ϩⲁⲛⲥϧⲁⲓ ⲛⲣⲉⲙⲛⲭⲏⲙⲓ

[bashandy]

ⲧⲁⲙⲉⲛⲣⲓⲧ ⲁⲣⲉⲭⲁⲧ ⲉⲑⲃⲉ ⲟⲩ ?

Ϯⲙⲉⲓ ⲁⲛ ⲛ̀ⲧⲁⲱⲛϧ ⲁϭⲛⲟⲩ.

Ⲕⲟⲧϯ ϩⲁⲣⲟⲓ ⲙⲡⲉⲣⲧⲁⲕⲟⲓ

Ⲁⲙⲟⲓ ⲛ̀ⲧⲉⲧⲁⲥⲑⲟ ϩⲁⲣⲟⲓ.

Ⲁⲙⲟⲓ ⲛ̀ⲧⲉⲧⲁⲥⲑⲟ ⲁⲙⲟⲓ.

---

Ⲓⲥ ⲡⲉⲙⲁ ⲉⲧϣⲟⲩⲓⲧ

Ⲕⲟⲧϯ ⲉⲣⲟϥ ⲧⲁⲙⲉⲛⲣⲓⲧ

Ⲙⲡⲉⲣϩⲱⲗ ⲙⲡⲉⲣⲭⲁⲧ

Ⲕⲟⲧϯ ⲧⲁⲙⲉⲛⲣⲓⲧ ⲉⲑⲃⲏⲧ

ⲧⲁⲙⲉⲛⲣⲓⲧ ⲁⲣⲉⲭⲁⲧ ⲉⲑⲃⲉ ⲟⲩ ?

Ϯⲙⲉⲓ ⲁⲛ ⲛ̀ⲧⲁⲱⲛϧ ⲁϭⲛⲟⲩ.

Ⲁⲙⲟⲓ ⲛ̀ⲧⲉⲧⲁⲥⲑⲟ ϩⲁⲣⲟⲓ.

Ⲁⲙⲟⲓ ⲛ̀ⲧⲉⲧⲁⲥⲑⲟ ⲁⲙⲟⲓ.


---

Ⲁⲛⲟⲕ ⲡⲉϯⲙⲉⲛⲣⲓϯ

Ⲡⲉⲧⲁⲓϯ ⲡⲁⲱⲛϧ ⲉⲑⲃⲏϯ

Ⲛ̀ⲛⲁⲭⲁϯ ⲙ̀ⲙⲁⲩⲁϯ

Ⲁⲛⲟⲕ ⲁⲛ ⲙ̀ⲡⲉⲣⲏϯ

ⲧⲁⲙⲉⲛⲣⲓⲧ ⲁⲣⲉⲭⲁⲧ ⲉⲑⲃⲉ ⲟⲩ ?

Ϯⲙⲉⲓ ⲁⲛ ⲛ̀ⲧⲁⲱⲛϧ ⲁϭⲛⲟⲩ.

Ⲁⲙⲟⲓ ⲛ̀ⲧⲉⲧⲁⲥⲑⲟ ϩⲁⲣⲟⲓ.

Ⲁⲙⲟⲓ ⲛ̀ⲧⲉⲧⲁⲥⲑⲟ ⲁⲙⲟⲓ.

Ⲁⲙⲟⲓ ⲁⲙⲟⲓ

Ⲁⲙⲟⲓ ⲁⲙⲟⲓ.

________________ ⲕⲁⲙⲁⲗ ϥⲁⲣⲓⲇ ⲓⲥⲁⲁⲕ

[bashandy]

ⲫⲗⲁⲥ ⲙⲁⲣⲉϥϣⲱⲡⲓ ⲉⲟⲩⲟⲛⲧⲉϥ ⲙⲙⲁⲩ ⲛϩⲁⲛϣⲓ
ⲕⲁⲧⲁ ⲡⲥⲁϫⲓ ⲛ̀ⲁⲡⲁ ⲓⲱϩⲁⲛⲛⲏⲥ ⲡⲓⲁⲣⲭⲏⲉⲡⲓⲥⲕⲟⲡⲟⲥ ⲛ̀ⲕⲱⲥⲧⲁⲛⲧⲓⲛⲟⲡⲟⲗⲓⲥ ⲉⲑⲃⲉ Ϯⲙⲉⲧⲁⲛⲟⲓⲁ ⲛⲉⲙⲧⲉⲅⲕⲣⲁⲧⲓⲁ

[bashandy]

ⲁⲩϭⲱⲣⲡ ⲉⲃⲟⲗ ⲛⲁⲃⲃⲁ ⲁⲛⲧⲱⲛⲓⲟⲥ ϩⲓ ⲡϣⲁϥⲉ ϫⲉ ⲟⲩⲟⲛ ⲟⲩⲁⲓ ϧⲉⲛ ⲟⲩⲃⲁⲕⲓ ⲉⲟⲩⲥⲏⲓⲛⲓ ⲡⲉ ϧⲉⲛ ϯⲉⲡⲓⲥⲧⲓⲙⲏ ⲉϥⲟⲛⲓ ⲙⲙⲟⲕ ⲟⲩⲟϩ ⲫⲏⲉⲧⲟⲓ ⲛϩⲟⲩⲟ ⲉⲣⲟϥ ⲉϥϯ ⲙⲙⲟϥ ⲛⲛⲏⲉⲧⲉⲣⲭⲣⲉⲓⲁ

[bashandy]

ⲯⲁⲗⲓ ⲏ̇ⲭⲟⲥ ⲁ̇ⲇⲁⲙ
Ⲙⲁⲣⲉⲛϩⲱⲥⲉ̇ⲡⲭ̅ⲥ̅ⲡⲉⲛⲛⲟⲩϯⲁ̇ⲗⲏⲑⲱⲥ·⳾ⲛ̀ⲧⲉⲛⲉⲣⲉⲩⲫⲱⲙⲓⲛ⳾ⲛ̀ⲧⲁⲓⲙⲁⲣⲧⲩⲣⲟⲥ⳾ϯⲁ̇ⲅⲓⲁ̇ⲙ̀ⲡⲓⲥⲧⲏ⳾ⲁ̇ⲛⲁⲥⲧⲁⲥⲓⲁ̇⳾ⲛⲉⲟⲩⲉ̇ⲃⲟⲗⲧⲉ⳾ϧⲉⲛϯⲡⲟⲗⲓⲥⲣⲱⲙⲏ⳾ Ⲡⲉⲥⲓⲱⲧⲟⲩϩⲉⲗⲏⲛⲟⲥⲡⲉ⳾ⲁϥϣⲉⲙϣⲓⲛ̇ⲛⲓⲓ̇ⲇⲱⲗⲟⲥⲉ̇ⲣⲉⲧⲉⲥⲙⲁⲩⲇⲉ⳾ⲛⲉⲟⲩⲭ̇ⲣⲏⲥⲧⲓⲁ̇ⲛⲉ⳾Ⲁⲥϣⲁⲛϣⲛ̀ⲧⲉⲥϣⲉⲣⲓ⳾ ϧⲉⲛⲟⲩⲙⲉⲧⲥⲩⲙⲛⲟⲥ⳾ⲟⲩⲟϩⲁⲥϯⲱⲙⲥⲙ̀ⲙⲟⲥ⳾ⲙ̀ⲡⲉⲡⲉⲥⲓⲱⲧⲉ̇ⲙⲓⲉ̇ⲣⲟⲥ⳾Ⲛⲁⲥϯⲥ̇ⲃⲱⲙ̀ⲙⲟⲥ⳾ⲕⲁⲧⲁⲉ̇ϩⲟⲟⲩⲛⲓⲃⲉⲛ⳾ ϧⲉⲛⲛⲓⲥ̇ⲃⲱⲟⲩⲓ̇ⲛ̀ⲱⲛϧ⳾ⲛ̀ⲧⲉⲛⲓⲭ̇ⲣⲏⲥⲧⲓⲁ̇ⲛⲟⲥ ⳾ Ⲁϥⲧⲁϫⲣⲟϧⲉⲛⲡⲉⲥϩⲏⲧ⳾ⲛ̀ϫⲉⲡⲓⲛⲁϩϯⲙ̀ⲙⲏⲓ⳾ ⲛ̀ⲧⲣⲓⲁⲧⲓⲕⲟⲛ⳾ ⲛ̀ⲧⲓⲏ̅ⲥ̅ⲡⲭ̅ⲥ̅.⳾ ⲁⲩϯⲙ̇ⲙⲟⲥⲉ̇ⲧⲟⲧϥⲛ̀ⲟⲩⲣⲱⲙⲓⲛ̀ⲁⲧⲛⲟⲩϯ⳾ⲉϥϣⲉⲙϣⲓⲛ̀ⲛⲓϧ.ⲉ̇ⲛⲉⲥⲟⲩⲱϣⲁⲛⲡⲉ ⳾ Ⲁⲫϯⲡⲓⲙⲁⲓⲣⲱⲙⲓⲉ̇ⲙⲓⲉ̇ⲡⲉⲥϩⲏⲧ⳾ ⲁϥⲙⲟⲩⲛ̀ϫⲉⲡⲉⲥϩⲁⲓ⳾ ⲁⲥⲣⲁϣⲓⲉ̇ⲙⲁϣⲱ⳾⁘ Ⲁⲥⲧⲱⲛⲥϧⲉⲛⲟⲩⲓⲏⲥ⳾ ⲁⲥϯⲛ̀ⲛⲉⲥϩⲩⲡⲁⲣⲭⲱⲛⲧⲁ. ⲛ̀ⲛⲓϩⲏⲕⲓⲛⲉⲙⲛⲓϫⲱⲃ⳾ ϧⲉⲛⲟⲩϫⲱⲕⲉ̇ⲃⲟⲗ⳾ Ⲉⲧⲁϥⲥⲱⲧⲉⲙⲉⲑⲃⲏⲧⲥ⳾ⲛ̀ϫⲉⲡⲓⲥⲧⲣⲁⲧⲓⲗⲁⲧⲏⲥ⳾ ⲉⲧϧⲉⲛϯⲡⲟⲗⲓⲥⲣⲱⲙⲏ⳾ ⲁϥⲉⲛⲥⲙ̀ⲡⲉϥⲙ̇ⲑⲟ⳾ Ⲁϥϣⲓⲛⲓⲙ̇ⲙⲟⲥ⳾ ϫⲉⲉ̇ⲣⲉϣⲉⲙⲓⲛ̀ⲛⲓⲙ⳾ ⲁⲥⲉⲣⲟⲩⲱ̇ ⲡⲉϫⲁⲥ⳾ ϫⲉⲁ̇ⲛⲟⲕⲟⲩⲭ̇ⲣⲏⲥⲧⲓⲁ̇ⲛⲉ ⳾ Ⲁϥⲣⲱⲕϩⲙ̀ⲡⲉⲥⲥⲱⲙⲁ.⳾ ϧⲉⲛⲡⲓⲭ̇ⲣⲱⲙⲉⲥⲱⲛϧ⳾ ⲙⲉⲛⲉⲛⲥⲁϩⲁⲛⲛⲓϣϯⲙ̀ⲃⲁⲥⲁⲛⲟⲥⲉⲩⲟϣ⳾ ⲁⲥϭⲓⲙ̀ⲡⲓⲭⲗⲟⲙ⳾ ⲛ̀ⲧⲉϯⲙⲉⲧⲙⲁⲣⲧⲩⲣⲟⲥ⳾ ⲁⲥⲉⲣϣⲁⲓⲛⲉⲙⲛⲏⲉⲑⲟⲩⲁⲃ⳾ ⲛ̀ϩ̇ⲣⲏⲓϧⲣⲛⲛⲓⲫⲏⲟⲩⲓ̇ ⳾ ϩⲓⲧⲉⲛⲛⲓⲉⲩⲭⲏ

[bashandy]

• ⲁⲟⲩⲁⲓ ϫⲱⲙⲙⲟⲥ.ϫⲉⲉⲓⲟⲩⲱϣ ⲉⲧⲟⲩϫⲉⲧⲁⲯⲩⲭⲏ. ⲛⲑⲟⲥⲇⲉ ⲁⲥϧⲓⲥⲓ ⲉⲥϣⲱϣⲧ ⲙⲙⲟϥ ⲙⲡⲉⲥϣϫⲙϫⲟⲙ ⲉⲣⲟϥ ⲙⲉⲛⲉⲛⲥⲱⲥ ⲁⲥⲭⲁⲁϥ ⲉⲃⲟⲗ. ⲉⲧⲁϥϣⲉⲛⲁϥ ⲇⲉ ⲛⲧⲉϥⲉⲣⲙⲟⲛⲁⲭⲟⲥ ⲁϥϣⲱⲡⲓ ϧⲉⲛ ⲟⲩⲁⲙⲉⲗⲓⲁ.ⲟⲩⲟϩ ⲁϥϫⲉ ⲡⲉϥⲁϩⲏⲉⲃⲟⲗ ⲕⲁⲕⲱⲥ. ⲁⲥϣⲱⲡⲓ ⲇⲉ ⲉⲧⲁⲣⲉ ⲧⲉϥⲙⲁⲩ ϣⲱⲛⲓ.ⲙⲉⲛⲉⲛⲥⲁ ⲟⲩⲥⲏⲟⲩ ⲇⲉ ⲁϥϣⲱⲛⲓ ϧⲉⲛ ⲟⲩⲛⲓϣϯ ⲛϣⲱⲛⲓ. ⲁϥⲧⲁⲥⲑⲟ ⲇⲉ ⲟⲩⲟϩ ⲁϥϫⲓⲙⲓ ⲛⲧⲉϥⲙⲁⲩ ⲙⲙⲁⲩ. ⲛⲑⲟⲥ ⲇⲉ ⲉⲧⲁⲥⲥⲛⲁⲩ ⲉⲣⲟϥ ⲁⲥⲡⲱϣⲥ. ⲟⲩⲟϩ ⲡⲉϫⲁⲥ ⲛⲁϥ.ϫⲉ ⲟⲩ ⲡⲉ ⲡⲁⲓ ⲡⲁϣⲏⲣⲓ ⲉⲑⲣⲉⲕⲓ ϩⲱⲕ ⲉⲡⲁⲓⲙⲁ.ⲁⲩⲑⲱⲛ ⲛⲉⲕⲥⲁϫⲓ ⲉⲧⲁⲕϫⲱ ⲙⲙⲱⲟⲩ ϫⲉ ⲉⲓⲟⲩⲉϣ ⲉⲧⲟⲩϫⲉ ⲧⲁⲯⲩⲭⲏ. ⲁϥϣⲓⲡⲓ ⲇⲉ ⲉϫⲉⲛ ⲛⲏⲉⲧⲁϥⲥⲟⲑⲙⲟⲩ. ⲁϥⲟϩⲓ ⲉⲣⲁⲧϥ ⲉϥⲟⲕⲉⲙ.ⲙⲙⲟⲛⲧⲉϥϩⲗⲓ ⲛⲁⲡⲟⲗⲟⲅⲓⲁ ⲉϫⲱ ⲛⲁⲥ. ⲁϥⲟⲧⲡϥ ϫⲉ ⲉϧⲟⲩⲛ ⲙⲙⲁⲩⲁⲧϥ. ⲙⲉⲛⲉⲛⲥⲱⲥ ⲁϥϩⲉⲙⲥⲓ ⲉϩⲣⲏⲓ ⲉϥⲫⲣⲟⲛⲧⲓⲍⲉⲓ ⲉⲡⲉϥⲟⲩϫⲁⲓ.ⲟⲩⲟϩ ⲉϥⲣⲓⲙⲓ ⲉϫⲉⲛ ⲡⲉϥⲟⲓ ϧⲉⲛ ⲟⲩⲙⲉⲧⲁⲙⲉⲗⲏⲥ ⲛϣⲟⲣⲡ.

• ⲁⲟⲩⲁⲓ ϣⲉⲛ ⲟⲩϧⲉⲗⲗⲟ ϫⲉ ⲉⲑⲃⲉ ⲟⲩ ⲉⲓϩⲉⲙⲥⲓ ϧⲉⲛ ⲡⲁⲙⲁⲛϣⲱⲡⲓ ⲡⲁϩⲏⲧ ⲕⲱϯ ⲛ̀ⲥⲁ ⲥⲁ ⲛⲓⲃⲉⲛ. ⲁϥⲉⲣⲟⲩⲱ ⲛⲁϥ ⲛ̀ϫⲉ ⲡϧⲉⲗⲗⲟ ϫⲉ ⲥⲉϣⲱⲛⲓ ⲛ̀ϫⲉ ⲛⲉⲕⲉⲥⲑⲏⲧⲏⲣⲓⲟⲛ ⲉⲧⲥⲁⲃⲟⲗ, ⲧϫⲓⲛⲛⲁⲩ, ⲧϫⲓⲛⲥⲱⲧⲉⲙ, ⲧϫⲓⲛϣⲱⲗⲉⲙ, ⲧϫⲓⲛⲥⲁϫⲓ. ⲛⲁⲓ ϫⲉ ⲉϣⲱⲡ ⲁⲕϣⲁⲛϫⲫⲉ ⲧⲟⲩⲉⲛⲉⲣⲅⲉⲓⲁ ϧⲉⲛ ⲟⲩⲙⲉⲧⲕⲁⲑⲁⲣⲟⲥ ϣⲁⲣⲉ ⲛⲉⲕⲉⲥⲑⲏⲧⲏⲣⲓⲟⲛ ⲉⲧⲥⲁϧⲟⲩⲛ ϣⲱⲡⲓ ϧⲉⲛ ⲟⲩⲥϭⲣⲁϩⲧ ⲛⲉⲙ ⲟⲩⲟⲩϫⲁⲓ

• ⲁⲟⲩⲁⲓ ⲟⲛ ϣⲉⲛ ⲟⲩϧⲉⲗⲗⲟ ϫⲉ ⲉⲑⲃⲉ ⲟⲩ ϯϩⲉⲙⲥⲓ ϧⲉⲛ ⲡⲁⲙⲁⲛϣⲱⲡⲓ ϯⲁⲗⲡⲗⲉⲡ. ⲁϥⲉⲣⲟⲩⲱ ⲛⲁϥ ϫⲉ ⲉⲃⲟⲗ ϫⲉ ⲙⲡⲁⲧⲕⲓⲱⲣϩ ⲙⲡⲓⲙⲧⲟⲛ ⲉⲑⲛⲉⲣϩⲉⲗⲡⲓⲥ ⲉⲣⲟϥ· ⲉⲛⲉⲁⲕⲓⲉⲣϩ ⲛⲁⲓ ϧⲉⲛ ⲟⲩⲱⲣϫ·ⲟⲩⲟϩ ⲛⲧⲉ ⲡⲉⲕⲙⲁⲛϣⲱⲡⲓ ⲙⲟⲩϩ ⲛϥⲉⲛⲧ ⲉⲣⲟⲕ ϣⲁⲛⲧⲟⲩⲫⲟϩ ⲉϩⲣⲏⲓ ⲉⲡⲉⲕⲙⲟϯ ⲉⲛⲉⲭⲛⲁⲙⲟⲩⲛ ⲉⲃⲟⲗ ⲉϩⲣⲏⲓ ⲛϧⲏⲧⲟⲩ ⲡⲉ ⲟⲩⲟϩ· ⲭⲛⲁϥ ϧⲁⲣⲱⲟⲩ ⲛⲛⲉⲕⲗⲁⲡⲗⲉⲡ

• ⲁϥϫⲟⲥ ⲟⲛ ϫⲉ… ⲛ̀ⲛⲉⲕⲟⲩⲉⲙ ⲛ̀ⲧⲥⲁⲣⲝ ⲛ̀ⲛⲉⲕⲥⲛⲏⲟⲩ ϩⲓⲧⲉⲛ ⲧⲕⲁⲧⲁⲗⲁⲗⲉⲓ

• ⲁϥϫⲟⲥ ⲛϫⲉ ⲟⲩϧⲉⲗⲗⲟ·ϫ ⲉϣⲁⲣⲉ ⲧⲙⲉⲑⲟⲩⲱⲥϥ ⲟⲩⲱϩ ⲉϫⲉⲛ ⲛⲓϣⲱϥⲧ ⲙⲡⲓⲣⲱⲙⲓ ⲁⲣⲉϣⲁⲛ ⲟⲩⲧⲁⲡⲥ ⲱⲥⲕ ⲛⲉⲙⲁϥ· ϩⲓⲧⲉⲛ ⲟⲩⲛⲓϣϯ ⲛⲥⲏⲟⲩ ϣⲁⲥϭⲣⲟ ⲟⲩⲟϩ ⲛⲧⲉⲥϫⲉⲙϫⲟⲙ ⲙⲫⲣⲏϯ ⲛⲟⲩⲫⲩⲥⲓⲥ·ⲙⲁⲗⲓⲥⲧⲁ ⲛⲏⲉⲧⲟⲓ ⲛⲁⲙⲉⲗⲏⲥ ⲉⲡϩⲟⲩⲟ . . . ⲁϫⲓⲥ ⲉⲣⲟⲕ ⲙⲙⲁⲩⲁⲧⲕ ϫⲉ ⲡⲥⲟⲛ ⲭⲱ ⲛⲁⲕ ⲛⲧⲉⲥⲫⲣⲁⲅⲓⲥ ⲛϯⲥⲟⲫⲓⲁ ·ⲉⲧⲉ ⲫⲁⲓ ⲡⲉ ⲡⲓⲑⲉⲃⲓⲟ·

 

• ⲁⲟⲩⲁⲓ ⲛⲛⲓϧⲉⲗⲗⲟ ϣⲉⲛⲁϥ ϣⲁ ⲕⲉϧⲉⲗⲗⲟ· ⲟⲩⲟϩ ⲡⲉϫⲁϥ ⲙⲡⲉϥⲙⲁⲑⲏⲧⲏⲥ ϫⲉ ⲙⲁⲑⲁⲙⲓⲟ ⲛⲁⲛ ⲛⲟⲩⲕⲟⲩϫⲓ ⲛⲁⲣϣⲓⲛ· ⲟⲩⲟϩ ⲁϥⲑⲁⲙⲓⲟϥ· ⲡⲉϫⲁϥ ϫⲉ ϩⲉⲣⲡ ϩⲁⲛⲱⲓⲕ ⲛⲁⲛ ⲟⲩⲟϩ ⲁϥϩⲟⲣⲡⲟⲩ. ⲛⲑⲱⲟⲩ ⲇⲉ ⲁⲩⲙⲟⲩⲛ ⲉⲃⲟⲗ ⲉⲩⲥⲁϫⲓ ϧⲁ ϯⲥⲟⲫⲓⲁ ⲙⲡⲓⲉϩⲟⲟⲩ ⲧⲏⲣϥ ⲛⲉⲙ ⲡⲓⲉϫⲱⲣϩ

• ⲉⲩⲛⲁϣⲉⲛⲱⲟⲩ ⲇⲉ ⲉⲡⲱⲥϧ ⲡⲉϫⲁϥ ⲛⲱⲟⲩ ϫⲉ ⲛϯⲛⲁⲃⲱⲕ ⲁⲛ ⲉⲕⲟⲧⲧ ⲉϯⲉⲛⲧⲟⲗⲏ ⲛⲱⲧⲉⲛ .ⲛⲧⲉⲧⲉⲛⲁⲣⲉϩ ⲅⲁⲣ ⲁⲛ

• ⲁⲟⲩⲁⲓ ⲛⲛⲓⲥⲛⲏⲟⲩ ϣⲉⲛ ⲁⲡⲁ ⲡⲁⲥⲧⲁⲙⲱⲛ ϫⲉ ⲟⲩ ⲡⲉϯⲛⲁⲓⲁϥ ϫⲉ ⲥⲉⲑⲗⲓⲃⲓ ⲙⲙⲟⲓ ⲉⲓϯⲙ ⲡⲁϩⲱⲃ ⲛϫⲓϫ ⲉⲃⲟⲗ.ⲁϥⲉⲣⲟⲩⲱ ⲛϫⲉ ⲡⲓϧⲉⲗⲗⲟ ⲡⲉϫⲁϥ ϫⲉ ⲡⲕⲉ·ⲁⲡⲁ ϫⲓϫⲱⲓ·ⲛⲉⲙ ⲡⲕⲉⲥⲉⲡⲓ ϣⲁⲩϯ ⲡⲟⲩϩⲱⲃ ⲛϫⲓϫ ⲉⲃⲟⲗ. ⲫⲁⲓ ⲛⲟⲩⲟⲓⲥⲓ ⲁⲛ ⲡⲉ. ⲁⲕϣⲁⲛⲛⲟⲩ ⲇⲉ ⲉϯⲁϫⲓ ϯⲙⲏⲛ ⲟⲩⲥⲟⲡ ⲛⲟⲩⲱⲧ ⲛⲧⲉ ⲡⲓⲇⲥ. ⲁⲕϣⲁⲛⲟⲩⲱϣ ⲇⲉ ⲉⲭⲁ ⲟⲩⲕⲟⲩϫⲓ ⲉⲃⲟⲗ ϧⲉⲛ ⲥⲟⲩⲉⲛϥ·ⲛⲑⲟⲕ ⲉⲧⲑⲱϣ.ⲑⲁⲓ ⲧⲉ ⲧϧⲉ ⲉⲧⲉⲭⲛⲁϭⲓⲛⲙⲧⲟⲛ. ⲡⲉϫⲉ ⲡⲥⲟⲛ ⲛⲁϥ ϫⲉ ⲉϣⲱⲡ ⲉⲟⲩⲛⲧⲏⲓ ⲧⲁⲭⲣⲓⲁ ⲙⲙⲁⲩ·ⲭⲟⲩⲱϣ ⲉⲑⲣⲓϥⲉⲓⲣⲱⲟⲩϣ ϧⲁ ϩⲱⲃ ⲛϫⲓϫ· ⲁϥⲉⲣⲟⲩⲱ ⲛϫⲉ ⲡϧⲉⲗⲗⲟ ϫⲉ ⲕⲁⲛ ⲟⲩⲛⲧⲉⲕ ϩⲱⲃ ⲛⲓⲃⲉⲛ ⲙⲡⲉⲣⲭⲁ ⲡϩⲱⲃ ⲛϫⲓϫ ⲉⲃⲟⲗ ⲡⲉⲧⲉⲟⲩⲟⲛ ϣϫⲟⲙ ⲙⲙⲟⲕ ⲉⲁⲓϥ ⲁⲣⲓⲧϥ—ⲙⲱⲛⲟⲛ ϧⲉⲛ ⲟⲩϣⲑⲟⲣⲧⲉⲣ ⲁⲛ.

