗ ϫⲉ ⲙⲙⲟⲛ ⲡⲉⲧⲁϥϫⲓⲙⲓ ⲙⲡⲓⲗⲉⲝⲓⲕⲟⲛ ⲛⲧⲉ ⲕⲗⲁⲩⲓⲇⲓⲟⲥ ⲗⲁⲡⲓⲡ ⲟⲩⲇⲉ ⲡⲓⲕⲟⲩϫⲓ ⲛⲗⲉⲝⲓⲕⲟⲛ ⲛⲧⲉ ⲡⲓⲥⲉⲛϯ ⲣⲓⲍⲕⲁⲗⲗⲁ ⲟⲩⲇⲉ ⲛⲓⲥⲕⲁⲗⲁ ⲉⲧⲁⲩⲥϧⲏⲟⲩⲧ ⲛϫⲉ ⲛⲉⲛⲓⲟϯ ⲟⲩⲟϩ ⲙⲡⲁⲧⲟⲩϫⲱⲕ ⲉⲃⲟⲗ ⲙⲡⲓⲗⲉⲭⲓⲕⲟⲛ ⲛⲧⲉ ⲁⲃⲇⲉⲗⲛⲟⲩⲣ ⲙⲁⲣⲕⲟⲥ ⲙⲉⲛ ⲁϥⲥϧⲁⲓ ⲙ̀ⲡⲓϭⲁⲩⲙⲱⲓⲧ ⲉⲡⲓⲙⲟⲩⲛⲛⲥⲁϫⲓ ϧⲉⲛ ϯⲁⲥⲡⲓ ⲛ̀ⲣⲉⲙⲛⲭⲏⲙⲓ ϧⲉⲛ ⲡⲁⲓϫⲱⲙ ⲫⲁⲓ ⲉⲧⲉⲙⲙⲁⲩ ⲁϥⲟⲩⲉϩ ⲛⲥⲁ ϯⲛⲓϣϯ ⲛⲥⲕⲁⲗⲁ ⲉⲧⲁϥⲥϧⲏⲧϥ ⲛ̀ϫⲉ ⲓⲃⲛ ⲕⲁⲃⲁⲣ ⲉⲧⲟⲩⲙⲟⲩϯ ⲉⲣⲟϥ ϫⲉ ⲡⲁⲣⲥⲱⲙⲁ ⲁϥϯⲥⲃⲱ ⲉⲛⲓⲥⲃⲟⲩⲓ ⲛ̀ⲧⲟⲩⲕⲱϯ ⲛⲥⲁ ⲛⲥⲕⲁⲗⲁ ⲛⲁⲡⲁⲥ ⲉⲧⲁϥⲥϧⲏⲧϥ ϩⲁⲛⲙⲏϣ ⲛⲥⲃⲟⲩⲓ ⲁⲩⲑⲉⲗⲏⲗ ϫⲉ ⲁⲩⲉⲣϩⲏⲧⲥ ⲛⲧⲟⲩϭⲓⲥⲃⲱ ⲉⲥⲁϫⲓ ⲛⲧⲟⲩⲁⲥⲡⲓ ⲁⲡⲉϥⲣⲁⲛ ⲉⲧϩⲟⲗϫ ⲙⲡⲉⲛⲥⲁϧ ϣⲉⲛⲁϥ ϩⲓ ⲡⲕⲁϩⲓ ⲛⲭⲏⲙⲓ ⲧⲏⲣϥ ⲟⲩⲟϩ ⲧⲉϥⲥⲟⲫⲓⲁ ⲁⲥⲫⲟϩ ϣⲁ ⲁⲩⲣⲏϫⲥ ⲛⲧⲭⲱⲣⲁ ⲛⲭⲏⲙⲓ ⲁⲩⲱϣ ⲙⲡⲉϥϫⲱⲙ ⲓⲥϫⲉⲛ ⲁⲗⲉⲝⲁⲛⲇⲣⲉⲁⲥ ϣⲁ ⲡⲑⲟϣ ϣⲙⲓⲛ

ⲁϥⲥϧⲁⲓ ⲙⲉⲛ ⲟⲛ ⲙⲡⲓϫⲱⲙ ⲉⲧⲟⲩⲙⲟⲩⲧ ⲉⲣⲟϥ ϫⲉ ⲧⲉⲕⲁⲥⲡⲓ ⲛⲣⲉⲙⲛⲭⲏⲙⲓ ϭⲓⲥⲃⲱ ⲉⲣⲟⲥ ⲟⲩⲟϩ ⲥⲁϫⲓ ⲙⲙⲟⲥ ⲛⲉⲙ ⲟⲩⲕⲉϫⲱⲙ ⲉⲡⲉϥⲣⲁⲛ ⲡⲉ ϩⲁⲛⲥϧⲓ ⲛ̀ⲣⲉⲙⲛ̀ⲭⲏⲙⲓ ⲟⲩϫⲓⲛⲃⲱⲗ ⲛⲉⲙ ⲟⲩϫⲓⲛϯⲗⲱⲓϫⲓ ⲁϥϭⲓⲙⲱⲓⲧ ϧⲁϫⲱⲟⲩ ⲛ̀ϩⲁⲛⲙⲏϣ ⲛ̀ⲣⲉϥϭⲓⲥⲃⲱ ⲉϧⲟⲩⲛ ⲉⲡⲁϩⲟ ⲛ̀ⲧⲉ ϯⲁⲥⲡⲓ ⲛⲣⲉⲙⲛⲭⲏⲙⲓ

ⲡⲉϫⲁϥ ⲛϫⲉ ⲙⲁⲣⲕⲟⲥ ϫⲉ ϯⲙⲉⲧⲣⲉⲙⲭⲛⲏⲙⲓ ⲛⲁⲥⲟⲓ ⲛ̀ϯⲁⲥⲡⲓ ⲛⲧⲉ ⲛⲓⲣⲉⲙⲛⲭⲏⲙⲓ ϣⲁ ϯⲁⲓⲱⲛⲁⲥ ⲙⲙⲁϩⲅ̄ϯ ⲙ̀ⲙⲁⲣⲧⲩⲣⲟⲥ ⲉⲧⲉ ϯⲁⲓⲱⲛⲁⲥ ⲙⲙⲁϩⲏ̄ ⲛ̀ⲭⲣⲓⲥⲧⲓⲁⲛⲟⲥ ⲉⲧⲉ ⲡⲥⲏⲟⲩ ⲉⲧⲥⲏⲣ ⲉⲃⲟⲗ ⲙⲉⲛⲉⲛⲥⲱⲥ ⲇⲉ ⲁⲩⲉⲣⲭⲣⲁⲥⲑⲉ ⲙ̀ⲙⲟⲥ ϧⲉⲛ ϯⲉⲕⲕⲗⲏⲥⲓⲁ ⲙ̀ⲙⲙⲁⲩⲁⲧⲥ ⲁⲗⲗⲁ ϣⲁ ϯⲛⲟⲩ ⲟⲩⲟⲛϩⲁⲛⲥⲁϫⲓ ⲛ̀ⲣⲉⲙⲛ̀ⲭⲏⲙⲓ ϧⲉⲛ ϯⲁⲥⲡⲓ ⲛ̀ⲁⲓⲅⲩⲡⲧⲓⲁⲕⲏ ⲛⲁⲣⲁⲃⲓⲕⲏ ⲁⲗⲗⲁ ϩⲁⲛⲙⲏϣ ⲥⲉⲉⲙⲓ ⲁⲛ ⲉⲫⲁⲓ  ⲡⲁⲙⲉⲛⲣⲓⲧ ⲛⲣⲉϥⲱϣ ⲙⲁⲣⲉ ⲡⲁⲓϫⲱⲙ ⲫⲁⲓ ⲉⲣⲃⲟⲏⲑⲓⲛ ⲉⲣⲟⲕ ⲉϭⲓⲥⲃⲱ ⲉⲛⲓⲥⲉⲛϯ ⲛⲉⲙ ϯⲅⲣⲁⲙⲙⲁⲧⲓⲕⲏ ⲛⲧⲉ ⲧⲉⲕⲁⲥⲡⲓ

ⲙⲁⲣⲕⲟⲥ ⲇⲉ ⲙⲡⲉϥϫⲉⲙⲁⲣⲓⲕⲓ ⲉϯϫⲓⲛⲥⲁϫⲓ ⲛⲁⲡⲁⲥ ⲁϥⲧⲁⲓⲟ ⲛⲟⲩⲟⲛ ⲛⲓⲃⲉⲛ ⲉⲧⲥⲁϫⲓ ⲛ̀ϯⲙⲉⲧⲣⲉⲙⲛⲭⲏⲙⲓ ⲁϥⲥⲱⲧⲡ ⲉⲥⲁϫⲓ ⲛϯϫⲓⲛⲥⲁϫⲓ ⲙⲃⲉⲣⲓ ⲛⲧⲉ ϯⲉⲕⲕⲗⲏⲥⲓⲁ ϫⲉ ϩⲓⲛⲁ ⲛⲧⲉ ⲛⲏⲉⲧⲥⲁϫⲓ ϧⲉⲛ ϯⲉⲕⲕⲗⲏⲥⲓⲁ ⲕⲁϯ ⲉⲣⲟϥ ⲟⲩⲟϩ ⲉⲧⲁϥⲟⲩⲁϩϥ ⲛ̀ⲥⲱϥ ⲛϫⲉ ⲡⲉϥⲙⲁⲑⲏⲧⲏⲥ ⲉⲡⲓⲙⲁⲛϯⲥⲃⲱ ⲛ̀ϯⲁⲥⲡⲓ ⲛ̀ⲣⲉⲙⲛ̀ⲭⲏⲙⲓ ⲡⲓⲫⲱϣ ⲛⲧⲉ ϯϫⲓⲛⲥⲁϫⲓ ⲛⲁⲡⲁⲥ ⲙ̀ⲡⲉϥϫⲱⲛⲧ ⲉϫⲱϥ ⲟⲩⲇⲉ ⲙ̀ⲡⲉϥϫⲉⲙⲁⲣⲓⲕⲓ ⲁⲗⲗⲁ ⲁϥⲧⲁⲓⲟ ⲛ̀ⲛⲏⲉⲧϭⲓⲥⲃⲱ ⲟⲩⲟϩ ⲥⲁϫⲓ ⲛ̀ⲧⲉϥⲁⲥⲡⲓ ⲁϥⲧⲁⲓⲟ ⲛ̀ⲕⲗⲁⲩⲇⲓⲟⲥ ⲗⲁⲡⲓⲡ ⲟⲩⲟϩ ⲁϥⲉⲣⲭⲣⲁⲥⲑⲉ ⲛ̀ⲛⲉϥⲗⲉⲝⲓⲥ ⲕⲉ ⲡⲁⲗⲓⲛ ⲟⲛ ⲁϥⲧⲁⲓⲟ ⲙ̀ⲡⲓϩⲩⲅⲟⲩⲙⲉⲛⲟⲥ ϣⲉⲛⲟⲩⲧⲉ ⲓⲥⲁⲁⲕ ⲛⲉⲙ ⲡⲓⲥⲏⲓⲛⲓ ⲕⲁⲙⲁⲗ ⲓⲥⲁⲁⲕ ⲟⲩⲟϩ ⲁϥⲧⲱⲃϩ ⲙ̀ⲡⲉϥⲥⲟϭⲛⲓ ⲟⲩⲟϩ ⲟⲛ ⲁϥϯϩⲑⲏϥ ⲉϯϩⲓⲥⲧⲟⲣⲓⲁ ⲛⲧⲉ ϯⲙⲉⲧⲥⲏⲓⲛⲓ ϧⲉⲛ ⲭⲏⲙⲓ