• ⲁⲟⲩⲥⲟⲛ ϣⲉⲛ ⲁⲡⲁ ⲥⲁⲣⲁⲡⲓⲟⲛ ϫⲉ ⲁϫⲓⲥ ⲟⲩⲥⲁϫⲓ ⲉⲣⲟⲓ. ⲡⲉϫⲉ ⲡϧⲉⲗⲗⲟ ⲛⲁϥ ϫⲉ ⲉⲓⲛⲁϫⲉ ⲟⲩⲁⲓ ⲛⲁⲕ ϫⲉ ⲁⲕϥⲓ ⲛⲓⲉⲛⲭⲁⲓ ⲛⲛⲓϩⲏⲕⲓ.ⲛⲉⲙ ⲛⲓⲭⲏⲣⲁ ⲛⲉⲙ ⲛⲓⲟⲣⲫⲁⲛⲟⲥ.ⲁⲕⲭⲁⲩ ϧⲉⲛ ⲡϣⲟⲩϣⲧ.ⲁϥⲛⲁⲩ ⲅⲁⲣ ⲉⲡϣⲟⲩϣⲧ ⲉϥⲙⲉϩ ⲛϧⲣⲉ.

• ⲁⲩϣⲓⲛⲉ ⲑⲙⲁⲕⲁⲣⲓⲁ ⲥⲩⲛⲕⲗⲏⲧⲓⲕⲏ·ϫⲉ ⲛⲉ ⲟⲩⲁⲅⲁⲑⲟ ⲛⲉϥϫⲏⲕ ⲉⲃⲟⲗ ⲧⲉⲧⲙⲉⲧⲁⲧϩⲛⲁⲩ· ⲁⲥⲉⲣⲟⲩⲱ ϫⲉ ⲟⲩⲁⲅⲁⲑⲟ ⲛϩⲟⲩⲟ ⲡⲉ ⲉϥϫⲏⲕⲉⲃⲟⲗ ⲛⲛⲏⲉⲧⲉ ⲙⲙⲟⲛ ϣϫⲟⲙ ⲙⲙⲱⲟⲩ. ⲛⲏⲉⲧⲁⲩϩⲩⲡⲟⲙⲓⲛⲓ ⲅⲁⲣ ϧⲉⲛ ⲫⲁⲓ ⲟⲩⲛⲧⲟⲩ ⲙⲙⲁⲩ ⲛⲟⲩⲑⲗⲓⲯⲓⲥ ϧⲉⲛ ⲧⲥⲁⲣⲝ·ϧⲉⲛ ϯⲯⲩⲭⲏ ⲇⲉ ⲟⲩⲛⲧⲟⲩ ⲙⲙⲁⲩ ⲛⲟⲩϩⲙⲟⲧ. ⲙⲫⲣⲏϯ ⲅⲁⲣ ⲛϩⲁⲛϩⲟⲓϯ ⲉⲩϭⲱⲣ ⲉⲩϩⲱⲙⲓ ⲉϫⲱⲟⲩ·ⲟⲩⲟϩ ⲉⲩϣⲱⲙ ⲙⲙⲱⲟⲩ ϣⲁⲩⲑⲣⲟⲩ ⲕⲱϯ ϧⲉⲛ ⲟⲩϫⲛⲁϩ ϣⲁⲛⲧⲟⲩⲟⲩⲃⲁϣ· ⲑⲁⲓ ⲧⲉ ⲧϧⲉ ⲛϯⲯⲩⲭⲏ ⲉⲧϫⲟⲣ ϧⲉⲛ ⲑⲙⲉⲧϩⲏⲕⲓ ϩⲁⲡⲉⲩϩⲧⲟⲣ ⲉϣⲁⲩ ⲁⲙⲁϩϯ ̀ⲛϩⲟⲩⲟ.

• ⲁϥϫⲟⲥ ⲛϫⲉ ⲁⲡⲁ ϩⲩⲡⲉⲣⲉⲭⲓⲟⲥ ϫⲉ ⲡⲁϩⲟ ⲙⲡⲓⲣⲱⲙⲓ ⲡⲉ ⲑⲙⲉⲧⲁⲧϫⲫⲉ ϩⲗⲓ ⲛϩⲩⲗⲏ ⲛⲁϥ. ⲱⲧⲡ ⲛⲁⲕ ⲉϧⲟⲩⲛ·ⲟⲩⲟϩ ⲛⲕⲥⲱⲟⲩϩ ⲛⲁⲕ ⲉϧⲟⲩⲛ ϧⲉⲛ ⲧⲉⲕⲯⲩⲭⲏⲉ·ⲟⲩⲁⲧⲟⲩⲱ ⲅⲁⲣ ⲛⲁⲕ ⲡⲉ ⲡⲙⲧⲟⲛⲛϣⲁ ⲡⲉⲕⲛⲓϥⲓ ⲛ̀ϧⲁⲉ.

 

• ⲛⲉ ⲟⲩⲟⲛ ⲟⲩⲁⲓ ⲇⲉ ⲛⲛⲓⲥⲁⲃⲉⲩ ⲉϣⲁⲩⲙⲟⲩϯ ⲉⲣⲟϥ ϫⲉ ⲫⲓⲗⲁⲅⲣⲓⲟⲥ·ⲉϥⲟⲩⲏϩ ϧⲉⲛ ⲧϩⲓⲉⲣⲟⲩⲥⲁⲗⲏⲙ·ⲉϥⲉⲣϩⲱⲃ ϧⲉⲛ ⲟⲩϧⲓⲥⲓ·ϣⲁⲛⲧⲉϥϫⲫⲟ ⲛⲁϥ ⲙⲡⲉϥⲱⲓⲕ ⲙⲙⲓⲛ ⲙⲙⲟϥ. ⲛϩⲟⲥⲟⲛ ⲇⲉ ϥⲟϩⲓ ⲉⲣⲁⲧϥ ϧⲉⲛ ⲧⲁⲅⲟⲣⲁ ⲉϯⲙⲡⲉϥϩⲱⲃ ⲛϫⲓϫ ⲉⲃⲟⲗ·ⲉⲓⲥ ϩⲏⲡⲡⲉ ϧⲉⲛ ⲟⲩϩⲟϯ ⲁϥϫⲓⲙⲓ ⲛⲟⲩⲃⲁⲗⲗⲁⲧⲓⲟⲛ ⲉⲟⲩⲟⲛ ⲙⲏⲧ ⲛϣⲉ ⲛϩⲟⲗⲟⲕⲟⲧⲧⲓⲛⲟⲥ ϩⲓⲱⲥ. ⲁϥⲟϩⲓ ⲉⲣⲁⲧϥ ϧⲉⲛ ⲡⲉϥⲙⲁ ⲉϥϫⲱ ⲙⲙⲟⲥ·ϫⲉ ϩⲱϯ ⲡⲉ ⲉⲑⲣⲉ ⲡⲉⲛⲧⲁϥⲥⲟⲣⲙⲉⲥ ⲓ. ⲟⲩⲟϩ ⲉⲓⲥ ⲫⲏⲉⲧⲉ ⲙⲙⲁⲩ ⲁϥⲓ ⲉϥⲣⲓⲙⲓ. ⲁϥϣⲟⲡϥ ⲇⲉ ⲛϫⲉ ⲡϧⲉⲗⲗⲟ  ⲁϥϭⲓⲧϥ ⲛⲥⲁ ⲟⲩⲥⲁ ⲁϥⲧⲏⲓⲥ ⲛⲁϥ· ⲡⲉⲧⲙⲙⲁⲩ ⲇⲉ ⲁϥⲁⲙⲟⲛⲓ ⲙⲙⲟϥ ⲉϥⲟⲩⲱϣ ⲉϯ ⲛⲟⲩⲱⲛ ⲛⲁϥ·ⲡϧⲉⲗⲗⲟ ⲇⲉ ⲙⲡⲉϥⲟⲩⲱϣ ⲉϭⲓ. ⲧⲟⲧⲉ ⲁϥϩⲓⲧⲟⲧϥ ⲉⲱϣ ⲉⲃⲟⲗ ⲉϥϫⲱ ⲙⲙⲟⲥ·ϫⲉ ⲁⲙⲱⲓⲛⲓ ⲛⲧⲉⲧⲉⲛⲛⲁⲩ ⲉⲩⲣⲱⲙⲓ ⲛⲁⲅⲁⲑⲟⲥ ϫⲉ ⲛⲧⲁϥⲉⲣ ⲟⲩ. ⲡϧⲉⲗⲗⲟ ⲇⲉ ⲁϥⲫⲱⲧ ⲛϫⲓⲟⲩ ⲉⲁϥⲓⲉⲃⲟⲗ ϧⲉⲛ ⲧⲡⲟⲗⲓⲥ·ϫⲉ ⲛⲛⲟⲩⲥⲟⲩⲱⲛϥ

• ⲡⲉϫⲁϥ ⲛϫⲉ ⲁⲡⲁ ⲃⲉⲛⲓⲁⲙⲓⲛ ⲛⲛⲉϥⲙⲁⲑⲏⲧⲏⲥ·ϫⲉ ⲙⲟϣⲓ ϧⲉⲛ ⲧⲉϩⲓⲏ ⲙⲡⲟⲩⲣⲟ· ⲟⲩⲟϩ ⲱⲡ ⲛⲥⲁ ⲙⲙⲓⲗⲓⲟⲛ ⲟⲩⲟϩ ⲛⲧⲉⲧⲉⲛⲛⲁⲥⲱϧⲉⲙ ⲁⲛ.

• ⲁϥϫⲟⲥ ⲛϫⲉ ⲁⲡⲁ ⲃⲏⲥⲁⲣⲓⲟⲛ ϫⲉ ⲁⲓⲉⲣ ϩⲙⲉ ⲛⲉϫⲱⲣϩ ϧⲉⲛ ⲑⲙⲏϯ ⲛⲟⲩϩⲣⲁⲙⲛⲟⲥ ⲉⲓⲟϩⲓ ⲉⲣⲁⲧ ⲙⲡⲓⲉⲛⲕⲟⲧ

• ⲟⲩⲥⲟⲛ ⲉϥϩⲙⲥⲓ ϧⲉⲛ ⲣⲓ ⲙⲙⲁⲩⲁⲧϥ ⲁϥϣⲑⲟⲣⲧⲉⲣ· ⲁϥϣⲉⲛⲁϥ ⲇⲉ ϣⲁ ⲁⲡⲁ ⲑⲉⲟⲇⲟⲣⲟⲥ ⲛⲧⲉ ⲡϩⲉⲣⲙⲏⲥ ⲁϥϫⲟⲥ ⲛⲁϥ ϫⲉ ⲁⲓϣⲁⲛϩⲉⲙⲥⲓ ⲙⲙⲁⲩⲁⲧϥ ϣⲁⲓϣⲑⲟⲣⲧⲉⲣ ⲉⲑⲃⲉ ϯⲙⲉⲧϭⲁⲥⲓϩⲏⲧ. ⲡⲉϫⲉ ⲡϧⲉⲗⲗⲟ ⲇⲉ ⲛⲁϥ ϫⲉ ⲙⲁϣⲉⲛⲁⲕ ⲛⲧⲉⲕⲑⲃⲓⲉ ⲡⲉⲕϩⲏⲧ ⲛⲅϭⲱ ⲛⲉⲙ ϩⲁⲛⲕⲉⲟⲩⲁⲓ ⲉⲕϩⲩⲡⲟⲧⲁⲥⲓⲥ ⲛⲱⲟⲩ· ⲁϥⲃⲱⲕⲇⲉⲁϥϭⲱⲙⲛϩⲟⲓⲛⲉϩⲙⲡⲧⲟⲟⲩⲁϥⲕⲧⲟϥⲟⲛⲁϥⲉⲓϣⲁⲡϩⲗⲗⲟ. ⲡⲉϫⲁϥ ϫⲉ ⲙⲡⲓⲙⲧⲟⲛ ⲉⲓⲟⲩⲏϩ ⲛⲉⲙ ⲛⲣⲱⲙⲓ. ⲡⲉϫⲉ ⲡϧⲉⲗⲗⲟ ⲇⲉ ⲛⲁϥ ϫⲉ ⲉϣⲱⲡ ⲉⲙⲡⲉⲕⲙⲧⲟⲛ ⲙⲙⲁⲩⲁⲧⲕ·ⲟⲩⲇⲉ ⲟⲛ ⲉⲕϣⲟⲡ ⲛⲉⲙ ⲛⲕⲉⲟⲩⲁⲓ ⲛⲭⲛⲁⲙⲧⲟⲛ ⲁⲛ ⲉⲑⲃⲉ ⲟⲩ ⲁⲕⲓ ⲉⲃⲟⲗ ⲉⲉⲣⲙⲟⲛⲁⲭⲟⲥ· ϫⲉⲕⲁⲥ ⲁⲛ ⲉⲕⲛⲁⲧⲱⲟⲩⲛ ϩⲁⲛⲑⲗⲓⲯⲓⲥ· ⲁϫⲟⲥ ⲉⲣⲟⲓ ϫⲉ ⲉⲓⲥ ⲟⲩⲏⲣ ⲛⲣⲟⲙⲡⲓ ⲛϭⲓ ⲛⲧⲁⲕϯⲙⲡⲉⲓⲥⲭⲏⲙⲁ ϩⲓⲱⲧⲕ. ⲡⲉϫⲁϥ ϫⲉ ⲉⲓⲥ ϣⲙⲏⲛⲓ ⲛⲣⲟⲙⲡⲉ. ⲡⲉϫⲉ ⲡϧⲉⲗⲗⲟ ⲛⲁϥ ϫⲉ ⲛⲁⲙⲉ ⲉⲓⲥ ϣϥⲉ ⲛⲣⲟⲙⲡⲓ ⲓⲥϫⲉⲛ ⲉⲧⲁⲉⲣⲙⲟⲛⲁⲭⲟⲥ ⲙⲡⲓϫⲉⲙ ⲟⲩⲙⲧⲟⲛ ⲛⲟⲉⲩϩⲟⲟⲩ ⲛⲟⲩⲱⲧ. ⲟⲩⲟϩ ⲛⲑⲟⲕ ⲭⲟⲩⲱϣ ⲉⲙⲧⲟⲛ ϧⲉⲛ ⲑⲁⲓϣⲙⲏⲛⲓ ⲛⲣⲟⲙⲡⲓ.

• ⲁⲟⲩⲁⲓ ⲛⲛⲓⲥⲛⲏⲟⲩ ϣⲉⲛϥ ⲛⲟⲩⲉϩⲟⲟⲩ ϫⲉ ⲁⲡⲁ ⲁⲣⲉϣⲁⲛ ⲟⲩϩⲟϯ ϣⲱⲡⲓ ϧⲉⲛ ⲟⲩϣⲡⲛϣⲱⲡϣ ⲁⲕⲣϩⲟϯ ϩⲱⲕ. ⲡⲉϫⲉ ⲡϧⲉⲗⲗⲟ ⲛⲁϥ ϫⲉ ⲁⲣⲉϣⲁⲛ ⲧⲫⲉ ⲧⲱϫⲓ ⲉⲡⲕⲁϩⲓ ⲛⲑⲉⲱⲇⲱⲣⲟⲥ ⲛⲁⲣϩⲟϯ ⲁⲛ. ⲛⲉ ⲁϥⲧⲱⲃϩ ⲅⲁⲣ ⲉⲱⲛϧ ⲛⲟⲩϣⲉⲛϩⲟϯ ϫⲉ ⲡⲓϫⲁⲣϩⲏⲧ ⲅⲁⲣ ϥⲛⲁⲙⲟⲩ ⲛⲟⲩⲥⲟⲡ ⲁⲗⲗⲁ ⲡⲓϫⲁⲃϩⲏⲧ ⲇⲉ ⲛⲁⲙⲟⲩ ⲛⲉϩⲟⲟⲩ ⲛⲓⲃⲉⲛ

• ⲁⲩϫⲟⲥ ⲉⲑⲃⲉ ⲁⲡⲁ ⲑⲉⲱⲇⲱⲣⲟⲥ·ⲛⲉⲙ ⲁⲡⲁ ⲗⲟⲩⲕⲓⲁⲛⲟⲥ ⲛⲁ ⲡϩⲉⲛⲁⲧⲟⲛ.ϫⲉ ⲁⲩⲉⲣ ⲧⲉⲃⲓ ⲛⲣⲟⲙⲡⲓ ⲉⲩⲣϩⲁⲗ ⲙⲫⲙⲉⲩⲓ ⲙⲙⲓⲛ ⲙⲙⲱⲟⲩ. ϫⲉ ⲁⲣⲉϣⲁⲛ ϯⲫⲣⲱ ⲥⲓⲛⲓ ⲧⲉⲛⲛⲁⲫⲱⲧ ⲉⲃⲟⲗϧⲉⲛ ⲡⲁⲓⲙⲁ· ⲁⲣⲉϣⲁⲛⲡϣⲱⲙ ⲇⲉ ϣⲱⲡⲓ ϣⲁⲩϫⲟⲥ·ϫⲉ ⲁⲣⲉϣⲁⲛ ⲡϣⲱⲙ ⲡⲁⲣⲁⲅⲉ ⲧⲉⲛⲛⲁⲫⲱⲧ ⲉⲃⲟⲗϧⲉⲛ ⲡⲁⲓⲙⲁ. ⲟⲩⲟϩ ⲑⲁⲓ ⲧⲉ ⲧϧⲉ ⲛⲧⲟⲩⲉⲣ ⲡⲥⲏⲟⲩ ⲧⲏⲣϥ ⲛϫⲉ ⲛⲉⲛⲓⲟϯ·ⲛⲁⲓ ⲉⲧⲟⲩⲓⲣⲓ ⲙⲡⲉⲩⲙⲉⲩⲓ ϣⲁ ϯⲛⲟⲩ

• ⲁϥϣⲉⲛⲁϥ ⲛϫⲉ ⲁⲡⲁ ⲙⲁⲕⲁⲣⲓⲟⲥ ⲡⲓⲛⲓϣϯ ϣⲁ ⲁⲡⲁ ⲁⲛⲧⲱⲛⲓⲟⲥ. ⲟⲩⲟϩ ⲛⲧⲉⲣⲉϥⲕⲱⲗϩ ⲉⲫⲣⲟ ⲁϥⲓ ⲉⲃⲟⲗ ϣⲁⲣⲟϥ ⲛϫⲉ ⲁⲡⲁ ⲁⲛⲧⲟⲛⲱⲛⲓⲟⲥ ⲡⲉϫⲁϥ ⲛⲁϥ ϫⲉ ⲛⲑⲟⲕ ⲛⲓⲙ. ⲛⲑⲟϥ ⲇⲉ ⲁϥⲉⲣⲟⲩⲱ ⲉϥϫⲱ ⲙⲙⲟⲥ ϫⲉ ⲁⲛⲟⲕ ⲡⲉ ⲙⲁⲕⲁⲣⲓⲟⲥ· ⲟⲩⲟϩ ⲁϥϣⲑⲁⲙ ⲙⲫⲣⲟ ⲁϥϣⲉ ⲉϧⲟⲩⲛ ⲛϫⲉ ⲁⲡⲁ ⲁⲛⲧⲱⲛⲓⲟⲥ ⲁϥⲭⲁϥ ⲛⲁⲡⲁ ⲙⲁⲕⲁⲣⲓⲟⲥ· ⲉⲧⲁϥⲛⲁⲩ ⲇⲉ ⲛϫⲉ ⲁⲡⲁ ⲁⲛⲧⲱⲛⲓⲟⲥ ⲉⲧϥϩⲩⲡⲟⲙⲟⲛⲏ ⲛⲧⲉ ⲁⲡⲁ ⲙⲁⲕⲁⲣⲓⲟⲥ ⲁϥⲟⲩⲱⲛ ⲛⲁϥ. ⲟⲩⲟϩ ⲁϥⲣⲱⲟⲩⲧⲫ ⲛⲉⲙⲁϥ ⲉϥϫⲱ ⲙⲙⲟⲥ ϫⲉ ⲉⲓⲥ ⲟⲩⲛⲓϣϯ ⲛⲥⲏⲟⲩ ⲉⲓⲟⲩⲱϣ ⲉⲛⲁⲩ ⲉⲣⲟⲕ ⲁⲓⲥⲱⲧⲉⲙ ⲅⲁⲣ ⲉⲑⲃⲏⲧⲕ. ⲟⲩⲟϩ ⲁϥϣⲟⲡϥ ⲉⲣⲟϥ ϧⲉⲛ ⲟⲩⲙⲉⲧⲙⲁⲓⲣⲱⲙⲓ. ⲁϥϯⲙⲧⲟⲛ ⲛⲁϥ ⲛⲧⲁϥⲓ ⲅⲁⲣ ⲉⲃⲟⲗϧⲉⲛ ϩⲁⲛⲛⲟϫ ⲛϧⲓⲥⲓ· ⲉⲧⲁ ⲣⲟⲩϩⲓ ⲇⲉ ϣⲱⲡⲓ ⲁⲁⲡⲁ ⲁⲛⲧⲱⲛⲓⲟⲥ ϩⲱⲣⲡ ⲛⲁϥ ⲛϩⲁⲛⲕⲟⲩϫⲓ ⲛⲁⲃⲏⲧ. ⲡⲉϫⲉ ⲁⲡⲁ ⲙⲁⲕⲁⲣⲓⲟⲥ ⲛⲁϥ ϫⲉ ⲕⲉⲗⲉⲩⲉⲓ ⲛⲏⲓ ⲛⲧⲁϩⲱⲣⲡ ⲛⲁⲓ ⲙⲙⲁⲩⲁⲧ. ⲁⲡⲁ ⲁⲛⲧⲱⲛⲓⲟⲥ ⲇⲉ ⲡⲉϫⲁϥ ϫⲉ ϩⲱⲣⲡ. ⲟⲩⲟϩ ⲁϥⲑⲁⲙⲓⲟ ⲛⲟⲩⲛⲟϫ ⲛϣⲟⲗ ⲛⲁⲃⲏⲧ ⲁϥϩⲟⲡϥ· ⲁⲩϩⲉⲙⲥⲓ ⲁⲩⲥⲁϫⲓ ⲉⲑⲙⲉⲧⲣⲉϥϯϩⲏⲟⲩ ⲛϯⲯⲩⲭⲏ. ⲓⲥϫⲉⲛ ⲫⲛⲁⲩ ⲛⲣⲟⲩϩⲓ. ⲁⲩⲛⲟⲃⲧⲟⲩ·ⲟⲩⲟϩ ⲑⲛⲏⲃⲧⲉ ⲁⲥϣⲉ ⲉⲡⲉⲥⲏⲧ ⲉⲡⲓⲥⲡⲩⲗⲩⲟⲛ ⲉⲃⲟⲗ ϩⲓⲧⲉⲛ ⲡϣⲟⲩϣⲧ· ⲁϥϣⲉⲛⲁϥ ⲉϧⲟⲩⲛ ⲉⲧⲟⲟⲩⲓ ⲛϫⲉ ⲫⲙⲁⲕⲁⲣⲓⲟⲥ ⲁⲡⲁ ⲁⲛⲧⲱⲛⲓⲟⲥ ⲁϥⲛⲁⲩ ⲉⲡⲁϣⲁⲓ ⲛⲑⲛⲏⲃⲧⲉ ⲛⲁⲡⲁ ⲙⲁⲕⲁⲣⲓⲟⲥ ⲁϥⲉⲣϣⲫⲏⲣⲓ ⲟⲩⲟϩ ⲁϥϯⲫⲓ ⲛϫⲓϫ ⲛⲁⲡⲁ ⲙⲁⲕⲁⲣⲓⲟⲥ ⲉϥϫⲱ ⲙⲙⲟⲥ ϫⲉ ⲁϩⲁϩ ⲛϫⲟⲙ ⲓ ⲉⲃⲟⲗϧⲉⲛ ⲛⲁⲓϫⲓϫ·