ⲟⲩⲟϩ ⲉⲧⲁⲩϩⲓⲧϥ ⲛ̀ϫⲉ ⲡⲓⲥⲏⲓⲛⲓ ⲕⲁⲙⲁⲗ ⲓⲥⲁⲁⲗ ⲉⲃⲟⲗϧⲉⲛ ⲡⲓⲥⲱⲟⲩϩ ⲉⲧϭⲟⲥⲓ ⲛⲧⲉ ⲛⲓⲥⲃⲱⲟⲩⲓ ⲛⲣⲉⲙⲛⲭⲏⲙⲓ ϫⲉ ⲁϥⲟⲩⲱϣ ⲉϯⲥⲃⲱ ⲛ̀ⲟⲩⲕⲉϫⲓⲛⲥⲁϫⲓ ⲁϥϫⲱⲛⲧ ⲟⲩⲟϩ ⲁϥⲙⲕⲁϩ ⲛ̀ϩⲏⲧ ⲛϫⲉ ⲙⲁⲣⲕⲟⲥ ⲟⲩⲟϩ ⲁϥⲭⲁ ⲡⲓⲥⲱⲟⲩϩ ⲉⲧϭⲟⲥⲓ ⲛⲧⲉ ⲛⲓⲥⲃⲱⲟⲩⲓ ⲛⲣⲉⲙⲛⲭⲏⲓ ⲛⲥⲱϥ ϫⲉ ⲙ̀ⲙⲟⲛ ⲙⲏⲓ ⲟⲩⲇⲉ ⲇⲓⲕⲁⲟⲩⲥⲩⲛⲏ ⲛⲁⲩⲭⲏ ⲙⲙⲁⲩ ⲡϫⲉⲁϥ ⲕⲁⲧⲁ ⲡⲥⲁϫⲓ ⲛⲁⲡⲁ ⲡⲁϧⲱⲙ ⲉϥϫⲱ ⲙⲙⲟⲥ ϫⲉ ⲕⲁⲓ ⲅⲁⲣ ⲛⲁⲛⲟⲩⲥ · ⲉⲕϩⲛⲧⲙⲏⲏⲧⲉ ⲛⲟⲩϣⲟ ϩⲛⲑⲃⲃⲓⲟ ⲛⲓⲙ ⲛϩⲟⲩⲟ ⲉⲟⲩⲁ ⲉϥϩⲛⲟⲩⲃⲏⲃ ⲛϩⲟⲉⲓⲧⲉ · ⲉϥϣⲟⲟⲡ ϩⲛⲟⲩⲙⲛⲧϫⲁⲥⲓϩⲏⲧ ⲁϥⲙⲟⲩⲛ ⲉⲃⲟⲗ ⲛⲧⲉϥⲙⲉⲧⲇⲓⲁⲕⲱⲛⲓⲁ ⲁϥϯⲥⲃⲱ ϧⲉⲛ ⲛⲓⲉⲕⲕⲗⲏⲥⲓⲁ ⲟⲩⲟϩ ⲁϥϯⲛⲟⲙϯ ⲛⲕⲁⲙⲁⲗ ⲓⲥⲁⲁⲕ ⲁⲗⲗⲁ ⲙⲡⲉϥϫⲉⲟⲩⲁ ⲛⲁⲃⲃⲁ ⲇⲏⲙⲏⲧⲣⲓⲟⲥ ⲡⲓⲉⲡⲓⲥⲟⲕⲟⲡⲟⲥ ⲙⲙⲁⲛⲗⲁⲩ ⲉⲧⲁϥϩⲓⲧⲟⲩ ⲉⲃⲟⲗ ⲁⲗⲗⲁ ⲁϥⲙⲟⲩⲛ ⲉⲃⲟⲗ ⲉϥϯⲥⲃⲱ ⲟⲩⲟϩ ⲁⲥϣⲱⲡⲓ ⲉⲧⲁⲩⲙⲟϩ  ⲉⲃⲟⲗ ⲛϫⲉ ⲛⲉϥⲉϩⲟⲟⲩ ⲛϣⲉⲙϣⲓ  ⲁϥⲉⲛⲕⲟⲧ ϧⲉⲛ ⲟⲩϩⲓⲣⲏⲛⲏ ϧⲉⲛ ⲡⲓⲁⲃⲟⲧ ⲑⲱⲟⲩⲧ ⲁⲯ̄ⲗ̄ⲋ̄ ⲙ̀ⲙⲁⲣⲧⲩⲣⲟⲥ ⲁⲗⲗⲁ ⲛⲉϥϩⲃⲏⲟⲩⲓ ⲛⲉⲙ ⲛⲉϥⲥⲁϫⲓ ⲥⲉⲛⲁⲙⲟⲩⲛ ⲉⲃⲟⲗ ⲁⲡⲟ ⲅⲉⲛⲉⲁⲥ ⲉⲓⲥ ⲅⲉⲛⲉⲁⲛ

[bashandy]

ⲁⲩϫⲟⲥ ⲛϫⲉ ϩⲁⲛ ϩⲉⲗⲗⲟ ⲉⲑⲃⲉ ⲁⲃⲃⲁ ⲁⲛⲧⲱⲛⲓⲟⲥ ϫⲉ ⲁϥϣⲱⲡⲓ ⲙⲡ̄ⲛ̄ⲁ̄ⲧⲟⲣⲫⲟⲣⲟⲥ ⲁⲗⲗⲁ ⲛⲁϥⲟⲩⲱϣ ⲉⲥⲁϫⲓ ⲁⲛ ⲡⲉ ⲉⲑⲃⲉ ⲛⲓⲣⲱⲙⲓ. ⲛⲏ ⲅⲁⲣ ⲉⲧϣⲟⲡ ϩⲉⲛ ⲡⲕⲟⲥⲙⲟⲥ ⲛⲁϥⲥⲱⲟⲩⲛ ⲙⲙⲱⲟⲩ ⲡⲉ ϩⲓ ϥⲟⲩⲉⲓ ⲟⲩⲟϩ ⲛⲁϥϯ ⲙⲏⲓⲛⲓ ⲉⲑⲃⲏⲧⲟⲩ ⲡⲉ ⲉⲁϥϫⲟⲥ ⲛϫⲉ ⲁⲃⲃⲁ ⲁⲛⲧⲱⲛⲓⲟⲥ ϫⲉ ϥⲛⲏⲟⲩ ⲛϫⲉ ⲟⲩⲥⲏⲟⲩ ϩⲓⲛⲁ ⲛⲧⲉ ⲛⲓⲣⲱⲙⲓ ⲗⲓⲃⲓ ⲁⲩⲥⲁⲛⲛⲁⲩ ⲉⲟⲩⲁⲓ ⲙⲡⲁϥⲗⲓⲃⲓ ⲥⲉⲛⲁⲧⲱⲟⲩⲟⲛⲟⲩ ⲉϫⲱϥ ⲉⲩϫⲱ ⲙⲙⲟⲥ ϫⲉ ⲛⲑⲟⲕ ⲉⲑⲗⲟⲃⲓ ⲉⲑⲃⲉ ϫⲉ ⲙⲡⲉϥϣⲱⲡⲓ ⲉϥⲟⲛⲓ ⲙⲙⲱⲟⲩ. ⲁⲁⲃⲃⲁ ⲁⲛⲧⲱⲛⲓⲟⲥ ϫⲟⲥ ⲛⲁⲃⲃⲁ ⲡⲁⲙⲱ ϫⲉ ϣⲁⲣⲉ ⲟⲩⲁⲓ ϫⲫⲟ ⲙⲫⲙⲟⲩ ⲉϣⲱⲡ ⲇⲉ ⲁⲫϣⲁⲛⲉⲣ ⲡⲉⲑⲛⲁⲛⲉϥ ⲛⲁϥ ϥⲛⲁϫⲫⲟ ⲙⲡⲱⲛϩ

[bashandy]

ϧⲉⲛⲥⲟⲩⲓ̄ⲉ̄ ⲙ̀ⲡⲓⲁⲃⲟⲧ ⲑⲱⲟⲩⲧ ⲁⲛⲓⲙⲉⲧⲙⲉⲑⲣⲉ ⲉⲩⲭⲱ ⲛ̀ⲛⲟⲩϩⲃⲱⲥ  ϧⲁⲣⲁⲧϥ ⲛ̀ⲟⲩϧⲉⲗϣⲓⲣⲓ ⲉⲡⲉϥⲣⲁⲛ ⲥⲁⲩⲗⲟⲥ ⲟⲩⲟϩ ⲛⲁⲩϩⲓⲱⲛⲓ ⲉϫⲉⲛ ⲥⲧⲉⲫⲁⲛⲟⲥ ⲁⲩϭⲟϫⲓ ⲛ̀ⲥⲱϥ ⲁⲩⲉⲛϥ ⲉⲡⲓⲙⲁⲛϯϩⲁⲡ  ⲁⲩϩⲓⲧϥ ⲥⲁⲃⲟⲗ ⲛ̀ϯⲃⲁⲕⲓ ⲁⲩϩⲓⲱⲛⲓ ⲉϫⲱϥ ⲙ̀ⲫⲣⲏϯ ⲛ̀ϩⲁⲛⲧⲉⲗⲧⲓⲗⲓ ⲙ̀ⲙⲟⲛϩⲱⲟⲩ ⲛ̀ⲧⲉ ⲧⲫⲉ ⲉⲩⲛⲏⲟⲩ ⲉⲡⲉⲥⲏⲧ ⲉϩⲣⲏⲓ ⲉϫⲉⲛ ⲡⲕⲁϩⲓ ⲫⲏⲉⲧⲁϥϯϣⲓⲡⲓ ⲛ̀ⲛⲟⲩⲣⲱⲟⲩ ⲁϥϣⲉⲛⲁϥ ϫⲉ ⲛ̀ϫⲉ ⲗⲟⲩⲕⲓⲁⲛⲟⲥ ⲡⲓⲡⲣⲉⲥⲃⲩⲧⲉⲣⲟⲥ ⲁϥⲉⲛⲩ ⲉⲫⲙⲁ ⲙ̀ⲡⲉϥⲥⲱⲙⲁ ⲁϥϭⲓⲧϥ ⲛ̀ϫⲉ ⲁⲃⲃⲁ ⲓⲱⲁⲛⲛⲏⲥ ⲛⲉⲙ ϩⲁⲛⲡⲣⲉⲥⲃⲩⲧⲉⲣⲟⲥ ⲉⲩϩⲱⲥ ϧⲁϫⲱϥ ϧⲉⲛ ⲟⲩⲧⲁⲓⲟ ϣⲁ ⲉϧⲟⲩⲛ ⲉⲓ̄ⲗ̄ⲏ̄ⲙ̄ ⲁϥⲕⲱⲧ ⲛⲁϥ ⲛ̀ⲟⲩⲉⲕⲕⲗⲏⲥⲓⲁ ⲁϥⲭⲱ ⲙ̀ⲡⲉϥⲥⲱⲙⲁ ̀ⲛϧⲏⲧⲥ

[bashandy]

ϧⲉⲛⲥⲟⲩⲓ̄ⲇ̄ ⲙ̀ⲡⲓⲁⲃⲟⲧ ⲑⲱⲟⲩⲧ ⲁ̣ⲯ̄ⲙ̄ⲁ̄ ⲁϥⲙⲧⲟⲛ ⲛ̀ϫⲉ ⲁⲡⲁ ⲁⲅⲁⲑⲉ ⲡⲓⲥⲧⲉⲗⲗⲓⲧⲏⲥ⳾ ⲁϥⲉⲣⲟⲩⲱⲓⲛⲓ ⲉⲙⲁϣⲱ ϧⲉⲛ ⲛⲓⲁⲣⲉⲧⲏ⳾ ⲡⲁⲓⲣⲱⲙⲓ ⲛ̀ⲇⲓⲕⲉⲟⲥ ⲛⲉ ⲟⲩⲉⲃⲟⲗ ⲡⲉ⳾ ϧⲉⲛ ⲟⲩⲓ ⲛ̀ⲛⲓⲡⲟⲗⲓⲥ⳾ ⲉⲡⲉⲥⲣⲁⲛ ⲡⲉ ⲑⲉⲛⲛⲓⲥ⳾ ⲉⲣⲉ ⲛⲉϥⲓⲟϯ ⲇⲉ⳾ ϩⲁⲛⲣⲱⲙⲓ ⲛ̀ⲑⲙⲏⲓ ⲛⲉ⳾ⲟⲩⲟϩ ⲛ̀ⲇⲓⲕⲉⲟⲥ ⲙ̀ⲡⲉⲙⲑⲟ ⲙ̀ⲫϯ ⲟⲩⲟϩ ⲛⲁⲣⲉ ⲫⲙⲉⲩⲓ ⲛϯⲙⲉⲧⲙⲟⲛⲁⲭⲟⲥ ⲓ̄ ⲉϫⲉⲛ ⲡⲉϥϩⲏⲧ⳾ ϧⲉⲛ ⲟⲩⲙⲟⲩⲛ ⲉ̇ⲃⲟⲗ⳾ ⲁϥϣⲉⲛⲁϥ ϣⲁ ϣⲓϩⲏⲧ⳾ϩⲱⲥ ⲟⲩⲙⲟⲩⲛⲁⲭⲟⲥ ⲁϥⲓ̇ ϣⲁ ⲛⲓϧⲉⲗⲗⲟⲓ⳾ⲁⲃⲣⲁⲁⲙ ⲛⲉⲙ ⲅⲉⲱⲣⲅⲓ⳾ⲁⲩϯⲉϫⲱϥ ⲙ̀ⲡⲓⲥⲭⲏⲙⲁ⳾ ⲁϥϣⲱⲡⲓ ⲛⲱⲟⲯ ⲛ̀ϣⲏⲣⲓ⳾ⲁϥϯ ⲛ̀ⲧⲉϥⲯⲩⲭⲏ ϧⲉⲛ ϩⲁⲛⲁⲥⲕⲩⲥⲓⲥ⳾ ⲛⲉⲙ ϩⲁⲛⲡⲣⲟⲥⲉⲩⲭⲏ⳾ ⲛ̀ⲁⲧϭⲓⲏⲡⲓ ⲙ̀ⲙⲱⲟⲩ⳾ ⲛⲁϥⲉ̇ⲣⲙⲉⲗⲉⲧⲁⲛ⳾ ϧⲉⲛ ⲛⲓⲁⲣⲉⲧⲏ ⳾ⲛ̀ⲧⲉ ⲡⲉⲛⲓⲱⲧ ⲉ̄ⲑ̄ⲩ̄⳾ⲥⲓⲙⲉⲱⲛ ⲡⲓⲥⲧⲓⲉⲗⲗⲓⲧⲏⲥ⳾ ⲛⲁϥⲉⲣⲡⲓⲑⲩⲙⲓⲛ ⲉⲡⲉϥⲃⲓⲟⲥ ⲙ̀ⲙⲏⲓ⳾ ⲁϥⲓ̇ ⲉⲛⲓⲑⲱϣ ⲛ̇ϯⲡⲟⲗⲓⲥ ⲥⲁⲭⲁ ⲁⲛⲓⲡⲓⲥⲧⲟⲥ ⲕⲱⲧ ⲛⲁϥ ⲙ̀ⲙⲁⲩ ⲛ̀ⲟⲩⲥⲧⲩⲗⲗⲟⲥ⳾ ⲁϥϣⲉ ⲉ̇ϩⲣⲏⲓ ⲉ̇ϫⲱϥ ⲛ̀ⲛ̄ ⲛ̀ⲣⲟⲙⲡⲓ ⲡⲓⲛⲓϣϯ ⲁⲃⲃⲁ ⲁⲅⲁⲑⲟⲥ ⲁϥϥⲁⲓ ϧⲁ ⲡⲓⲥⲧⲁⲩⲣⲟⲥ ⲛⲧⲉ̀ ⲡⲓⲭ̄ⲥ̄ ϧⲉⲛ ⲟⲩⲙⲉⲧϫⲱⲣⲓ ⲛⲉⲙ ⲟⲩⲙⲉⲧⲛⲓϣϯ ⲛ̇ϩⲩⲡⲟⲙⲟⲛⲏ ⲉⲣⲉ ⲓⲉⲣⲉⲙⲓⲁⲥ ϫⲱ ⲙ̀ⲡⲧⲁⲓⲟ ⲙ̀ⲫⲏⲉⲑⲟⲩⲁⲃ ⲛⲉⲙ ⲧⲉϥⲛⲓϣϯ ⲛ̀ϩⲩⲡⲟⲙⲟⲛⲏ ⲛⲉⲙ ⲡⲉϥⲁⲙⲟⲛⲓ ⲛ̀ⲧⲟⲧϥ⳾ϫⲉ ⲱⲟⲩⲛⲓⲁⲧϥ ⲙ̀ⲡⲓⲣⲱⲙⲓ⳾ⲫⲏⲉⲑⲛⲁϥⲁⲓ ϧⲁ ⲡⲉϥⲛⲁϩⲃⲉϥ ⲟⲩⲟϩ ⲛ̀ⲧⲉϥⲧⲁⲗⲟϥ ⲉⲣⲟϥ⳾ ⲓⲥϫⲉⲛ ⲡⲥⲏⲟⲩ ⲛ̀ⲧⲉϥⲙⲉⲧⲁⲗⲟⲩ⳾ ⲱ ⲡⲓⲛⲓϣϯ ⲁⲃⲃⲁ ⲁⲅⲁⲑⲉ ⲁⲕϯϩⲓⲱⲧⲕ ⲛ̀ϯϧⲉⲗⲗⲓⲃϣ ⲛ̀ⲧⲉ ϯⲇⲓⲕⲉⲟⲥⲩⲛⲏ⳾ ⲛⲉⲙ ⲡⲓⲑⲱⲟⲩⲓ ⲉ̇ⲛⲉⲕϭⲁⲗⲁⲩϫ ϧⲉⲛ ⲡⲥⲟⲃϯ ⲙ̀ⲡⲓⲉⲩⲁⲅⲅⲉⲗⲓⲟⲛ⳾ ⲁⲕⲙⲉⲛⲣⲉ ⲉϣⲱⲡⲓ ϩⲓ ⲡϣⲁϥⲉ⳾ ⲉⲧⲁⲕϫⲱⲕ ⲉ̇ⲃⲟⲗ ⲁⲕⲙ̇ⲧⲟⲛ ⲙ̀ⲙⲟⲕ⳾ⲧⲉⲛⲉⲣⲡⲉⲕⲙⲉⲩⲓ ⲙ̀ⲫⲟⲟⲩ

[bashandy]

ⲛⲛⲉⲕⲟⲩⲉⲙ ⲧⲥⲁⲣⲝ ⲛⲛⲉⲕⲥⲛⲏⲟⲩ ϩⲓⲧⲉⲛ ⲧⲕⲁⲧⲁⲗⲁⲗⲉⲓ

[bashandy]

ⲡⲓⲣⲉϥϫⲱ ⲁⲑⲉⲓⲁ ⲓⲥⲁⲁⲕ ⲁⲡⲇⲉⲗⲙⲉⲥⲓϩ ⲛⲉ ⲡⲓⲣⲉϥϫⲱ ⲛ̀ⲧⲉ ϯⲉⲕⲕⲗⲏⲥⲓⲁ ⲛ̀ⲧⲉ ⲅⲉⲱⲣⲅⲓⲟⲥ ⲛⲉⲙ ⲁⲡⲁ ϣⲉⲛⲛⲟⲩϥⲉ ϧⲉⲛ ⲫⲟⲙ ⲉⲗϧⲁⲗⲓϫ ϧⲉⲛ ⲡⲉⲙϩⲓⲧ ⲛ̀ⲧⲉ ⲭⲏⲙⲓ. Ⲁϥϭⲓⲥⲃⲱ ⲛ̀ϯⲙⲟⲩⲥⲓⲕⲏ ϧⲉⲛ ⲡⲓⲙⲁⲛϯⲥⲃⲱ ⲛ̀ⲧⲉ ϯⲙⲟⲩⲥⲓⲕⲏ ⲛ̀ⲁⲣⲁⲃⲓⲕⲁ ϧⲉⲛ ⲣⲁⲙⲥⲓⲥ. Ⲁϥϭⲓⲥⲃⲱ ⲛⲧⲉϥϫⲉⲛϫⲉⲛ ⲟⲩⲟϩ ⲛ̀ⲧⲉϥⲥⲉⲕⲟⲩⲉⲗⲗⲉ ⲙ̀ⲡⲓⲫⲗⲁⲟⲩⲧⲟ ⲛⲉⲙ ⲡⲓⲗⲁⲟⲩⲧⲟ ⲛⲉ ⲛⲑⲟϥ ⲟⲩⲃⲉⲗⲗⲉ ⲡⲉ ⲁⲗⲗⲁ ⲛⲁϥⲱϣ ⲛ̀ϯⲙⲟⲩⲥⲓⲕⲏ ϩⲓⲧⲟⲧϥ ⲛ̀ⲛⲉϥⲧⲏⲃ ϧⲉⲛ ⲧϧⲉ ⲙ̀ⲃⲣⲁⲓⲗ. Ⲁϥⲥϧⲁⲓ ϧⲉⲛ ⲟⲩⲓϥⲧ ⲟⲩⲟϩ ⲁϥⲙⲉⲧⲁⲅⲣⲁⲫⲱ ⲛ̀ϩⲁⲛⲙⲏϣ ⲙ̀ⲃⲱϩⲉⲙ ϧⲉⲛ ⲟⲩⲥⲙⲉⲓⲟⲅⲣⲁⲫⲓⲁ ϫⲉ ϩⲓⲛⲁ ⲛ̀ⲧⲉ ⲛⲏⲉⲧⲥⲉⲕⲟⲩⲉⲗⲗⲉ ⲛⲉⲙ ⲛⲏⲉⲧϫⲉⲛϫⲉⲛ ϣ̀ⲱϣ ⲙ̀ⲙⲱⲟⲩ ⲟⲩⲟϩ ϫⲉⲛϫⲉⲛ ⲙ̀ⲙⲱⲟⲩ. Ⲁϥⲙⲉⲧⲁⲅⲣⲁⲫⲱ ⲙ̀ⲡⲓⲃⲱϩⲉⲙ ⲉⲧⲟⲩⲙⲟⲩϯ ⲉⲣⲟⲫ ϫⲉ ⲡⲉⲕⲑⲣⲟⲛⲟⲥ ⲛⲉⲙ ⲭⲉⲣⲉ ⲛⲉ ⲙⲁⲣⲓⲁ ⲛⲉⲙ ϩⲁⲛⲕⲉⲙⲏϣ ⲙ̀ⲃⲱϩⲉⲙ.

Ⲁϥϭⲓⲥⲃⲱ ⲛ̀ϯⲁⲥⲡⲓ ⲛ̀ⲣⲉⲙⲛ̀ⲭⲏⲙⲓ ϧⲉⲛ ⲡⲓⲙⲁⲛϯⲥⲃⲱ ⲛ̀ϯⲁⲥⲡⲓ ⲛ̀ⲣⲉⲙⲛ̀ⲭⲏⲙⲓ ϧⲉⲛ ϯⲕⲁⲑⲉⲇⲣⲁ ⲙ̀ⲃⲉⲣⲓ ⲛ̀ⲧⲉ ⲁⲃⲃⲁ ⲧⲉϫⲓ ϧⲉⲛ ⲣⲁⲙⲥⲓⲥ ⲁⲗⲗⲁ ⲛⲉ ⲙ̀ⲙⲟⲛϣϫⲟⲙ ⲙ̀ⲙⲟϥ ⲛ̀ⲧⲉϥϫⲱ ϧⲉⲛ ϯⲉⲕⲕⲗⲏⲥⲓⲁ ⲛ̀ⲧⲉ ⲁⲡⲁ ϣⲉⲛⲛⲟⲩϥⲉ ϧⲉⲛ ⲫⲗⲁⲥ ⲛ̀ⲁⲡⲁⲥ ϫⲉ ⲛⲁⲩϣⲗⲏⲗ ϧⲉⲛ ϯϫⲓⲛⲥⲁϫⲓ ⲙ̀ⲃⲉⲣⲓ ⲙ̀ⲙⲁⲩ.