• ⲡⲉϫⲁⲥ ⲛϫⲉ ⲁⲙⲁ ⲥⲩⲛⲕⲗⲏⲧⲓⲕⲏ ϫⲉ ⲙⲫⲣⲏϯ ⲅⲁⲣ ⲛⲟⲩⲛⲓϣϯ ⲙⲫⲁϧⲣⲓ ⲉϥϫⲉⲙϫⲟⲙ ⲉⲙⲁϣⲱ ϧⲉⲛ ⲡⲥⲱⲙⲁ ⲙⲡϣⲱⲛⲓ.ⲡϧⲓⲥⲓ ⲛⲣⲉϥⲱϫⲛ ⲙⲫⲛⲟⲃⲓ ⲭⲏ ⲉϩⲣⲏⲓ. ⲟⲩⲟϩ ⲑⲁⲓ ⲧⲉ ⲑⲛⲟϫ ⲛⲁⲥⲕⲏⲥⲓⲥ ⲙⲙⲉⲧⲣⲉϥϥⲓ ⲉⲣⲟⲕ ϧⲉⲛ ⲛⲓϣⲱⲛⲓ. ⲙⲡⲉⲛⲑⲣⲉⲛϣⲱⲡⲓ ϩⲱⲥ ⲉⲛⲧⲱⲟⲩⲛ ϧⲉⲛ ⲟⲩϩⲣⲟϣ

• ⲡⲉϫⲁⲥ ⲛϫⲉ ⲁⲙⲁ ⲥⲩⲛⲕⲗⲏⲧⲓⲕⲏ ⲛⲏⲉⲧⲁⲩ ϩⲓⲧⲟⲧⲟⲩ ⲉⲡⲗⲉⲁ. ϣⲁⲩϣⲱⲛϥ ⲛⲑⲏⲟⲩ ⲛⲟⲩⲛⲁⲙ.ϣⲁⲩⲫⲱⲣϣ ⲉⲃⲟⲗ ⲛⲧⲟⲩⲗⲁⲩⲟ. ⲙⲉⲛⲉⲛⲥⲱⲥ ϣⲁⲣⲉ ⲡⲑⲏⲟⲩ ⲉⲧϯⲟⲩⲃⲏⲟⲩ ⲧⲱⲙⲧ ⲉⲣⲱⲟⲩ. ⲁⲗⲗⲁ ⲙⲛⲁ ⲛⲛⲏⲃⲓ ϣⲟⲩⲟ ⲉϩⲣⲏⲓ ⲙⲡⲁⲩⲓⲛ ⲉⲑⲃⲉ ⲡⲁϣⲁⲓ ⲛⲛⲉⲛⲑⲏⲟⲩ ⲉⲧⲁⲩⲓ ⲉϫⲱⲟⲩ. ϣⲁⲩϭⲣⲉϩⲧ ⲇⲉ ⲛⲟⲩⲕⲟⲩϫⲓ ⲛⲥⲉϭⲱ ⲉⲩⲙⲓϣⲓ ⲛⲉⲙ ⲡϩⲱⲓⲙⲓ ⲛⲧⲁϥⲓ ⲉϩⲣⲏⲓ ⲉϫⲱⲟⲩ ⲉⲩⲥϭⲏⲣ. ⲑⲁⲓ ϩⲱⲛ ⲧⲉ ⲧⲉⲛϧⲏ ϫⲉ ϩⲓⲛⲁ ⲛⲧⲉⲛϫⲱⲕ ⲉⲃⲟⲗ ⲛⲡⲓⲥϭⲏⲣ ⲁϭⲛⲉ ϩⲟϯ

• ⲁϥϫⲟⲥ ⲛϫⲉ ⲁⲡⲁ ϩⲩⲡⲉⲣⲉⲭⲓⲟⲥ·ϫⲉ ⲧⲙⲉⲗⲉⲧⲏ ⲉⲑⲙⲏⲛ ⲉⲃⲟⲗ ϣⲁⲩϫⲁϫϥ ⲙⲡⲓⲡⲟⲗⲏⲙⲟⲥ ⲉⲑⲛⲟⲏⲩ ⲉϫⲱⲛ

• ⲁϥϫⲟⲥ ⲟⲛ ⲛϫⲉ ⲁⲡⲁ ϩⲩⲡⲉⲣⲉⲭⲓⲟⲥ ϫⲉ ⲥϣⲉ ⲉⲣⲟⲛ ⲉⲑⲣⲉⲛ ϧⲱⲕ ⲙⲙⲟⲛ ϧⲁⲧϩⲏ ⲙⲡⲓⲣⲁⲥⲙⲟⲥ ⲥⲉⲛⲏⲟⲩ ⲅⲁⲣ· ⲟⲩⲟϩ ⲁⲩϣⲁⲛⲓⲓ ⲛⲥⲉϫⲓⲙⲓ ⲙⲙⲟⲛ ⲉⲛⲣⲏⲥ.

• ⲁⲛⲓϧⲉⲗⲗⲟ ϫⲟⲥ ϫⲉ ⲁⲣⲉϣⲁⲛ ⲟⲩⲡⲉⲓⲣⲁⲥⲙⲟⲥ ⲧⲱⲟⲩⲛ ⲉϫⲱⲕ ϧⲉⲛ ⲫⲙⲁ ⲉⲧⲉⲕⲛϧⲏⲧϥ·ⲙⲡⲉⲣⲭⲱ ⲛⲥⲱⲕ ⲙⲡⲉⲕⲧⲟⲡⲟⲥ ϧⲉⲛ ⲡⲥⲏⲟⲩ ⲙⲡⲓⲡⲉⲓⲣⲁⲥⲙⲟⲥ· ⲉϣⲱⲡⲓ ⲙⲙⲟⲛ ⲫⲙⲁ ⲟⲛ ⲉⲧⲉⲕⲭⲁϣⲉⲛⲁⲕ ⲉⲣⲟϥ·ⲭⲛⲁϫⲓⲙⲓ ⲛϧⲏⲧϥ ⲙⲡⲉⲧⲉⲕⲫⲱⲧ ⲉⲑⲃⲏⲧϥ· ⲁⲗⲗⲁ ϩⲩⲡⲟⲙⲓⲛⲏ ϣⲁⲛⲧⲉ ⲡⲡⲉⲓⲣⲁⲥⲙⲟⲥ ⲥⲓⲛⲓ· ϫⲉⲕⲁⲥ ⲉⲣⲉ ⲡⲉⲕϫⲓⲛⲡⲱⲛ ⲉⲉⲃⲟⲗ ϣⲱⲡⲓ ⲛⲥⲕⲁⲛⲇⲁⲗⲟⲛ ⲁⲛ. ⲟⲩⲟϩ ϧⲉⲛ ⲟⲩⲥⲏⲟⲩ ⲛϩⲓⲣⲏⲛⲏ ϫⲉⲕⲁⲥ ⲛⲉ ⲡⲉⲕⲡⲱⲛⲉ ⲉⲃⲟⲗ ϣⲱⲡⲓ ⲑⲗⲓⲯⲥⲓⲥⲛ ⲛⲏⲉⲧϧⲉⲛ ⲡⲉⲕⲙⲁ

• ϯⲛⲁⲙⲓϣⲓ ⲙⲛⲡⲁⲙⲉⲩⲓ ⲡⲉϫⲉ ⲁⲡⲁ ⲁⲃⲣⲁϩⲁⲙ ⲛⲁϥ·ϫⲉ ⲉⲓⲥ ϩⲏⲡⲡⲉ ⲙⲡⲉⲕϧⲱⲧⲉⲃ ⲙⲡⲡⲁⲑⲟⲥ.ⲁⲗⲗⲁ ⲉⲧⲓ ϥⲟⲛϧ·ϥⲙⲏⲣ ⲡⲁⲗⲓⲛ ⲟⲛ ⲉⲕⲙⲟϣⲓ· ϧⲉⲛ ⲡⲓⲙⲱⲓⲧ.ⲟⲩⲟϩ ⲉⲕⲛⲁⲩ ⲉϩⲁⲛ ⲱⲛⲓ ⲛⲉⲙ ϩⲁⲛ ⲃⲉⲗϫⲉ.ⲉⲣⲉ ⲟⲩⲛⲟⲩⲃ ⲇⲉ ϧⲉⲛ ⲧⲟⲩⲙⲏϯ·ⲟⲩⲟⲛ ϫⲟⲙ ⲙⲡⲉⲕϩⲏⲧ ⲉⲉⲡ ⲫⲁⲓ ⲙⲫⲣⲏϯ ⲛⲛⲁⲓ. ⲡⲉϫⲁϥ ϫⲉ ⲙⲙⲟⲛ.ⲁⲗⲗⲁ ϯⲛⲁⲙⲓϣⲓ ⲛⲉⲙ ⲡⲁⲙⲉⲩⲓ ⲉϣⲧⲉⲙϥⲓⲧϥ ⲡⲉϫⲉ ⲡϧⲉⲗⲗⲟ ⲛⲁϥ ϫⲉ ⲉⲓⲥ ϩⲏⲡⲡⲉ ⲟⲛ ⲡⲡⲁⲑⲟⲥ ⲟⲛϧ.ⲁⲗⲗⲁ ϥⲙⲏⲣ. ⲡⲉϫⲁϥ ⲟⲛ ⲛϫⲉ ⲁⲡⲁ ⲁⲃⲣⲁϩⲁⲙ·ϫⲉ ⲉⲓⲥ ϩⲏⲡⲡⲉ ⲉⲁⲕⲥⲱⲧⲙ ⲉⲑⲃⲉ ⲥⲟⲛⲥⲛⲁⲩ.ϫⲉ ⲫⲟⲩⲁⲓ ⲙⲉⲓ ⲙⲙⲟⲕ·ⲟⲩⲟϩ ϥϯⲱⲟⲩ ⲛⲁⲕ ⲡⲕⲉⲟⲩⲁⲓ ⲇⲉ ⲙⲟⲥϯ ⲙⲙⲟⲕ ⲟⲩⲟϩ ϥⲕⲁⲧⲁⲗⲁⲗⲉⲓ ⲙⲙⲟⲕ. ⲁⲩϣⲁⲛⲉⲓ ⲇⲉ ϣⲁⲣⲟⲕ ⲭⲛⲁϣⲟⲡⲟⲩ ⲉⲣⲟⲕ ϧⲉⲛⲡⲁⲓⲙⲉⲩⲓ ⲛⲟⲩⲱⲧ ⲙⲡⲓⲥⲛⲁⲩ. ⲡⲉϫⲁϥ ϫⲉ ⲙⲙⲟⲛ·ⲁⲗⲗⲁ ϯⲛⲁⲡⲟⲗⲩⲙⲉⲓ ⲙⲛⲡⲁϩⲏⲧ ⲉⲑⲣⲓ ⲉⲣⲡⲡⲉⲑⲛⲁⲛⲉϥ ⲛⲉⲙ ⲡⲉⲧⲙⲟⲥϯ ⲙⲙⲟⲓ ⲙⲫⲣⲏϯ ⲙⲡⲉⲧⲙⲉⲓ ⲙⲙⲟⲓ ⲡⲉϫⲁϥ ⲇⲉ ⲛⲁϥ ⲛϫⲉ ⲁⲡⲁ ⲁⲃⲣⲁϩⲁⲙ·ϫⲉ ϩⲱⲥⲧⲉ ⲉⲉ ⲥⲉⲟⲛϧ ⲛϫⲉ ⲙⲡⲁⲑⲟⲥ.ⲁⲗⲗⲁ ⲉⲩⲙⲏⲣ ⲛⲧⲟⲧⲟⲩ ⲛⲛⲏⲉⲧⲟⲩⲁⲁⲃ

• ⲁϥϫⲟⲥ ⲛϫⲉ ⲟⲩⲁⲓ ⲛⲛⲉⲛⲉⲓⲟϯ·ϫⲉ ⲛⲉ ⲟⲩⲟⲛ ⲟⲩϧⲉⲗⲗⲟ ϧⲉⲛ ⲛⲣⲓ ⲛⲣⲉϥϣⲡϧⲓⲥⲓ·ⲉϥⲫⲟⲣⲉⲓⲛ ⲟⲩⲑⲙⲏ·ⲁϥϣⲉⲛⲁϥ ⲇⲉ ϣⲁ ⲁⲡⲁ ⲁⲙⲱⲛⲁ. ⲁϥⲛⲁⲩ ⲉⲣⲟϥ ⲛϫⲉ ⲡϧⲉⲗⲗⲟ ⲉϥⲫⲟⲣⲉⲓⲛ ϯⲑⲙⲏ· ⲡⲉϫⲁϥ ⲛⲁϥ ϫⲉ ⲛⲧⲁⲓⲛⲁ ϯϩⲏⲟⲩ ⲛⲁⲕ ⲁⲛ ⲛⲗϩⲗⲓ. ⲟⲩⲟϩ ⲁϥϣⲉⲛϥ ϫⲉ ⲟⲩⲟⲛ ϣⲟⲙⲧ ⲙⲙⲉⲩⲓ ⲉⲛⲟⲭⲗⲉⲓ ⲛⲏⲓ· ⲉⲓⲧⲉ ⲥⲟⲣⲙⲉⲧ ⲉⲃⲟⲗ ϩⲓ ⲡϣⲁϥⲉ·ⲉⲓⲧⲉ ϣⲉⲛⲏⲓ ⲉⲡϣⲙⲙⲟ·ⲫⲙⲁ ⲉⲧⲉ ⲙⲙⲟⲛ ϩⲗⲓ ⲛⲁⲥⲟⲩⲱⲛⲧ ⲉⲓⲧⲉ ⲟⲧⲡ ⲉϧⲟⲩⲛ ⲉⲟⲩⲣⲓ ⲉⲓⲧⲉ ⲛⲧⲁϣⲧⲉⲙⲁⲡⲁⲛⲧⲁ ⲉϩⲗⲓ· ⲛⲧⲁⲟⲩⲱⲙ ⲙⲡⲁⲥⲛⲁⲩ. ⲡⲉϫⲁϥ ⲛⲁϥ ⲛϫⲉ ⲁⲡⲁ ⲁⲙⲱⲛⲁ ϫⲉ ⲙⲙⲟⲛ ϩⲗⲓ ϧⲉⲛ ⲡⲓϣⲟⲙⲧ ⲉⲣⲛⲟⲫⲣⲓ ⲛⲁⲕ· ⲁⲗⲗⲁ ϩⲉⲙⲥⲓ ⲛⲑⲟⲕ ϧⲉⲛ ⲧⲉⲕⲣⲓ ⲛⲧⲉⲕⲟⲩⲱⲙ ⲛⲟⲩⲕⲟⲩϫⲓ ⲙⲙⲏⲛⲓ·ⲛⲧⲉⲕϧⲟⲧϧⲉⲧ ⲛⲛⲓⲅⲣⲁⲫⲏ

• ⲁϥϫⲟⲥ ⲛϫⲉ ⲁⲡⲁ ⲇⲁⲛⲓⲏⲗ.ϫⲉ ⲛϩⲱⲥⲟⲛ ⲡⲥⲱⲙⲁ ϯⲟⲩⲱ.ϯⲯⲩⲭⲏ ϩⲱⲥ ϣⲁⲥϫⲱⲃ ⲟⲩⲟϩ ⲛϩⲱⲥⲟⲛ ⲡⲥⲱⲙⲁ ϫⲱⲃ.ϯⲯⲩⲭⲏ ϩⲱⲥ ϯⲟⲩⲱ.

• ⲁϥϫⲟⲥ ⲛϫⲉ ⲁⲡⲁ ⲇⲁⲛⲓⲏⲗ ϫⲉ ⲙⲡⲥⲏⲟⲩ ⲉⲣⲉ ⲁⲡⲁ ⲁⲣⲥⲉⲛⲓⲟⲥ ϧⲉⲛ ϣⲓϩⲏⲧ.ⲉⲛⲁϥⲙⲙⲁⲩ ⲡⲉ ⲛϫⲉ ⲟⲩⲙⲟⲛⲁⲭⲟ ⲥⲉϥϩⲱⲃⲧ ⲛⲛⲉⲥⲕⲉⲩⲏ ⲛⲛⲓϧⲉⲗⲗⲟ. ⲁⲡⲁ ⲁⲣⲥⲉⲛⲓⲟⲥ ⲇⲉⲉ ϥⲟⲩⲱϣ ⲉϯϩⲏⲟⲩ ⲛⲧⲉϥⲯⲩⲭⲏ ⲁϥϭⲓⲧϥ ⲉϧⲟⲩⲛ ⲉⲧⲉϥⲣⲓ·ⲟⲩⲟϩ ⲡⲉϫⲁϥ ⲛⲁϥ ϫⲉ ⲛⲉⲛⲭⲁ ⲛⲓⲃⲉⲛ ⲉⲧⲉⲕⲟⲩⲁϣⲟⲩ ϯⲛⲁⲧⲏⲓⲧⲟⲩ ⲛⲁⲕ ⲙⲱⲛⲟⲛ ⲙⲡⲣϭⲓⲟⲩⲓ ⲟⲩⲟϩ ⲁϥϯⲛⲁϥ ⲛⲭⲣⲉⲓⲁⲛⲓⲃⲉⲛ ⲛⲧⲁϥ. ⲁϥϣⲉⲛⲁϥ ⲟⲛ ⲁϥϩⲱⲃⲧ.ⲛⲓϧⲗⲗⲟ ⲇⲉ ⲉⲧⲁⲩⲩⲛⲁⲩ ⲉⲣⲟϥ ϫⲉ ⲙⲡⲉϥⲗⲟ ⲉϥϩⲱⲃⲧ.ⲁⲩⲫⲱⲧ ⲛⲥⲱϥ ⲉⲩϫⲱ ⲙⲙⲟⲥ ϫⲉ ⲉϣⲱⲡ ⲉⲟⲩⲥⲟⲛ ⲡⲉ ⲉⲁⲩϫⲉⲙϥ ⲉⲟⲩⲟⲛ ⲟⲩϣⲱⲧ ϩⲓⲱⲧϥ·ⲛⲧⲉ ⲑⲙⲉⲧϫⲱⲃ·ⲓⲥϣⲉ ⲉⲧⲱⲟⲩⲛ ϩⲁ ⲫⲁⲓ ϣⲁⲛⲧⲉϥϣⲱⲡⲓ ϫⲱⲣⲓ ⲉϣⲱⲡ ⲇⲉ ⲉϥϩⲱⲃⲧ ⲟⲩⲟϩ ⲛⲥⲉϯⲥⲃⲱ ⲛⲁϥ ⲛϥϣⲧⲉⲙϩⲱ ⲉⲣⲟϥ ⲥϣⲉ ⲉⲛⲟϫϥ ⲉⲃⲟⲗ ϫⲉ ⲧⲉϥⲯⲩⲭⲏ ϣⲁϥⲧⲁⲕⲟⲥ· ⲟⲩⲟϩ ⲟⲩⲟⲛ ⲛⲏⲉⲧϧⲉⲛ ⲡⲧⲟⲡⲟⲥ ϣⲁϥϣⲑⲟⲣⲧⲉⲣⲟⲩ

• ϧⲉⲛ ⲧⲁⲣⲭⲏ ⲛⲁⲡⲁ ⲉⲩⲁⲅⲣⲓⲟⲥ ⲁϥϣⲉⲛⲁϥ ϣⲁ ⲟⲩϧⲉⲗⲗⲟ·ⲟⲩⲟϩ ⲡⲉϫⲁϥ ⲛⲁϥ ϫⲉ ⲁⲡⲁ ⲁϫⲓ ⲟⲩⲥⲁϫⲓ ⲉⲣⲟⲓ·ϫⲉ ⲉⲓⲛⲁⲱⲛϧ ⲛⲁϣ ⲛⲣⲏϯ. ⲛⲑⲟϥ ⲇⲉ ⲡⲉϫⲁϥ ⲛⲁϥ ϫⲉ ⲥϣⲉ ϫⲉ ⲭⲟⲩⲱϣ ⲉⲉⲣⲧⲉⲗⲓⲟⲥ ⲙⲡⲣⲕⲁⲧⲁⲫⲣⲟⲛⲉⲓⲛ ⲟⲩⲟϩ ⲁⲕϣⲁⲛϣⲉⲛⲁⲕ ϣⲁ ⲟⲩⲁⲓ ·ⲙⲡⲣⲥⲁϫⲓ ⲛϣⲟⲣⲡ ⲙⲡⲁⲧⲉϥϣⲉⲛⲕ· ⲛⲑⲟϥ ⲇⲉ ⲁϥⲧⲱⲃⲥ ϩⲓϫⲉⲛ ⲡⲥⲁϫⲓ ⲁϥⲫⲁϧⲧϥ ⲛⲁϥ ⲉϥϫⲱ ⲙⲙⲟⲥ ϫⲉⲭⲱ ⲛⲏⲓ ⲉⲃⲟⲗ· ⲛⲁⲙⲉ ⲁⲓⲟⲩⲉϣ ⲟⲩⲙⲏϣ ⲛϫⲱⲙ· ⲟⲩⲟϩ ⲙⲡⲓⲥⲱⲟⲩ ⲛϯⲙⲉⲧⲥⲁⲃⲉ ⲉⲛⲉϩ. ⲟⲩⲟϩ ⲁϥϯϩⲏⲟⲩ ⲁϥⲉⲓ ⲉⲃⲟⲗ

• ϯⲛⲟⲩ ⲇⲉ ϩⲱϥ ⲁⲛϣⲁⲛⲥⲱⲟⲩϩ ⲉⲛⲉⲛⲉⲣⲏⲟⲩ·ϣⲁⲛⲓ ⲉϩⲣⲏⲓ ⲉⲟⲩⲕⲁⲧⲁⲗⲁⲗⲓⲁ· ⲟⲩⲟϩ ϣⲁⲣⲉ ⲡⲓⲟⲩⲁⲓ·ⲡⲓⲟⲩⲁⲓ ϭⲱ ⲉϥⲥⲱⲕ ⲙⲡⲉⲧϩⲓⲧⲟⲩⲱϥ ⲉϩⲣⲏⲓ ⲉⲫⲛⲟⲩⲛ·

• ⲁϥϫⲟⲥ ⲛϫⲉ ⲟⲩϧⲉⲗⲗⲟ ϫⲉ ⲁⲣⲉϣⲁⲛ ⲫⲣⲱⲙⲓ ⲉⲧⲥⲁϧⲟⲩⲛ ⲛⲏⲫⲉ·ⲉⲓⲉ ⲟⲩⲟⲛ ϣϫⲟⲙ ⲙⲙⲟϥ ⲉⲁⲣⲉϩⲉ ⲡⲉⲧϩⲓⲃⲟⲗ· ⲥϣϫ ⲉⲙⲡⲁⲓϣⲟⲡ ⲁⲛ ⲙⲁⲣⲉⲛⲁⲣⲉϩ ⲉⲡⲉⲛⲗⲁⲥ ⲉⲡⲉⲧϩⲱⲟⲩ ⲛⲃⲉⲛ ϧⲉⲛ ϫⲟⲙ ⲛⲓⲃⲉⲛ·

• ⲁϥϫⲟⲥ ⲟⲛ ϫⲉ ϯⲭⲣⲉⲓⲁ ⲧⲉ ⲙⲡϩⲱⲃ ⲉⲧⲁⲛⲓ ⲅⲁⲣ ⲉⲡⲥⲓⲙⲁ ⲉⲑⲃⲉ ⲫⲁⲓ· ⲡⲉⲧϯⲥⲃⲱ ⲅⲁⲣ ϧⲉⲛ ⲛⲧⲧⲁⲡⲣⲟ ⲛⲛⲉϥⲓⲣⲓ ⲁⲛ ⲙⲡϩⲱⲃ ⲟⲩⲕⲓⲛⲇⲩⲛⲟⲥ ⲛⲁϥ ⲡⲉ·

• ⲁⲕⲉⲟⲩⲁⲓ ⲛⲛⲉⲛⲓⲟϯ ϫⲟⲥ ϫⲉ ⲥϣⲉ ⲉⲫⲣⲱⲙⲓ ⲉⲕⲁⲟⲩⲉⲣⲅⲁⲥⲓⲁ ⲛⲁϥⲥⲁϧⲟⲩⲛ ⲙⲙⲟϥ· ⲁϥϣⲁⲛⲥⲉⲣϥ ⲙⲉⲛ ⲉⲧⲉⲣⲅⲁⲥⲓⲁ·ϣⲁⲣⲉ ⲡⲕⲱⲣϥ ϣⲉⲛⲁϥ ⲛϩⲁⲛⲥⲟⲡ ⲥⲟⲡ·ⲁⲗⲗⲁ ⲛⲛⲉⲉϥϫⲉⲙⲙⲁ ⲛⲟⲩⲱϩ ⲛϧⲏⲧϥ. ⲁⲩϣⲁⲛⲉⲣϫⲟⲓⲥ ⲇⲉ ⲟⲛ ⲉⲣⲟϥ ⲉⲃⲟⲗϩⲓⲧⲉⲛ ϯⲉⲭⲙⲁⲗⲱⲥⲓⲁ·ϣⲁⲣⲉ ϯϩⲩⲡⲟⲙⲟⲛⲏ ϣⲉⲛⲁⲥ ϣⲁⲣⲟϥ ⲛϩⲁⲛⲥⲟⲡ ⲥⲟⲡ· ⲁⲗⲗⲁ ⲁϥϣⲧⲉⲙⲭⲁⲙⲁ ⲛⲁⲥ ⲉⲑⲃⲉ ⲧⲕⲁⲕⲓⲁ ϣⲁⲥⲁⲛⲁⲭⲱⲣⲉⲓ.