Ⲁϥϭⲓⲥϩⲓⲙⲓ ⲟⲩⲟϩ ⲁⲩϫⲫⲟ ⲛ̀ⲟⲩϣⲉⲣⲓ ⲛⲉⲙ ⲟⲩϣⲏⲣⲓ ⲛⲁⲩⲱⲛϧ ϧⲉⲛ ⲟⲩⲕⲟⲩϫⲓ ⲙ̀ⲃⲁϩⲙⲓ ⲛ̀ⲁⲡⲁⲥ ϧⲉⲛ ⲣⲁⲙⲥⲓⲥ ⲥⲁⲫⲁϩⲟⲩ ⲙ̀ⲡⲓⲙⲁⲛϯⲥⲃⲱ ⲛ̀ϯⲙⲟⲩⲥⲓⲕⲏ ⲛ̀ⲁⲣⲁⲃⲓⲕⲁ. Ⲛⲁϥⲙⲉⲓ ⲡⲉ ⲛ̀ⲧⲉϥⲥⲱⲧⲉⲙ ⲉⲕⲗⲁⲥⲥⲓⲕⲓ ⲙⲟⲥⲓⲕⲓ ⲛⲉϣⲁϥⲥⲱⲧⲉⲙ ⲉϭⲁⲓⲕⲟⲩⲥⲕⲓ ⲛⲉⲙ ⲙⲟⲧⲍⲁⲣⲧ ⲛⲉⲙ ⲃⲁϫⲛⲉⲣ. Ⲡⲉϫⲁϥ ϫⲉ ⲁⲣⲏⲟⲩ ⲡⲓⲣⲉϥϫⲱ ⲙⲓⲭⲁⲏⲗ ⲅⲉⲱⲣⲅⲓⲟⲥ ⲉⲗⲡⲁⲑⲁⲛⲟⲛⲓ ⲁϥⲧⲟⲩϩⲟ ⲛ̀ⲟⲩⲕⲟⲩϫⲓ ⲛ̀ⲧⲟⲓ ϧⲉⲛ ⲡⲓⲃⲱϩⲉⲙ ⲛ̀ⲧⲉ ⲡⲉⲕⲑⲣⲟⲛⲟⲥ ϧⲉⲛ ⲡⲓⲑⲱϣ ⲛ̀ⲧⲉ ⲁⲗⲗⲏⲗⲟⲩⲓⲁ ⲉⲧⲉ ⲫⲁⲓ ⲡⲓⲑⲱϣ ⲛ̀ⲧⲉ ⲫⲣⲁϣⲓ

ⲁϥϣⲉⲙϣⲓ ϧⲉⲛ ⲧⲉⲕⲕⲗⲏⲥⲓⲁ ⲟⲩⲟϩ ⲉⲧⲁϥⲉⲣϧⲉⲗⲗⲟ ⲁϥϣⲱⲛⲓ ⲟⲩⲟϩ ⲁϥⲉⲛⲕⲟⲧ ⲁⲗⲗⲁ ⲛⲉϥⲥϧⲁⲓ ⲛⲉⲙ ⲛⲉϥⲥⲁϫⲓ ⲥⲉⲛⲁⲙⲟⲩⲛ ⲉⲃⲟⲗ ϫⲉ ⲁϥⲙⲉⲛⲣⲉ ⲛⲓⲃⲱϩⲉⲙ ⲛ̀ⲧⲉ ϯⲉⲕⲕⲗⲏⲥⲓⲁ ⲛ̀ⲣⲉⲙⲛ̀ⲭⲏⲙⲓ ⲛ̀ⲟⲣⲑⲟⲇⲟⲝⲟⲥ ⲛⲉⲙ ⲛⲓⲃⲱϩⲉⲙ ⲛ̀ⲣⲉⲙⲛ̀ⲭⲏⲙⲓ.

[bashandy]

ϣⲁϥⲓⲕ ⲇⲁⲙⲓⲁⲛ

ⲫⲛⲏⲃ ⲡⲓⲥⲁⲙⲫⲁϧⲣⲓ ϣⲁϥⲓⲕ ⲇⲁⲙⲓⲁⲛ ⲁϥϭⲓⲥⲃⲱ ⲛ̀ϯⲙⲉⲧⲥⲁⲙⲫⲁϧⲣⲓ ⲉⲧⲁϥϫⲱⲕ ⲉⲃⲟⲗ ⲁϥϣⲉⲛⲁϥ ⲛ̀ⲧⲉϥⲉⲣϩⲱⲃ ϧⲉⲛ ⲡⲗⲁϩⲓ ⲛ̀ⲥⲟⲩⲇⲁⲛ ⲉⲧⲁϥⲧⲁⲥⲑⲟ ⲁϥⲉⲣϭⲓⲥϩⲓⲙⲓ ⲟⲩⲟϩ ⲁϥⲱⲛϧ ϧⲉⲛ ⲁⲡⲁⲥⲉⲓⲁ ⲙⲉⲛⲉⲛⲥⲁ ⲫⲁⲓ ⲁϥⲟⲩⲱⲧⲉⲃ ϣⲁ ⲙⲁⲁⲇⲓ.

Ⲁϥⲓ̀ ⲉϩⲣⲉⲛ ⲡⲓⲥⲏⲓⲛⲓ ⲓⲙⲓⲗ ⲙⲁϩⲓⲣ ⲓⲥⲁⲁⲕ ⲟⲩⲟϩ ⲁϥϭⲓⲥⲃⲱ ⲛ̀ϯⲁⲥⲡⲓ ⲛ̀ⲣⲉⲙⲛ̀ⲭⲏⲙⲓ ⲉⲃⲟⲗϩⲓⲧⲟⲧϥ ⲙ̀ⲡⲉϥϭⲓⲥⲃⲱ ⲛ̀ϯϫⲓⲛⲥⲁϫⲓ ⲉⲧⲁϥⲁⲓϥ ⲛ̀ϫⲉ ⲁⲣⲓⲁⲛ ⲙⲟϥⲧⲁϩ ⲁⲗⲗⲁ ⲁϥϭⲓⲥⲃⲱ ⲛ̀ϯϫⲓⲛⲥⲁϫⲓ ⲛ̀ⲁⲡⲁⲥ ⲛ̀ⲧⲉ ⲡⲉⲙϩⲓⲧ ⲁϥϫⲱⲕ ⲉⲃⲟⲗ ⲙ̀ⲡⲓϭⲟϫⲓ ⲛ̀ⲧⲉ ⲡⲓⲥϧⲓ ⲛ̀ⲭⲏⲙⲓ ⲛⲉⲙ ⲥⲁϫⲓ ⲛⲉⲙ ⲥⲙⲟⲩ ⲉⲫϯ ⲉⲧⲁ ⲫⲓⲱⲧ ϣⲉⲛⲟⲩⲧⲉ ⲓⲥⲁⲁⲕ (ⲓⲙⲓⲗ ⲙⲁϩⲓⲣ) ϫⲱⲕ ⲉⲃⲟⲗ ⲙ̀ⲡⲓϭⲟϫⲓ ⲛ̀ⲧⲉ ϯⲙⲉⲧⲥⲁⲙⲙⲁⲣⲕ ⲁϥϫⲟⲕϥ ⲉⲃⲟⲗ. Ⲁϥⲑⲁϩⲙⲉϥ ⲛ̀ϫⲉ ⲓⲙⲓⲗ ⲙⲁϩⲓⲣ ⲛ̀ⲧⲉϥϯⲥⲃⲱ ϧⲉⲛ ⲡⲓⲙⲁⲛϯⲥⲃⲱ ⲛ̀ϯⲁⲥⲡⲓ ⲛ̀ⲣⲉⲙⲛ̀ⲭⲏⲙⲓ ϧⲉⲛ ϯⲕⲁⲑⲉⲇⲣⲁ ⲙ̀ⲃⲉⲣⲓ ⲛ̀ⲧⲉ ⲁⲃⲃⲁ ⲧⲉϫⲓ. Ⲁϥⲉⲣϩⲏⲧⲥ ⲛ̀ⲧⲉϥϯⲥⲃⲱ ⲛ̀ⲟⲩⲙⲏϣ ⲙ̀ⲙⲁⲑⲏⲧⲏⲥ. Ⲁϥϯⲥⲃⲱ ⲛ̀ⲛⲏⲉⲧⲟⲩⲱϣ ⲛ̀ⲧⲟⲩϥⲓⲣⲱⲟⲩϣ ϧⲁ ⲛⲓϭⲟϫⲓ ⲛⲉⲙ ⲛⲏⲉⲧⲁⲩϯϩⲑⲏⲟⲩ ϧⲁ ϯⲙⲉⲑⲣⲉⲙⲛ̀ⲭⲏⲙⲓ ⲛ̀ⲟⲩⲉϣⲉⲛ ϭⲟϫⲓ. Ⲁϥϯⲥⲃⲱ ⲛ̀ⲛⲓⲣⲉⲙⲛ̀ⲭⲏⲙⲓ ⲛⲉⲙ ⲛⲓϣⲉⲙⲙⲱⲟⲩ, ⲛⲓⲭⲣⲓⲥⲧⲓⲁⲛⲟⲥ ⲛⲉⲙ ⲛⲏⲉⲧⲉ ⲟⲩⲟⲛⲧⲟⲩ ⲟⲩⲕⲉⲛⲁϩϯ ⲛⲉⲙ ⲛⲏⲉⲧⲉ ⲙ̀ⲙⲟⲛⲧⲟⲩ ⲛⲁϩϯ, ⲛⲓϧⲉⲗⲗⲟⲓ ⲛⲉⲙ ϧⲉⲗϣⲓⲣⲓ, ⲛⲓⲣⲱⲙⲓ ⲛⲉⲙ ⲛⲓⲥϩⲓⲙⲓ. Ϣⲁⲩⲟⲩⲱⲛ ⲙ̀ⲡⲓⲁⲙⲁⲛϯⲥⲃⲱ ϧⲉⲛ ⲡⲓⲉϩⲟⲟⲩ ⲙⲡⲓⲃ̄ ⲛⲉⲙ ⲡⲓⲅ̄ ⲛⲉⲙ ⲡⲓⲋ̄ ⲛ̀ⲁⲛϣⲁϣϥ ⲛⲓⲃⲉⲛ ⲛ̀ⲑⲟϥ ⲇⲉ ⲛⲉ ⲟⲩⲟⲛⲧⲉϥ ⲛⲓϣⲟϣⲧ ⲙ̀ⲡⲓⲙⲁⲛϯⲥⲃⲱ ⲛⲁϥϯⲥⲃⲱ ⲟⲛ ϧⲉⲛ ⲡⲓⲉϩⲟⲟⲩ ⲙ̀ⲡⲓⲍ̄ ⲛⲉⲙ ⲙ̀ⲡⲓⲇ̄ ⲛⲉⲙ ⲡⲓⲉ̄ ⲉⲑⲃⲉ ⲛⲏⲉⲧⲟⲩⲱϣ ⲛⲏⲉⲧⲉ ⲙ̀ⲡⲟⲩϣⲣⲁⲟⲩⲱ ϧⲉⲛ ⲛⲓⲕⲉⲉϩⲟⲟⲩ ⲛ̀ⲧⲉ ⲡⲓⲁⲛϣⲁϣϥ.

Ⲛⲁϥⲟⲩⲱϣ ⲁⲛ ⲡⲉ ⲛ̀ⲧⲉϥⲟⲩⲱϩⲉⲙ ⲙ̀ⲡⲓⲥⲁϫⲓ ⲉⲑⲃⲉ ⲫⲁⲓ ⲁϥⲱϣ ⲙ̀ⲡⲓⲥϧⲓ ⲛ̀ϫⲓϫ ⲛ̀ⲧⲉ ⲓⲙⲓⲗ Ⲙⲁϩⲓⲣ ⲉⲧⲁϥⲥϧⲏⲧϥ ϧⲉⲛ ⲟⲝⲫⲟⲣⲇ ⲟⲩⲟϩ ⲁϥⲟϣϥ ⲉⲡⲧⲏⲣϥ. Ⲕⲉ ⲡⲁⲗⲓⲛ ⲟⲛ ⲁϥⲱϣ ̀ⲛⲛⲓϫⲱⲙ ⲛ̀ⲧⲉ ⲕⲣⲁⲙ, ⲃⲟⲣⲣⲉⲗⲗ, ⲓⲉⲥⲥⲉ ⲁⲡⲧⲉⲗⲙⲉⲥⲓϩ, ⲡⲓⲥⲏⲓⲛⲓ ⲅⲉⲟⲣⲅⲓ ⲥⲟⲡϩⲓ, ⲡⲉⲧⲣⲁⲉⲟⲩⲥ, ⲙⲁⲣⲓⲁ ⲕⲣⲁⲙⲉⲣ, ⲃⲓⲥⲓϭⲗ, ϭⲉⲣⲛⲓ, ⲣⲟϭⲉⲙⲟⲛⲧⲉⲓⲝ ⲛⲉⲙ ⲡⲟⲣϭⲉ ⲛⲉⲙ ϩⲁⲛⲕⲉⲙⲏϣ ⲛ̀ϫⲱⲙ ϫⲉ ϩⲓⲛⲁ ⲛ̀ⲧⲉϥⲕⲁϯ. Ⲁϥϣⲱⲡⲓ ⲛ̀ⲟⲩⲣⲱⲙⲓ ⲛ̀ⲣⲉϥⲉⲙⲓ ϧⲉⲛ ϯⲁⲥⲡⲓ ⲛ̀ⲣⲉⲙⲛ̀ⲭⲏⲙⲓ. Ⲉⲧⲁϥϫⲱⲕ ⲉⲃⲟⲗ ⲛ̀ⲛⲁⲓϫⲱⲙ ⲁϥⲱϣ ⲛ̀ⲛⲓϫⲱⲙ ⲛ̀ⲧⲉ ⲁⲣⲓⲁⲛ Ⲙⲟϥⲧⲁϩ, ⲕⲗⲁⲩⲇⲓⲟⲥ ⲗⲁⲃⲓⲃ, ⲡⲓⲥⲉⲛϯ ⲣⲓⲍⲕⲁⲗⲗⲁ, ⲙⲟⲁⲩⲁⲇ ⲇⲁⲟⲩⲇ ⲁⲡⲇⲉⲗⲛⲟⲩⲣ, ⲁⲓⲟⲩⲃ ⲫⲁⲣⲁϫ, ϣⲁⲕⲓⲣ ⲃⲁⲥⲓⲗⲓⲟⲥ, ⲕⲁⲙⲁⲗ ⲓⲥⲁⲁⲕ, ⲛⲁⲃⲓⲗ ⲙⲓⲭⲁⲏⲗ ⲙⲁⲣⲕⲟⲥ, ⲙⲁⲣⲓⲁⲙ ⲁⲃⲇⲉⲗⲙⲁⲗⲁⲕ, ⲡⲁⲥⲉⲙ ⲥⲟⲡϩⲓ, ⲙⲁϫⲇⲓ ⲁⲓⲁⲇ ⲓⲱⲥⲏⲫ, ⲛⲉⲙ ⲧⲥⲱⲛⲓ ⲙⲁϫⲇⲁ ⲑⲁⲛⲓⲟⲥ ⲛⲉⲙ ⲛⲓϭⲟϫⲓ ⲛ̀ⲧⲉ ϯⲙⲉⲧⲉⲡⲓⲥⲕⲟⲡⲟⲥ ⲛ̀ⲧⲉ ⲛⲓϧⲉⲗϣⲓⲣⲓ.