• ⲁⲟⲩⲁⲓ ⲛⲛⲓϧⲉⲗⲗⲟⲓ ⲁⲙⲁϩⲓ ⲛⲧⲉϥϫⲓϫ ⲙ̀ⲡⲉⲫⲙⲁⲑⲏⲧⲏⲱ ⲉϥϫⲱⲙⲙⲟⲥ·ϫⲉ ⲟⲩⲱⲙ ϧⲉⲛ ⲟⲩⲉⲡⲓⲥⲧⲏⲙⲉⲓ

• ⲡⲉϫⲱⲟⲩ ⲛⲱⲟⲩ ⲛϫⲉ ⲛⲓϧⲉⲗⲗⲟⲓ ϫⲉ ⲧⲉⲧⲉⲛϫⲱ ⲙⲙⲟⲥ ϫⲉ ⲙⲙⲟⲛⲧⲉⲛ ϩⲗⲓ ⲙⲙⲉⲩⲓ ⲉϥϩⲱⲟⲩ ϧⲉⲛ ⲡⲉⲛϩⲏⲧ·ⲟⲩⲟϩ ⲟⲛ ⲡⲉⲧⲫⲱⲣϫ ⲙⲙⲱⲧⲉⲛ ⲉⲧⲉⲧⲉⲛⲯⲩⲭⲏ ⲉⲧⲁⲩⲥⲱⲧⲉⲙ ⲇⲉ ⲛϫⲉ ⲛⲉⲛⲉⲓⲟϯ ⲁⲩⲉⲣϣⲫⲏⲣⲓ ⲟⲩⲟϩ ⲡⲉϫⲱⲟⲩ ϫⲉ ⲙⲙⲉⲩⲓ ⲉⲧϩⲱⲟⲩ ⲛⲁⲙⲉ ⲛⲉϣⲁⲩⲫⲟⲣϫⲉⲛ ⲉⲧⲉⲛⲯⲩⲭⲏ.

• ⲟⲩⲟϩ ⲡⲉϫⲁϥⲙ ⲡⲉϥⲥⲟⲛ ϫⲉ ⲕⲉⲣⲭⲣⲉⲓⲁ ⲛϩⲁⲛⲕⲟⲩϫⲓ ⲛⲱⲓⲕ. ⲡⲉϫⲁϥ ϫⲉ ⲙⲙⲟⲛ ⲡⲁⲥⲟⲛ.ⲙⲫⲛⲁⲩ ⲅⲁⲣ ⲉⲓⲣⲭⲣⲉⲓⲁ ⲟⲩⲟϩ ⲉⲓϭⲓ ϩⲗⲓ ⲛⲧⲟⲧⲕ.ⲉϣⲁⲓⲉⲣ ⲙⲫⲣⲏϯ ⲉⲧⲁⲓϭⲓ ⲛⲟⲩⲕⲱϩⲧ ⲉϧⲟⲩⲛ ⲉⲡⲁⲏⲓ.ⲟⲩⲟϩ ϣⲁϥⲟϫⲛϥ. ⲙⲫⲛⲁⲩ ϩⲱϥ ⲉⲓϭⲓ ϩⲗⲓ ⲛⲧⲟⲧⲕ ⲁⲛ ⲁⲓⲉⲣϩⲟⲩⲟ ϧⲉⲛ ϩⲱⲃ ⲛⲓⲃⲉⲛ

• ⲡⲉϫⲉ ⲡⲓϧⲉⲗⲗⲟ ϫⲉ ⲛⲉ ⲟⲩⲟⲛ ⲟⲩⲣⲱⲙⲓ ⲉϥϧⲉⲛ oⲩϭⲉⲡⲏ ⲟⲩⲟϩ ⲟⲩⲕⲉⲟⲩⲁⲓ ⲉⲧⲁϥϫⲟⲥ ⲛⲁϥ ϫⲉ ϯⲉⲣⲡⲓⲑⲩⲙⲉⲓⲛ ⲉⲛⲁⲩ ⲉⲡⲟⲩⲣⲟ. ⲡⲉϫⲉ ⲟⲩⲁⲓ ⲛⲁϥ ϫⲉ ϭⲓⲧ ⲙⲙⲁⲩ. ⲡⲉϫⲁϥ ⲛⲁϥ ϫⲉ ⲁⲛⲟⲕ ϯⲛⲏⲟⲩ ⲛⲉⲙⲁⲕ ϣⲁ ⲧⲫⲁϣⲓ ⲙⲡⲓⲙⲱⲓⲧ. ⲟⲩⲟϩ ⲡⲉϫⲁϥ ⲛⲕⲉϣⲫⲏⲣ ϫⲉ ϭⲓⲧ ϣⲁ ⲡⲟⲩⲣⲟ. ⲡⲉϫⲁϥ ⲛⲁϥ, ϫⲉ ϯⲛⲏⲩⲟ ⲛⲉⲙⲁⲕ ϣⲁ ⲡⲡⲁⲗⲁⲧⲓⲟⲛ. ⲡⲉϫⲁϥ ⲙⲡⲕⲉϣⲫⲏⲣ ϫⲉ ϭⲓⲧ ϣⲁ ⲡⲟⲩⲣⲟ. ⲡⲉϫⲁϥ ⲛⲁϥ ϫⲉ ⲁⲛⲟⲕ ϯⲛⲁϭⲓⲧⲕ ϣⲁ ⲡⲟⲩⲣⲟ ϧⲉⲛ ⲟⲩⲡⲁⲣⲣⲏⲥⲓⲁ. ⲟⲩⲟϩ ϯⲛⲁⲥⲁϫⲓ ϩⲁⲣⲟⲕ. ⲡⲉϫⲱⲟⲩ ⲇⲉ ⲛⲁϥ ϫⲉ ⲃⲱⲗ ⲉⲣⲟⲛ ⲛⲧⲁⲓⲡⲁⲣⲁⲃⲟⲗⲏ. ⲟⲩⲟϩ ⲡⲉϫⲁϥ ϫⲉ ⲧϣⲟⲣⲡ ⲉⲧⲉ ⲧⲁⲥⲕⲏⲥⲓⲥ ⲉϣⲁⲥϭⲓⲙⲱⲉⲓⲧ ϣⲁ ⲧⲫⲁϣⲉⲓ ⲙⲫⲙⲱⲓⲧ. ⲫⲙⲁϩⲥⲛⲁⲩ ⲡⲉ ⲑⲙⲉⲧϩⲁⲕ ⲑⲁⲓ ⲉⲧⲫⲏϩ ϣⲁϩⲣⲏⲓ ⲉϯⲡⲩⲗⲏ . ⲑⲙⲁϩϣⲟⲙⲧ ⲉⲧⲉ ϯⲙⲉⲧⲛⲁⲏⲧ ⲑⲁⲓ ⲉϣⲁⲥϭⲓⲧⲟⲩ ⲉϧⲟⲩⲛ ϣⲁ ϯϩⲏⲥⲩⲭⲓⲁ ϧⲉⲛ ⲟⲩⲡⲁⲣⲣⲏⲥⲓⲁ.

• ⲁⲩϫⲟⲥ ⲛϫⲉ ⲛⲓϧⲉⲗⲗⲟⲓ ϫⲉ ⲡϧⲉⲗⲗⲟ ϣⲓⲛⲓ ⲛⲥⲁ ϩⲗⲓ ⲁⲛ ⲛⲧⲟⲧⲟⲩ ⲛⲛⲓⲣⲉⲙⲛⲃⲉⲣⲣⲉ ⲙⲫⲣⲏϯ ⲛϯⲙⲉⲧⲥⲉⲧⲉⲙϩⲏⲧ

• ⲟⲩ ⲅⲁⲣ ⲡⲉ ⲉⲧⲉ ⲡⲓⲣⲱⲙⲓ ⲛⲁϫⲉⲙϩⲏⲟⲩ ⲙ̀ⲙⲟϥ ⲁⲫϣⲁⲛϫⲉⲙϩⲏⲟⲩ ⲙⲡⲓⲕⲟⲥⲙⲟⲥ ⲧⲏⲣϥ ⲟⲩⲟϩ ⲛⲧⲉϥϯⲟⲥⲓ ⲛⲧⲉϥⲯⲩⲭⲏ

• ⲁϥϫⲟⲥ ⲟⲛ ⲛϫⲉ ⲡⲓϧⲉⲗⲗⲟ·ϫⲉ ⲁⲣⲉϣⲁⲛ ⲡⲣⲱⲙⲓ ⲁⲣⲉϩ ⲉⲧⲉϥⲧⲁⲝⲓⲥ ⲛϥⲛⲁϣⲑⲟⲣⲧⲉⲣ ⲁⲛ·

• ⲁϥϫⲟⲥ ⲛϫⲉ ⲁⲡⲁ ⲓⲱⲥⲏⲫ·ϫⲉ ⲉⲛϩⲙⲥⲓ ⲛⲉⲙ ⲁⲡⲁ ⲡⲟⲓⲙⲏⲛ ⲁϥⲁⲛⲟⲙⲁϩⲉ ⲛⲁⲡⲁ ⲁⲅⲁⲑⲟⲛ ⲟⲩⲟϩ ⲛⲉⲛϫⲱⲙⲙⲟⲥ ⲛⲁϥ ϫⲉ ⲟⲩⲃⲉⲣⲓ ⲡⲉ ⲟⲩⲟϩ ⲉⲑⲃⲉ ⲟⲩⲭⲙⲟⲩϯ ⲉⲣⲟϥ ϫⲉ ⲁⲡⲁ ⲟⲩⲟϩ ⲡⲉϫⲁϥ ⲛϫⲉ ⲁⲡⲁ ⲡⲟⲓⲙⲏⲛ·ϫⲉ ⲣⲱϥ ⲑⲏⲉⲛⲁⲧⲏⲓϥ ⲑⲣⲟⲩⲙⲟⲩϯ ⲉⲣⲟϥ ϫⲉ ⲁⲡⲁ·

• ⲁⲩϫⲟⲥ ⲉⲑⲃⲉ ⲁⲡⲁ ⲡⲟⲓⲙⲏⲛ ϫⲉ ⲙⲡⲉϥⲟⲩⲱϣ ⲉⲛⲉϩ ⲉⲭⲁⲡⲉϥⲥⲁϫⲓ ⲉϫⲉⲛ ⲡⲥⲁϫⲓ ⲛϩⲗⲓ ⲛϧⲉⲗⲗⲟ·ⲁⲗⲗⲁ ⲛⲑⲟϥ ⲛϩⲟⲩⲟ ⲛⲉ ϣⲁϥϯⲱⲟⲩ ⲙⲡⲟⲩⲥⲁϫⲓ ⲡⲁⲣⲁ ⲫⲱϥ·

• ⲁϥϣⲉⲛⲁϥ ⲛⲥⲏⲟⲩ ⲉϣⲓϩⲏⲧ ⲛϫⲉ ⲫⲙⲁⲕⲁⲣⲓⲟⲥ ⲁⲡⲁ ⲑⲉⲱⲫⲓⲗⲟⲥ ⲡⲁⲣⲭⲏ ⲉⲡⲓⲥⲕⲟⲡⲟⲥ· ⲁⲩⲥⲱⲟⲩϩ ⲇⲉ ⲛϫⲉ ⲛⲉⲥⲛⲏⲟⲩ ⲁⲩϫⲟⲥ ⲛⲁⲡⲁ ⲡⲁⲙⲃⲱ ϫⲉ ⲧⲁⲟⲩⲉ ⲟⲩⲥⲁϫⲓ ⲛⲟⲩⲱⲧ ⲉⲡⲡⲁⲡⲁⲥ ⲛⲧⲉϥϯϩⲏⲟⲩ ⲡⲉϫⲁϥ ⲛⲱⲟⲩ ⲛϫⲉ ⲡϧⲉⲗⲗⲟ ϫⲉ ⲉϣⲱⲡ ⲙⲡⲉϥϯϩⲏⲟⲩⲉ ⲡⲉⲛⲕⲁⲣⲱϥ·ⲉⲓⲉⲉⲛϣⲁⲛⲥⲁϫⲓ ⲟⲛ ⲛϥⲛⲁϯϩⲏⲟⲩ ⲁⲛ·

• ⲁϥϫⲟⲥ ⲛϫⲉ ⲟⲩⲥⲟⲛ ⲙⲡⲓⲥⲧⲟⲥ·ϫⲉ ⲁⲛϣⲉⲛⲁⲛ ⲉⲛⲟⲓ ⲛϣⲁϣϥ ⲛⲥⲟⲛ ⲛⲁⲛⲁⲭⲱⲣⲏⲧⲏⲥ ϣⲁ ⲁⲡⲁ ϫⲓϫⲱⲓ ⲉϥⲟⲩⲏϩ ϧⲉⲛ ⲛⲑⲙⲟⲩⲓ ⲙⲡⲕⲗⲟⲩⲥⲙⲁ· ⲁⲛⲡⲁⲣⲁⲕⲁⲗⲉⲓ ⲙⲙⲟϥ ⲉⲑⲣⲉϥϫⲱ ⲛⲁⲛ ⲛⲟⲩⲥⲁϫⲓ· ⲟⲩⲟϩ ⲡⲉϫⲁϥ ϫⲉ ⲭⲱ ⲛⲏⲓ ⲉⲃⲟⲗ ⲁⲛⲟⲕ ⲟⲩⲣⲱⲙⲓ ⲛϩⲓⲇⲓⲱⲧⲏⲥ·ⲁⲗⲗⲁ ⲁⲓϣⲉⲛⲏⲓ ϣⲁ ⲁⲡⲁ ϩⲱⲣ·ⲛⲉⲙ ⲁⲡⲁ ϩⲁⲧⲣⲏ· ⲛⲁⲣⲉ ⲁⲡⲁ ϩⲱⲣ ⲇⲉ ϣⲱⲛⲓ ⲙⲙⲉⲧϣⲙⲏⲛⲓ ⲛⲣⲟⲙⲡⲓ· ⲟⲩⲟϩ ⲁⲓⲫⲁϧⲧ ⲛⲱⲟⲩ ϫⲉ ⲁϫⲓ ⲟⲩⲥⲁϫⲓ ⲉⲣⲟⲓ ⲡⲉϫⲉ ⲁⲡⲁ ϩⲱⲣ ⲇⲉ ⲛⲏⲓ ϫⲉ ⲟⲩ ⲡⲉⲧⲉ ⲟⲩⲟⲛ ⲛⲧⲏⲓ ⲉϫⲟϥ ⲛⲁⲕ ⲙⲁϣⲉⲛⲁⲕ ⲡⲉⲧⲉϣⲛⲁⲩ ⲉⲣⲟϥ ⲁⲣⲓⲧϥ·

• ⲛⲁⲓ ⲁϥϫⲱⲟⲩ ⲛϫⲉ ⲁⲡⲁ ϫⲓϫⲱⲓ· ⲟⲩⲁⲓ ⲇⲉ ⲉⲃⲟⲗ ⲛϧⲏⲧⲉⲛ ⲡⲁⲣⲁⲕⲁⲗⲉⲓ ⲙⲙⲟϥ ϫⲉ ⲁⲣⲓⲧⲁⲅⲁⲡⲏ ⲁϫⲓ ⲟⲩⲥⲁϫⲓ ⲉⲣⲟⲛ ϩⲱⲕ· ⲡⲉϫⲁϥ ϫⲉ ⲑⲙⲉⲧⲁⲧⲟⲡⲕ ϧⲉⲛ ⲟⲩⲥⲱⲟⲩⲛ· ⲡⲉϫⲉ ⲕⲉⲟⲩⲁⲓ ⲇⲉ ⲛⲁϥ ⲛϧⲏⲧⲉⲛ·ϫ ⲉⲟⲩ ⲧⲉ ⲑⲙⲉⲧϣⲉⲙⲙⲟ ⲡⲁⲓⲱⲧ· ⲡⲉϫⲁϥ ϫⲉ ⲡⲕⲁⲣⲱϥ ⲡⲉ ⲟⲩⲟϩ ⲁϫⲓⲥ ϧⲉⲛ ⲙⲁⲓ ⲛⲓⲃⲉⲛ ⲉⲧⲭⲛⲁϣⲉⲛⲁⲕ ⲉⲣⲱⲟⲩ·ϫⲉ ⲙⲙⲟⲛϯϩⲱⲃ· ⲑⲁⲓ ⲧⲉ ⲑⲙⲉⲧϣⲉⲙⲙⲟ·

• ⲁϥϣⲉⲛⲁϥ ⲛϫⲉ ⲟⲩⲥⲟⲛ ϣⲁ ⲁⲡⲁ ϫⲓϫⲱⲓ ⲉⲡⲧⲱⲟⲩ ⲛⲁⲡⲁ ⲁⲛⲧⲱⲛⲓⲟⲥ ⲟⲩⲟϩ ⲁⲩⲥⲁϫⲓ ⲁⲩϫⲟϥ ⲛⲁⲡⲁ ϫⲓϫⲱⲓ ϫⲉ ϯⲛⲟⲩ ⲙⲡⲁⲧⲉⲕⲫⲟϩ ⲉⲡϣⲓ ⲛⲁⲡⲁ ⲁⲛⲧⲱⲛⲓⲟⲥ ⲁⲡⲁ·· ⲡⲉϫⲁϥ ⲛⲱⲟⲩ ϫⲉ ⲉⲃⲟⲗⲑⲱⲛ· ⲉⲛⲉ ⲟⲩⲟⲛϯ ⲙⲙⲁⲩ ⲛⲟⲩⲙⲉⲩⲓ ⲛⲟⲩⲱⲧ ⲛⲧⲉ ⲁⲡⲁ ⲁⲛⲧⲱⲛⲓⲟⲥ ⲛⲁⲓⲛⲁϣⲱⲡⲓ ⲛⲕⲱϩⲧ ⲧⲏⲣⲧ· ⲡⲗⲏⲛ ⲁⲓⲛⲁⲩ ⲉⲟⲩⲣⲱⲙⲓ ⲉⲟⲩⲟⲛⲭϫⲟⲙ ⲙⲙⲟϥ ⲉⲧⲱⲟⲩⲛ ϧⲁ ⲡⲉϥⲙⲉⲩⲓ ⲙⲁⲩⲁⲧϥ ϧⲉⲛ ⲟⲩϧⲓⲥⲓ

• ⲁⲥϫⲟⲥ ⲛϫⲉ ⲑⲙⲁⲕⲁⲣⲓⲁ ⲥⲩⲅⲕⲗⲏⲧⲓⲕⲏ ϫⲉ ⲙⲫⲣⲏϯ ⲉⲧⲉ ⲙⲙⲟⲛ ϣϫⲟⲙ ⲛϫⲟⲓ ⲉⲧⲁϩⲟ ⲉⲣⲁⲧϥ ⲁϭⲛⲉ ⲓϥⲧ.ⲑⲁⲓ ⲧⲉ ⲧϧⲉ ⲟⲩⲁⲧϫⲟⲙ ⲡⲉ ⲟⲩⲥⲟⲫⲓⲁ ⲭⲱⲣⲓⲥ ⲡⲓⲑⲉⲃⲓⲟⲛϩⲏⲧ.

• ⲁϥϫⲟⲥ ⲛϫⲉ ⲁⲡⲁ ϩⲩⲡⲏⲣⲉⲭⲓⲟⲥ.ϫⲉ ⲟⲩϣϣⲏⲛ ⲛⲱⲛϧ ⲉϥⲫⲏⲧ ⲉⲡϭⲓⲥⲓ ⲡⲉ ⲡⲓⲑⲉⲃⲓⲟⲛϩⲏⲧ

• ⲁϥϫⲟⲥ ⲛϫⲉ ⲟⲩϧⲉⲗⲗⲟ ϫⲉ ⲙⲡⲉⲣⲭⲁ ⲡⲉⲕϩⲏⲧ ⲉⲥⲁϫⲓ ⲛⲥⲁ ⲡⲉⲕⲥⲟⲛ·ⲉⲕϫⲱ ⲙⲙⲟⲥ ϫⲉ ϩⲱⲥ ϯⲛⲏⲫⲉ ⲉϩⲟⲧⲉ ⲉⲣⲟϥ·ⲟⲩⲟϩ ⲟⲛ ϫⲉ ϯⲁⲥⲕⲉⲓ ⲉϩⲟⲧⲉ ⲉⲣⲟϥ·ⲟⲩⲟϩ ϫⲉ ϯⲛⲟⲉⲓ ⲡⲁⲣⲁⲣⲟϥ· ⲁⲗⲗⲁ ϩⲩⲡⲟⲧⲁⲥⲥⲉ ⲛϯⲯⲩⲭⲏ ⲛⲑⲙⲉⲧϩⲏⲕⲓ· ⲛⲧⲉⲕϫⲫⲟ ⲛⲁⲕ ⲛⲧⲁⲅⲁⲡⲏ ⲁϭⲛⲉ ϩⲩⲡⲟⲕⲣⲓⲛⲓ·ϫⲉ ⲛⲛⲉⲕⲃⲱⲗⲉⲃⲟⲗ ⲙⲡϣⲟⲩϣⲟⲩ ⲛⲧⲉⲕⲯⲩⲭ

• ⲁϥϫⲟⲥ ⲛⲓⲟⲩϧⲉⲗⲗⲟ·ϫⲉ ⲡⲉⲧⲟⲩⲧⲁⲓⲟ ⲙⲙⲟϥ ⲡⲁⲣⲁⲡⲉϥⲙⲡϣⲁ·ⲉϥϣⲟⲩϣⲟⲩ ⲙⲙⲟϥ ⲉϫⲱϥ ϣⲁϥϯⲟⲥⲓ ⲧⲱⲛⲟⲩ

• ⲡⲉϫⲉ ⲡϧⲉⲗⲗⲟ ϫⲉ ⲉⲛⲟⲩⲉϣ ⲡⲕⲁⲣⲱϥ·ⲡⲉϥⲥⲙⲟⲧ ⲣⲱϣⲉⲓ ⲡⲉⲧϩⲓⲧⲟⲩⲱⲛ

• ⲁⲕϣⲁⲛ ϫⲉⲙⲙⲟⲙ ⲉⲧⲱⲟⲩⲛ ⲉⲩⲥⲱϣ ⲙⲙⲟⲕ ⲟⲩⲛⲟϫ ⲛϩⲱⲃ ⲡⲉ ⲫⲁⲓ ⲡⲁⲣⲁ ⲛⲓⲁⲣⲉⲧⲏ ⲧⲏⲣⲟⲩ.

• ⲁⲩϭⲱⲗⲡ ⲉⲃⲟⲗ ⲛⲁⲡⲁ ⲁⲛⲧⲱⲛⲓⲟⲥ ϩⲓ ⲡϣⲁϥⲉ·ϫⲉ ⲟⲩⲟⲛ ⲟⲩⲁⲓ ⲉϥⲓⲛⲓ ⲙⲙⲟⲕ ϧⲉⲛ ⲧⲡⲟⲗⲓⲥ·ⲉⲟⲩⲥⲏⲓⲛⲓ ⲡⲉ ϧⲉⲛ ⲧⲉϥⲧⲉⲭⲛⲓ·ⲉϥϯⲙⲡⲉϥϩⲟⲩⲟ ⲛⲛⲏⲉⲧϣⲁⲧ. ⲟⲩⲟϩ ϣⲁϥⲉⲣ ⲡⲉϩⲟⲟⲩ ⲧⲏⲣϥ ⲉϥⲉⲣϩⲱⲃ

• ⲁϥϫⲟⲥ ⲟⲛ ϫⲉ ⲫⲏⲉⲧⲁⲙⲟⲛⲓ ⲁⲛ ⲙⲡⲉϥⲗⲁⲥ.ⲙⲁⲗⲓⲥⲧⲁ ⲙⲫⲛⲁⲩ ⲙⲡϫⲱⲛⲧ ⲙⲡⲉϥⲉⲣϭⲟⲓⲥ ⲛϩⲗⲓ ⲙⲡⲁⲑⲟⲥ

• ⲁϥϫⲟⲥ ⲟⲛ ϫⲉ ⲙⲡⲉⲣⲧⲁⲟⲩⲉ ϩⲗⲓ ⲛⲥⲁϫⲓ ⲉϥϩⲱⲟⲩ ⲉⲃⲟⲗϧⲉⲛ ⲣⲱⲕ.ⲑⲃⲱ ⲛⲁⲗⲟⲗⲓ ⲅⲁⲣ ⲙⲡⲁⲥⲧⲁⲟⲩⲉ ϣⲟⲛϯ ⲉⲃⲟⲗ

• ⲁϥϫⲟⲥ ⲟⲛ ϫⲉ ⲉⲣⲉ ⲡⲉⲧⲕⲁⲧⲁⲗⲁⲗⲉⲓ ⲙⲡⲉϥⲥⲟⲛ ϣⲁϥⲧⲁⲕⲟ ⲅⲁⲣ ⲛϯⲯⲩⲭⲏ ⲙⲫⲏⲉⲧⲥⲱⲧⲙ.ⲟⲩⲟϩ ⲧⲉϥⲕⲉⲟⲩⲏⲓ ⲙⲙⲓⲛ ⲙⲙⲟϥ
• ⲁϥϫⲟⲥ ⲛ̀ϫⲉ ⲁⲡⲁ ⲓⲥⲁⲁⲕ ϫⲉ ⲛⲉⲛⲓⲟϯ ⲛⲉⲙ ⲁⲡⲁ ⲡⲁⲙⲃⲱ ⲛⲁⲩⲉⲣⲫⲟⲣⲓⲛ ⲛ̀ϩⲁⲛϣⲑⲏⲛ ⲙ̀ⲫⲉⲗϫⲓ ⲉⲩϧⲉⲛ ⲛⲓⲧⲱⲓⲥ ⲛⲉⲙ ϩⲁⲛϣⲑⲏⲛ ⲙ̀ⲃⲉⲛⲓ. ⲛ̀ⲑⲱⲧⲉⲛ ⲇⲉ ϯⲛⲟⲩ ⲧⲉⲧⲉⲛⲉⲣⲫⲟⲣⲓⲛ ⲛ̀ϩⲁⲛϣⲑⲏⲛ ⲉⲩⲧⲁⲟⲩⲓⲏⲟⲩⲧ ⲙⲁϣⲉⲛⲱⲧⲉⲛ ⲙ̀ⲡⲁⲓⲙⲁ ⲁⲧⲉⲧⲉⲛⲧⲁⲕⲟϥ
• ⲉⲩϣⲉⲛⲱⲟⲩ ⲇⲉ ⲉⲡⲱⲥϧ ⲡⲉϫⲁϥ ⲛⲱⲟⲩ ϫⲉ ⲛ̀ϯⲛⲁⲃⲱⲕ ⲁⲛ ⲉⲕⲟⲧⲧ ⲉϯⲉⲛⲧⲟⲗⲏ ⲛⲏⲉⲧⲉⲛ ⲛ̀ⲧⲉⲧⲉⲛⲁⲣⲉϩ ⲅⲁⲣ ⲁⲛ
• ⲁⲟⲩⲁⲓ ⲛ̀ⲛⲓⲥⲛⲏⲟⲩ ϣⲉⲛ ⲁⲡⲁ ⲡⲁⲥⲧⲁⲙⲱⲛ ϫⲉ ⲟⲩ ⲡⲉϯⲛⲁⲁⲓϥ ϫⲉ ⲥⲉⲧⲗⲓⲃⲓ ⲙ̀ⲙⲟⲓ ⲉⲓϯ ⲙ̀ⲡⲁϩⲱⲃ ⲛ̀ϫⲓϫ ⲉⲃⲟⲗ. ⲁϥⲉⲣⲟⲩⲱ ⲛ̀ϫⲉ ⲡϧⲉⲗⲗⲟ ⲡⲉϫⲁϥ ⲛⲁϥ ϫⲉ ⲡⲕⲉ ⲁⲡⲁ ϫⲓϫⲱⲓ ⲛⲉⲙ ⲡⲕⲉⲥⲉⲡⲓ ϣⲁⲩϯ ⲡⲟⲩϩⲱⲃ ⲛ̀ϫⲓϫ ⲉⲃⲟⲗ ⲫⲁⲓ ⲛⲉ ⲟⲩⲟⲥⲓ ⲁⲛ ⲡⲉ. ⲁⲕϣⲁⲛⲛⲟⲩ ⲇⲉ ⲉϯⲁϫⲓ ⲧϯⲙⲏ ⲛ̀ⲟⲩⲥⲟⲡ ⲛ̀ⲟⲩⲱⲧ ⲛ̀ⲧⲉ ⲡⲉⲓⲇⲟⲥ. ⲁⲕϣⲁⲛⲟⲩⲱϣ ⲇⲉ ⲉⲭⲁ ⲟⲩⲕⲟⲩϫⲓ ⲉⲃⲟⲗϧⲉⲛ ⲥⲟⲩⲉⲛϥ ⲛ̀ⲑⲟⲕ ⲉⲧⲑⲱϣ. ⲑⲁⲓ ⲧⲉ ⲧϧⲉ ⲉⲧⲉⲭⲛⲁϭⲓⲙⲧⲟⲛ. ⲡⲉϫⲉ ⲡⲥⲟⲛ ⲛⲁϥ ϫⲉ ⲉϣⲱⲡ ⲟⲩⲟⲛϯ ⲧⲁⲭⲣⲓⲁ ⲙ̀ⲙⲁⲩ ⲭⲟⲩⲱϣ ⲉϣⲧⲉⲙⲉⲑⲣⲓϥⲓⲣⲱⲟⲩϣ ϧⲁ ϩⲱⲃ ⲛ̀ϫⲓϫ. ⲁϥⲉⲣⲟⲩⲱ ⲛⲁϥ ⲛ̀ϫⲉ ⲡϧⲉⲗⲗⲟ ϫⲉ ⲕⲁⲛ ⲟⲩⲟⲛⲧⲉⲕ ϩⲱⲃ ⲛⲓⲃⲉⲛ ⲙ̀ⲡⲉⲣⲭⲁ ⲡϩⲱⲃ ⲛ̀ϫⲓϫ ⲉⲃⲟⲗ ⲫⲏⲉⲧⲉ ⲟⲩⲟⲛ ϣϫⲟⲙ ⲙ̀ⲙⲟⲕ ⲉⲁⲓϥ ⲁⲣⲓⲧϥ _ ⲙⲱⲛⲟⲛ ϧⲉⲛ ⲟⲩϣⲑⲟⲣⲧⲉⲣ ⲁⲛ
• ⲁⲩϫⲟⲥ ⲛ̀ϫⲉ ⲁⲡⲁ ⲃⲉⲛⲓⲁⲙⲓⲛ ⲛⲉⲙ ⲛⲉϥⲙⲁⲑⲏⲧⲏⲥ ϫⲉ ⲙⲟϣⲓ ϧⲉⲛ ⲧϧⲉ ⲛ̀ϯⲅⲛⲱⲥⲓⲥ ⲟⲩⲟϩ ⲱⲡ ⲛ̀ⲥⲁ ⲛⲓⲙⲓⲗⲓⲟⲛ ⲟⲩⲟϩ ⲛ̀ⲛⲉⲧⲉⲛⲛⲁⲥⲱϧⲉⲙ ⲁⲛ
• ⲁⲥϫⲟⲥ ⲟⲛ ϫⲉ ⲁⲕϩⲓⲧⲟⲧⲕ ⲉⲉⲣ ⲡⲓⲡⲉⲑⲛⲁⲛⲉϥ ⲙ̀ⲡⲉⲣⲓ̀ ⲉⲫⲁϩⲟⲩ
• ⲁϥϫⲟⲥ ⲛ̀ϫⲉ ⲁⲡⲁ ϩⲩⲡⲉⲣⲉⲭⲓⲟⲥ ϫⲉ ⲡϩⲩⲙⲛⲟⲥ ⲙ̀ⲡⲛⲉⲩⲙⲁⲧⲓⲕⲟⲛ ⲛⲉⲙ ϯⲙⲉⲗⲉⲧⲏ ⲉⲑⲙⲏⲛ ⲉⲃⲟⲗ ϣⲁⲩϫⲟϫϥ ⲛ̀ⲛⲓⲡⲟⲗⲏⲙⲟⲥ ⲉⲑⲛⲏⲟⲩ ⲉϫⲱⲛ
• ⲁϥϫⲟⲥ ⲟⲛ ϫⲉ ⲥϣⲉ ⲉⲣⲟⲛ ⲉⲑⲣⲉⲛϧⲱⲕ ⲙ̀ⲙⲁⲩⲁⲧⲉⲛ ϧⲁⲧϩⲏ ⲙ̀ⲡⲉⲓⲣⲁⲥⲙⲟⲥ. ⲥⲉⲛⲏⲟⲩ ⲅⲁⲣ ⲟⲩⲟϩ ⲁⲩϣⲁⲛⲓ̀ ϫⲉⲙⲧⲉⲛ ⲉⲛⲣⲏⲥ ⲧⲉⲛⲛⲁϭⲓⲱⲟⲩ

[bashandy]