Ⲉⲧⲁϥⲱϣ ̀ⲛⲛⲓϫⲱⲙ ⲛ̀ⲧⲉ ⲛⲓⲥⲉⲛϯ ⲛ̀ϯⲙⲉⲧⲣⲉⲙⲛ̀ⲭⲏⲙⲓ ⲙ̀ⲃⲉⲣⲓ ⲁϥϫⲉⲙ ϩⲁⲛⲙⲏϣ ⲛ̀ϣⲱϥⲧ ⲁϥⲧⲱⲃϩ ⲛ̀ⲧⲉϥⲓ̀ ⲉϩⲣⲉⲛ ⲛⲓⲥⲁϧ ⲛ̀ⲧⲉϥϯⲟⲧϥ ⲛⲱⲟⲩ. Ⲁϥⲓ̀ ⲉϩⲣⲉⲛ ⲡⲓⲥⲏⲓⲛⲓ ⲕⲁⲙⲁⲗ ⲓⲥⲁⲁⲕ ⲟⲩⲟϩ ⲛⲁⲩⲥⲁϫⲓ ϧⲁ ⲛⲓⲥⲉⲛϯ ⲛ̀ϯⲙⲉⲑⲣⲉⲙⲛ̀ⲭⲏⲙⲓ. Ⲕⲉ ⲡⲁⲗⲓⲛ ⲟⲛ ⲁϥⲣⲁⲟⲩⲱ ⲛ̀̀ⲛⲓϫⲓⲛⲑⲱⲟⲩⲧⲥ ⲛ̀ⲧⲉ ⲛⲏⲉⲧⲥⲁϫⲓ ⲛ̀ϯⲙⲉⲑⲣⲉⲙⲛ̀ⲭⲏⲙⲓ ⲁⲗⲗⲁ ⲛⲏⲉⲧⲥⲁϫⲓ ⲛ̀ϯϫⲓⲛⲥⲁϫⲓ ⲛ̀ⲧⲉ Ⲙⲟϥⲧⲁϩ ⲙ̀ⲡⲟⲩϣⲕⲁϯ ⲉⲣⲟϥ ϫⲉ ⲙ̀ⲡⲟⲩⲥⲱⲧⲉⲙ ⲉⲫⲗⲁⲥ ⲛ̀ⲁⲡⲁⲥ ⲛ̀ⲑⲟϥ ⲇⲉ ⲛⲁϥⲕⲁϯ ⲉⲫⲗⲁⲥ ⲙ̀ⲃⲉⲣⲓ ⲛⲉⲙ ⲫⲗⲁⲥ ⲛ̀ⲁⲡⲁⲥ. Ⲡⲓⲥⲁⲙⲫⲁϧⲣⲓ ϣⲁϥⲓⲕ ⲇⲁⲙⲓⲁⲛ ⲛⲁϥⲥⲁϫⲓ ⲡⲉ ⲛ̀ϯⲙⲉⲑⲣⲉⲙⲛ̀ⲭⲏⲙⲓ ϧⲉⲛ ⲟⲩⲙⲟⲑⲛⲉⲥ ⲛⲁϥϣⲓⲛⲓ ⲉⲛⲉϥⲙⲁⲑⲏⲧⲏⲥ ⲡⲉ ⲉϥϫⲱ ⲙ̀ⲙⲟⲥ ϫⲉ ⲛⲁⲛⲉ ⲣⲟⲩϩⲓ ⲡⲥⲟⲛ ⲛⲓⲙ ⲁϣ ⲡⲉ ⲡⲉⲕⲣⲏϯ ⲁⲣⲓϩⲙⲟⲧ ϩⲉⲙⲥⲓ ⲙⲏ ⲭⲟⲩⲱϣ ⲛ̀ⲟⲩⲁⲫⲟⲧ ⲛ̀ϣⲁⲓ ⲓⲉ ⲁⲛⲓⲥⲟⲛ. Ⲕⲉ ⲡⲁⲗⲓⲛ ⲟⲛ ⲁϥⲟⲩⲁϩⲥⲁϩⲛⲓ ⲛ̀ⲛⲉϥⲙⲁⲑⲏⲧⲏⲥ ⲉϥϫⲱ ⲙ̀ⲙⲟⲥ ϫⲉ ⲙⲁⲓⲁⲧⲉⲛⲑⲏⲛⲟⲩ ⲉϯⲁⲥⲡⲓ ⲛ̀ⲧⲉ ⲛⲉⲧⲉⲛⲓⲟϯ ⲟⲩⲟϩ ⲙⲁϩⲑⲏⲧⲉⲛ ⲉⲣⲟⲥ ⲁⲣⲉϩ ⲉⲣⲟⲥ ⲟⲩⲟϩ ϭⲓⲥⲃⲱ ⲙ̀ⲙⲟⲥ ⲙⲁⲧⲥⲁⲃⲟⲥ ⲉⲛⲉⲧⲉⲛϣⲏⲣⲓ ⲛⲉⲙ ⲛⲉⲧⲉⲛϣⲉⲣⲓ ⲥⲁϫⲓ ⲙ̀ⲙⲟⲥ ϧⲉⲛ ⲛⲉⲧⲉⲛⲏⲟⲩ ⲙⲁⲣⲉⲧⲉⲛⲱϣ ϧⲉⲛ ⲛⲓϫⲱⲙ ⲉⲧⲥϧⲏⲟⲩⲧ ϧⲉⲛ ϯⲙⲉⲧⲣⲉⲙⲛ̀ⲭⲏⲙⲓ. ⲙ̀ⲉⲣⲟⲩⲱϩⲉⲙ ⲉⲡⲓⲥⲁϫⲓ ⲁϭⲛⲉ ⲕⲁϯ ⲱϣ ⲛ̀ⲧⲉⲧⲉⲛⲕⲁϯ ⲙ̀ⲡⲉⲣⲧⲉⲛϩⲟⲩⲧ ϫⲉ ⲁⲓϫⲟⲥ ⲛⲱⲧⲉⲛ ⲛ̀ⲛⲁⲓⲥⲁϫⲓ ⲕⲱϯ ⲛ̀ⲥⲁ ⲛⲁⲓⲥⲁϫⲓ ϧⲉⲛ ⲛⲓϫⲱⲙ ⲟⲩⲟϩ ⲕⲁϯ. Ⲁⲩϣⲁⲛⲙⲟϣⲓ ⲛⲁϥϫⲟⲥ ⲛⲱⲟⲩ ϫⲉ ⲟⲩϫⲁⲓ ϧⲉⲛ ⲡϭⲟⲓⲥ.

Ⲉⲧⲁϥⲉⲣϩⲏⲧⲥ ⲛ̀ϭⲓⲥⲃⲱ ⲁϥⲥϧⲁⲓ ⲛ̀ⲛⲓϭⲟϫⲓ ⲧⲏⲣⲟⲩ ϧⲉⲛ ⲡⲉϥϫⲱⲙ ⲛ̀ⲥϧⲁⲓ ϧⲉⲛ ⲛⲓⲕⲁⲡ ⲛ̀ⲥϧⲁⲓ ⲛ̀ⲣⲉⲙⲛ̀ⲭⲏⲙⲓ ⲛ̀ⲧⲉϥϣⲧⲉⲙⲱϣ ⲛ̀ϯⲁⲥⲡⲓ ⲛ̀ⲣⲉⲙⲛⲭⲏⲙⲓ ⲉⲥⲥϧⲏⲟⲩⲧ ϧⲉⲛ ϩⲁⲛⲕⲉⲕⲁⲡ ⲛ̀ⲥϧⲁⲓ, ϧⲉⲛ ⲑⲛⲁⲩ ⲛ̀ϩⲁⲛⲁⲧⲟⲟⲩⲓ ⲛⲁϥⲛⲉϩⲥⲓ ⲛ̀ϣⲱⲣⲡ ⲟⲩⲟϩ ⲛⲉϣⲁϥⲱϣ ⲙ̀ⲡⲓⲕⲁⲧⲁⲙⲉⲣⲟⲥ ϧⲉⲛ ϯⲙⲉⲧⲣⲉⲙⲛ̀ⲭⲏⲙⲓ ⲛⲉⲙ ⲛⲓⲯⲁⲗⲙⲟⲥ ⲛⲉⲙ ⲡⲓⲉⲩⲁⲅⲅⲉⲗⲓⲟⲛ ⲉ̄ⲑ̄ⲩ̄ ⲕⲉ ⲡⲁⲗⲓⲛ ⲟⲛ ⲛⲁϥϣⲗⲏⲗ ϧⲉⲛ ϯⲙⲉⲧⲣⲉⲙⲛ̀ⲭⲏⲙⲓ. ⲛ̀ϩⲣⲏⲓ ϧⲉⲛ ⲡⲓⲡⲁⲥⲭⲁ ⲉ̄ⲑ̄ⲩ̄ ⲛⲁϥϣⲉⲛⲁϥ ⲡⲉ ⲉϯⲉⲕⲕⲗⲏⲥⲓⲁ ⲛ̀ⲧⲉ ϯⲑⲉⲟⲧⲟⲕⲟⲥ ⲙⲁⲣⲓⲁ ϧⲉⲛ ⲙⲁⲁⲇⲓ ⲟⲩⲟϩ ⲛⲁϥⲱϣ ⲡⲉ ϧⲉⲛ ⲡⲓⲉⲩⲁⲅⲅⲉⲗⲓⲟⲛ ϧⲉⲛ ⲫⲗⲁⲥ ⲛ̀ⲁⲡⲁⲥ.

Ϧⲉⲛ ⲣⲟⲩϩⲓ ⲛⲁϥⲥⲱⲧⲉⲙ ⲉⲕⲗⲁⲥⲥⲓⲕⲓ ⲙⲟⲥⲓⲕⲓ ⲉⲑⲃⲉ ⲛⲉ ⲟⲩⲟⲛ ϣϫⲟⲙ ⲙ̀ⲙⲟϥ ⲛ̀ⲧⲉϥⲁⲣⲉϩ ⲉⲛⲓⲃⲱϩⲉⲙ ⲛ̀ⲧⲉ ϯⲉⲕⲕⲗⲏⲥⲓⲁ ⲛⲉⲙ ⲛⲓⲃⲱϩⲉⲙ ⲕⲉ ⲛⲓϩⲩⲙⲛⲟⲥ ⲉⲧⲁϥⲥϧⲏⲧⲟⲩ ⲛ̀ϫⲉ ⲫⲓⲱⲧ ϣⲉⲛⲟⲩⲧⲉ ⲓⲥⲁⲁⲕ ⲡⲓⲟⲩⲏⲃ. Ⲉⲧⲁϥⲉⲣϧⲉⲗⲗⲟ ⲁϥϣⲱⲛⲓ ⲡⲓⲇⲓⲁⲃⲏⲧⲏⲥ ⲁⲧⲁϩⲟϥ ⲛⲁϥⲥⲱ ⲡⲉ ⲙ̀ⲡⲓⲁⲛⲓⲥⲟⲛ ⲛⲉⲙ ⲡⲓϣⲁⲓ ⲛ̀ⲟⲩⲉϣⲉⲛ ⲥⲁⲭⲁⲣ ϫⲉ ⲡⲓⲥⲁⲭⲁⲣ ϥⲭⲣⲟϥ ⲙ̀ⲡϯⲡⲓ ⲙ̀ⲡⲓϣⲁⲓ. Ⲙⲉⲛⲉⲛⲥⲁ ⲫⲁⲓ ⲛⲉ ⲙ̀ⲙⲟⲛϣϫⲟⲙ ⲙ̀ⲙⲟϥ ⲛ̀ⲧⲉϥϣⲉⲛⲁϥ ⲉⲡⲓⲙⲁⲛϯⲥⲃⲱ ⲛ̀ϯⲁⲥⲡⲓ ⲛ̀ⲣⲉⲙⲛ̀ⲭⲏⲙⲓ ϫⲉ ⲛⲁϥϣⲱⲛⲓ ⲡⲉ ⲁϥϣⲉⲡ ϩⲁⲛⲙⲏϣ ⲛ̀ϧⲓⲥⲓ ⲟⲩⲟϩ ⲁϥⲉⲛⲕⲟⲧ.