Ⲟⲩⲕⲁⲧⲁⲏⲅⲏⲥⲓⲥ ⲉⲁϥⲧⲁⲱⲟⲩⲥ ⲛ̀ϫⲉ ⲡⲉⲛⲡⲉⲑⲟⲩⲁⲃ ⲛ̀ⲓⲱⲧ ⲉⲧⲧⲁⲓⲏⲟⲩⲧ ⲕⲁⲧⲁ ⲥⲙⲟⲧ ⲛⲓⲃⲉⲛ ⲁⲡⲁ ⲡⲁϧⲱⲙ ⲡⲓⲁⲣⲭⲏⲙⲁⲛⲇⲣⲓⲧⲏⲥ ⲉⲑⲟⲩⲁⲃ ⲉⲣⲉ ⲛⲉϥⲥⲙⲟⲩ ⲉⲑⲟⲩⲁⲃ ⲛⲉⲙ ⲛⲓⲥⲙⲟⲩ ⲛ̀ⲛⲏⲉⲑⲟⲩⲁⲃ ⲧⲏⲣⲟⲩ ⲛⲁⲓ̇ ⲉϩⲣⲏⲓ ⲉϫⲱⲕ ⲛ̀ⲧⲉⲛⲟⲩϫⲁⲓ ⲧⲏⲣⲉⲛ ⲁⲙⲏⲛ ⲡⲁϣⲏⲣⲓ ⲥⲱⲧⲉⲙ ⲛ̀ⲧⲉⲕⲉⲣⲥⲁⲃⲉ ⲛ̀ⲧⲉⲕϣⲱⲡⲓ ⲉⲣⲟⲕ ⲛ̀ϯⲥⲃⲱ ⲙ̀ⲙⲏⲓ ⲏ ⲛⲅⲉⲣϩⲓⲕⲁⲛⲟⲥ ⲙⲁⲧⲁϫⲣⲟ ϧⲉⲛ ⲡⲓⲣⲁⲥⲙⲟⲥ ϭⲓⲛⲁⲕ ⲟⲛ ⲙ̀ⲡⲓⲑⲉⲃⲓⲟ ϭⲓⲛⲁⲕ ⲟⲛ ⲙ̀ϯⲙⲉⲧⲥⲁⲃⲉ ⲛⲉ ϯⲙⲉⲧⲥⲉⲧⲉⲙϩⲏⲧ ⲛ̀ⲧⲉⲕⲁⲅⲱⲛⲓⲍⲉ ϧⲉⲛ ⲟⲩⲉⲅⲕⲣⲁⲧⲓⲁ ⲛⲉⲙ ⲟⲩⲙⲉⲧϣⲉⲙϣⲓ ϣⲁⲛⲧⲉⲕⲉⲣⲟⲩⲣⲟ ⲡⲁϣⲏⲣⲓ ⲭⲟϩ ⲉⲫⲃⲓⲟⲥ ⲛ̀ⲛⲓⲥⲁⲃⲉⲩ ⲛ̀ⲧⲉⲕⲗⲩⲧⲉⲩⲉ ϧⲉⲛ ⲛⲟⲩⲁⲣⲉⲧⲏ ⲛⲉϩⲥⲓ ⲙ̀ⲙⲟⲕ ⲙ̀ⲡⲉⲣⲁⲙⲉⲗⲏⲥ ⲧⲱⲟⲩⲛ ⲙ̀ⲡⲉⲣϭⲱ ⲛⲉⲙ ⲛⲏⲉⲑⲙⲱⲟⲩⲧ ϯⲅⲛⲱⲥⲓⲥ ⲉⲣⲟⲩⲱⲓⲛⲓ ⲉⲣⲟⲕ ⲛⲓϩⲙⲟⲧ ⲅⲁⲣ ⲧⲏⲣⲟⲩ ϯⲙⲉⲧϩⲁⲣϣϩⲏⲧ ⲧⲉ ϣⲁⲥϭⲟⲣⲡⲟⲩ ⲛⲁⲕ ⲉⲃⲟⲗ ⲛ̀ⲧⲉ ⲛⲓⲥⲁⲃⲉⲩ ⲁⲩⲙⲁϯ ⲛ̀ⲛⲓⲣⲏⲧ ⲡϣⲟⲩϣⲟⲩ ⲛ̀ⲛⲓⲥⲁⲃⲉⲩ ϯⲙⲉⲧϩⲁⲣϣϩⲏⲧ ϣⲱⲡⲓ ⲛ̀ϩⲁⲣϣϩⲏⲧ ϫⲉ ⲉⲕⲉⲱⲡ ⲉⲡⲓⲁⲣⲓⲑⲙⲟⲥ ⲛ̀ⲛⲓⲥⲁⲃⲉⲩ ⲟⲩⲙⲉⲩⲓ ⲛⲅϥⲓ ⲉⲣⲟⲕ ⲛ̀ϧⲏⲧϥ ϧⲉⲛ ⲟⲩⲙⲉⲧϩⲁⲣϣϩⲏⲧ ⲟⲩⲛⲏⲥⲧⲓⲁ ⲛⲅϩⲩⲡⲟⲙⲟⲛⲏ ⲉⲣⲟⲥ ϧⲉⲛ ⲟⲩⲙⲟⲩⲛ ⲉⲃⲟⲗ ⲟⲩϩⲏⲧ ⲛ̀ⲟⲩⲱⲧ ⲛⲉⲙ ⲡⲉⲕⲥⲟⲛ ⲟⲩⲡⲁⲣⲑⲉⲛⲓⲁ ϧⲉⲛ ⲛⲉⲕⲙⲉⲗⲟⲥ ⲧⲏⲣⲟⲩ ⲟⲩⲡⲁⲣⲑⲉⲛⲓⲁ ϧⲉⲛ ⲛⲉⲕⲙⲉⲩⲓ ⲟⲩⲧⲟⲩⲃⲟ ⲛ̀ⲥⲱⲙⲁ ⲛⲉⲙ ⲟⲩⲧⲟⲩⲃⲟ ⲛ̀ϩⲏⲧ ⲟⲩⲙⲉⲧⲣⲉⲙⲣⲁⲩϣ ⲙ̀ⲫⲛⲁⲩ ⲙ̀ⲡⲓϫⲱⲛⲧ ⲁⲣⲉϣⲁⲛ ⲟⲩⲙⲉⲓ ϩⲣⲟϣ ⲉϫⲱⲕ ⲙ̀ⲡⲉⲣⲉⲣϩⲧϣⲏⲙ ⲁⲗⲗⲁ ϩⲩⲡⲟⲙⲉⲓⲛⲉ ϧⲉⲛ ⲟⲩⲣⲱⲟⲩⲧ ⲉⲕϫⲱ ⲙ̀ⲙⲟⲥ ϫⲉ ϧⲉⲛ ⲟⲩⲕⲱϯ ⲇⲉ ⲁⲩⲕⲱϯ ⲉⲣⲟⲓ ⲁⲛⲟⲕ ⲇⲉ ⲁⲓⲃⲟⲟⲣⲟⲩ ϫⲉ ⲟⲩⲣⲱⲧ ⲙⲟϣⲓ ⲛⲉⲙ ⲛⲏⲉⲧⲑⲉⲃⲏⲟⲩⲧ ⲟⲩⲟϩ ⲭⲛⲁⲥⲓ ⲙ̀ⲫⲣⲏϯ ⲉⲧⲉⲣⲉ ⲧⲉⲕⲯⲩⲭⲏ ⲟⲩⲁϣⲥ 19 july ⲡⲁϣⲏⲣⲓ ϯϩⲱⲛ ⲉⲣⲟⲕ ⲉⲣⲱⲓⲥ ⲛⲅⲛⲏⲫⲉ ⲉⲕⲥⲱⲟⲩⲛ ⲛ̀ⲛⲏⲉⲧϭⲟⲣⲕ ⲉⲣⲟⲕ ⲡϫⲱⲗ ⲛⲉⲙ ϯⲙⲉⲧⲥⲁⲛⲕⲧⲟⲥ ϣⲁⲩⲙⲟϣⲓ ⲛⲉⲙ ⲛⲟⲩⲉⲣⲏⲟⲩ ϯⲡⲟⲣⲛⲓⲁ ⲛⲉⲙ ϯⲁⲕⲁⲑⲁⲣⲥⲓⲁ ϣⲁⲩⲙⲟϣⲓ ⲛⲉⲙ ⲛⲟⲩⲉⲣⲏⲟⲩ ϯⲙⲉⲧϫⲁϫⲓ ⲛⲉⲙ ⲡⲓⲁⲧⲗⲩⲡⲏ ϣⲁⲩⲙⲟϣⲓ ⲛⲉⲙ ⲛⲟⲩⲉⲣⲏⲟⲩ ⲡⲁϣⲏⲣⲓ ⲥⲱⲧⲉⲙ ⲛ̀ⲥⲱⲓ ⲙ̀ⲡⲉⲣⲁⲙⲁⲗⲉⲓ ⲡⲁϣⲏⲣⲓ ⲙ̀ⲡⲉⲣⲧϭⲁⲓ ⲉϩⲗⲓ ⲛ̀ⲣⲱⲙⲓ ⲉⲛⲉϩ ⲡⲉⲧϫⲱ ⲇⲉ ⲙ̀ⲙⲙⲟⲥ ⲉⲣⲟϥ ϫⲉ ⲁⲛⲟⲕ ⲡⲉ ⲉⲟⲩϩⲗⲓ ⲡⲉ ⲉϥⲉⲣϩⲁⲁⲗ ⲙ̀ⲙⲙⲟϥ ⲙ̀ⲙⲁⲩⲁⲧϥ ⲉⲣⲉ ⲛⲓⲙ ⲛⲁϣⲉⲣⲃⲟⲏⲑⲓⲛ ⲉⲣⲟϥ ⲡⲓⲣⲱⲙⲓ ϩⲱϥ ⲛ̀ⲧⲉϥϫⲫⲟ ⲛⲁϥ ⲙ̀ⲡⲓⲑⲉⲃⲓⲟ ⲙ̀ⲙⲙⲟϥ ⲙ̀ⲙⲙⲁⲩⲁⲧϥ ⲉϥϫⲱ ⲙ̀ⲙⲟⲥ ϫⲉ ⲛⲁⲛⲟⲃⲓ ϩⲁⲛⲛⲟϫ ⲡⲁⲣⲁ ⲟⲩⲟⲛ ⲛⲓⲃⲉⲛ ⲛ̀ⲛⲉϥϯϩⲁⲡ ⲛ̀ϩⲗⲓ ⲣⲱⲓⲥ ⲉⲣⲟⲕ ⲡⲁϣⲏⲣⲓ ⲙ̀ⲡⲉⲣϭⲁⲓ ⲉϩⲗⲓ ⲛ̀ⲣⲱⲙⲓ ϫⲉⲙϯⲡⲓ ⲛ̀ⲛⲓⲁⲣⲉⲧⲏ ⲧⲏⲣⲟⲩ ⲛ̀ⲧⲉⲕⲁⲣⲉϩ ⲉⲣⲱⲟⲩ ⲓⲥϫⲉ ⲛ̀ⲑⲟⲕ ⲟⲩϣⲉⲙⲙⲟ ⲟⲗⲕ ⲉⲣⲟⲕ ⲙ̀ⲡⲉⲣⲫⲱⲧ ⲉϧⲟⲩⲛ ⲉⲣⲱⲙⲓ ⲛ̀ⲧⲉⲕϣⲧⲉⲙⲱϧ ⲛⲉⲙ ⲛⲟⲩϩⲃⲏⲟⲩⲓ ⲓⲥϫⲉ ⲛ̀ⲑⲟⲕ ⲟⲩϩⲏⲕⲓ ⲙ̀ⲡⲉⲣⲉⲅⲕⲁⲉⲓ ϧⲉⲛ ϩⲗⲓ ⲛ̀ϩⲱⲃ ϫⲉ ⲁⲣⲉⲧⲉⲛϣⲁⲛϩⲕⲟ ⲧⲉⲧⲉⲛⲛⲁⲗⲩⲡⲏ ⲟⲩⲟϩⲧⲉⲧⲉⲛϫⲉ ⲡⲉⲧϩⲱⲟⲩ ϫⲟⲩϣⲧ ⲟⲛ ⲙⲏⲡⲱⲥ ⲛ̀ⲥⲉⲭⲁ ⲟⲩⲡⲟⲗⲉⲙⲟⲥ ⲟⲩⲟϩ ⲉϫⲱⲕ ⲉⲑⲃⲉ ⲟⲩϩⲗⲓ ⲉⲕϣⲁⲧ ⲙ̀ⲙⲟϥ ⲕⲁⲧⲁ ⲡⲥⲁⲣⲕⲓⲕⲟⲛ ⲉⲑⲃⲉ ϯⲧⲣⲟⲫⲏ ⲛⲅⲛⲭⲁⲕⲓ ⲁⲗⲗⲁ ϩⲩⲡⲟⲙⲉⲓⲛⲉ ⲟⲩⲙⲉⲧϫⲱⲣⲓ ⲁⲛ ⲡⲉ ⲡⲓⲱⲓⲕ ϧⲉⲛ ⲫⲛⲁⲩ ⲙ̀ⲡⲓϩⲉⲛⲟⲩϥⲓ ⲟⲩⲟϩ ⲙⲉⲧϩⲏⲕⲓ ⲁⲛ ⲡⲉ ⲁⲕϣⲁⲛ ⲉⲅⲕⲁⲕⲉⲓ ϧⲉⲛ ⲛⲓϭⲣⲟϩ ⲙⲉⲗⲏⲧⲁ ⲛ̀ⲥⲏⲟⲩ ⲛⲓⲃⲉⲛ ⲫⲱⲧ ⲉⲃⲟⲗ ⲙ̀ⲡⲓⲧⲁⲓⲟ ⲛ̀ⲛⲓⲣⲱⲙⲓ ⲙⲁⲣⲉ ⲣⲱⲙⲓ ⲛⲓⲃⲉⲛ ϯϩⲏⲟⲩ ⲉⲣⲟⲕ ϫⲉ ⲉⲕⲉϯϩⲏⲟⲩ ⲛ̀ⲣⲱⲙⲓ ⲛⲓⲃⲉⲛ ⲛ̀ⲧⲉⲕⲙⲟⲩⲛ ⲉⲃⲟⲗ ϧⲉⲛ ⲡⲉⲕϩⲱⲃ ⲛⲉⲙ ⲡⲉⲕⲥⲁϫⲓ ⲉⲑⲛⲁⲛⲟⲩϥ ⲙ̀ⲡⲉⲣϯⲟⲩⲟⲓ ⲉⲧϩⲏ ⲟⲩⲟⲓ ⲉⲫⲁϩⲟⲩ ⲁⲕϣⲁⲛϩⲉⲙⲥⲓ ϧⲉⲛ ⲑⲙⲏϯ ⲛ̀ⲛⲓⲥⲛⲏⲟⲩ ⲙ̀ⲙⲉⲣϭⲓϩⲣⲁⲕ ϧⲉⲛ ϩⲗⲓ ⲛ̀ⲥⲁϫⲓ ⲛ̀ⲉⲗⲗⲏⲃ ⲑⲉⲃⲓⲟⲕ ϧⲉⲛ ϩⲱⲃ ⲛⲓⲃⲉⲛ ⲭⲁ ⲛⲉⲕⲥⲁϫⲓ ⲙ̀ⲫⲁϩⲟⲩ ⲕⲁⲛ ⲉⲕⲛⲟⲓ ⲛ̀ϩⲱⲃ ⲛⲓⲃⲉⲛ ϧⲉⲛ ⲟⲩϩⲓⲣⲏⲛⲏ ⲙ̀ⲡⲉⲣⲧⲟⲡⲕ ⲉϣⲱϣ ⲁⲗⲗⲁ ϥⲓ ϧⲁ ⲡⲉⲓⲣⲁⲥⲙⲟⲥ ⲛⲓⲃⲉⲛ ϧⲉⲛ ⲟⲩⲣⲁϣⲓ ⲛ̀ⲛⲉⲕⲥⲱⲟⲩⲛ ⲅⲁⲣ ⲙ̀ⲡⲧⲁⲓⲟ ⲉⲑⲟⲩⲏϩ ⲛ̀ⲥⲁ ⲡⲉⲓⲣⲁⲥⲙⲟⲥ ⲉⲑⲃⲉ ⲡⲁⲓⲗⲱⲓϫⲓ ⲱ ⲡⲁⲥⲟⲛ ⲙ̀ⲡⲉⲣⲭⲁ ⲡⲉⲕϩⲏⲧ ⲉⲃⲟⲗ ⲙⲉϣⲁⲕ ⲛ̀ⲑⲟⲕ ϣⲁⲕⲉⲣⲡⲱⲃϣ ⲛ̀ⲟⲩⲕⲟⲩϫⲓ ⲉⲑⲃⲉ ⲫⲁⲓ ⲫⲱⲧ ⲙ̀ⲡⲉⲣⲫⲱⲧ ⲛ̀ⲥⲁ ϯⲙⲉⲧⲛⲟϫ ϫⲉ ⲛ̀ⲛⲉⲕⲑⲉⲃⲓⲟ ⲫⲱⲧ ⲛ̀ⲑⲟϥ ⲛ̀ⲥⲁ ⲡⲓⲑⲉⲃⲓⲟ ⲁⲣⲓϫⲱⲣⲓ ⲓⲥ ⲟⲩⲏⲣ ⲡⲉ ⲡⲉⲕⲧⲁⲓⲟ ⲁⲕϣⲁⲛ ϩⲩⲡⲟⲙⲉⲓⲛⲉ ϧⲉⲛ ⲡⲉⲓⲣⲁⲥⲙⲟⲥ ⲓⲉ ⲟⲩⲙⲉⲩⲓ ⲙ̀ⲡⲟⲛⲉⲓⲁ ⲓⲉ ⲙⲉⲩⲓ ⲙ̀ⲙⲉⲧϭⲁⲥⲓϩⲏⲧ ⲓⲉ ⲕⲉϩⲗⲓ ⲙ̀ⲡⲁⲑⲟⲥ ⲣⲱⲓⲥ ⲉⲣⲟⲕ ⲉϯⲉⲃϣⲓ ϫⲉ ⲛ̀ⲑⲟⲥ ⲧⲉ ⲑⲙⲁⲩ ⲛ̀ϭⲉⲣⲏⲧ ⲧⲏⲣⲟⲩ ⲡⲁϣⲏⲣⲓ ϣⲱⲧ ⲉⲃⲟⲗ ⲛ̀ϯⲉⲡⲓⲑⲩⲙⲓⲁ ϫⲉ ⲛ̀ⲑⲟⲥ ⲧⲉ ϣⲁⲥ ⲉⲣϣⲛⲟⲩⲥ ⲛ̀ⲭⲁⲕⲓ ⲣⲱⲓⲥ ⲉⲣⲟⲕ ⲙ̀ⲡⲉⲣϭⲁⲥⲓϩⲏⲧ ⲁⲗⲗⲁ ⲙⲟⲩⲛ ⲉⲃⲟⲗ ⲉⲕⲑⲉⲃⲏⲟⲩⲧ ⲣⲱⲓⲥ ⲉⲣⲟⲕ ⲛⲅⲛⲏⲫⲉ ⲡⲁϣⲏⲣⲓ ⲁⲣⲓϩⲁⲣϣϩⲏⲧ ϧⲉⲛ ϩⲱⲃ ⲛⲓⲃⲉⲛ ⲡⲗⲏⲛ ⲛⲟⲩϫⲉ ⲉⲃⲟⲗ ⲙ̀ⲙⲟⲕ ⲙ̀ⲙⲉⲧϭⲁⲥⲓϩⲏⲧ ⲛ̀ⲧⲉⲕϣⲱⲡⲓ ⲛ̀ϫⲁⲣϩⲏⲧ ϣⲁⲣⲉϯⲙⲉⲧϫⲁⲃϩⲏⲧ ⲙⲟϩⲕ ⲛ̀ⲗⲱⲓϫⲓ ⲙ̀ⲙⲉⲧⲣⲉϥϭⲛⲁⲩϩ ϩⲓ ⲙⲉⲧⲁⲙⲉⲗⲏⲥ ϣⲁⲛⲧⲉⲕⲱϫⲛ ϣⲱⲡⲓ ⲛ̀ϩⲏⲧ ⲙ̀ⲙⲟⲩⲓ ⲛ̀ⲧⲉⲕⲱϣ ⲉⲃⲟⲗ ϫⲉ ⲓⲥϫⲉ ⲡⲁⲕⲉⲣⲱⲙⲓ ⲉⲧϩⲓⲃⲟⲗ ⲧⲁⲕⲟ ⲁⲗⲗⲁ ⲡⲉⲧϩⲓϧⲟⲩⲛ ⲉⲣⲃⲉⲣⲓ ϧⲉⲛ ⲟⲩⲉϩⲟⲟⲩ ⲉⲟⲩⲉϩⲟⲟⲩ ⲟⲩⲟϩ ⲁⲩϣⲁⲛⲧⲁⲓⲟⲕ ⲟⲛ ⲙ̀ⲡⲉⲣⲣⲁϣⲓ ⲙ̀ⲡⲉⲣⲁⲙⲁⲗⲉⲓ ⲉⲕϯⲉϩⲟⲟⲩ ⲛ̀ⲥⲁ ⲉϩⲟⲟⲩ ⲛ̀ⲥⲉⲓ̇ ⲛ̀ⲥⲱⲕ ⲙ̀ⲡⲁⲧⲉⲕⲉⲙⲓ ⲛ̀ⲧⲉⲕⲓ̇ ⲉⲡϩⲱϣ ⲛ̀ⲧⲉⲕⲁⲛⲁⲅⲕⲏ ⲛⲁⲓϣⲁⲃⲉϩⲟ ⲕⲱϯ ⲉⲣⲟⲕ ⲛ̀ⲥⲉⲧⲟⲣⲡⲕ ϧⲉⲛ ⲟⲩⲙⲉⲧⲟⲩⲁϩⲓϩⲏⲧ ⲛ̀ⲥⲉϭⲓⲧⲕ ⲉⲛⲟⲩⲧⲟⲡⲟⲥ ⲛ̀ⲭⲁⲕⲓ ⲛⲁⲓ ⲉⲑⲙⲏϩ ⲛ̀ϩⲟϯ ⲏⲓ ⲁⲛⲁⲅⲕⲏ ⲙ̀ⲡⲉⲣⲗⲩⲡⲏ ⲁⲩϣⲁⲛϣⲟϣⲕ ϩⲓⲧⲉⲛ ϩⲁⲛⲣⲱⲙⲓ ⲁⲗⲗⲁ ⲗⲩⲡⲏ ⲁⲕϣⲁⲛ ⲉⲣⲛⲟⲙⲓ ⲡⲁⲓⲛⲁⲙⲉ ⲡⲉ ⲡϣⲱϣ ⲛ̀ⲧⲉⲕϣⲉⲛⲁⲕ ϧⲉⲛ ϯⲡⲗⲩⲅⲏ ⲛ̀ⲛⲉⲕⲛⲟⲃⲓ ϯϩⲱⲛ ⲉⲧⲟⲧⲕ ⲉⲙⲁϣⲱ ⲉⲑⲣⲉⲕⲙⲉⲥⲧⲉ ⲡⲱⲟⲩ ⲉⲧϣⲟⲩⲓⲧ ⲛ̀ⲑⲟⲕⲇⲉ ϩⲱⲕ ⲁⲕϣⲁⲛⲫⲱⲧ ⲛ̀ⲥⲁ ⲡⲱⲟⲩ ⲉⲧϣⲟⲩⲓⲧ ϣⲁϥⲁⲓⲕ ⲛ̀ϣⲉⲙⲙⲟ ⲉⲡⲉⲕϩⲏⲧ ⲙ̀ⲡⲉⲣⲗⲩⲡⲉⲓ ⲁⲩϣⲁⲛϣⲟϣⲕ ϯϧⲉ ⲧⲉ ⲑⲁⲓ ⲙ̀ⲡⲉⲕⲱⲛϧ ϯⲛⲟⲩ ϫⲉ ⲁⲩϣⲁⲛⲧⲁⲓⲟⲕ ⲭⲁ ⲡⲉⲕϩⲏⲧ ⲙ̀ⲙⲟⲕ ⲉϣⲱⲡ ⲇⲉ ϯⲁⲙⲉⲗⲓⲁ ⲑⲏⲉⲧⲥⲱⲕ ⲙ̀ⲙⲟⲕ ⲉⲕⲉⲣⲓⲙⲓ ⲛ̀ⲧⲉⲕⲛⲉϩⲡⲓ ϫⲫⲟ ⲛⲁⲕ ⲛ̀ⲟⲩⲙⲉⲧⲃⲁⲗϩⲏⲧ ⲛ̀ⲑⲟⲕ ϩⲱⲕ ⲱ ⲡⲁϣⲏⲣⲓ ϣⲁ ⲑⲛⲁⲩ ⲉⲕⲁⲙⲉⲗⲉⲓ ⲁϣ ⲡⲉ ⲣⲁⲧⲥ ⲛ̀ⲧⲉⲕⲁⲙⲉⲗⲉⲓⲁ ⲙ̀ⲫⲣⲏϯ ⲛ̀ⲥⲛⲟⲩϥ ⲑⲁⲓ ⲟⲛ ⲧⲉ ⲧϧⲉ ⲛ̀ⲑⲣⲟⲙⲡⲓ ⲙ̀ⲫⲣⲏϯ ⲛ̀ⲥⲁϥ ⲑⲁⲓ ⲟⲛ ⲧⲉ ⲧϧⲉ ⲙ̀ⲫⲟⲟⲩ ϣⲁ ⲑⲛⲁⲩ ⲉⲕⲁⲙⲉⲗⲉⲓ ⲛⲉⲙ ⲡⲣⲟⲕⲟⲡⲏ ϣⲱⲡⲓ ⲛⲁⲕ ⲛⲏⲫⲉ ϫⲉ ⲙ̀ⲙⲟⲕ ⲛ̀ⲧⲉⲕⲧⲟⲩⲛⲟⲥ ⲡⲉⲕϩⲏⲧ ⲉϩⲣⲏⲓ ϫⲉ ⲙ̀ⲡⲉⲣⲉⲛⲕⲟⲧⲕ ⲙ̀ⲫⲙⲁ ϫⲉ ⲟⲩⲟⲛ ⲟⲩϫⲣⲟϫⲥ ⲛ̀ϧⲏⲧϥ ⲛⲏⲫⲉ ϫⲉ ⲙ̀ⲙⲟⲕ ⲛ̀ⲧⲉⲕⲥⲱⲟⲩⲛ ⲛⲉⲕⲉⲣⲏⲧ ⲛ̀ⲧⲉⲕⲫⲱⲧ ⲉⲃⲟⲗ ⲙ̀ⲡⲓⲟⲩⲁϩⲓϩⲏⲧ ⲛ̀ⲧⲉⲕⲫⲟⲣϫⲕ ⲉⲣⲟϥ ϫⲉ ⲛ̀ⲛⲉϥⲫⲱⲣⲕ ⲛ̀ⲛⲉⲛⲃⲁⲗ ⲙ̀ⲡⲉⲕⲛⲟⲩⲥ ⲛ̀ⲧⲉϥⲁⲓⲕ ⲙ̀ⲃⲉⲗⲗⲉ ⲛ̀ⲧⲉϥϣⲧⲉⲙⲥⲟⲩⲉⲛ ϯϧⲉ ⲙ̀ⲡⲉⲕⲙⲁⲛϣⲱⲡⲓ ⲉⲑⲃⲉ ⲟⲩ ⲁⲣⲉϣⲁⲛ ⲟⲩⲥⲟⲛ ⲧⲁⲟⲩⲉ ⲟⲩⲥⲁϫⲓ ⲉϧⲟⲩⲛ ⲉⲣⲟⲕ ϣⲁⲕϫⲱⲛⲧ ⲛ̀ⲧⲉⲕⲉⲣ ⲧϧⲉ ̀ⲛⲛⲓⲑⲏⲣⲓⲟⲛ ⲉϧⲟⲩⲛ ⲉⲣⲟϥ ⲱ ⲡⲓⲉⲃⲓⲏⲛ ⲫⲛⲁⲩ ⲡⲉ ⲫⲁⲓ ⲛ̀ⲧⲉⲕⲉⲑⲏⲣⲓⲟⲛ ⲓⲉ ⲛ̀ⲧⲉⲕⲉⲣⲧϧⲉ ⲕⲱϩⲧ ϣⲁⲛⲧⲉⲕⲣⲱⲕϩ ⲛ̀ⲧⲉϥⲕⲁⲕⲓⲁ ⲧⲏⲣⲥ ⲛⲧⲉⲫⲉϩ ⲡⲉⲕϩⲏⲧ ⲛ̀ⲧⲉ ⲕⲁⲃⲟⲗ ⲙ̀ⲡⲉⲭϯⲃⲱⲛ ⲙⲏⲡⲟⲧⲉ ⲛ̀ⲧⲉ ⲑⲙⲁⲑⲟⲩⲓ ϫⲟⲧⲕ ⲛ̀ⲧⲉⲕⲙⲟⲩ ⲱ ⲫⲣⲱⲙⲓ ⲙ̀ⲡⲉⲕⲁⲛⲉⲭⲉ ⲛ̀ⲟⲩⲕⲟⲩϫⲓ ⲛ̀ⲥⲁϫⲓ ⲛ̀ⲧⲁ ⲡⲉⲕⲥⲟⲛ ϫⲟϥ ⲉⲣⲟⲕ ⲁⲕϩⲣⲟϣ ⲛ̀ϩⲏⲧ ⲉϩⲣⲏⲓ ⲉϫⲱϥ ⲙ̀ⲫⲱⲣ ⲡⲁⲙⲉⲣⲓⲧ ⲡⲗⲏⲛ ⲕⲟⲧⲕ ⲛ̀ⲧⲉⲕⲣⲓⲙⲓ ϧⲁ ⲛⲉⲕⲛⲟⲃⲓ ⲙ̀ⲡⲉⲣⲫⲱⲧ ⲛ̀ⲥⲁ ⲟⲩⲕⲁⲑⲉⲇⲣⲁ ⲛ̀ⲱⲟⲩ ⲙ̀ⲙⲉⲧⲣⲱⲙⲓ ⲇⲟⲕⲏⲙⲁⲍⲉ ⲟⲛ ̀ⲛϩⲱⲃ ⲛⲓⲃⲉⲛ ⲁⲙⲁϩϯ ⲙ̀ⲡⲉⲑⲛⲁⲛⲉϥ ⲁⲣⲉϩ ⲟⲛ ⲉⲧⲉⲕⲙⲉⲧϣⲏⲣⲓ ϣⲏⲙ ϫⲉ ⲭⲛⲁⲁⲣⲉϩ ⲉⲧⲉⲕⲙⲉⲧⲃⲉⲗⲗⲉ ⲙ̀ⲡⲉⲣⲭⲁ ⲡⲉⲕϩⲏⲧ ⲉⲃⲟⲗ ⲛⲉⲙ ϩⲗⲓ ⲛ̀ⲣⲱⲙⲓ ⲉⲑⲃⲉ ⲑⲙⲟⲑⲛⲉⲥ ⲛ̀ⲧⲉⲕⲯⲩⲭⲏ ⲣⲱⲓⲥ ⲉⲣⲟⲕ ⲉⲙⲁϣⲱ ⲉⲧⲡⲟⲣⲛⲉⲓⲁ ⲁⲥⲭⲉⲛⲥ ⲟⲩⲙⲏϣ ⲅⲁⲣ ⲁⲥⲧⲁⲟⲩⲱⲟⲩ ⲉϧⲣⲏⲓ ⲙ̀ⲡⲉⲣⲉⲣϣⲫⲏⲣ ⲉⲕⲟⲩϫⲓ ⲙ̀ⲡⲉⲣⲫⲱⲧ ⲉϧⲟⲩⲛ ⲉⲥϩⲓⲙⲓ ⲫⲱⲧ ⲉⲃⲟⲗ ⲛ̀ⲑⲙⲟⲑⲛⲉⲥ ⲙ̀ⲡⲥⲱⲙⲁ ϫⲉ ϣⲁⲣⲉ ⲟⲩⲙⲉⲧϣⲫⲏⲣ ⲙⲟϩ ⲙ̀ⲫⲣⲏϯ ⲛ̀ⲟⲩⲕⲱϩⲧ ϧⲉⲛ ⲁⲣⲉϩ ⲛⲓⲃⲉⲣⲛ ⲁⲣⲉϩ ⲉⲡⲉⲕⲥⲱⲙⲁ ⲛⲉⲙ ⲡⲉⲕϩⲏⲧ ⲫⲱⲧ ⲛ̀ⲥⲁ ϯϩⲉⲓⲣⲏⲛⲏ ⲛⲉⲙ ⲡⲓⲑⲉⲃⲓⲟ ⲉⲩⲙⲏⲣ ⲛⲉⲙ ⲛⲟⲩⲉⲣⲏⲟⲩ ⲙ̀ⲡⲉⲣⲙⲟⲩⲣ ⲟⲛ ⲛⲉⲙ ϩⲗⲓ ⲛ̀ⲣⲱⲙⲓ ⲟⲩⲟϩ ⲡⲉⲧⲟⲓ ⲛ̀ⲟⲩϩⲉⲓⲣⲏⲛⲏ ⲛⲉⲙ ⲡⲉϥⲥⲟⲛ ⲉϥⲟⲓ ⲛ̀ⲟⲩϩⲓⲣⲏⲛⲏ ⲛⲉⲙ ⲡⲉϥϩⲏⲧ ⲁⲕⲉⲙⲓ ϫⲉ ϯⲛⲟⲩ ϫⲉ ⲙ̀ⲙⲟⲛ ⲡⲉⲧⲟⲓ ⲛ̀ⲛⲟϫ ⲉϯϩⲉⲓⲣⲏⲛⲏ ϩⲱⲥⲧⲉ ⲉⲑⲣⲉ ⲡⲓⲟⲩⲁⲓ ⲡⲓⲟⲩⲁⲓ ⲙⲉⲛⲣⲉ ⲡⲉϥⲥⲟⲛ ϯⲁⲅⲁⲡⲏ ϣⲁⲥⲕⲱⲧ   
 ⲟⲩⲡⲉⲛⲧⲟⲩⲃⲟ ⲙ̀ⲡⲓϭⲱϧⲉⲙ ⲓⲥϫⲉ ⲟⲩⲟⲛ ⲟⲩⲙⲟⲥϯ ϧⲉⲛ ⲡⲉⲕϩⲏⲧ ⲓⲉ ⲟⲩⲙⲉⲧϫⲁϫⲓ ⲁϥⲑⲱⲛ ⲡⲉⲕⲧⲟⲩⲃⲟ ⲡⲉⲧⲙⲟⲥϯ ⲙ̀ⲡⲉϥⲥⲟⲛ ⲉϥⲙⲟϣⲓ ϧⲉⲛ ⲡⲭⲁⲕⲓ ⲉⲓⲉⲉⲛϣⲟⲡ ϧⲉⲛ ⲟⲩⲕⲓⲛⲇⲩⲛⲟⲥ ⲛ̀ⲁϣ ⲛ̀ϭⲣⲟⲧ ⲉⲛⲙⲟⲥϯ ⲛ̀ⲛⲛⲉⲛⲣⲏⲟⲩ ⲛⲉⲛϣⲃⲏⲣ ⲙⲉⲗⲟⲥ ⲉⲧϩⲟⲧⲉⲣ ⲛⲉⲙ ⲱ ⲫⲣⲱⲙⲓ ⲉⲑⲃⲉ ⲭⲱϩ ⲛⲉⲙ ⲟⲩⲱⲟⲩ ⲉϥϣⲟⲩⲓⲧ ⲙⲁⲣⲉⲛϧⲟⲧϧⲉⲧ ϫⲉ ⲛ̀ⲥⲁ ⲡⲫⲁϧⲣⲓ ⲛ̀ⲧⲉ ϯⲡⲗⲏⲅⲏ ⲙ̀ⲡⲁⲧⲉⲛⲙⲟⲩ ⲛⲁⲥⲛⲏⲟⲩ ⲙ̀ⲡⲉⲣⲑⲣⲟⲩϫⲓⲙⲓ ⲛ̀ϩⲁⲛϩⲃⲏⲛⲟⲩⲓ ⲛ̀ϯⲙⲓⲛⲓ ⲛ̀ⲥⲉϩⲉⲓ ⲉⲣⲟⲛ ⲥⲁⲡⲉⲥⲏⲧ ⲛ̀ⲣⲱⲙⲓ ⲛⲓⲃⲉⲛ ⲙⲁⲣⲉⲛⲛⲏⲫⲉ ⲛⲉⲛⲓⲟϯ ⲅⲁⲣ ϫⲉⲕ ⲡⲟⲩⲃⲓⲟⲥ ⲉⲃⲟⲗϧⲉⲛ ⲟⲩϩⲕⲟ ⲛⲉⲙ ⲟⲩⲓⲃⲓ ⲛⲉⲙ ϩⲁⲛⲙⲟⲕϩ ⲉⲩⲟϣ ϣⲁⲛⲧⲟⲩⲛⲱⲟⲩ ⲙ̀ⲡⲓⲧⲟⲩⲃⲟ ⲙⲁⲗⲓⲥⲧⲁ ⲉⲩⲫⲏⲧ ⲉⲃⲟⲗ ⲛ̀ϯⲙⲉⲧⲣⲉϥⲥⲉⲏⲣⲡ ⲑⲁⲓ ⲉⲑⲙⲉϩ ⲛ̀ⲟⲥⲓ ⲛⲓⲃⲉⲛ ⲉⲣⲉ ⲛⲉⲛⲓⲟϯ ⲅⲁⲣ ⲥⲱⲟⲩⲛ ⲉⲡϩⲱⲟⲩ ⲙ̀ⲡⲓⲟⲥⲓ ⲉⲑⲛⲁϣⲱⲡⲓ ⲉⲑⲃⲉ ⲡⲏⲣⲡ ⲁⲩⲥⲁϩⲱⲟⲩ ⲙ̀ⲙⲙⲟϥ ⲟⲩ ⲡⲉⲧϯⲛⲁϫⲟϥ ⲛⲱⲟⲩ ϯⲉⲣϩⲟϯ ⲉϫⲟⲥ ϫⲉ ⲙ̀ⲡⲉⲣⲉⲣⲣⲉϥⲥⲱ ⲉⲡⲧⲏⲣϥ ⲛⲁⲓⲥⲁϫⲓ ⲅⲁⲣ ϩⲟⲣϣ ⲛ̀ⲟⲩⲙⲏϣ ⲙ̀ⲡⲁⲓⲥⲏⲟⲩ ⲡⲗⲏⲛ ⲛⲁⲙⲉⲛⲣⲁϯ ⲛⲁⲛⲉ ⲉⲁⲣⲉϩ ⲟⲩϩⲏⲟⲩ ⲡⲉⲧⲙⲟⲕϩⲥ ⲡⲉⲑⲛⲁⲛⲉϥ ⲅⲁⲣ ϥⲛⲁⲧⲟⲩϫⲟ ⲙ̀ⲡⲉϥϫⲟⲓ ⲉϧⲟⲩⲛ ⲉⲡⲗⲩⲙⲏⲛ ⲙ̀ⲡⲟⲩϫⲁⲓ ⲉⲑⲛⲁⲛⲉϥ ⲡⲛⲟϫ ⲇⲉ ⲟⲛ ⲉⲛⲁⲓⲧⲏⲣⲟⲩ ⲁⲩϯ ⲉⲧⲟⲧⲉⲛ ⲙ̀ⲡⲓⲑⲉⲃⲓⲟ ⲫⲁⲓ ⲉⲧⲣⲱⲓⲥ ⲉⲛⲓⲁⲣⲉⲧⲏ ⲧⲏⲣⲟⲩ ⲡⲥⲟⲃⲧ ⲛ̀ⲛⲓⲁⲣⲉⲧⲏ ⲡⲓⲑⲏⲥⲁⲩⲣⲟⲥ ⲛ̀ⲛⲓⲡⲣⲁⲝⲓⲥ ⲡⲓϩⲟⲡⲗⲟⲛ ⲛ̀ⲣⲉϥⲛⲟϩⲉⲙ ⲡⲓⲑⲉⲣⲁⲉⲩⲧⲏⲥ ⲙ̀ⲡⲗⲩⲡⲏ ⲛⲓⲃⲉⲛ ⲙⲁⲣⲉⲛⲁⲅⲱⲛⲓⲍⲉ ⲱ ⲛⲁⲙⲉⲛⲣⲁϯ ⲁⲛϣⲁⲛⲁⲅⲱⲛⲓⲍⲉ ⲛ̀ⲧⲉⲛϭⲣⲟ ⲉⲛⲓⲡⲁⲑⲟⲥ ⲧⲉⲛⲛⲁⲉⲣⲟⲩⲣⲟ ⲁⲩϣⲁⲛϭⲣⲟ ⲇⲉ ⲉⲣⲟⲛ ⲧⲉⲛⲛⲁⲉⲣϩⲑⲏⲛ ⲧⲉⲛⲣⲓⲙⲓ ϧⲉⲛ ⲟⲩⲣⲓⲙⲓ ⲉϥⲟⲓ ⲛ̀ϣⲁϣⲓ ⲟⲩⲡⲁⲣⲑⲉⲛⲓⲁ ⲁⲛ ⲙ̀ⲙⲁⲧⲉ ⲛ̀ⲥⲱⲙⲁ ⲁⲗⲗⲁ ⲟⲩⲡⲁⲣⲑⲉⲛⲓⲁ ⲛ̀ⲥⲁϧⲱⲕ ⲛⲓⲃⲉⲛ ⲟⲩⲛⲟϫ ⲛ̀ⲁⲅⲁⲑⲟⲛ ⲡⲉ ⲛ̀ⲟⲩϣⲉⲙⲙⲟ ⲉϥⲑⲉⲃⲏⲟⲩⲧ ⲉⲕⲟⲓⲕⲟⲛⲟⲙⲉⲓ ⲛ̀ⲛⲉⲕⲥⲁϫⲓ ϧⲉⲛ ⲟⲩϩⲁⲡ ⲙⲉⲛⲉⲛⲥⲁ ⲛⲁⲓ ⲟⲛ ϯϩⲱⲛ ⲉⲣⲟⲕ ⲉⲧⲟⲧⲕ ⲉϣⲧⲉⲙⲭⲁ ⲡⲉⲕϩⲏⲧ ⲉⲃⲟⲗ ⲙ̀ⲡⲉⲣⲁⲙⲉⲗⲉⲓ ⲟⲩⲛ ⲉϭⲓⲥⲃⲱ ⲛ̀ⲧⲉⲕⲡⲣⲟⲕⲟⲡⲧⲉⲓ ⲙ̀ⲫⲣⲏϯ ⲙ̀ⲛⲓⲧⲱϫⲓ ⲙ̀ⲃⲉⲣⲓ ϣⲱⲡⲓ ⲟⲛ ⲛ̀ⲟⲩⲣⲱⲙⲓ ⲛ̀ϫⲱⲣⲓ ϧⲉⲛ ⲡⲓϩⲱⲃ ⲛⲉⲙ ⲡⲓⲥⲁϫⲓ ⲙ̀ⲡⲉⲣϯϩⲟ ⲉⲃⲟⲗ ⲙ̀ⲫⲣⲏϯ ⲛ̀ⲛⲓϩⲩⲡⲟⲕⲣⲏⲧⲏⲥ ⲉⲓⲧⲉ ⲉⲕⲁⲛⲁⲭⲱⲣⲉⲓ ⲉⲓⲧⲉ ⲉⲕϧⲉⲛ  ⲑⲙⲏϯ ⲡⲗⲏⲛ ϯϩⲁⲡ ⲉⲣⲟⲕ ⲙ̀ⲙⲏⲛⲓ ⲕⲁⲓ ⲅⲁⲣ ⲛⲁⲛⲉ ⲉⲕϧⲉⲛ ⲑⲙⲏϯ ⲛ̀ⲟⲩϣⲟ ϧⲉⲛ ⲑⲉⲃⲓⲟ ⲛⲓⲃⲉⲛ ⲛ̀ϩⲟⲩⲟ ⲉⲟⲩⲁⲓ ⲇⲟⲕⲓⲙⲁⲍⲉ ⲛ̀ⲛⲏⲉⲧⲛⲏⲟⲩ ⲉϫⲱⲕ ⲙ̀ⲙⲙⲏⲛⲓ ϯⲛⲟⲩ ⲇⲉ ⲡⲁϣⲏⲣⲓ ⲫⲟⲣⲉⲓ ⲙ̀ⲡⲓⲑⲉⲃⲓⲟ ϯⲛⲟⲩ ϯⲡⲉⲕⲟⲩⲓ ⲉⲡⲓⲥϫⲣⲁϩ ⲛⲉⲙ ϯⲥⲩⲛⲏⲇⲏⲥⲓⲥ

[bashandy]

ⲕⲉⲅⲁⲣ ⲁϥϫⲟⲥ ϧⲉⲛⲛⲓⲫⲓⲗⲟⲥⲟⲫⲟⲥ ϫⲉⲫⲏⲉⲑⲛⲁⲡⲁⲧⲁⲥⲥⲉⲓⲛ ⲛ̀ⲟⲩⲙⲟⲩⲓ ⲟⲩϫⲱⲣⲓ ⲁⲛ ⲡⲉ ⲟⲩⲟϩ ⲫⲏⲉⲑⲛⲁⲡⲁⲧⲁⲥⲥⲉⲓⲛ ⲛ̀ⲟⲩⲡⲁⲛⲑⲏⲣ ⲟⲩⲇⲩⲛⲁⲧⲟⲥ ⲁⲛ ⲡⲉ ⲫⲏⲉⲑⲛⲁⲙⲟⲩⲇⲉ ⲛ̀ⲑⲟϥ ⲉϥⲟⲩⲁⲃ ⲉⲧⲁⲡⲁⲧⲏ ⲛ̀ϯⲙⲉⲧⲁⲧⲉⲙⲉⲗⲏⲥ ⲫⲁⲓ ⲟⲩϫⲱⲣⲓ ⲡⲉ ⲛ̀ϩⲟⲩⲟ

[bashandy]

ⲁⲓⲛⲉϩⲥⲓⲇⲉ ⲟⲩⲟϩ ⲉⲧⲁⲓⲥⲁϫⲓ ⲙ̀ⲡⲓϫⲓⲙⲓ ⲙ̀ⲡⲁⲗⲁⲥ ⲙ̀ⲙⲟⲛϣϫⲟⲙⲙ̀ⲙⲟⲓ ⲉϣⲓⲛⲓ ⲛ̀ϩⲗⲓⲛ̀ⲣⲱⲙⲓ ⲙⲏⲡⲱⲥ ⲛ̀ⲧⲟⲩ ϯϣⲓⲡⲓ ⲛⲏⲓ ⲙ̀ⲙⲟⲛⲅⲁⲣ ⲡⲉⲧⲕⲁϯ ⲉⲣⲟⲓ ⲁⲓⲕⲱϯⲙⲉⲛ ⲛ̀ⲥⲁ ⲧⲁⲁⲥⲡⲓ ϧⲉⲛⲛⲉⲛϫⲱⲙ ⲛ̀ⲧⲉ ϯϩⲓⲥⲧⲟⲣⲓⲁ ⲁⲗⲗⲁ ⲁⲩⲧⲁⲙⲟⲓ ϫⲉⲁⲥⲧⲁⲕⲟ ⲟⲩⲟϩ ⲁⲥⲉⲣⲁⲑⲟⲩⲱⲛϩ ⲁⲓⲕⲱϯⲇⲉ ⲛ̀ⲥⲱⲥ ϧⲉⲛϯⲉⲕⲕⲗⲏⲥⲓⲁ ⲁⲩϫⲟⲥ ⲛⲏⲓ ϫⲉⲡⲉⲥⲗⲁⲟⲥ ⲁϥⲉⲣⲡⲱⲃϣ ⲙ̀ⲙⲟⲥ ⲛ̀ⲥⲉⲕⲁϯ ⲉⲣⲟⲥ ⲁⲛ ϯⲛⲟⲩ ⲁⲓϣⲉⲛⲏⲓ ⲉⲛⲓⲙⲟⲛⲁⲥⲧⲏⲣⲓⲟⲛ ⲟⲩⲟϩ ⲡⲉϫⲱⲟⲩ ⲛⲏⲓ ϫⲉⲁⲛϯ ⲛⲉⲛϫⲱⲙ ⲛ̀ⲁⲡⲁⲥ ⲉⲃⲟⲗ ϫⲉⲁⲛⲟⲛⲅⲁⲣ ⲁⲛⲟⲛ ϩⲁⲛⲓⲇⲓⲱⲧⲏⲥ ⲛ̀ⲣⲱⲙⲓ ⲙ̀ⲡⲉⲛϭⲓⲥⲃⲱ ⲛ̀ⲧⲉⲡⲁⲓⲕⲟⲥⲙⲟⲥ ⲟⲩⲇⲉ ⲛ̀ⲛⲉⲥϣⲱⲡⲓ ⲙ̀ⲙⲟⲛ ⲁⲓϩⲱⲗ ⲉⲛⲓⲣⲉⲙⲛ̀ⲭⲏⲙⲓ ⲙ̀ⲫⲁⲣⲁⲱ ⲙ̀ⲃⲉⲣⲓ ⲡⲉϫⲱⲟⲩ ⲛⲏⲓ ϫⲉⲧⲉⲕⲁⲥⲡⲓ ⲥⲟⲛⲓ ⲛ̀ϯⲙⲉⲧⲟⲩⲉⲓⲛⲓⲛ ⲁⲛⲟⲛⲇⲉ ⲧⲉⲛⲧⲟⲩⲃⲟⲥ ⲉⲃⲟⲗϩⲁ ⲡⲑⲱⲗⲉⲃ ⲛ̀ⲧⲉ ⲛⲓⲕⲉⲁⲥⲡⲓ ⲛ̀ⲗⲁⲥ ⲙⲏⲡⲱⲥ ⲛ̀ⲧⲟⲩⲙⲟⲩϯ ⲉⲣⲟⲛ ϫⲉϩⲁⲛϣⲉⲙⲙⲱⲟⲩ ⲧⲉⲛⲛⲁⲧⲁⲕⲟⲅⲁⲣ ⲙ̀ⲙⲟⲥ ϩⲓⲛⲁ ⲛ̀ⲧⲉⲛⲧⲟⲩⲃⲟⲥ ⲁⲩϫⲕⲥ ϫⲉϯⲕⲉⲁⲥⲡⲓ ⲙ̀ⲃⲉⲣⲓⲧⲉ ϯⲁⲥⲡⲓ ⲛ̀ⲗⲁⲥ ⲛ̀ⲁⲡⲁⲥ ⲙ̀ⲙⲓⲛⲙ̀ⲙⲟⲥ ⲁⲩⲥⲱⲃⲓ ⲙ̀ⲙⲟⲓ ⲁⲩϫⲟⲥ ϫⲉⲕⲕⲁϯ ⲁⲛ ϫⲉⲕⲥⲱⲟⲩⲛ ⲁⲛ ⲛ̀ⲧⲉⲕⲁⲥⲡⲓ ⲙ̀ⲃⲉⲣⲓ ⲛ̀ⲑⲟⲕ ⲟⲩⲣⲉⲙⲛ̀ⲭⲏⲙⲓ ⲙ̀ⲙⲏⲓ ⲁⲛ ⲁⲓϣⲉⲡϣⲉⲙⲙⲟ ⲉⲓⲕⲱϯ ⲛ̀ⲥⲱⲥ ⲛⲓⲥⲟⲫⲟⲥⲇⲉ ⲁⲩϫⲟⲥ ⲛⲏⲓ ϫⲉⲧⲉⲛⲕⲁϯ ⲉⲣⲟⲥ ⲕⲁⲗⲱⲥ ⲧⲉⲛⲥⲁϫⲓⲙⲉⲛ ⲙ̀ⲙⲟⲥ ⲁⲛ ⲁⲓⲧⲁⲥⲑⲟ ⲉⲛⲁϣⲫⲏⲣ ⲁⲩϫⲟⲥ ⲛⲏⲓ ⲛ̀ⲑⲟⲕ ⲟⲩϩⲟⲡⲗⲟⲥ ⲙⲁϯϩⲓⲱⲧⲕ ⲛ̀ϯϧⲉⲗⲗⲓⲃϣ ⲟⲩⲟϩ ⲁⲙⲟⲛⲓ ⲛ̀ⲧⲉⲕⲥⲏϥⲓ ⲉⲧⲁⲓϫⲟⲥ ϫⲉϯⲉⲣⲉⲧⲓⲛ ⲛ̀ϯϩⲓⲣⲏⲛⲏ ⲁⲩⲱϣ ⲉⲃⲟⲗ ⲉⲩϫⲱⲙ̀ⲙⲟⲥ ϫⲉⲉⲓⲥ ⲡⲓⲡⲣⲟⲇⲟⲧⲏⲥ ϯϫⲱⲙⲙⲟⲥ ⲛⲱⲧⲉⲛ ϫⲉϯⲛⲁⲥϧⲁⲓ ⲛ̀ⲧⲁⲁⲥⲡⲓ ϩⲓ ⲡϣⲱ ⲛ̀ⲧⲉ ⲫⲓⲟⲙ ⲟⲩⲟϩ ⲁⲣⲉϣⲁⲛ ⲛⲓϩⲱⲙⲓ ⲱⲙⲥ ⲙ̀ⲙⲟⲥ ϯⲛⲁⲥϧⲏⲧⲥ ⲛ̀ⲕⲉⲥⲟⲡ

[bashandy]

ϯⲥⲁϩⲟⲩⲓ ⲁⲛ ⲙ‌ⲡⲭⲁⲕⲓ ⲁⲗⲗⲁ ⲡⲓⲭⲁⲕⲓⲙⲉⲛ ϥⲥⲁϩⲟⲩⲓ ⲙ‌ⲙⲟⲓ ϣⲁϯⲛⲟⲩ ϥϭⲟϫⲓ ⲛ‌ⲥⲱⲓ ⲛ‌ϫⲉⲡⲧⲁⲕⲟ ⲁⲗⲗⲁ ⲙ‌ⲡⲉϥϣⲧⲁϩⲟⲓ

ⲁⲛⲟⲕⲅⲁⲣⲡⲉ ⲫⲟⲩⲱⲓⲛⲓ ⲛⲉⲙⲧϧⲏⲓⲃⲓ
ⲁⲛⲟⲕⲡⲉ ϯⲁⲗⲏⲑⲓⲁ ⲛⲉⲙϯⲁⲡⲁⲧⲏ
ⲁⲛⲟⲕⲡⲉ ⲡⲓⲑⲉⲃⲓⲏⲟⲩⲧ ⲛⲉⲙⲡⲓϭⲁⲥⲓϩⲏⲧ
ⲁⲛⲟⲕⲡⲉ ⲡⲓⲙⲱⲓⲧ ⲛⲉⲙⲡⲓⲟⲥⲓ
ⲁⲛⲟⲕⲡⲉ ⲡⲓⲁϩⲟ ⲛⲉⲙⲡⲧⲁⲕⲟ
ⲁⲛⲟⲕⲡⲉ ⲡⲓϧⲣⲱⲟⲩ ⲉⲧⲱϣ ϧⲉⲛⲡϣⲁϥⲉ ⲁⲗⲗⲁ ⲙ‌ⲙⲟⲛⲡⲉⲧⲁϥⲥⲟⲑⲙⲉⲧ ϫⲉⲁⲓⲫⲱⲧ ⲉⲃⲟⲗϩⲁ ⲡⲓⲕⲟⲥⲙⲟⲥ

ⲛⲁⲣⲉ ⲡⲓⲕⲟⲥⲙⲟⲥ ⲙⲡϣⲁ ⲙ‌ⲙⲟⲓ ⲁⲛ ⲡⲉ ⲉⲓⲥⲱⲣⲉⲙ ϩⲓⲛⲓϣⲁϥⲉⲩ ⲛⲉⲙⲛⲓⲧⲱⲟⲩ ⲛⲉⲙⲛⲓⲃⲏⲃ ⲛⲉⲙⲛⲓⲭⲟⲗ ⲛ‌ⲧⲉⲡⲕⲁϩⲓ ⲁⲛⲟⲕⲇⲉ ϩⲱ ϯⲙⲡϣⲁ ⲙ‌ⲡⲓⲕⲟⲥⲙⲟⲥ ⲁⲛ ϫⲉⲁⲛⲟⲕ ⲛⲉ ⲡⲉ ⲡⲉϥⲟⲩⲱⲓⲛⲓ

ⲁⲛⲟⲕⲡⲉ ⲧϣⲱϯ ⲙ‌ⲙⲱⲟⲩ ⲛ‌ⲱⲛϧ ⲉⲑⲙⲉϩ ⲙ‌ⲫⲁⲣⲙⲁⲅⲓⲁ

ⲁⲕϣⲁⲛⲕⲁϯ ⲉⲣⲟⲓ ⲭⲛⲁⲕⲁⲧ ⲛ‌ⲥⲱⲕ ⲇⲉⲟⲥ ⲭⲛⲁⲙⲟϣⲓ ⲛ‌ⲥⲱⲓ
ⲁⲕϣⲧⲉⲙⲕⲁϯ ⲉⲣⲟⲕ ⲭⲛⲁϩⲓⲱⲛⲓ /ⲙ‌ⲙⲟⲓ ϩⲱⲥ ϩⲉⲣⲉⲧⲓⲕⲟⲥ ⲛⲉⲕⲱⲛⲓ ⲥⲉⲛⲁⲑⲱⲙ ⲛ‌ⲣⲱⲓ ⲁⲗⲗⲁ ⲧⲁⲥⲟⲫⲓⲁ ⲥⲛⲁⲭⲁⲣⲱⲥ ⲁⲛ

[bashandy]

ⲁϥⲉ̀ⲣⲟⲩⲱ̀ ⲛ̀ϫⲉⲁⲃⲃⲁ ⲡⲓⲥⲟⲩⲣⲁ. ϫⲉⲛⲓⲙ ⲉⲑⲛⲁⲟⲩⲱϣⲧ ⲙ̀ⲫⲣⲏ ⲫⲁⲓ ⲉⲧϣⲟⲡ ϧⲉⲛⲟⲩⲥⲭⲏⲙⲁ ⲉⲧϩⲩⲡⲟⲅⲓⲥⲑⲉ ⲛ̀ⲧⲉⲛⲉⲥⲑⲉⲥⲓⲥ.ⲫⲏⲉⲧϩⲓⲟⲩⲓ̀ ⲉ̀ⲃⲟⲗ ⲛ̀ⲟⲩϧⲙⲟⲙ ϧⲉⲛⲟⲩⲉⲥⲑⲉⲥⲓⲥ ⲛ̀ⲧⲉⲟⲩⲕⲉⲣⲟⲥ ⲉϥϭⲓⲙⲟⲣⲫⲏ ϧⲉⲛϩⲁⲛⲕⲉⲣⲟⲥ ⲫⲏⲉ̀ϣⲁⲣⲉ ⲡⲉϥⲟⲩⲱⲓⲛⲓ ϫⲱϫⲉⲃ ⲫⲏⲉ̀ⲧⲉ ⲙ̀ⲙⲟⲛϣϫⲟⲙⲙ̀ⲙⲟϥ ⲉ̀ⲛⲉϩ ⲉ̀ϣⲓⲃϯ ⲛ̀ⲧⲉϥⲧⲁⲝⲓⲥ ⲛⲉⲙⲧⲉϥⲉ̀ⲛⲉⲣⲅⲓⲁ̀ ⲡⲁⲣⲁⲛⲓⲑⲱϣ ⲛ̀ⲧⲉⲫⲏⲉ̀ⲧⲁϥⲑⲁⲙⲓⲟϥ ⲉϥⲟⲩⲁϩⲥⲁϩⲛⲓ ⲛⲁϥ ⲉ̀ϭⲟϫⲓ ⲉ̀ⲡⲉϥⲙⲱⲓⲧ ⲛⲁⲓⲇⲉ ⲧⲏⲣⲟⲩ ϩⲁⲛϣⲉⲙⲙⲟ ⲛⲉ ⲉ̀ϯⲫⲩⲥⲓⲥ ⲛ̀ϣⲟⲩⲟⲩⲱϣⲧ ⲛⲁⲥ ⲙ̀ⲙⲁⲩⲁⲧⲥ.
ⲧⲫⲉⲇⲉ ⲟⲛ ⲉⲛⲟⲩⲱϣⲧ ⲛⲁⲥ ⲛ̀ⲁϣⲛ̀ⲣⲏϯ ϩⲱⲥ ⲛⲟⲩϯ ⲉⲩϩⲱⲃⲥ ⲙ̀ⲙⲟⲥ ⲛ̀ⲟⲩⲙⲏϣ ⲛ̀ⲥⲟⲡ ϩⲓⲧⲉⲛ ϩⲁⲛϭⲏⲡⲓ.
ⲑⲁⲓ  ⲉ̀ⲧⲁ ⲡⲉⲥⲣⲉϥⲥⲱⲛⲧ ⲫⲟⲣϣⲥ ⲉ̀ⲃⲟⲗ ⲙ̀ⲫⲣⲏϯ ⲛ̀ⲟⲩⲕⲁⲙⲁⲣⲁ ⲁϥⲧⲁϫⲣⲟⲥ ⲙ̀ⲫⲣⲏϯ ⲛ̀ⲟⲩⲭⲏⲡⲓ.
ⲉⲛⲛⲁⲟⲩⲱϣⲧⲇⲉ ⲙ̀ⲡⲓⲟϩ ⲛ̀ⲁϣ ⲛ̀ⲣⲏϯ ⲫⲁⲓ ⲉⲧϫⲟϫⲉⲃ ⲟⲩⲟϩ ⲉⲑⲙⲉϩ ⲉϥϭⲛⲟⲛ ⲛ̀ϫⲱϥ ⲛ̀ⲛⲓⲡⲁⲑⲟⲥ ϣⲁϥⲉⲣⲉⲃⲓⲏⲛ ⲛ̀ⲟⲩⲙⲏϣ ⲛ̀ⲥⲟⲡ. ⲁⲗⲗⲁ ⲕϫⲱⲙ̀ⲙⲟⲥ ϫⲉⲥϣⲉ ⲉ̀ⲟⲩⲱϣⲧ ⲙ̀ⲙⲱⲟⲩ ⲉⲑⲃⲉ ⲡⲟⲩⲟⲩⲱⲓⲛⲓ ⲉⲧⲫⲉⲣⲓⲱⲟⲩ. ⲡⲁⲓⲥⲁϫⲓ ⲟⲩⲙⲏⲓ ⲁⲛ ⲡⲉ.
ⲉ̀ⲧⲁ ⲡⲓⲇⲏⲙⲓⲟⲩⲣⲅⲟⲥ ϯⲙ̀ⲡⲉϥⲟⲩⲱⲓⲛⲓ ⲉ̀ⲣⲱⲟⲩ ⲁⲛ ⲉ̀ⲑⲣⲟⲩⲟⲩⲱϣⲧ ⲙ̀ⲙⲱⲟⲩ ϩⲱⲥ ⲛⲟⲩϯ ⲁⲗⲗⲁ ⲉ̀ⲑⲣⲟⲩⲉⲣⲟⲩⲱⲓⲛⲓ ⲉ̀ⲛⲓⲣⲱⲙⲓ ⲟⲩⲟϩ ⲛ̀ⲧⲟⲩϯⲁⲓⲁⲓ ⲛ̀ⲛⲓⲕⲁⲣⲡⲟⲥ ⲉ̀ⲑⲣⲟⲩⲫⲟϩ ⲉ̀ⲡⲓⲕⲉⲣⲟⲥ ⲛ̀ⲥⲉⲙⲁϩ ⲡⲓⲉ̀ϩⲟⲟⲩ ⲛ̀ⲟⲩⲉ̀ϩⲟⲟⲩ ⲛⲉⲙⲡⲓⲉ̀ϫⲱⲣϩ ⲛ̀ⲟⲩⲉ̀ϫⲱⲣϩ. ⲛⲓⲥⲓⲟⲩⲇⲉ ⲟⲛ ⲉ̀ⲧⲁϥⲑⲁϣⲟⲩ ⲛ̀ϩⲁⲛⲙⲏⲓⲛⲓ ⲉ̀ⲑⲣⲟⲩⲉⲣⲥⲩⲙⲉⲛⲓⲛ ⲛ̀ⲛⲓⲕⲁⲣⲡⲟⲥ ⲛⲉⲙ ⲛⲓⲕⲉⲣⲟⲥ ⲛⲉⲙⲡϣⲓⲃϯ ⲛ̀ⲛⲓⲥⲏⲟⲩ ⲉ̀ⲑⲣⲟⲩϣⲱⲡⲓ ⲛ̀ϭⲁⲩⲙⲱⲓⲧ ⲛ̀ⲛⲏⲉⲧϣϭⲏⲣ ϧⲉⲛⲫⲓⲟⲙ.
ⲙ̀ⲙⲟⲛϩⲗⲓ ϣⲟⲡ ⲉ̀ⲑⲣⲟⲩⲟⲩⲱϣⲧ ⲙ̀ⲙⲟϥ ϩⲱⲥ ⲛⲟⲩϯ ϧⲉⲛⲛⲁⲓ ⲙ̀ⲡⲁⲓⲣⲏϯ ⲟⲩⲇⲉ ⲡⲓⲙⲱⲟⲩ ⲫⲏⲉ̀ⲧⲟⲩⲙⲟⲩϯ ⲉ̀ⲣⲟϥ ϫⲉⲡⲟⲥⲓⲇⲱⲛ. ⲟⲩⲇⲉ ⲡⲓⲭⲣⲱⲙ ⲫⲏⲉ̀ⲧⲟⲩⲙⲟⲩϯ ⲉ̀ⲣⲟϥ ϫⲉⲏ̀ⲣⲁ ⲟⲩⲇⲉ ⲡⲓⲕⲁϩⲓ ⲫⲏⲉⲧⲙⲟⲩϯ ⲉ̀ⲣⲟϥ ϫⲉⲇⲏⲙⲏⲧⲏⲣ.ⲟⲩⲇⲉ ⲛⲓⲕⲁⲣⲡⲟⲥ ⲛⲁⲓⲇⲉ ⲧⲏⲣⲟⲩ ⲕⲁⲛ ⲓⲥϫⲉ ⲁϥⲑⲁⲙⲓⲱⲟⲩ ⲉ̀ⲡⲧⲁϩⲟ ⲉ̀ⲣⲁⲧϥ ⲙ̀ⲡⲉⲛⲱⲛϧ ϩⲁⲛⲣⲉϥϣⲓⲃϯ ⲛⲉ ⲟⲩⲟϩ ϩⲁⲛⲁⲛⲁⲯⲩⲭⲟⲛ ⲛⲉ.