Ⲛⲉϥⲙⲁⲑⲏⲧⲏⲥ ⲇⲉ ⲙ̀ⲡⲟⲩϭⲓⲥⲃⲱ ⲛ̀ϯⲙⲉⲧⲣⲉⲙⲛ̀ⲭⲏⲙⲓ ⲙ̀ⲙⲁⲩⲁⲧⲥ ⲁⲗⲗⲁ ⲁⲓϭⲓⲥⲃⲱ ⲛ̀ⲧⲟⲩⲥⲁϫⲓ ⲙ̀ⲙⲟⲥ ϧⲉⲛ ⲟⲩⲙⲟⲑⲛⲉⲥ ϧⲉⲛ ϯϫⲓⲛⲥⲁϫⲓ ⲛ̀ⲁⲡⲁⲥ ⲟⲩⲟϩ ⲛ̀ⲧⲟⲩⲥϧⲁⲓ ϧⲉⲛ ϯⲙⲉⲑⲣⲉⲙⲛ̀ⲭⲏⲙⲓ ⲕⲉ ⲡⲁⲗⲓⲛ ⲟⲛ ⲁⲩϭⲓⲥⲃⲱ ⲛ̀ⲧⲟⲩⲕⲱϯ ⲛ̀ⲥⲁ ⲛⲓϫⲱⲙ ⲛ̀ⲧⲟⲩϣⲧⲉⲙⲛⲁϩϯ ⲟⲩⲟϩ ⲙⲟϣⲓ ⲛ̀ⲥⲁ ⲛⲓⲥⲁϧ ⲁⲗⲗⲁ ⲱϣ ⲟⲩⲟϩ ⲕⲁϯ ⲛ̀ⲧⲟⲩϣⲱⲡⲓ ⲛ̀ϩⲁⲛⲣⲱⲙⲓ ⲛ̀ⲣⲉϥⲉⲙⲓ ⲛ̀ⲧⲟⲩⲧⲥⲁⲃⲟ ⲛ̀ϩⲁⲛⲕⲉϫⲱⲟⲩ. Ⲡⲁⲓⲛⲓϣϯ ⲛ̀̀ⲥⲁϧ ⲁϥⲧⲥⲁⲃⲟ ⲛ̀ⲟⲩⲙⲏϣ ⲛ̀ⲧⲟⲩϣⲱⲡⲓ ⲛ̀ϩⲁⲛⲣⲱⲙⲓ ⲛ̀ⲣⲉϥⲉⲙⲓ ⲟⲩⲟϩ ⲛ̀ⲧⲟⲩⲙⲉⲩⲓ ⲟⲩⲟϩ ⲙⲉⲓ ⲛ̀ϯⲙⲉⲧⲣⲉⲙⲛ̀ⲭⲏⲙⲓ.

[bashandy]

Ⲕⲗⲁⲩⲇⲓⲟⲥ Ⲗⲁⲃⲓⲃ

Ⲕⲗⲁⲩⲇⲓⲟⲥ Ⲗⲁⲃⲓⲃ ⲁⲩⲙⲁⲥϥ ϧⲉⲛ ⲥⲓⲱⲟⲩⲧ ϧⲉⲛ ⲭⲏⲙⲓ ⲁⲫ̄ⲡ̄ⲍ̄ ⲙ̀ⲙⲁⲣⲧⲩⲣⲟⲥ. Ⲁϥϭⲓⲥⲃⲱ ⲛ̀ϯⲙⲉⲑⲣⲉⲙⲛ̀ⲭⲏⲙⲓ ϩⲓⲧⲟⲧⲟⲩ ⲛ̀ⲛⲓⲙⲟⲛⲁⲭⲟⲥ ϧⲉⲛ ⲡⲓⲙⲟⲛⲁⲥⲧⲏⲣⲓⲟⲛ ⲛ̀ⲧⲉ ϯⲁⲅⲓⲁ ⲙⲁⲣⲓⲁ ϧⲉⲛ ⲥⲱⲟⲩⲧ ⲛ̀ϩⲣⲏⲓ ϧⲉⲛ ⲧⲉϥⲙⲉⲧⲁⲗⲟⲩ: ⲕⲉ ⲡⲁⲗⲓⲛ ⲟⲛ ⲁϥϭⲓⲥⲃⲱ ⲛ̀ϯⲁⲥⲡⲓ ⲛ̀ⲣⲉⲙⲛ̀ⲭⲏⲙⲓ ⲛ̀ⲁⲡⲁⲥ ⲛ̀ⲧⲉ ⲛⲓⲫⲁⲣⲁⲱ. Ⲁϥⲧⲱⲡ ⲙ̀ⲡⲓϫⲱⲙ ⲛ̀ⲧⲉ ϯⲯⲁⲗⲙⲟⲇⲓⲁ ⲛ̀ⲧⲉⲙⲣⲟⲙⲡⲓ ⲛⲉⲙ ϯⲯⲁⲗⲙⲟⲇⲓⲁ ⲛ̀ⲧⲉ ⲭⲟⲓⲁⲕ ⲛⲉⲙ ϩⲁⲛⲧⲟⲓ ⲉⲃⲟⲗϧⲉⲛ ⲡⲓⲁⲛⲧⲓⲫⲱⲛⲁⲣⲓⲟⲛ ⲛⲉⲙ ϩⲁⲛⲕⲉⲙⲏϣ ⲛ̀ϫⲱⲙ ⲛ̀ⲧⲉ ϯⲉⲕⲕⲗⲏⲥⲓⲁ ϧⲉⲛ ϯⲁⲥⲡⲓ ⲛ̀ⲣⲉⲙⲛ̀ⲭⲏⲙⲓ. Ⲡⲁⲡⲁ ⲁⲃⲃⲁ ⲕⲩⲣⲓⲗⲗⲟⲥ ⲡⲓⲙⲁϩⲉ̄ ⲁϥⲉⲣⲃⲟⲏⲑⲓⲛ ⲉⲣⲟϥ ⲟⲩⲟϩ ⲁϥⲱϣ ⲛ̀ϩⲁⲛⲥϧⲓ ⲛ̀ϫⲓϫ ⲛ̀ⲣⲉⲙⲛ̀ⲭⲏⲙⲓ ⲛ̀ⲁⲡⲁⲥ: ⲡⲁⲗⲓⲛ ⲟⲛ ⲁϥϭⲓⲥⲃⲱ ⲛ̀ϯⲙⲉⲧⲁⲅⲅⲗⲓⲕⲟⲥ ⲛⲉⲙ ϩⲁⲛⲕⲉⲁⲥⲡⲓ. Ⲁϥⲥϧⲁⲓ ⲙ̀ⲡⲓϩⲟⲩⲓⲧ ⲛ̀ⲗⲉⲝⲓⲕⲟⲛ ⲛ̀ⲣⲉⲙⲛ̀ⲭⲏⲙⲓ ⲁⲗⲗⲁ ⲁϥⲙⲟⲩ ⲙ̀ⲡⲁⲧⲉϥϫⲟⲕϥ ⲉⲃⲟⲗ

Ⲁϥϯϩⲑⲏϥ ⲛ̀ⲧⲉϥϯⲥⲃⲱ ⲛ̀ⲧⲉϥⲁⲥⲡⲓ ⲉⲧⲁϥⲥϧⲁⲓ ⲛ̀ϩⲁⲛϫⲱⲙ ⲉⲑⲃⲉ ⲛⲓⲁⲗⲱⲟⲩⲓ ⲙ̀ⲫⲣⲏϯ ⲙ̀ⲡⲓⲁϧⲱⲙⲫⲁⲧ ⲛⲉⲙ ϩⲁⲛⲕⲉϫⲱⲙ ⲉⲑⲃⲉ ⲛⲉⲛⲥⲁϫⲓ ⲛ̀ⲧⲉ ⲛⲉⲛⲓⲟϯ ϧⲉⲛ ϯϫⲓⲛⲥⲁϫⲓ ⲛ̀ⲧⲉ ⲣⲏⲥ. Ⲁϥⲥϧⲁⲓ ⲛ̀ϩⲁⲛϫⲱⲙ ⲉⲑⲃⲉ ⲛⲓⲥⲁϫⲓ ⲛ̀ⲣⲉⲙⲛ̀ⲭⲏⲙⲓ ⲉⲧϧⲉⲛ ϯⲙⲉⲧⲁⲣⲁⲃⲟⲥ ⲛ̀ⲧⲉ ⲭⲏⲙⲓ ⲛⲉⲙ ⲛⲓⲥⲁϫⲓ ⲛ̀ⲣⲉⲙⲛ̀ⲭⲏⲙⲓ ϧⲉⲛ ϯⲙⲉⲧⲁⲅⲅⲗⲓⲕⲟⲥ ⲓⲉ ⲥⲉⲟⲛⲓ ⲛ̀ϩⲁⲛⲥⲁϫⲓ ⲛ̀ⲁⲅⲅⲗⲓⲕⲟⲥ ⲛⲉⲙ ϩⲁⲛϫⲱⲙ ⲉⲑⲃⲉ ⲛⲓⲥⲉⲛϯ ⲛⲉⲙ ϯⲅⲣⲁⲙⲙⲁⲧⲓⲕⲏ ⲛ̀ⲣⲉⲙⲛ̀ⲭⲏⲙⲓ ⲛⲉⲙ ⲡⲓϫⲱⲙ ⲛ̀ⲧⲉ ⲛⲓⲯⲁⲗⲙⲟⲥ

Ⲁϥⲥⲁϫⲓ ⲛ̀ϫⲉ ⲫⲛⲏⲃ Ⲕⲗⲁⲩⲇⲓⲟⲥ ⲛ̀ϯⲙⲉⲧⲣⲉⲙⲛ̀ⲭⲏⲙⲓ ϧⲉⲛ ⲡⲉϥⲏⲓ ⲛⲉⲙ ⲛⲏⲉⲧⲥⲁϫⲓ ⲛ̀ϯⲁⲥⲡⲓ ⲛ̀ⲣⲉⲙⲛ̀ⲭⲏⲙⲓ ⲟⲩⲟϩ ϩⲁⲛⲙⲏϣ ⲛ̀ⲣⲱⲙⲓ ⲁⲩⲟⲩⲉϩ ⲛ̀ⲥⲱϥ ⲙ̀ⲫⲣⲏϯ ⲙ̀ⲫⲛⲏⲃ ⲡⲓⲥⲉⲛϯ ⲣⲓⲍⲕⲁⲗⲗⲁ ⲉⲧⲁϥⲥⲁϫⲓ ⲟⲛ ⲛ̀ϯⲙⲉⲧⲣⲉⲙⲛ̀ⲭⲏⲙⲓ ⲛⲉⲙ ⲡⲉϥⲏⲓ

Ⲕⲗⲁⲩⲇⲓⲟⲥ Ⲗⲁⲃⲓⲃ ⲁϥⲟⲩⲉϩ ⲛ̀ⲥⲁ ϯϫⲓⲛⲥⲁϫⲓ ⲙ̀ⲃⲉⲣⲓ ⲛ̀ⲧⲉ ⲡⲉⲙϩⲓⲧ ⲉⲧⲁϥⲑⲁⲙⲓⲟϥ ⲛ̀ϫⲉ ϩⲉⲣⲓⲁⲛ ⲙⲟϥⲧⲁϩ ⲟⲩⲟϩ ⲁϥⲭⲁ ϯϫⲓⲛⲥⲁϫⲓ ⲛ̀ⲁⲡⲁⲥ ⲛ̀ⲥⲱϥ ⲟⲩⲟϩ ⲕⲉ ⲁϥⲭⲱ ⲛ̀ⲛⲓⲥⲁϫⲓ ⲛ̀ⲧⲉ ϯⲙⲉⲧⲟⲩⲉⲛⲓⲛ ⲉⲧϧⲉⲛ ϯⲙⲉⲧⲣⲉⲙⲛ̀ⲭⲏⲙⲓ ⲛ̀ⲥⲱϥ ⲟⲩⲟϩ ⲁϥϭⲱⲛⲧ ⲛ̀ⲧⲉϥⲉⲣⲭⲣⲁⲥⲑⲉ ⲛ̀ϩⲁⲛⲥⲁϫⲓ ⲛ̀ⲣⲉⲙⲛ̀ⲭⲏⲙⲓ ⲛ̀ⲧϣⲉⲃⲓⲱ ⲛ̀ⲛⲁⲓⲥⲁϫⲓ ⲙ̀ⲙⲉⲧⲟⲩⲉⲓⲛⲓⲛ ⲛⲁⲓ ⲉⲧⲉⲙⲙⲁⲩ.