[bashandy]

ⲛⲁⲓ ⲛⲉ ⲛⲓⲥⲁϫⲓ ⲉⲧϩⲏⲡ ⲉⲧⲁⲓⲏ‌ⲥ‌ⲟⲩⲥ ⲉⲧⲟⲛϧ ϫⲱⲟⲩ ⲟⲩⲟϩ ⲁϥⲥϧⲏⲧⲟⲩ ⲛ‌ϫⲉ ⲇⲓⲇⲩⲙⲟⲥ ⲓⲟⲩⲇⲁⲥ ⲑⲱⲙⲁⲥ ⲟⲩⲟϩ ⲡⲉϫⲁϥ ϫⲉ ⲫⲏⲉⲧⲧⲁϩⲟ ϯⲉⲣⲙⲏⲛⲉⲓⲁ ⲛ‌ⲛⲁⲓⲥⲁϫⲓ ϥⲛⲁϫⲉⲙϯⲡⲓ ⲁⲛ ⲙ‌ⲫⲙⲟⲩ ⲡⲉϫⲉ ⲓⲏ‌ⲥ‌ⲟⲩⲥ ϫⲉ ⲙ‌ⲡⲉⲛⲑⲣⲉϥϩⲱ ⲛ‌ϫⲉ ⲫⲏⲉⲧϣⲓⲛⲓ ⲉϥϣⲓⲛⲓ ϣⲁⲛⲧⲉϥϫⲓⲙⲓ ⲟⲩⲟϩ ϩⲟⲧⲁⲛ ⲁϥϣⲁⲛϫⲓⲙⲓ ϥⲛⲁϣⲑⲟⲣⲧⲉⲣ ⲟⲩⲟϩ ⲁϥϣⲁⲛϣⲑⲟⲣⲧⲉⲣ ϥⲛⲁⲉⲣϣⲫⲏⲣⲓ ⲟⲩⲟϩ ϥⲛⲁⲉⲣⲟⲩⲣⲟ ⲉϫⲉⲛ ⲡⲧⲏⲣϥ

ⲉⲃⲟⲗϧⲉⲛ ⲡⲓⲉⲩⲁⲅⲅⲉⲗⲓⲟⲛ ⲕⲁⲧⲁ ⲑⲱⲙⲁⲥ

ⲁⲡⲟⲥⲧⲁⲥⲥⲉ ⲙⲡⲓⲭⲣⲉⲙⲣⲉⲙ
ⲁⲡⲟⲥⲧⲁⲥⲥⲉ ⲛ‌ϯⲙⲉⲧⲣⲉϥϭⲓⲥⲙⲏ
ⲁⲡⲟⲥⲧⲁⲥⲥⲉ ⲛ‌ϯⲙⲉⲧⲣⲉϥⲧⲁϩⲙⲉ
ⲁⲡⲟⲥⲧⲁⲥⲥⲉ ⲙ‌ⲫⲗⲁⲥ ⲛ‌ⲛⲟⲩϫ
ⲁⲡⲟⲥⲧⲁⲥⲥⲉ ⲛ‌ⲛⲓⲙⲉⲧⲣⲉϥⲛⲟⲩϫ
ⲁⲡⲟⲥⲧⲁⲥⲥⲉ ⲛ‌ⲛⲓⲙⲉⲧϣⲟⲩϣⲟⲩ ⲛⲉⲙ ⲛⲓⲙⲉⲧϭⲁⲥⲓϩⲏⲧ
ⲁⲡⲟⲥⲧⲁⲥⲥⲉ ⲛ‌ⲛⲓⲙⲉⲑⲙⲁⲓϧⲏⲧϥ
ⲁⲡⲟⲥⲧⲁⲥⲥⲉ ⲛ‌ⲛⲓⲙⲉⲧϩⲁϩ ⲛ‌ⲥⲁϫⲓ
ⲁⲡⲟⲧⲁⲥⲥⲉ ⲛ‌ⲛⲓϯϭⲉ ⲉⲧϩⲱⲟⲩ

[bashandy]

ⲁϥϫⲟⲥ ⲟⲛ ⲛ̀ϫⲉⲁⲡⲁ ⲁⲛⲧⲱⲛⲓⲟⲥ ϫⲉϧⲓⲥⲓⲛⲓⲃⲉⲛ ⲉⲣⲉⲡⲓⲣⲉϥϫⲱⲛⲧ ⲛⲁⲁⲓⲟⲩⲧⲟⲩ ⲥⲉⲧⲁⲕⲏⲟⲩⲧ ⲛ̀ⲧⲟⲧϥ ⲙ̀ⲙⲏⲛⲓ

[bashandy]

ⲡⲉϫⲱⲟⲩ ⲛ̀ϫⲉⲛⲉⲛⲓⲟϯ ϫⲉⲟⲩ ⲧⲉ ϯⲙⲉⲧⲣⲉⲙϩⲉ ⲛ̀ⲧⲉⲡⲓⲃⲟⲥⲉⲣ ⲥⲁⲃⲟⲗ ⲙ̀ⲡⲓϫⲟⲓ

[bashandy]

ⲧⲉⲣⲃⲟⲛⲏ ⲛⲟⲩⲥ ⲛ̀ⲧⲉⲗⲉⲟⲥ

ⲛ̀ⲧⲁⲧⲁⲧⲟⲩⲓ ⲁⲛⲟⲕ ⲉⲃⲟⲗϧⲉⲛϫⲟⲙ
ⲟⲩⲟϩ ⲛ̀ⲧⲁⲓ̀ ϣⲁⲛⲏⲉⲧⲙⲉⲩⲓ ⲉⲣⲟⲓ
ⲟⲩⲟϩ ⲁⲓϫⲓⲙⲓ ⲙ̀ⲙⲟⲓ ϧⲉⲛⲛⲏⲉⲧϣⲓⲛⲓ ⲛ̀ⲥⲱⲓ
ⲉⲛⲁⲩⲉⲣⲟⲓ ⲛⲏⲉⲧⲙⲉⲩⲓ ⲉⲣⲟⲓ
ⲟⲩⲟϩ ⲛ̀ⲣⲉϥⲥⲱⲧⲉⲙ ⲥⲱⲧⲉⲙ ⲉⲣⲟⲓ
ⲛⲏⲉⲧϫⲟⲩϣⲧ ⲉⲃⲟⲗϧⲁⲧϩⲏⲓ ϣⲟⲡⲧ ⲉⲣⲱⲧⲉⲛ

ⲟⲩⲟϩ ⲙ̀ⲡⲉⲣⲫⲱⲧ ⲛ̀ⲥⲱⲓ ⲙ̀ⲡⲉⲙⲑⲟ ⲛ̀ⲛⲉⲧⲉⲛⲃⲁⲗ ⲉⲃⲟⲗ
ⲟⲩⲟϩ ⲙ̀ⲡⲉⲣⲑⲣⲉ ⲡⲉⲧⲉⲛϧⲣⲱⲟⲩ ⲙⲉⲥⲧⲱⲓ
ⲙ̀ⲡⲉⲣⲉⲣⲁⲧⲥⲱⲟⲩⲛ ⲙ̀ⲙⲟⲓ ⲕⲁⲧⲁ ⲙⲁ ⲓⲉ ⲕⲁⲧⲁ ⲕⲉⲥⲏⲟⲩ
ⲁⲣⲉϩ ⲙ̀ⲡⲉⲣⲉⲣⲁⲧⲥⲱⲟⲩⲛ ⲙ̀ⲙⲟⲓ
ⲁⲛⲟⲕⲅⲁⲣ ⲧⲉ ⲧϣⲟⲣⲡ ⲟⲩⲟϩ ⲧϧⲁⲉ
ⲁⲛⲟⲕⲧⲉ ⲑⲏⲉⲧⲧⲁⲓⲏⲟⲩⲧ ⲟⲩⲟϩ ⲑⲏⲉⲧϣⲏⲥ
ⲁⲛⲟⲕⲧⲉ ⲧⲡⲟⲣⲛⲏ ⲟⲩⲟϩ ⲧⲥⲉⲙⲛⲏ
ⲁⲛⲟⲕⲧⲉ ϯⲥϩⲓⲙⲓ ⲟⲩⲟϩ ϯⲡⲁⲣⲑⲉⲛⲟⲥ
ⲁⲛⲟⲕⲡⲉ ϯⲙⲁⲩ ⲟⲩⲟϩ ϯϣⲉⲣⲓ
ⲁⲛⲟⲕ ⲟⲩⲙⲉⲗⲟⲥ ⲛ̀ⲧⲉ ⲧⲁⲙⲁⲩ
ⲁⲛⲟⲕⲧⲉ ϯⲁϭⲣⲏⲛ ⲟⲩⲟϩ ⲛⲁϣⲉ ⲛⲉⲥϣⲏⲣⲓ
ⲁⲛⲟⲕⲧⲉ ⲑⲏⲉⲧϣⲉ ⲡⲉⲥⲅⲁⲙⲟⲥ ⲟⲩⲟϩ ⲙ̀ⲡⲓϭⲓϩⲁⲓ
ⲁⲛⲟⲕⲧⲉ ⲑⲙⲉⲥⲓⲱ ⲟⲩⲟϩ ⲑⲏⲉⲧⲉ ⲙ̀ⲡⲉⲥⲙⲓⲥⲓ
ⲁⲛⲟⲕⲡⲉ ⲡⲥⲟⲗⲥⲉⲗ ⲛ̀ⲛⲁⲁⲛⲁⲁⲕⲉ
ⲁⲛⲟⲕⲧⲉ ⲧϣⲉⲗⲉⲧ ⲟⲩⲟϩ ⲡⲓⲡⲁⲧϣⲉⲗⲉⲧ ⲟⲩⲟϩ ⲡⲁϩⲱⲟⲩⲧ ⲡⲉⲛⲧⲁϥϫⲫⲟⲓ

ⲁⲛⲟⲕⲧⲉ ⲑⲙⲁⲩ ⲛ̀ⲧⲉ ⲡⲁⲓⲱⲧ ⲟⲩⲟϩ ⲧⲥⲱⲛⲓ ⲙ̀ⲡⲁϩⲱⲟⲩⲧ
ⲟⲩⲟϩ ⲛ̀ⲑⲟϥ ⲡⲉ ⲡⲁϣⲏⲣⲓ
ⲁⲛⲟⲕⲧⲉ ϯⲃⲱⲕⲓ ⲙ̀ⲡⲉⲛⲧⲁϥⲥⲉⲃⲧⲱⲧ
ⲁⲛⲟⲕⲧⲉ ⲧϭⲟⲓⲥ ⲙ̀ⲡⲁϫⲫⲟ
ⲛ̀ⲑⲟϥⲇⲉ ⲡⲉⲛⲧⲁϥϫⲫⲟⲓ ϧⲁⲧϩⲏ ⲙ̀ⲡⲁⲥⲏⲟⲩ ϧⲉⲛ ⲟⲩϩⲟⲩⲙⲓⲥⲓ
ⲟⲩⲟϩ ⲧⲁⲇⲩⲛⲁⲙⲓⲥ ⲟⲩⲉⲃⲟⲗⲛ̀ϧⲏⲧϥⲧⲉ
ⲁⲛⲟⲕ ⲡϭⲁⲣⲱⲃ ⲛ̀ⲧⲉϥϫⲟⲙ ϧⲉⲛⲧⲉϥⲙⲉⲧϣⲏⲙ
ⲟⲩⲟϩ ⲛ̀ⲑⲟϥⲡⲉ ⲧⲕⲉⲗⲉⲗⲓ ⲛ̀ⲧⲁⲙⲉⲧϧⲉⲗⲗⲱ
ⲟⲩⲟϩ ⲡⲉⲧⲁϥⲟⲩⲟϣϥ ϣⲁϥϣⲱⲡⲓ ⲙ̀ⲙⲟⲓ
ⲁⲛⲟⲕⲡⲉ ⲡⲭⲁⲣⲱϥ ⲉⲧⲉ ⲙ̀ⲡⲁⲩϣⲧⲁϩⲟϥ
ⲟⲩⲟϩ ⲧⲉⲡⲓⲛⲟⲓⲁ ⲉⲧⲉ ⲛⲁϣⲉ ⲡⲉⲥⲉⲣⲫⲙⲉⲩⲓ
ⲁⲛⲟⲕⲧⲉ ϯⲥⲙⲏ ⲉⲧⲉ ⲛⲁϣⲉ ⲡⲉⲥϧⲣⲱⲟⲩ
ⲟⲩⲟϩ ⲡⲓⲗⲟⲅⲟⲥ ⲉⲧⲉ ⲛⲁϣⲉ ⲡⲉϥⲓ̀ⲛⲓ
ⲁⲛⲟⲕⲡⲉ ⲡⲥⲁϫⲓ ⲙ̀ⲡⲁⲣⲁⲛ
ⲉⲑⲃⲉⲟⲩ ⲛⲏⲉⲑⲙⲟⲥϯ ⲙ̀ⲙⲟⲓ ⲧⲉⲧⲉⲛⲙⲉⲓ ⲙ̀ⲙⲟⲓ ⲟⲩⲟϩ ⲧⲉⲧⲉⲛⲙⲟⲥϯ ⲛ̀ⲛⲏⲉⲑⲙⲉⲓ ⲙ̀ⲙⲟⲓ
ⲛⲏⲉⲧⲉⲣⲁⲣⲛⲓ ⲙ̀ⲙⲟⲓ ⲉⲣϩⲓⲙⲟⲗⲟⲅⲓⲛ ⲙ̀ⲙⲟⲓ ⲟⲩⲟϩ ⲛⲏⲉⲧⲉⲣϩⲓⲙⲟⲗⲟⲅⲓⲛ ⲙ̀ⲙⲟⲓ ⲉⲣⲁⲣⲛⲓ ⲙ̀ⲙⲟⲓ
ⲛⲏⲉⲧϫⲉⲙⲉⲑⲛⲟⲩϫ ⲉⲣⲟⲓ ϫⲉ ϯⲙⲉⲑⲙⲏⲓ ⲉⲣⲟⲓ
ⲛⲏⲉⲧϫⲉϯⲙⲉⲑⲙⲏⲓ ⲉⲣⲟⲓ ϫⲉⲙⲉⲑⲛⲟⲩϫ ⲉⲣⲟⲓ
ⲛⲏⲉⲧⲥⲱⲟⲩⲛ ⲙ̀ⲙⲟⲓ ⲉⲣⲁⲧⲥⲱⲟⲩⲛ ⲙ̀ⲙⲟⲓ
ⲟⲩⲟϩ ⲛⲏⲉⲧⲉ ⲙ̀ⲡⲟⲩⲥⲟⲩⲟⲛⲧ ⲙⲁⲣⲟⲩⲥⲟⲩⲟⲛⲧ
ⲁⲛⲟⲕⲅⲁⲣⲡⲉ ⲡⲥⲱⲟⲩⲛ ⲟⲩⲟϩ ϯⲙⲉⲧⲁⲧⲥⲱⲟⲩⲛ
ⲁⲛⲟⲕⲡⲉ ⲡϣⲓⲡⲓ ⲟⲩⲟϩ ⲧⲡⲁⲣϩⲓⲥⲓⲁ
ⲁⲛⲟⲕ ⲟⲩⲁⲧϣⲓⲡⲓⲁⲛⲟⲕ ⲟⲩϫⲫⲓⲟⲁⲛⲟⲕ ⲟⲩⲛⲁϣϯⲁⲛⲟⲕⲡⲉ ⲡⲓⲗⲟⲙⲉⲥ ⲛⲉⲙϯϩⲓⲣⲏⲛⲏⲙⲁϩⲑⲏⲧⲉⲛ ⲉⲣⲟⲓ ⲁⲛⲟⲕ ⲑⲏⲉⲧϫⲁⲓⲱⲟⲩ ⲟⲩⲟϩ ϯⲛⲟϫⲙⲁϩⲑⲏⲧⲉⲛ ⲉⲣⲟⲓ ⲉⲧⲁⲙⲉⲧϩⲏⲕⲓ ⲟⲩⲟϩ ⲧⲁⲙⲉⲧⲣⲁⲙⲁⲟ ⲙ̀ⲡⲉⲣϭⲓⲥⲓ ⲛ̀ϩⲏⲧ ⲉⲣⲟⲓ ⲉⲓⲛⲏϫ ⲉⲃⲟⲗ ϩⲓϫⲉⲛ ⲡⲕⲁϩⲓⲟⲩⲟϩ ⲧⲉⲧⲉⲛⲛⲁϫⲓⲙⲓ ⲙ̀ⲙⲟⲓ ϧⲉⲛⲛⲏⲉⲧⲉⲛⲛⲏⲟⲩⲟⲩⲧⲉ ⲙ̀ⲡⲉⲣⲛⲁⲩ ⲉⲣⲟⲓ ϩⲓ ⲧⲕⲟⲡⲣⲓⲁ ⲛ̀ⲧⲉⲧⲉⲛⲙⲟϣⲓ ⲛ̀ⲧⲉⲧⲉⲛⲭⲁⲧ ⲉⲓⲛⲏϫ ⲉⲃⲟⲗⲟⲩⲟϩ ⲧⲉⲧⲉⲛⲛⲁϫⲓⲙⲓ ⲙ̀ⲙⲟⲓ ϧⲉⲛϯⲙⲉⲧⲟⲩⲣⲟⲟⲩⲇⲉ ⲙ̀ⲡⲉⲣⲛⲁⲩ ⲉⲣⲟⲓ ⲉⲓⲛⲏϫ ⲉⲃⲟⲗϧⲉⲛⲧϫⲁⲓⲱⲟⲩⲟⲩⲟϩ ϧⲉⲛⲛⲓⲉⲗⲁⲭⲓⲥⲧⲟⲥ ⲛ̀ⲧⲟⲡⲟⲥ ⲛ̀ⲧⲉⲧⲉⲛⲥⲱⲃⲓ ⲛ̀ⲥⲱⲓ ⲛ̀ⲥⲱⲓ

[bashandy]

ⲧⲥⲟⲫⲓⲁ ⲥϭⲓⲙⲱⲓⲧ ϧⲁϫⲱⲥ ⲛϯⲯⲩⲭⲏ ϣⲁ ⲉϩⲣⲏⲓ ⲉⲫⲙⲁ ⲛϯⲙⲉⲑⲙⲏⲓ
ⲙⲙⲟⲛ ⲟⲩⲣⲉⲙⲛⲏⲓ ϣⲟⲡ ⲛⲧⲁⲗⲏⲑⲓⲁ ϧⲉⲛ ⲑⲙⲏⲓϯ ⲛϯⲥⲟⲫⲓⲁ
ⲟⲩⲫⲩⲥⲓⲥ ⲙⲡⲓⲥⲧⲟⲥ ⲙⲙⲟⲛϣϫⲟⲙ ⲙⲙⲟⲥ ⲉⲑⲣⲉⲥϣⲱⲡⲓ ⲙⲙⲁⲓϭⲓϭⲟⲗ
ⲟⲩⲣⲱⲙⲓ ⲛⲥⲟⲫⲟⲥ ⲟⲩⲣⲉϥⲉⲣⲡⲉⲑⲛⲁⲛⲉϥ ⲡⲉ
ⲙⲁⲣⲉⲡⲉⲕⲃⲓⲟⲥ ⲧⲁϫⲣⲟ ⲛⲛⲉⲕⲥⲁϫⲓ ϧⲁⲧϩⲏ ⲛⲛⲏⲉⲧⲥⲱⲧⲉⲙ
ⲡⲉⲧⲥϣⲉ ⲁⲛ ⲉⲁⲓϥ ⲟⲩⲇⲉ ⲙⲡⲉⲣⲙⲉⲩⲓ ⲉⲁⲓϥ
ⲡⲉⲧⲉⲕⲟⲩⲱϣ ⲉⲑⲣⲉϥϣⲧⲉⲙϣⲱⲡⲓ ⲛⲁⲕ ⲟⲩⲇⲉ ⲛⲑⲟⲕ ϩⲱⲕ ⲕⲓⲣⲓ ⲙⲙⲟⲫ ⲁⲛ ⲡⲉⲧⲉ ⲟⲩⲁⲓⲥⲭⲣⲟⲛ ⲡⲉ ⲉⲁⲓϥ