Ⲛⲁⲓ ⲛⲉ ϩⲁⲛⲧⲩⲡⲟⲥ -⳿ϧⲉⲛ ⲫⲣⲁⲛ ⲙ̀ⲫⲓⲱⲧ ⲛⲉⲙ ⲡϣⲏⲣⲓ ⲛⲉⲙ ⲡⲓⲛⲓϥⲓ ⲉⲑⲟⲩⲁⲃ ⲟⲩⲛⲟⲩϯ ⲛ̀ⲟⲩⲱⲧ ⲉⲥⲉϣⲱⲡⲓ⳿

    ⲃⲏⲗⲗⲁ: ⲉⲡⲓⲥⲧⲟⲗⲏ
    ⲡⲓϭⲱⲙ: ⲡⲁⲣⲁⲇⲓⲥⲟⲥ
    ⲙⲁⲛⲭⲁ: ⲕⲟⲩⲧⲁⲗⲓ
    ⲡⲓⲁϧⲱⲙⲫⲁⲧ: ⲁⲗⲫⲁ ⲃⲏⲧⲁ

ⲁϥⲉⲣⲭⲣⲁⲥⲑⲉ ⲛ̀ϩⲁⲛⲥⲁϫⲓ ⲁⲗⲗⲁ ⲙ̀ⲡⲉϥⲧⲁⲙⲟⲛ ϫⲉ ⲁϥⲑⲱⲛ ⲁϥϫⲓⲙⲓ ⲙ̀ⲙⲱⲟⲩ ⲓⲉ ⲁϥⲑⲁⲙⲓⲱⲟⲩ ⲙ̀ⲫⲣⲏϯ ⲛ̀: Ⲕⲗⲁⲩⲇⲓⲟⲥ: ⲛⲓⲕⲉⲥⲁϫⲓ ⲉⲧⲥⲱⲣ

    Ⲃⲏⲗⲗⲁ: ⲉⲡⲓⲥⲧⲟⲗⲏ
    Ⲙⲁⲛⲃⲏⲗⲗⲁ
    Ⲙⲁⲛⲭⲁ: ⲕⲟⲩⲧⲁⲗⲓ
    Ⲃⲉⲣⲉϭⲉⲣⲁⲧ: ⲡⲟⲇⲓⲏⲗⲁⲧⲟ
    Ⲥⲓⲑⲃⲉⲗϩⲱⲃ: ⲡⲓⲭⲗⲁⲗ ⲛ̀ⲁϫⲟⲗϯ: ⲧⲣⲉⲛⲟ
    ⲣⲉⲙⲁⲛⲍⲏⲃ: ⲥⲃⲱⲟⲩⲓ ⲓⲉ ⲣⲉϥϭⲓⲥⲃⲱ ⲓⲉ ⲙⲁⲑⲏⲧⲏⲥ
    ⲣⲉⲙⲙ̀ⲫⲉ: ⲫⲁ ⲧⲫⲉ
    ⲉⲧⲏⲓⲥ ⲛ̀ϩⲟⲩⲟ: ⲉⲕⲡⲁⲓⲇⲉⲩⲧⲉ ⲧⲣⲉⲛⲟ
    ⲟⲩⲥⲓⲑⲃⲁⲓ: ⲙⲏⲭⲁⲛⲏ

ⲁϥⲥϧⲁⲓ ⲛ̀ϯⲙⲉⲧⲣⲉⲙⲛ̀ⲭⲏⲙⲓ ϧⲉⲛ ⲟⲩⲧϧⲉ ⲙ̀ⲃⲉⲣⲓ: Ⲕⲗⲁⲩⲇⲓⲟⲥ: ⲛⲓⲕⲉⲥⲁϫⲓ

    ⲛ̀ⲑⲟϥ ⲡⲓϩⲟⲩⲓⲧ ⲡⲉ: ⲛ̀ⲑⲟϥ ⲡⲉ ⲡⲓϩⲟⲩⲓⲧ
    ϣⲁϥϭⲟⲥⲓ ⲉⲙⲁϣⲱ: ϣⲁϥϭⲓⲥⲓ ⲉⲙⲁϣⲱ
    ⲥⲱⲧⲉⲙ ϧⲉⲛ ⲛⲉⲕⲙⲁϣϫ: ⲣⲉⲕ ⲡⲉⲡⲕⲙⲁϣϫ
    ⲟⲩⲙⲁⲛⲫⲓⲥⲓ: ⲟⲩⲙⲁⲛⲥⲁϩϯ
    ⲟⲩⲗⲁϫⲓ: ⲟⲩⲥⲓⲱⲟⲩⲛⲓ
    ⲙⲁⲛϩⲉⲙⲥⲓ: ⲧⲟⲧⲥ
    ϣⲁϥⲱⲛϧ ϩⲓϫⲉⲛ ⲡⲓⲁϥ: ϣⲁϥⲟⲩⲉⲙⲁϥ
    ⲁϥⲙⲟϣⲓ ⲛ̀ϫⲉ ⲡⲓⲥⲓⲑⲃⲗⲉϩⲱⲃ ϧⲉⲛ ⲛⲉⲛⲃⲁⲕⲓ ⲛ̀ⲭⲏⲙⲓ: ⲁⲡⲓⲧⲣⲉⲛⲟ (ⲡⲓⲭⲗⲁⲗ ⲛ̀ⲁϫⲟⲗϯ) ϣⲉⲛⲁϥ ⲉⲛⲉⲛⲃⲁⲕⲓ ⲛ̀ⲭⲏⲙⲓ

Ⲉⲧⲁϥⲥⲱⲧⲡ ⲛ̀ϫⲉ ⲫⲛⲏⲃ ⲕⲗⲁⲩⲇⲓⲟⲥ ⲗⲁⲃⲓⲃ ⲛ̀ϯϫⲓⲛⲥⲁϫⲓ ⲙ̀ⲃⲉⲣⲓ ⲕⲉ ⲛⲓⲥⲁϫⲓ ⲙ̀ⲃⲉⲣⲓ ⲉⲧⲁϥⲥⲱⲧⲡ ⲙ̀ⲙⲱⲟⲩ ⲛ̀ⲧϣⲉⲃⲓⲱ ⲛ̀ⲛⲓⲥⲁϫⲓ ⲛ̀ⲟⲩⲉⲓⲛⲓⲛ ⲕⲉ ⲛⲓⲥⲉⲛϯ ⲛⲉⲙ ⲧϧⲉ ⲛ̀ⲧⲉ ⲛⲉϥⲥϧⲁⲓ ⲁⲩⲣⲓⲕⲓ ⲥⲁⲃⲟⲗ ⲛ̀ϯϫⲓⲛⲥⲁϫⲓ ⲛ̀ⲧⲉ ⲡⲉⲙϩⲓⲧ ⲛⲉⲙ ϯϫⲓⲛⲥⲁϫⲓ ⲛ̀ⲁⲡⲁⲥ ⲉⲑⲃⲉ ⲫⲁⲓ ⲁⲩⲙⲟⲩϯ ⲉⲛⲉϥⲥϧⲁⲓ ϫⲉ ϯϫⲓⲛⲥⲁϫⲓ ⲛ̀ⲧⲉ Ⲕⲗⲁⲩⲇⲓⲟⲥ

ϯⲧⲁⲓⲟ ⲙ̀ⲙⲟϥ ⲉⲑⲃⲉ ⲛⲉϥⲛⲓϣϯ ⲛ̀ϩⲃⲏⲟⲩⲓ ⲉⲑⲃⲉ ϯⲙⲉⲣⲉⲙⲛ̀ⲭⲏⲙⲓ ⲁⲗⲗⲁ ϯϯⲙⲁϯ ⲁⲛ ⲛⲉⲙ ⲧⲉϥϫⲓⲛⲥⲁϫⲓ ϫⲉ ⲥ̇ⲟⲛⲓ ⲁⲛ ⲛ̀ϯⲙⲉⲧⲣⲉⲙⲛ̀ⲭⲏⲙⲓ ⲁⲗⲗⲁ ⲁϥϣⲧⲉⲙϥⲓⲣⲱⲟⲩϣ ϧⲁ ϯⲙⲉⲣⲉⲙⲛ̀ⲭⲏⲙⲓ ⲁⲣⲏⲟⲩ ⲙ̀ⲡⲁⲛϯϩⲑⲏⲛ ϧⲁⲣⲟⲥ ϫⲉ ⲁⲛϭⲓⲥⲃⲱ ⲉⲃⲟⲗϩⲓⲧⲟⲧϥ ⲙ̀ⲡⲉϥⲛⲓϣϯ ⲙ̀ⲙⲉⲓ ⲉϧⲟⲩⲛ ⲉϯⲙⲉⲧⲣⲉⲙⲛ̀ⲭⲏⲙⲓ

[bashandy]

ⲡⲓⲥⲁϧⲟ ⲥⲁⲣⲕⲓⲥ

ⲡⲓⲥⲁϧⲟ ⲥⲁⲣⲕⲓⲥ ⲡⲉ ⲡⲓⲣⲱⲙⲓ ⲛ̀ⲟⲩⲱⲧ ⲉⲧⲁϥⲥϧⲉ ⲡⲉϥⲣⲁⲛ ϧⲉⲛ ⲛⲓϩⲱⲇⲏ ⲛ̀ⲣⲉⲙⲛ̀ⲭⲏⲙⲓ ϧⲉⲛ ϯⲯⲁⲗⲙⲟⲇⲓⲁ ⲛ̀ⲧⲉⲙⲡⲣⲟⲙⲡⲓ ⲛⲉⲙ ϯⲯⲁⲗⲙⲟⲇⲓⲁ ⲛ̀ⲧⲉ ⲡⲓⲁⲃⲟⲧ ⲭⲟⲓⲁⲕ. ⲡⲉϫⲁϥ ⲛ̀ϫⲉ ⲫⲓⲱⲧ ϣⲉⲛⲟⲩⲧⲉ ⲙⲁϩⲓⲣ ⲓⲥⲁⲁⲕ ϧⲉⲛ ⲡⲓϫⲱⲙ ⲛ̀ⲧⲉ ϯⲯⲁⲗⲙⲟⲇⲓⲁ ⲉ̄ⲑ̄ⲩ̄ ⲛ̀ⲧⲉⲙⲡⲣⲟⲙⲡⲓ ⲉⲧⲁϥⲥϧⲏⲧϥ ϧⲉⲛⲥⲟⲩ ⲡⲁⲟⲡⲓ ⲁⲭⲝⲉ ⲙ̀ⲙⲁⲣⲧⲩⲣⲟⲥ ϧⲉⲛ ⲡⲓϫⲱⲃⲓ ⲛ̄ⲏ̄ ϧⲁ ϯⲯⲁⲗⲓ ⲃⲁⲧⲟⲥ ⲙ̀ⲡⲓⲅ̄ ⲛ̀ⲁⲗⲟⲩ ⲛ̀ⲁⲅⲓⲟⲥ ϫⲉ ⲛⲉ ϩⲱϯ ⲉⲣⲟϥ ⲛ̀ⲧⲉϥⲥϧⲁⲓ ϫⲉ

ⲭⲱⲗⲉⲙ ϧⲉⲛ ⲟⲩⲛⲓϣϯ ⲛ̀ϣⲣⲱⲓⲥ
ⲱ ⲛⲏⲉⲧⲉⲣⲥⲉⲃⲉⲥⲑⲉ ⲙ̀ⲡϭⲟⲓⲥ
ⲛⲉⲙ ϯⲫⲩⲥⲓⲥ ⲧⲏⲣⲥ ⲉⲧⲁϥⲁⲓⲥ
ϩⲱⲥ ⲉⲣⲟϥ ⲁⲣⲓϩⲟⲩⲟϭⲁⲥϥ

Ⲁⲣⲓⲯⲁⲗⲓⲛ: Ⲱⲥⲁⲩⲧⲱⲥ ⲡⲉⲕⲃⲱⲕ ⲡⲓⲡ̀ⲧⲱⲭⲟⲥ
Ⲥⲁⲣⲕⲓⲥ ⲁ̀ⲣⲓⲧϥ ⲉϥⲟⲓ ⲛ̀ⲉ̀ⲛⲟⲭⲟⲥ
ⲉⲥⲁϫⲓ ⲛⲉⲙ ⲛⲁⲓ ϩⲱⲥ ⲙⲉⲧⲟⲭⲟⲥ
ϩⲱⲥ ⲉⲣⲟϥ ⲁⲣⲓϩⲟⲩⲟ̀ ϭⲁⲥϥ

ⲛⲑⲟϥ ⲡⲉⲧⲁϥⲥϧⲁⲓ ⲛϩⲩⲙⲛⲟⲥ ⲛⲣⲱⲙⲉⲟⲥ ⲛⲧⲉ ⲡⲓⲉϩⲟⲟⲩ ⲙⲡⲓⲍ̅ ⲉⲧⲉ ⲡⲓⲥⲁⲃⲃⲁⲧⲟⲛ ϧⲉⲛ ϯⲯⲁⲗⲙⲱⲇⲓⲁ ⲛⲧⲉ ⲡⲓⲁⲃⲟⲧ ⲭⲟⲓⲁⲕ ⲟⲩⲟϩ ⲡⲉϫⲁϥ ⲛⲏⲓ ϫⲉ ϩⲓⲛⲁ ⲛⲧⲉⲕⲥⲱⲟⲩⲛ ⲉⲕⲉⲱϣ ⲛⲧⲁⲣⲭⲏ ⲛⲥⲧⲩⲭⲟⲛ ⲛⲓⲃⲉⲛ ⲙⲡⲁⲓⲣⲏϯ

Ⲥⲩⲛⲇⲟⲝⲁⲥⲑⲱⲙⲉⲛ ⲏⲙⲉⲣⲁⲛ: ⲉⲑⲃⲏϯ ⲱ ϯⲡⲣⲟⲥⲧⲁⲥⲓⲁ: ⲁⲛϣⲁⲛⲉⲣⲫⲙⲉⲩⲓ ⲙⲡⲉⲣⲁⲛ : ⲩⲙⲛⲟⲩⲙⲉⲛ ⲥⲉ ⲁⲇⲓⲭⲟⲥⲧⲁⲥⲓⲁ̀.
Ⲁⲥⲡⲓⲗⲉ ⲕⲉ ⲁⲅⲓⲱⲧⲉ̀ⲣⲁ: ⲡⲁⲥⲏⲥ ⲕⲧⲏⲥⲉⲱⲥ ⲇⲓⲁ̀ⲡⲁⲛⲧⲟ̀ⲥ: ⲕⲉ ⲏⲕⲟⲣⲏ ⲁⲗⲏⲑⲉⲥⲧⲉ̀ⲣⲁ: ϫⲉ ⲡϣⲏⲣⲓ ⲙⲪϯ ⲁⲙⲓⲁⲛⲧⲟⲥ.
Ⲣⲱⲙⲁⲗⲉ̀ⲟⲥ ⲡⲟⲗⲩⲉ̀ⲗⲉⲟⲥ: ⲁϥⲓ̀ ϣⲁⲣⲟⲛ ⲥⲉⲥⲁⲣⲕⲱⲙⲉ̀ⲛⲟⲥ: ⲉⲃⲟⲗϧⲉⲛ ⲧⲉⲙⲟⲩⲙⲓ ⲩⲕⲗⲉⲟⲥ: ⲉⲛ ⲙⲩⲥⲧⲏⲣⲓⲟⲛ ⲑⲁⲩⲙⲁⲝⲉⲛⲟⲛ.
Ⲕⲉ ⲇⲓ ⲁⲩⲧⲟⲩ ⲁⲛⲟⲛ ⲩⲙⲛⲟⲩⲙⲉⲛ: ⲉⲛ ⲥⲧⲓⲭⲉⲣⲁ ⲕⲉ ⲁⲛⲧⲓ̀ⲫⲱⲛⲟⲛ: ⲕⲉ ⲇⲓⲁ̀ⲥⲟⲩ ⲉⲡⲉⲛⲟⲩⲙⲉⲛ: ⲓⲡⲱⲙⲉⲛ ⲇⲉ ⲉⲡⲓ̀ⲫⲁⲛⲟⲛ.
Ⲓⲥ ⲡϣⲏⲣⲓ ⲛⲗⲟⲅⲟⲥ ⲉⲑⲣⲱⲉⲃ: ϧⲉⲛ ⲕⲉⲛϥ ⲙⲡⲉϥⲓⲱⲧ ⲉⲧⲁⲥⲁⲡϣⲱⲓ: ⲛⲁⲣⲭⲏ ⲛⲓⲃⲉⲛ ⲱ ϯⲁⲧⲑⲱⲗⲉⲃ:ⲁ̀ⲣⲉⲉⲛϥ ⲉϥⲧⲁⲗⲏⲟⲩⲧ ⲉϫⲉⲛ ⲛⲉϫⲫⲟⲓ.
Ⲥⲉⲣⲁϣⲓ ⲛⲉⲙⲉ ⲛϫⲉ ϯⲟⲓⲕⲟⲩⲙⲉⲛⲏ: ⲛⲉⲙ ⲛⲏⲉⲧϣⲟⲡ ⲛϧⲏⲧⲥ ⲉⲩⲥⲟⲡ: ϫⲉ ⲭⲉⲣⲉ ⲕⲉ ⲭⲁⲣⲓⲧⲱⲙⲉⲛⲏ: Ⲡⲟ̅ⲥ̅ ⲛⲉⲙⲉⲱ̀ ⲑⲏⲉⲑⲩ.

ⲁⲛϣⲁⲛⲱϣ ⲙⲡⲓϩⲟⲩⲓⲧ ⲛⲥⲧⲩⲭⲟⲛ ϧⲉⲛ ⲛⲓϩⲩⲙⲛⲟⲥ ⲛⲣⲱⲙⲉⲟⲥ ϧⲉⲛ ϯⲯⲁⲗⲙⲇⲓⲁ ⲛⲧⲉ ⲡⲓⲁⲃⲟⲧ ⲭⲟⲓⲁⲕ ⲧⲉⲛⲛⲁϫⲓⲙⲓ ⲙⲡⲉϥⲣⲁⲛ ⲟⲛ ⲙⲡⲁⲓⲣⲏϯ

Ⲥⲩⲛⲇⲟⲝⲁⲥⲑⲱⲙⲉⲛ ⲏⲙⲉⲣⲁⲛ: ⲉⲑⲃⲏϯ ⲱ ϯⲡⲣⲟⲥⲧⲁⲥⲓⲁ: ⲁⲛϣⲁⲛⲉⲣⲫⲙⲉⲩⲓ ⲙⲡⲉⲣⲁⲛ : ⲩⲙⲛⲟⲩⲙⲉⲛ ⲥⲉ ⲁⲇⲓⲭⲟⲥⲧⲁⲥⲓⲁ̀.
ⲀⲪϯ Ⲟⲩⲱⲣⲡ Ⲙⲡⲉϥⲙ̀ⲙⲁⲩⲁⲧϥ: ⲛⲗⲟⲅⲟⲥ ⲉⲕ ⲧⲟⲛ ⲁⲛⲱⲅⲉⲟⲥ. ⲛⲧⲉϥϯ ⲙⲫⲛⲟϩⲉⲙ ⲉⲃⲟⲗϩⲓⲧⲟⲧϥ : ⲓⲥ ⲧⲟⲛ ⲕⲟⲥⲙⲟⲛ ⲛⲕⲁⲧⲟⲅⲉⲟⲥ.
Ⲣⲁⲙⲁ Ⲫϯ ⲛⲑⲟ ϩⲱⲓ Ⲙⲁⲣⲓ : ⲡⲉϫⲓⲛⲙⲓⲥⲓ ⲁⲛⲉⲣⲙⲏⲛⲉⲩⲧⲟⲥ: ⲱ ϯⲥⲉⲙⲛⲉ ⲙⲙⲁⲣⲅⲁⲣⲓⲧⲁⲣⲓ̀ⲁ: ⲕⲉ ⲏ ⲕⲟ̀ⲣⲏ ⲑⲉⲟⲩ ⲡⲛⲉ̀ⲥⲧⲟⲥⲉ
Ⲕⲩⲣⲓⲉ̀ ⲧⲓⲥ ⲟⲙⲓⲟⲥ ⲥⲓ: ⲉⲛ ⲑⲉⲉⲓ̀ⲥ ⲛⲉⲙ ⲛⲓϭⲓⲥⲉⲩ: ⲇⲟⲝⲁ ⲥⲓ ϧⲉⲛ ⲛⲏⲉⲧϭⲟⲥⲓ: ⲕⲁⲓ ⲏ ⲅⲏ ϣⲁⲧ̀ϧⲁⲉ ⲛⲛⲓⲥⲏⲟⲩ.
Ⲓⲥ ϩⲏⲡⲡⲉ Ⲡⲟ̅ⲥ̅ ⲫⲏⲉ̀ⲧⲁϥϣⲁⲛϣ:ⲛ̀ⲛⲉⲓⲟϯ ϧⲉⲛ ⲡⲓⲇ̀ⲣⲩⲙⲟⲥ: ⲁϥⲛⲁϩⲙⲟⲩ ⲉⲃⲟⲗϩⲁ ⲛⲓⲟⲩⲱⲛϣ : ⲉⲧϩⲱⲗⲉⲙ ⲛⲧⲉ ⲡⲓⲇⲟⲕⲓⲙⲟⲥ.
Ⲥⲟⲙⲥ ⲟⲩⲟϩ ⲙⲁⲓⲁ̀ⲧⲉⲛ ⲑⲏⲛⲟⲩ : ϧⲉⲛ ⲛⲁⲓⲙⲩⲥⲧⲏⲣⲓⲟⲛ ⲉⲧϩⲏⲡ: ⲧⲉⲧⲉⲛϫⲉⲙⲟⲩ ⲉϯⲡⲁⲣⲑⲉⲛⲟⲥ: ⲟⲩⲙⲩⲧⲏⲣ ⲭⲣⲓⲥⲧⲟⲩ ⲑⲉⲟⲩ Ⲡⲉⲛⲛⲏⲃ.

̀Ⲫⲁⲓ ⲡⲉ ⲫⲛⲏⲃ Ⲥⲁⲣⲕⲓⲥ ⲉⲧⲁϥⲥϧⲁⲓ ⲛⲀⲣⲓⲯⲁⲗⲓⲛ ⲛⲉⲙ ⲛⲓϩⲱⲇⲏ ⲛⲣⲱⲙⲉⲟⲥ ⲉⲧϧⲉⲛ ⲡϫⲱⲙ ⲛϯⲯⲁⲗⲙⲟⲇⲓⲁ ⲛⲧⲉ ⲡⲓⲁⲃⲟⲧ ⲭⲟⲓⲁⲕ. Ⲁⲓⲉⲣϣⲫⲏⲣⲓ ⲟⲩⲟϩ ⲁⲓϣⲡϩⲙⲟⲧ ⲛⲧⲟⲧϥ ⲙⲫⲛⲏⲃ ⲉⲧⲧⲁⲓⲏⲟⲩⲧ ⲣϥ̅ⲥⲱⲧ ⲉⲧⲁϥⲉⲣⲟⲩⲱⲛ ⲉⲛⲁⲃⲁⲗ ⲉⲛⲁⲩ ⲉⲫⲣⲁⲛ ⲙⲡⲓⲥⲁϧ Ⲥⲁⲣⲕⲓⲥ ϧⲉⲛ ϯⲯⲁⲗⲙⲟⲇⲓⲁ.